Cadi gudiʼnu lugar quite Binidxabaʼ laanu ne cani riníʼ

«CADI gudiitu lugar chuʼ tu quite laatu. Dios stitu qué zulá diʼ laatu. Lachuuné naa tobi si pacaa naná zaguíxetu ni.» Nga nga gudxi Rabsaqué, hombre biseendaʼ rey Senaquerib de Asiria, chitidxi ca binni de Jerusalén. Ca soldadu stiʼ rey riʼ maʼ gucuaacaʼ guidxi stiʼ Judá ne ni gucalaʼdxiʼ Rabsaqué ora guníʼ ca diidxaʼ que nga guchibi ca binni de Jerusalén ne gucaabe laacaʼ chúʼnecaʼ laacabe tobi si (2 Rey. 18:28-35).

Nabé binibiáʼ binni ca asiriu purtiʼ nabé malu laacaʼ ne nabé bininacaʼ binni. Bichíbicabe ca xhenemígucabe ra bisihuínnicabe xi guiráʼ rúnicabe ca esclavu stícabe ne pabiáʼ feu modo runinácabe laacaʼ. Philip Taylor, ti hombre ni bicaa historia na «bíʼnicabe zaqué para cadi gusaana ca esclavu stícabe de guni ni nácabe ne guchíbicabe cani zándaca gueeda gaca xhenemígucabe, ngue runi biquiiñecabe caadxi dibuju ra bisihuínnicabe ximodo rúnicabe ca esclavu stícabe para guiníʼ íquecaʼ xi zazaacacaʼ pa gucaalucaʼ laacabe». Dxandíʼ, guiráʼ ni gucaadiáganu ne ni guidúʼyanu nabé nadipaʼ cani purtiʼ, casi na Taylor, «riaanacani ndaaniʼ ique binni».

Yanna riʼ, laanu ca xpinni Cristu «cadi binni guidxilayú cadinde né nu, sínuque [...] irá ca espíritu malu» o ca espíritu ni qué niná nuzuubaʼ stiidxaʼ Dios (Efe. 6:12). Binidxabaʼ nga xaíque stiʼ cani cucaalú laanu ne laaca racaláʼdxibe guchíbibe laanu ne guiráʼ ni riniʼbe ti gusaana de gúninu ni na Dios.

Binidxabaʼ na zanda gucaa guiranu guchéʼnenu Dios. Ca dxi bibani Job, gúdxibe Jiobá: «Guiráʼ ni napa binni zudii ni pur xhialma». Ni gucalaʼdxiʼ Binidxabaʼ niníʼ nga, pa gucaacabe tuuxa guchee la? zedandá ora zusaana de guni ni na Jiobá (Job 2:4). Ñee dxandíʼ nga la? Binidxabaʼ racalaʼdxiʼ guni crenu maca nuu pabiáʼ runi huantar binni, peru zedandá ora zucheené ca ley stiʼ Dios para cadi gati. Ne para nga, rucaa Binidxabaʼ laanu guni crenu cani riníʼ ti guchaʼnu modo riníʼ íquenu sin gudiʼnu cuenta, cásica qué rudii binni cuenta pa napa cáncer. Nga runi, guidúʼyanu caadxi de cani riquiiñebe ne ximodo zanda gudxíʼlunu cani.

Cani «zuba lu yu dé»

Binidxabaʼ biquiiñeʼ Elifaz, tobi de ca guionnaʼ xhamigu Job ni yeganna laa, para guiníʼ qué runi huantar binni guidxilayú guiráʼ guendanagana guidxaagalú. Óraque guníʼ Elifaz nabézacabe «ndaaniʼ yoo [o cuerpu] de beñe, ni zuba lu yu dé», ne despué guniʼbe: «Jma nagueenda nucaachecabe laacaʼ que ti bandaa. De siadóʼ hasta huadxí si ribánicaʼ; nagueenda ráticaʼ ne guirutiʼ rudii cuenta» (Job 4:19, 20).

Biblia laaca ruzeeteʼ zeeda gácanu casi «guisu de yu» (2 Cor. 4:7). Rucheʼnu purtiʼ gulenenu donda ne purtiʼ bisaanané Adán laanu guendaruchee (Rom. 5:12). Nga runi, pa ñaca guirutiʼ tu ñacané laanu la? qué ñanda diʼ ñuni huantarnu ora nucaalú Binidxabaʼ laanu. Peru cadi guiaandaʼ laanu, guiráʼ ca xpinni Cristu cayacané Jiobá laacaʼ. Neca nácanu binni ruchee, nabé risácanu para laabe (Isa. 43:4). Ne pa guinábanu laabe espíritu santu stibe la? zudiibe ni laanu (Luc. 11:13). Pur espíritu santu ca nápanu «poder» ni rudii Dios laanu ti ganda guni huantarnu guiráʼ guendanagana ni ruseendaʼ Binidxabaʼ luguianu (2 Cor. 4:7; Fili. 4:13, NM). Nga runi pa guzuhuaa dxiichinu lu cani runi crenu, ne gucáʼlunu laabe la? zacané Dios laanu para cadi guchéʼnenu laa ne zudiibe stipa laanu (1 Ped. 5:8-10). ¡Qué gápanu xi pur guidxíbinu Binidxabaʼ!

