¡Galán nga gudixhe íquetu satu lu neza ni jma sicarú!
¡Galán nga gudixhe íquetu satu lu neza ni jma sicarú!
«Pa ibani nu o pa gati nu, sti [Jiobá] laanu.» (ROM. 14:8)
1. Xii nga guníʼ Jesús jma galán guni binni.
NUU stale modo zanda guibani binni, zeeda gácacani casi ora ñe binni lu stale neza, peru tobi si de laacani nga ni jma galán, ne lu ni nga racalaʼdxiʼ Jiobá sanu. Gastiʼ sti cosa jma galán que chinándanu ni na ca mandamientu ni zeeda lu Biblia ne guizíʼdinu de Jesucristu, Xiiñiʼ Dios. Laabe bisiidibe ca xpínnibe guni adorarcaʼ Bixhózebe jneza ne gúnicaʼ ni de guidubi ladxidoʼcaʼ ne gúdxibe laacaʼ gusiidicaʼ binni para gueeda gácacaʼ discípulo (Mat. 28:19, 20; Juan 4:24). Pa gúninu guiráʼ ni na Jesús la? ziechené Jiobá laanu ne zaguube ndaayaʼ laanu.
2. 1) Xi biʼniʼ stale binni lu primé siglu que ora binadiágacaʼ de Reinu stiʼ Dios. 2) Xiñee guníʼ Biblia yenanda ca primé discípulo que Cristu.
2 Guiráʼ «cani ma [nuu listu para] icaa enda nabani ni qué zaluxe» caziidicaʼ ni dxandíʼ ne cayuunísacaʼ (Hech. 13:48). Ora maʼ guyuunísacabe maʼ zanda gábinu laacabe: «¡Galán nga gudixhe íquetu satu lu neza ni jma sicarú!». Lu primé siglu que guyuu mil de binni de stale guidxi ni guca xpinni Cristu ne guyuunísacaʼ para gusihuínnicaʼ maʼ runi adorarcaʼ Dios (Hech. 2:41). Ca binni que nga na Biblia «zinanda Cristu» (Hech. 9:2; 19:23). Ne biaʼsi ngue ni guníʼ Biblia de laacabe, purtiʼ maʼ bichaacabe modo nabánicabe, yanna maʼ naquiiñeʼ gusihuínnicabe nápacabe fe Jesucristu ne quixhe íquecabe chinándacabe ejemplu stiʼ (1 Ped. 2:21).
3. 1) Xiñee guyuʼnísanu. 2) Panda binni maʼ guyuunisa lu ca últimu chii iza ni maʼ gudiʼdiʼ ca.
3 Ca dxi stinu ra mayaca guinitilú ca cosa malu nuu yanna, caziidiʼ stale binni para gaca discípulo lu jma de chupa gayuaa treinta guidxi roʼ. Lu ca últimu chii iza ni maʼ gudiʼdiʼ ca, guyuunisa 2,700,000 binni, biaʼsi 5,000 pur semana, ne zacá rusihuínnicaʼ maʼ bidiicaʼ laacaʼ Jiobá. Bíʼnicabe ni purtiʼ nadxiicabe laabe ne racaláʼdxicabe gúnicabe ni nabe, ne purtiʼ maʼ runibiáʼcabe Stiidxaʼ Dios ne rúnicabe ni nani. Gástiruʼ sti dxi lu xquendanabáninu qué dxi guyuʼnísanu, purtiʼ dxi ca bizulú guca xhamígunu Jiobá. Laaca rusihuínninu runi crenu zacané Jiobá laanu para cadi gusaana de sanu lu ca neza stiʼ, cásica gucanebe ca xpínnibe ni bibani dxiqué (Isa. 30:21).
Xiñee naquiiñeʼ chuʼnísanu
4, 5. Bizeeteʼ caadxi de ca ndaayaʼ ni ricaa cani riuunisa.
