«Derechu ni napa ca baʼduhuiiniʼ ca para gápacaʼ jma fe»

NGA nga tema stiʼ ti seminariu ni gudixhe Academia Sueca de Derechos del Niño gaca, (ti scuela stiʼ Suecia ni rusiidiʼ derechu ni napa ca baʼduhuiiniʼ ca). Guendaridagulisaa ca gúcani 9 stiʼ diciembre 2008, ne guyé stale xaíque stiʼ Yuʼduʼ de guidxi Suecia ne ca binni de xcaadxi religión ni nacaʼ zinándacaʼ Cristu, zaqueca cani nuu ndaaniʼ religión islam ne de movimiento humanista (ti grupu ni racané binni guibani jma galán).

Ti xaíque stiʼ ti yuʼduʼ guníʼ sicaríʼ lu ti libana ni bidii: «Qué zanda guidxélanu diidxaʼ para guininu pabiáʼ risaca nga ca historia ni zeeda lu Biblia para gacaneni ca baʼduhuiiniʼ ca gápacaʼ jma fe». Ximodo racané ca historia ni zeeda lu Biblia ca cani jma nahuiiniʼ para gápacaʼ jma fe yaʼ.

Xaíque que laaca guníʼ: «Ca historia ni zeeda lu Biblia rucaacani ca baʼduhuiiniʼ ca guiníʼ íquecaʼ». Para xaíque que «ca relatu stiʼ Adán ne Eva, Caín ne Abel, David ne Goliat, baʼduhuiiniʼ Jesús, Zaqueo ni biquixe impuestu que, hombrehuiiniʼ ni gudxite xpueltu bixhoze ne samaritanu ni guca nachaʼhuiʼ» que, rusiidiʼ cani laacabe «ximodo naquiiñeʼ gácacabe, casi cadi naquiiñeʼ gudxii déchecabe xhamígucabe, gutiidiláʼdxicabe donda, quíxecabe pur ni bíʼnicabe, cadi gaca nanaláʼdxicabe stobi, cadi gaca biidiʼ xquendabiaanicabe, guyúbicabe gácacabe nachaʼhuiʼ ne stobi, gannaxhiicabe ne gacanécabe stobi sin cuézacabe guicaacabe xiixa». Ne laaca guniʼbe: «Riguíxhecani ejemplu ni zanda chinándacabe lu xquendanabánicabe guiráʼ dxi».

Nánnanu nabé galán nga guʼndaʼ binni Stiidxaʼ Dios. Yanna, ñee zanda guiene ca baʼduhuiiniʼ ca xiixa ni gúʼndacaʼ stúbisicaʼ jneza ne «guiníʼ íquecaʼ» de laacani la?

Stiidxaʼ Dios peʼ rusihuinni dede né ca binni huaniisi ca caquiiñeʼ chuʼ tu gacané laacaʼ para guiénecaʼ ni. Casi bizaaca ti hombre ni biʼniʼ xhiiñaʼ gobiernu stiʼ Etiopía. Laa qué ñanda ñene Stiidxaʼ Dios neca guníʼ ique de laani. Relatu ni caníʼ de laabe que na, neca cayuundabe tobi de ca diidxaʼ riguixhená ni bicaa Isaías, qué ñanda ñénebe xi nácani, ngue runi bidiibe xquíxepeʼ discípulo Felipe ora bisiene laabe cani cayuundabe que (Hech. 8:26-40). Peru cadi laasibe nga qué ñénebe cani zeeda lu Biblia, sínuque guiráʼ xixenu, ne jmaruʼ si cani nahuiiniʼ ca, caquiiñeʼ chuʼ tu gacané laanu guiénenu ca diidxaʼ ni zeeda lu Stiidxaʼ Dios.

Biblia cudii laanu conseju riʼ: «Guendahuati ca nuuni ndaaniʼ ladxidóʼ hombrehuiiniʼ ca» (Pro. 22:15). Nga runi, naquiiñeʼ chuʼ tu gacané ca baʼduhuiiniʼ ca ti quixhe íquecaʼ gúnicaʼ ni jneza lu xquendanabánicaʼ ne guiziidicaʼ de Dios. Tuu nga naquiiñeʼ gusiidiʼ laacabe yaʼ. Bixhózecabe ne jñaacabe, ne zanda iquiiñecaʼ cani zeeda lu Biblia ne cani rusiidiʼ xquidxi Dios para gúnicaʼ ni. Dxandíʼ, guiráʼ ca baʼduhuiiniʼ ca nápacaʼ derechu de gusiidicabe laacaʼ. Dede ora gálecabe naquiiñeʼ guiziidicabe de Dios ne zanda iquiiñeʼ bixhózecabe ne jñaacabe Biblia para gacané laacabe. Zacá zeeda gácacabe binni ni zanna «uná nga jneza ne uná nga ni cadi jneza» (Heb. 5:14).