Ñee ridúʼyanu Jiobá casi Bixhózenu la?

«SEÑOR, bisiidi laadu iní né du Dios.» Zacá gudxi tobi de ca discípulo stiʼ Jesús laa, óraque gúdxibe laa: «Ora iniʼ né tu Dios la? sicarí nga iníʼ tu: Bixhoze du ni nuu ibáʼ, rinaba du gusisaca irá binni [laluʼ, NM]» (Luc. 11:1, 2). Ñanda niquiiñeʼ Jesús xcaadxi título jma risaca ora guníʼ de Jiobá, casi «Ni Jma Nandxóʼ», «Ni jma nanna gusiidiʼ», Dios «ni bizáʼ guiráʼ xixé ni nuu», «Binnigola ni nabani dede maʼ xadxipeʼ» ne «ni qué huayuu dxi gusaana de gaca Rey» (Gén. 49:25; Isa. 30:20; 40:28; Dan. 7:9; 1 Tim. 1:17, NM). Peru Jesús gudxi laabe «Bixhoze». Xiñee yaʼ. Zándaca purtiʼ racaláʼdxibe guidxíñanu gaxha de binni ni jma risaca nuu guibáʼ ne lu guidubi naca Guidxilayú, cásica ridxiña ti baʼduhuiiniʼ bixhoze ni nadxii laa.

Peru nuu binni raca nagana para laa guʼyaʼ Dios casi Bixhoze. Casi bizaaca ti gunaa Testigu ni láʼ Atsuko a, laa guníʼ: «Neca maʼ guyuaanisaʼ, guca nagana para naa guidxiñaʼ ra nuu Jiobá ne guinieniáʼ laabe casi Bixhozeʼ ne stale iza guyuaaʼ zacá». Óraque guniʼbe xi pur qué ñanda ñuube gaxha de Dios: «Qué rietenalaʼdxeʼ pa guyuu biaje bisihuinni bixhózepiaʼ nadxii naa».

Lu ca últimu dxi nabáninu riʼ, stale binni qué rusihuínnicaʼ pa nadxiicaʼ ca xiiñicaʼ (2 Tim. 3:1, 3). Nga runi, qué zadxagayaanu gánnanu nuu stale binni runi sentir casi Atsuko. Peru galán gánnanu nápanu stale razón para guidúʼyanu Jiobá casi Bixhózenu ni nadxii laanu.

Jiobá rudii guiráʼ ni caquiiñenu

Para ganda guidúʼyanu Jiobá casi Bixhózenu la? primeru caquiiñeʼ gánnanu ximodo laabe. Peru ximodo zanda gánnanu nga yaʼ. Jesús guníʼ: «Naa nga Xiiñi be ne iruti runibiáʼ naa jma que laabe, ne zaqueca iruti runibiáʼ laabe jma que naa ne cani racaladxe gunibiáʼ laabe» (Mat. 11:27). Ya, para ganda gunibiáʼ chaahuinu Bixhózenu ni nuu guibáʼ la? caquiiñeʼ guiníʼ íquenu guiráʼ cani bisiidiʼ Cristu de laabe. Xi bisiidiʼ Jesús de laabe yaʼ.

Primé la? bisihuínnibe Dios nga bidii laabe guendanabani ora guniʼbe ca diidxaʼ riʼ: Naa «nabane pur [Bixhozeʼ]» (Juan 6:57). Laanu laaca nabáninu pur Dios (Sal. 36:9; Hech. 17:28). Xiñee bidii Jiobá laanu guendanabani yaʼ. Purtiʼ nadxiibe laanu. Nga runi laaca naquiiñeʼ gannaxhiinu laabe.

Ra jma bisihuínnibe nabé nadxiibe binni guidxilayú nga ra bidiibe Xiiñibe ni nadxiibe para gueeda gati ne gueeda gulá laanu. Nga runi, neca binni ruchee laanu zanda gaca xhamígunu laabe (Rom. 5:12; 1 Juan 4:9, 10). Ne cumu nánnanu runi Bixhózenu ni nuu guibáʼ guiráʼ ni riníʼ la? nga runi guiráʼ binni ni nadxii laabe ne ni ruzuubaʼ stiidxabe zareecaʼ de «lu ná enda nayuudxuʼ» (Rom. 8:21).