 «Ti hombre ni racalaʼdxiʼ guni ni cadi jneza»

Despué gunabadiidxaʼ Elifaz: «Tuu nga hombre para guiníʼ qué huachee, o tuu nga hombre ni gule de gunaa para guiníʼ ique runi ni jneza». Óraque laca laabe bicábibe ne guniʼbe sicaríʼ de Dios: «¡Biiyaʼ! Qué runi crebe ca ángel stibe, nin guibáʼ ca cadi nayá ni para laabe. ¡Laxa tuuxa ni rixhacaláʼdxibe ne cayuni cosa malu, ti hombre ni racalaʼdxiʼ guni ni cadi jneza cásica racalaʼdxiʼ ti binni gueʼ nisa ora cayati nisa!» (Job 15:14-16). Ne ca diidxaʼ guníʼ Elifaz riʼ, casi ora ñábibe Job nin ti binni guidxilayú cadi nachaʼhuiʼ para Jiobá. Binidxabaʼ laaca riquiiñeʼ guiráʼ ca cosa ni ribee gana laanu. Laabe racaláʼdxibe chuʼnu xizaa pur ca cosa cadi jneza bíninu dxiqué, guininu guirútiruʼ huayuni cosa malu que ni bíninu ne pur nga guiníʼ íquenu qué zutiidilaʼdxiʼ Dios stóndanu. Laaca racaláʼdxibe guiníʼ íquenu stálepeʼ nga ni rinabaʼ Dios laanu, qué riabe binni, qué rilaseláʼdxibe binni ne qué racanebe laacaʼ.

Pablu guníʼ: «Guiráʼ xixé binni maʼ bichee ne qué zanda gusihuínnicaʼ ca guenda sicarú stiʼ Dios». Cumu binni ruchee laanu la? qué zanda gúninu guiráʼ ni na ca ley stiʼ Jiobá (Rom. 3:23, NM; 7:21-23). Peru ca diidxaʼ ca qué rusihuínnicani qué risácanu para laabe. Bixhózenu Jiobá nanna nácanu de yu, nga runi riénebe laanu ne qué ziuu dxi gusietenaláʼdxibe laanu cani cadi jneza bíninu (Sal. 103:8, 9, 14). Ne nánnabe nuu «beenda yooxho ni lá diablu ne binidxabaʼ» cucaa laanu gucheʼnu purtiʼ nanna nácanu binni ruchee (Apo. 12:9, 10).

Jiobá zutiidilaʼdxiʼ donda stiʼ cani cayuni cosa malu peru pa gusaanacabe ni ne dxandipeʼ gaca arrepentírcabe ne pa qué gudxiibacabe laca laacabe (Isa. 55:7; Sal. 51:17). Neca gueeda gaca ca donda stícabe «naxiñáʼ rini, peru zácacani naquichibé casi nieve» (Isa. 1:18). ¡Nabé riguu ndiʼ gana laanu para cadi gusaananu de gúninu stipa pur gúninu ni na Bixhózenu!

Cumu binni ruchee laanu la? qué zanda gácanu xhamigu Dios pur cani gúnisinu. Adán ne Eva bisaana de ñácacaʼ binni ni qué ruchee ne biníticaʼ guendanabani ni qué zaluxe ne laca binítinu guiráʼ ni biníticabe (Rom. 6:23). Peru cumu nabé nadxii Jiobá binni guidxilayú la? gudíxhebe modo gutiidiláʼdxibe stóndanu pa gusihuínninu nápanu fe lu guendaguti stiʼ Xiiñibe (Mat. 20:28; Juan 3:16). ¡«Pabiáʼ nachaʼhui» Dios ne laanu! (Tito 2:11.) ¡Zanda gutiidilaʼdxiʼ Dios stóndanu! Yanna, xiñee gudiʼnu lugar gucaa Binidxabaʼ laanu guni crenu ni na yaʼ.

«Gudaʼnaʼ dede dxitaládibe ne beela ládibe»

Binidxabaʼ guníʼ zudxiideche Job Dios pa gaca huará. Ne bicaalube Jiobá ora gúdxibe laa ca diidxaʼ riʼ: «Gudaʼnaʼ dede dxitaládibe ne beela ládibe guʼyuʼ pa qué zaguudibe lii nezaluluʼ» (Job 2:5). Ca dxi stinu riʼ laaca riquiiñeʼ Binidxabaʼ ca guendahuará stinu para gucaa laanu guiníʼ íquenu qué zanda gúninu jma lu xhiiñaʼ Dios pur laacani.