4 Yanna lii yaʼ. Zándaca maʼ biziidiluʼ tuu nga Dios, maʼ bichaaluʼ modo nabániluʼ ne maʼ nácaluʼ ti ni rucheeche diidxaʼ ni caʼruʼ chúʼnisa. Pa zacá ni la? galán nga ni maʼ bíʼniluʼ. Yanna, ñee maʼ bidiiluʼ lii Jiobá ne cá íqueluʼ chuʼnísaluʼ la? Pur guiráʼ ni maʼ biziidiluʼ lu Biblia, maʼ bidiiluʼ cuenta jma galán nga gusisácaluʼ Jiobá, lugar de guicá íqueluʼ guʼnuʼ guiráʼ ni racalaʼdxuʼ ne gapuʼ bidxichi (biindaʼ Salmo 148:11-13; Luc. 12:15). Ne pa chuʼnísaluʼ la? zacaaluʼ stale ndaayaʼ. Gunáʼ nga caadxi de laacani yaʼ.
5 Jma galán zabániluʼ pa chuʼnísaluʼ, ziuuluʼ jma nayecheʼ purtiʼ nannuʼ cayuʼnuʼ ni riuulaʼdxiʼ Dios (Rom. 12:1, 2). Espíritu santu zacané lii para gápaluʼ ca guenda stiʼ ca xpinni Cristu casi fe ne guendariuudxi (Gál. 5:22, 23). Zacabi Dios ca oración stiluʼ ne zaguube ndaayaʼ ca stipa cayuʼnuʼ pur guibániluʼ casi modo na Biblia. Laaca ziuuluʼ jma nayecheʼ ora gucheecheluʼ diidxaʼ, ne jma zuni creluʼ zadxiña dxi guibániluʼ sin gátiluʼ. Ne ndiʼ nga ni jma galán: ora gudiiluʼ lii Jiobá ne chuʼnísaluʼ la? zusihuínniluʼ dxandíʼ racaláʼdxiluʼ gácaluʼ testigu stiʼ Jiobá (Isa. 43:10-12).
6. Xi rusihuínninu ora chuʼnísanu.
6 Ora riuʼnísanu rusihuínninu maʼ bidiʼnu laanu Jiobá ne maʼ stibe laanu. Biaʼsi nga ca diidxaʼ guníʼ Pablu riʼ: «Nin tobi de laanu cadi nabani nu para laasi nu, ne nin tobi qué zati para laa si. Pa nabani nu la? nabani nu para [Jiobá], ne pa gati nu la? zati nu para [Jiobá]. Nga runi pa ibani nu o pa gati nu, sti [Jiobá] laanu» (Rom. 14:7, 8). Maʼ bisihuinni Dios rusisaca laanu purtiʼ rudiibe lugar cuinu xi racaláʼdxinu gúninu. Ora quixhe íquenu de guidubi ladxidoʼno sanu lu ca neza stibe la? rusihuínninu pabiáʼ nadxiinu laabe ne rusiéchenu ladxidoʼbe (Pro. 27:11). Ora riuʼnísanu la? cadi rusihuínnisinu maʼ bidiʼnu laanu Jiobá, sínuque laaca rusihuínninu laabe nga Rey stinu ne nuunu pur derechu ni nápabe de guni mandarbe (Hech. 5:29, 32). Ne laaca riuu Jiobá pur laanu óraca (biindaʼ Salmo 118:6). Peru nuuruʼ xcaadxi ndaayaʼ ni zacaanu yanna ne despué ora maʼ guyuʼnísanu.
Ti ndaayaʼ nga nuunu tobi si ne guiráʼ ca xpinni Cristu
7-9. 1) Xi guníʼ Jesús zacaa cani gusaana guiráʼ ni napa para chinanda laabe. 2) Ximodo cayaca ni na ca diidxaʼ guníʼ Jesús lu Marcos 10:29, 30 ca dxi stinu.
7 Ti biaje gudxi Pedru ca diidxaʼ riʼ Maestru stiʼ: «Laadu yaʼ, xi zacaa du, ma bisaana du irá xixé ne ma beda nanda du lii» (Mat. 19:27). Gunabadiidxabe ni purtiʼ racaláʼdxibe gánnabe xi nuu para laabe ne para xcaadxi discípulo que, purtiʼ maʼ stale cosa ngue bisaanacabe para gucheechecabe stiidxaʼ Reinu biaʼ gándatiʼ (Mat. 4:18-22). Xi bicabi Jesús laabe yaʼ.