Sti cosa ni rusihuinni nadxii Jiobá binni nga guiráʼ dxi «rudii lugar guzaani gubidxa sti ra nuu [guiráʼ binni]» (Mat. 5:45). Zándaca qué huayuu dxi guinábanu lu oración stinu guiree Gubidxa. Peru ¡galán nga guzaaniʼ ni laanu! Bixhózenu ni nuu guibáʼ rudii laanu guiráʼ ni caquiiñenu ne guirútiruʼ zanda gúnini, ne nánnabe xi caquiiñenu ante gábinu ni laabe. Ñee cadi dxandíʼ naquiiñeʼ guuyaʼ chaahuinu cani bizaʼbe ne guiníʼ íquenu pabiáʼ sicarú modo rápabe cani la? (Mat. 6:8, 26.)

Rapa Bixhózenu laanu

Dios biquiiñeʼ Isaías ni riguixhená para  gabi xquidxi ni guyuu dxiqué ca diidxaʼ riʼ: «Neca guixeleʼ ca dani ca ne guiniibi dxacha ca dani huiiniʼ ca, qué zusaanaʼ de gannaxhieeʼ lii, ne gastiʼ zucueeza naa para cadi chuaaniáʼ lii tobi si, na Señor, ni nabé nadxii lii» (Isa. 54:10, Sagrada Biblia, Universidad de Navarra, nota). Últimu gueelaʼ bibani Jesús lu Guidxilayú riʼ bíʼnibe ti oración, ne luni bizeetebe pabiáʼ rapa Dios ca xpinni. Biʼniʼ orarbe pur ca discípulo stibe: «Naa ma chaa ra nuu luʼ, [...] peru laacabe ziaana cabe raríʼ. Bixhoze ni nachaʼhuiʼ, cani bidiiu naa ca rinaba lii gapa lu laacabe [ne bíʼnini pur laluʼ, NM]» (Juan 17:11, 14). Jiobá bicabi ni gunabaʼ Jesús laa ne yanna cayápabe ca xpinni.

Tobi de ca cosa ni riquiiñebe para cueebe laanu lu ca guendanagana ni rutiidiʼ Binidxabaʼ laanu nga cani rudii «mozo ni nuu xpiaaniʼ ne ni runi jneza» laanu órapeʼ caquiiñenu ni (Mat. 24:45). Pa qué gusaana de guidúʼndanu cani cudii mozo ca laanu la? qué zaca nagana para laanu iquiiñenu «irá ni ma bidii Dios laa[nu]». Tobi de ca cosa ni rudii Dios laanu nga escudu. Apóstol Pablu guníʼ: «Rinaaze cabe escudu para qué cui flecha laacabe. Zacaca lauzuhuaa dxiichi lu ni runi cre tu ti ganda usuíʼ tu ca flecha ni cá gui ni undaa binidxaba laatu» (Efe. 6:11, 16). Dxandíʼ, fe ni nápanu ca racaneni laanu para cadi guixélenu de Dios ne zacá ridúʼyanu pabiáʼ rapa Bixhózenu laanu.

Zanda guiene chaahuinu pabiáʼ nadxii Bixhózenu ni nuu guibáʼ laanu pa guiníʼ ique chaahuinu ximodo guca Cristu ne binni dxi guyuu lu Guidxilayú riʼ. Lu Marcos 10:13-16 ridúʼndanu ca diidxaʼ ni gudxi Jesús ca discípulo stiʼ: «Cadi ucueeza tu ca baʼdu ca. Zaa gueeda cabe ra nuaaʼ». Ne ora bidxiña ca baʼduhuiiniʼ que laabe bisihuínnibe nadxiibe laacaʼ ra guluu ndaayabe ne ra gudiidxibe laacaʼ. ¡Nanna pabiáʼ nayecheʼ guyuu ca baʼduhuiiniʼ que yaʼ! Cásica naca Jiobá zacaca nga Xiiñiʼ. Laaca zuxaleʼ ndaga nabe cabézabe binni. Ximodo nánnanu nga yaʼ. Purtiʼ Jesús guníʼ: «Ni ma biiya naa la? ma biiya Bixhozeʼ» (Juan 14:9).

Qué rusaana Jiobá de gannaxhii binni, cásica qué rusaana de guidá nisa xiixa lugar. Cudiibe laanu guiráʼ ni caquiiñenu, laasibe nga rulabe laanu ne racaláʼdxibe guidxíñanu laabe (Sant. 4:8). ¡Guirutiʼ zanda gaca casi laabe!