 Qué ziuu dxi gudxii deche Jiobá laanu pa maʼ qué ganda gúninu jma lu xhiiñaʼ casi bíninu dxiqué. Guiníʼ íquenu xi ñúninu pa ñuninácabe ti xhamígunu dede biaʼ qué ñuutisícabe laa. Ñee maʼ qué zannaxhiinu laabe casi ante purtiʼ maʼ qué zanda gúnibe guiráʼ ni bíʼnibe dxiqué la? ¡Coʼ xa! Zannaxhiirunu laabe ne zápanu laabe, ne jmaruʼ si pa gucanabe ra gucaláʼdxibe ñacanebe laanu. Yanna, ñee rábiluʼ zusaana Jiobá de gannaxhii laanu purtiʼ maʼ qué randa rúninu xhiiñabe casi dxiqué la? Biblia cayabi laanu ca diidxaʼ riʼ: «Jneza runi Dios, ne qué zusiaanda irá enda nachaʼhui ni huayuni tu ca xpinni purti nadxii tu laa» (Heb. 6:10).

Stiidxaʼ Dios cuzeeteʼ de «ti viuda pobre» ni zándaca maʼ ziné stale iza de cayuni adorar Dios ni dxandíʼ. Ora biʼyaʼ Jesús bisábabe «chupa de gaayu huiiniʼ» ndaaniʼ tobi de ca caja ni nuu ndaaniʼ yuʼduʼ que, ñee guníʼ ique Jesús qué risácabe ne nin ca qué risaca biaʼ bidiibe que la? ¡Coʼ, qué niníʼ íquebe zacá! Bisisácabe gunaa que pur biʼniʼ guiráʼ ni gunda para biʼniʼ adorar Jiobá (Luc. 21:1-4).

Pa gúninu stipa pur cadi guchéʼnenu Dios la? zanda guni crenu gastiʼ qué zuxheleʼ laanu de laabe, neca guidxaagalunu intiica guendahuará, guióxhonu o gueeda gápanu xiixa guendanagana pur nácanu binni ruchee. Qué ziuu dxi gusaana Jiobá laanu purtiʼ si cucueeza ca guendanagana ca laanu de gúninu jma lu xhiiñabe (Sal. 71:9, 17, 18).

Cuʼ íquenu cascu ni zulá laanu

Xi zanda gúninu para cadi gucaadiáganu cani guiníʼ Binidxabaʼ. Caquiiñeʼ chinándanu conseju ni bidii Pablu: «Lachuu né Señor tobi si, ti uzuhuaa chaahui tu, purti nabé nandxóʼ be ne zacané be laatu. Casi nuu ni riquiiñe soldadu para cadi usaba enemigu sti laa la? zacaca laiquiiñe irá ni ma bidii Dios laatu para cadi usaba binidxaba laatu ne enda nexhená stiʼ». Tobi de ca cosa risaca ni rudii Dios laanu para ganda gúninu ni na nga «cascu», purtiʼ laani rulani laanu (Efe. 6:10, 11, 17). Para ganda gudxíʼlunu guiráʼ ni riníʼ Binidxabaʼ la? caquiiñeʼ cuʼ íquenu cascu ca ne cadi gusaana de iquiiñenu ni. Laanu runi crenu zuni Dios guiráʼ cani maʼ guníʼ, de guni Guidxilayú riʼ nacubi. Ne ni runi crenu ca zeeda gácani casi ti cascu ni riguu ique ti soldadu purtiʼ rápani xquendabiaaninu de guiráʼ cani cadi dxandíʼ ni rusiidiʼ Binidxabaʼ (1 Tes. 5:8). Para cadi gusaana de guiníʼ íquenu guiráʼ cani chiguni Dios la? caquiiñeʼ guidúʼndanu Stiidxabe.

Xi gucané Job para gunda biʼniʼ huantar guiráʼ ca guendananá biseendaʼ Binidxabaʼ ra nuu. Laabe gúpabe fe zandisaʼ Dios guiráʼ cani maʼ guti. Ngue runi, neca nánnabe zándaca gueeda gátibe qué nixélebe de Jiobá, sínuque gúdxibe laa ca diidxaʼ riʼ: «Lii zucaa riʼdxuʼ, ne naapeʼ zacabeʼ lii. Zacaláʼdxiluʼ cani bizáʼ naluʼ» (Job 14:15). Laabe nánnabe neca gátibe pur cayúnibe ni na Dios zusibani laabe sti biaje purtiʼ laa nabé nadxii ca xpinni.

Guiranu naquiiñeʼ guni crenu zanda gacané Dios ni dxandíʼ laanu. Laabe zanda guni chaahuibe intiica guendanagana ni gápanu pur guiráʼ ni runi Binidxabaʼ ne ca xpinni. Qué chuʼ dxi guiaandaʼ laanu conseju bidii apóstol Pablu riʼ: «Jneza runi Dios, ne qué zudii lugar gueeda xiixa luguiá tu ni qué zanda gua tu, sínuque laga zacané laatu tidi tu ni ora idxiña tu ni, ti ganda gua tu ni» (1 Cor. 10:13).

[Dibuju/foto ni zeeda lu yaza 20]

Jiobá rusisaca laanu purtiʼ qué rusaananu de gúninu xhiiñaʼ

[Dibuju/foto ni zeeda lu yaza 21]

Cuʼ íquenu cascu ni zanda gulá laanu ne cadi gusaana de iquiiñenu ni