8 Sti libru ni laaca cuzeeteʼ de laani nga Evangeliu stiʼ Marcos, ne lu relatu ca guníʼ Jesús zeeda gácacabe casi ti familia naroʼbaʼ. Laabe guniʼbe: «Tutiica usaana lidxi o biʼchi o bizaʼna o bixhoze o jñaa o xheela o xiiñi o layú sti pur naa ne pur stiidxa Dios la? zacaa ti gayuaa tantu de ni bisaana que: yoo, biʼchiʼ, bizaʼnaʼ, jñaa, xiiñiʼ ne layú, neca zadiʼdi stale ni nagana. Ne dxi [guzulú] guidxilayú cubi la? zapa ti enda nabani ni qué zaluxe» (Mar. 10:29, 30). Guca ni na ca diidxaʼ guníʼ Cristu ca lu primé siglu que ora bidxaagalú ca discípulo casi Lidia, Áquila, Priscila ne Gayo ca xpinni Cristu ralídxicaʼ, laacaʼ beeda gácacaʼ para laacabe casi bíʼchicabe, bizáʼnacabe ne jñaacabe (Hech. 16:14, 15; 18:2-4; 3 Juan 1, 5-8).
9 Yanna riʼ jma cahuinni modo cayaca ni na ca diidxaʼ guníʼ Jesús que. Stale de ca xpinni Cristu, casi ca misioneru, ca betelita, cani riguni dxiiñaʼ sti guidxi, maʼ bisaanacaʼ ca cosa ni nápacaʼ para guibaninecaʼ, ni zeeda gaca casi «layú» sticaʼ, para gacanecaʼ guireeche stiidxaʼ Reinu ndaaniʼ stale guidxi roʼ. Xcaadxi maʼ bisaana lidxi ne maʼ biziidicaʼ guibánicaʼ sin stale cosa. Riéchenu guiráʼ biaje gunadiáganu ximodo cayapa Jiobá laacabe lu dxiiñaʼ stícabe ne riéchecabe purtiʼ cayúnicabe ni na Jiobá (Hech. 20:35). Guiranu, casi xpinni Cristu ni maʼ guyuunisa ridúʼyanu galán gúninu ni na ca diidxaʼ riʼ: «Nirudó laguyubi [reinu stiʼ Dios] ne sa tu modo na», cásica cayuni xcaadxi xpinni Cristu ni nuu lu guidubi naca Guidxilayú (Mat. 6:33).
Ti ndaayaʼ nga rapa Dios laanu «lugar ra nagaʼchiʼ»
10, 11. Xii nga «lugar ra nagaʼchiʼ stiʼ Ni Nuu Jma Luguiáʼ», ne ximodo zanda chuʼnu racá.
10 Laaca ricaanu sti ndaayaʼ ora rudiʼnu laanu Jiobá ne chuʼnísanu. Biblia caníʼ xi laani: «Tutiica cueza lugar ra nagaʼchiʼ stiʼ Ni Nuu Jma Luguiáʼ la? qué zaca gastiʼ, purtiʼ casi ora ñuube xaʼnaʼ bandáʼ stiʼ ni jma napa poder» (Salmo 91:1). «Lugar ra nagaʼchiʼ» ni cuzeeteʼ textu riʼ, zeeda gácani casi ti lugar ra rapa Jiobá laanu de ca cosa ni zándaca guxheleʼ laanu de laabe. Rieeteʼ nagaʼchiʼ lugar ca purtiʼ ca binni ni qué riene ca cosa stiʼ Dios ne qué gápacaʼ fe laabe, qué randa diʼ ridxélacaʼ ni. Pa gúninu ni guninu dxi bidiʼnu laanu Dios ne guni crenu laabe de guidubi ladxidoʼno la? casi ñaca ñábinu laabe: «Lii nga ti lugar ra zanda guiaapaʼ, ti lugar ni nadipaʼ para naa, Dios stinneʼ ni runeʼ cré de guidubi ladxiduáʼ» (Sal. 91:2). Zacá nga reeda gaca Jiobá tuuxa ni rapa laanu (Sal. 91:9). Ñee nuuruʼ sti lugar jma galán que laani la?