Ricaanu stale ndaayaʼ

Zacaanu stale ndaayaʼ pa guni crenu zanda gacané Jiobá, Bixhózenu ni nadxii laanu (Pro. 3:5, 6). Dede ne Jesús gucuaa stale ndaayaʼ purtiʼ biʼniʼ cré de guidubi ladxidóʼ zacané Dios laa. Ngue runi, gunda gúdxibe ca discípulo stibe: «Cadi naa siaʼ [nuaaʼ], sínuque naa ne Bixhoze ni biseenda naa» (Juan 8:16). Qué ñuu dxi ñaandaʼ laabe nuu Bixhózebe para gacané laabe. Casi dxi guyuunísabe, binadiágabe caadxi diidxaʼ ni guluu gana laabe: «Ndi nga Xiiñe ni nadxiee ne ni rusieche naa» (Mat. 3:15-17). Ne ante gátibe guniʼbe: «Bixhozeʼ ucuaa espíritu stinneʼ» (Luc. 23:46). Jesús qué nusaana de ñapa fe dede ora gudiʼdiʼ lu ca guendanagana jma naná.

Zacaca nga naquiiñeʼ gúninu. Pa nuunu gaxha de Dios la? gastiʼ qué zuchibi laanu (Sal. 118:6). Atsuko, ni maca bizéʼtenu que, maʼ biaabe guidxagalube ca guendanagana stibe stúbisibe. Peru biindabe xi guiráʼ biʼniʼ Jesús dxi bibani lu Guidxilayú riʼ, modo bicheeche diidxaʼ ne modo bidxaaga Jiobá. Xi guleendú Atsuko yaʼ. Laabe guniʼbe: «Gunnaʼ ximodo runi sentir binni ora napa Bixhoze ne bineʼ cré zanda gacanebe naa. Bineʼ sentir gutadxí ladxiduáʼ ne guyuaaʼ nayecheʼ. Dxandíʼ, qué gápanu razón para chuʼnu xizaa».

Xiruʼ zabeendunu pa guidúʼyanu Jiobá casi Bixhózenu yaʼ. Nánnanu xiiñiʼ binni nadxii bixhoze ne jñaa ne ruyúbicaʼ modo gusiéchecaʼ ladxidóʼcabe. Jesús nabé gunnaxhii Bixhoze ni nuu guibáʼ, ngue runi guniʼbe: «Qué riaana dxie de gune ni riulaʼdxi be» (Juan 8:29). Pa gannaxhiinu Dios casi biʼniʼ Jesús la? zusihuínninu nuu xpiaaninu lu cani  gúninu ne zusisácanu laabe (Mat. 11:25; Juan 5:19).

«Naazeʼ dxiicheʼ naluʼ ladu derechu»

Bixhózenu Jiobá maʼ bidii laanu tobi ni «acané» laanu, ne nga nga espíritu santu, ne casi guníʼ Jesús, zusiéneni laanu puru ni dxandíʼ (Juan 14:15-17; 16:12, 13). Ya, laani zanda gacaneni gunibiáʼ chaahuinu Bixhózenu. Laaca zacané espíritu ca laanu guchianu «intiica ni quixhe cabe para cadi chindá stiidxa Dios» ndaaniʼ ladxidoʼno, o intiica cosa ni cadi jneza guiníʼ íquenu ne gucueezanu «irá ni riníʼ ique binni guidxilayú, ti iníʼ ique ca ni na Cristu» (2 Cor. 10:4, 5). Nga runi cadi guidxíbinu guinábanu Dios gudii laanu espíritu santu stiʼ ne casi na Jesús: «Bixhoze tu ni nuu ibáʼ [zudii] Espíritu Santu ni inaba laa» (Luc. 11:13). Ne guinábanu laabe gacané espíritu stibe laanu ti chuʼnu jma gaxha de laabe.

Ca baʼduhuiiniʼ ca qué ridxíbicaʼ ora naaze bixhózecaʼ nacaʼ ne maʼ zizacaʼ purtiʼ nánnacaʼ zapa bixhózecaʼ laacaʼ. Pa guidúʼyanu Jiobá casi Bixhózenu la? zuni crenu ni na ca diidxaʼ riʼ: «Naa, Jiobá Dios stiluʼ, naazeʼ dxiicheʼ naluʼ ladu derechu, [ne naa nga cayabeʼ] lii: “Cadi guidxíbiluʼ. Naa dxandipeʼ zacaniáʼ lii”» (Isa. 41:13). Casi maʼ bidúʼyanu ca, guiranu zanda sánenu Dios biaʼ dxi guibáninu (Miq. 6:8). Pa qué gusaananu de gúninu ni na Jiobá la? qué zusaana de gannaxhii Bixhózenu laanu, guiechené ne gapa laanu.

[Cani cá ñee yaza]