11 Randa riuʼnu «lugar ra nagaʼchiʼ» ca purtiʼ xhamigu Jiobá laanu. Ruzulú raca xhamígube laanu ora rudiʼnu laanu laabe ne chuʼnísanu, ne riuʼnu jma gaxha de laabe ora ridúʼndanu Biblia, guni orarnu de guidubi ladxidoʼno ne ora rúninu stipa pur guzúʼbanu stiidxabe (Sant. 4:8). Ejemplu stiʼ Jesús nga ni jma galán chinándanu, purtiʼ guirútiruʼ qué huayuu jma gaxha de Jiobá que laabe. Qué huasaana de guni crebe Bixhózebe de guidubi ladxidoʼbe (Juan 8:29). Qué chuʼ dxi guiníʼ íquenu zusaana Dios laanu, laabe zanda gacanebe laanu ne racaláʼdxibe gúnibe ni ti ganda gúninu ni bidii stiidxanu laabe (Ecl. 5:4). Modo rapa Jiobá laanu pur guiráʼ ni rusiidiʼ laanu rusihuínnini pabiáʼ nadxiibe laanu ne qué racaláʼdxibe gusaana de gúninu xhiiñabe.
Ti ndaayaʼ nga chuʼnu lugar ni zeeda gaca casi ti paraísu
12, 13. 1) Xii nga lugar ni zeeda gaca casi ti paraísu. 2) Ximodo zanda gacanenu cani nacubi.
12 Ora rudiʼnu laanu Jiobá ne chuʼnísanu, laaca ricaanu sti ndaayaʼ purtiʼ riuʼnu ti lugar ni zeeda gaca casi ti paraísu. Xii nga paraísu ca yaʼ. Laani nga guendanayecheʼ ni runi sentirnu ndaaniʼ xquidxi Jiobá, purtiʼ racá si nga nuunu tobi si ne Jiobá ne guiráʼ ca xpinni Cristu (Sal. 29:11; Isa. 54:13). Gastiʼ nin sti cosa ni nuu ndaaniʼ guidxilayú riʼ ni zanda guchaaganu ni. Ne jma rihuínnini lu ca guendaridagulisaa ni raca para stale guidxi roʼ, ra ridagulisaa ca xpinni Cristu de gadxé gadxé guidxi, ni riníʼ gadxé gadxé diidxaʼ ne de gadxé gadxé raza, ne rihuinni nuudxícabe, nuucabe tobi si ne nadxiisaacabe.
13 ¡Guizáʼ sicarú modo nabánicabe pa guchaaganu ni ne modo nabani binni guidxilayú! (Biindaʼ Isaías 65:13, 14.) Ora rucheechenu stiidxaʼ Reinu runi invitarnu ca binni ca para chuʼcaʼ ndaaniʼ paraísu ra nuunu. Laaca ti ndaayaʼ nga gacanenu cani nacubi caziidiʼ ni caquiiñeʼ chuʼ tu gacané laacaʼ para gucheechecaʼ diidxaʼ jma jneza. Ne pa guinabaʼ ca binnigola laanu gacanenu tobi de laacabe la? naquiiñeʼ gúninu ni, cásica biʼniʼ Áquila ne Priscila ora «bisiene chaahui ca [Apolos] stiidxa Dios» (Hech. 18:24-26).
Cadi gusaana de guizíʼdinu de Jesús
14, 15. Gunáʼ nga ca razón nápanu para cadi gusaana de guizíʼdinu de Jesús.
14 Despué de maʼ guyuʼnísanu la? naquiiñeʼ guizíʼdirunu de Jesús. Xiñee yaʼ. Cadi guiaandaʼ ndiʼ laanu, ante gueedabe ndaaniʼ Guidxilayú riʼ bíʼninebe Bixhózebe dxiiñaʼ stale mil de iza (Pro. 8:22, 30). Gúnnabe gastiʼ sti cosa jma galán que gúnibe xhiiñaʼ Bixhózebe ne gusiidibe binni ni dxandíʼ de laa (Juan 8:37). Ne maca nánnabe zuninácabe laabe ne zuuticabe laabe purtiʼ gudixhe íquebe sabe lu neza stiʼ Dios (Mat. 20:18, 19; Heb. 4:15). Peru laaca gúnnabe sti cosa, pa niguixhe íquebe ñúnibe gadxé de ni biseendaʼ Dios laabe la? nusihuínnibe cuyúbibe puru si para laabe ne laaca nusihuínnibe maʼ qué ruuyabe ca cosa ca casi ruuyaʼ Dios cani. Modo bibani Jesús ca nácani ti ejemplu galán para laanu purtiʼ qué nucheenebe Jiobá.
15 Cadi xadxí de guyuunisa Jesús, gucalaʼdxiʼ Binidxabaʼ nucaa laabe nucheenebe Dios, peru qué ñanda diʼ ñúnini (Mat. 4:1-11). Ni bíʼnibe ca rusiidini laanu zanda guzúʼbanu stiidxaʼ Dios neca guni Binidxabaʼ intiica cosa para gucaa laanu gucheʼnu. Stale biaje jma riebe luguiáʼ cani mayaca chúʼnisa o cani deruʼ guyuunisa (1 Ped. 5:8). Xi rúnibe para gucaabe laacaʼ gucheecaʼ yaʼ. Riquiiñebe ca binnilídxicaʼ ni qué ganna de dxiiñaʼ rúninu para cueecaʼ gana laacabe, purtiʼ riníʼ íquecaʼ zacá nga cayacanecaʼ laacabe. Neca zacá, ora guidxaagalunu ni bizéʼtenu ca racaneni laanu guicábinu laacabe, guinínenu laacabe de ni cazíʼdinu ne gápanu ca guenda ni rapa ca xpinni Cristu, casi respetu ne gánnanu guicábinu jneza (1 Ped. 3:15). Ora gúninu zacá la? cani rucaadiaga laanu laaca ribeenducaʼ stale cosa galán (1 Tim. 4:16).
Qué chuʼ dxi gusaananu neza ni jma galán
16, 17. 1) Xi chonna cosa rieeteʼ lu Deuteronomio 30:19, 20 naquiiñeʼ guni binni para guicaa guendanabani. 2) Ximodo bisihuinni Jesús, Juan ne Pablu naquiiñeʼ gaca guionnaʼ cosa guníʼ Moisés que.
16 Biaʼ ti mil gaayuʼ gayuaa iza ante gueeda Xiiñiʼ Dios ndaaniʼ Guidxilayú riʼ, gudxi Moisés ca binni de guidxi Israel cuicaʼ gunáʼ nga neza ni jma galán para laacaʼ dxiqué. Gúdxibe laacaʼ: «Caquiiñeʼ guibáʼ ne guidxilayú casi testigu [...] maʼ gudixheʼ guendanabani ne guendaguti nezaluluʼ, ndaayaʼ ne guendananá; ne nápaluʼ xidé cuiluʼ guendanabani ti cadi gátiluʼ, lii ne ca xiiñiluʼ, gannaxhiiluʼ Jiobá Dios stiluʼ, gucaadiágaluʼ stídxibe ne cadi guixéleluʼ de laabe» (Deu. 30:19, 20). Neca bisaana guidxi que Jiobá la? qué nuchaa diʼ guionnaʼ cosa ni guníʼ Moisés naquiiñeʼ guni binni para guibani. Dede Jesús ne xcaadxi xpinni Dios de dxiqué laaca bizeetecaʼ de laacani.
17 Primé la? rusihuínninu nadxiinu Jiobá ora rúninu ni na ca ley stibe (Mat. 22:37). Guiropaʼ, naquiiñeʼ «gucaadiága[nu] stídxibe». Ne rúninu ni ora guidúʼndanu Biblia ne gúninu ni na ca mandamientu stibe (1 Juan 5:3). Nga runi caquiiñeʼ chuunu guiráʼ ca guendaridagulisaa ca, purtiʼ racá rusiénecabe laanu de Stiidxaʼ Dios (Heb. 10:23-25). Ne últimu la? «cadi guixéle[nu]» de Jiobá. Intiica guendanagana guidxaagalunu, naquiiñeʼ gusihuínninu nápanu fe laabe ne chinándanu Xiiñibe (2 Cor. 4:16-18).
18. 1) Xi guníʼ revista riʼ lu iza 1914 de cani cazíʼdinu lu Biblia. 2) Xi runi sentirnu pur canazanu lu «biaaniʼ stiʼ Jiobá».
18 ¡Guizáʼ sicarú nga guibani binni modo rusiidiʼ Biblia! Sicaríʼ guníʼ revista riʼ lu iza 1914, lu diidxaʼ inglés: «Ñee cadi dxandíʼ nuunu ndaaniʼ ti guidxi nayecheʼ ne nápanu stale ndaayaʼ la? Ñee cadi dxandíʼ qué rusaana Dios stinu laanu la? Nga runi, pa nuu tuuxa ni runibiáʼ sti neza jma galán que neza riʼ la? zaa cheʼ lu neza ca. Pa tuuxa de laatu guidxela xiixa jma sicarú la? rinábadu laa gabi ni laadu. Laadu qué huadxéladu gastiʼ ni guidxiña neca galaa de ca cosa ni maʼ bizíʼdinu lu Stiidxaʼ Dios. [...] Qué zanda diʼ guinidu o gucaʼdu pabiáʼ nayecheʼ nuu ladxidoʼno, ca ndaayaʼ nápanu ne modo nuunu tobi si pur guiráʼ ni maʼ bizíʼdinu de Dios ni dxandíʼ. Ora bizíʼdinu pabiáʼ nuu xpiaaniʼ Dios, rúnibe ni jneza, nápabe poder ne nadxiibe binni la? gudixhedxini xquendabiaaninu ne bichá tipa ni ladxidoʼno. Maʼ cadi caquiiñeʼ diʼ guyúbirunu jma. Gástiruʼ sti cosa jma galán gúninu que guiene chaahuinu ca guenda sicarú stiʼ Dios ra zidiʼdiʼ dxi» (The Watch Tower 15 stiʼ diciembre 1914, yaza 377 ne 378). Zeʼ dxi jma rusisácanu guiráʼ ni cazíʼdinu lu Biblia. Yanna nga jma stale razón nápanu para guiéchenu purtiʼ canazanu lu «biaaniʼ stiʼ Jiobá» (Isa. 2:5; Sal. 43:3; Pro. 4:18).
19. Xiñee cadi naquiiñeʼ guindaa binni para chúʼnisa pa maʼ runi guiráʼ ni rinabaʼ Biblia.
19 Pa racaláʼdxiluʼ saluʼ lu «biaaniʼ stiʼ Jiobá» peru caʼruʼ gudiiluʼ lii laabe ne caʼruʼ chuʼnísaluʼ la? cadi guindaaluʼ. Biʼniʼ stipa para gúniluʼ guiráʼ ni canabaʼ Biblia binni para chúʼnisa, zacá nga modo jma galán para gusihuínniluʼ rudiiluʼ xquíxepeʼ Jiobá ne Jesús pur guiráʼ ni maʼ bíʼnicaʼ pur lii. Bidii Dios cosa ni jma sicarú nápaluʼ, laani nga: xquendanabániluʼ. Biluíʼ laabe nápaluʼ gana guʼnuʼ ni nabe ne chinanduʼ Xiiñibe (2 Cor. 5:14, 15). Ñee maʼ bidiiluʼ cuenta la? qué zanda guidxélaluʼ sti neza jma galán ra saluʼ.
Xi nicábiluʼ
• Xi rusihuinni binni ora riuunisa.
• Xi ndaayaʼ ricaa cani rudii laa Jiobá ne riuunísacaʼ.
• Xiñee naquiiñeʼ guizíʼdinu de Jesús.
• Xi zacané laanu para cadi gusaananu neza ni jma galán ni nuu.
[Guendarinabadiidxaʼ stiʼ párrafo]
[Dibuju/foto ni zeeda lu yaza 25]
Rusihuínninu nuunu lu neza ni jma galán ora chuʼnísanu
[Dibuju/foto ni zeeda lu yaza 26]
Ñee maʼ biyúbiluʼ gapa Jiobá lii «lugar ra nagaʼchiʼ» stiʼ la?