Iquiiñenu «espada ni rudii Espíritu Santu» laanu jneza
Iquiiñenu «espada ni rudii Espíritu Santu» laanu jneza
«Laucaa lú ne espada ni rudii Espíritu Santu laatu, ne nga nga stiidxa Dios.» (EFE. 6:17)
1, 2. Xi caquiiñeʼ gúninu yanna ra maʼ nánnanu cayaadxaruʼ tu gucheeche diidxaʼ.
ORA biʼyaʼ Jesús nuu stale binni ni caquiiñeʼ gusiidicabe laa de Dios gúdxibe ca discípulo stibe: «Ma stale binni cabeza si ucaa diaga stiidxa Dios. Tu güi ni nga huaxiéʼ. Yanna lainaba lu Dios useenda stale tu guni dxiiña ca, ti laabe nga xpixuaana ni». Peru cadi guníʼsibe xi caquiiñeʼ gaca, sínuque «guridxi be doce discípulu stibe» ne biseendabe laacaʼ guidubi naca guidxi Israel para chiyúbicaʼ binni ni gaca xpínnibe (Mat. 9:35-38; 10:1, 5). Ne despué «ulí [Jesús] sti setenta, ne biseenda laaca chupa chupa» chigúnicaʼ dxiiñaʼ queca (Luc. 10:1, 2).
2 Ca dxi nabáninu riʼ laaca nabé caquiiñeʼ chuʼ tu chigucheeche stiidxaʼ Reinu. Lu iza 2009, bidagulisaa 18,168,323 binni lu guidubi naca Guidxilayú para bietenaláʼdxicaʼ guendaguti stiʼ Jesús, guyé jma de chii millón binni ni cadi naca testigu stiʼ Jiobá. Rihuinni dxíchica nuu stale binni ni racalaʼdxiʼ guiziidiʼ (Juan 4:34, 35). Nga runi naquiiñeʼ guinábanu Dios guseendaruʼ jma binni para guni dxiiñaʼ ca. Ne para gusihuínninu cayúninu casi gunábanu laabe ca la? naquiiñeʼ gúninu stipa para gánnanu gucheechenu diidxaʼ jneza ne gacanenu binni gaca xpinni Cristu (Mat. 28:19, 20; Mar. 13:10).
3. Bisiene ximodo racané espíritu santu laanu gucheechenu diidxaʼ.
3 Casi maʼ bidúʼyanu lu tema ni gudídinu ca, espíritu ca racaneni laanu guininu stiidxaʼ Dios sin guidxíbinu (Hech. 4:31). Peru laaca racaneni laanu gánnanu gucheechenu diidxaʼ. Ne para ganda gánnanu gúninu dxiiñaʼ ca la? galán iquiiñenu Biblia, Stiidxaʼ Dios (2 Tim. 3:16). Nánnanu biquiiñeʼ Dios espíritu santu para gucuá Biblia, nga runi ora guininu cani zeeda lu Biblia ca espíritu santu nga cayabi laanu xi guininu. Peru ante guidúʼyanu ximodo zanda gucheechenu diidxaʼ jma jneza la? chiguininu pabiáʼ nandxóʼ Stiidxaʼ Dios.
«Stiidxa Dios [...] nandxóʼ ni»
4. Xi runi Stiidxaʼ Dios lu xquendanabani binni.
4 Stiidxaʼ Dios, o cani rusiidini laanu, nabé nandxóʼ cani (Heb. 4:12). Jma naduxhuʼ ni que ti espada ni runi binni. Cumu naduxhuʼ ni la? riaaziʼ ni dede ndaaniʼ dxita ládinu. Guiráʼ cani rusiidiʼ Biblia rindácani dede ndaaniʼ ladxidoʼno, lu xquendabiaaninu, cani runi sentirnu ne ribeecani ni nuu ndaaniʼ ladxidoʼno. Ne zanda guchaani guidubi naca xquendanabani binni (biindaʼ Colosenses 3:10). ¡Dxandíʼ, Stiidxaʼ Dios ca zanda guchaani xquendanabani binni!
5. Xi guiráʼ modo racané Biblia laanu, ne xi ribeendunu.
5 Gástiruʼ sti libru ni zanda gudii laanu guendabiaaniʼ casi Biblia, purtiʼ laani rusiidini laanu guibáninu ndaaniʼ guidxilayú ra nuu stale guendanagana riʼ. Laani zeeda gácani casi ti lámpara ni ruzaaniʼ ra ruxhatañeenu ne neza ra zizanu (Sal. 119:105). Dxandipeʼ racaneni laanu lu cani ridxaagalunu guiráʼ dxi, casi ca guendanagana stinu, gánnanu xi gúninu ne ca binni ni ridxaaganu, ca cosa ni rúninu para chuʼnu nayecheʼ, dxiiñaʼ stinu ne modo gácunu lari (Sal. 37:25; Pro. 13:20; Juan 15:14; 1 Tim. 2:9). Laaca racaneni laanu gánnanu guidxaaganu xcaadxi binni (Mat. 7:12; Fili. 2:3, 4). Peru Stiidxaʼ Dios laaca casi ñaca nuzaaniʼ ni zitu, purtiʼ racaneni laanu gánnanu xi zabeendunu despué pur cani gúninu (1 Tim. 6:9). Ne laaca riniʼni dede ante xi chiguni Dios ne nga rucaa laanu guibáninu modo riuuláʼdxibe (Mat. 6:33; 1 Juan 2:17, 18). Nga runi, pa chinanda binni ca conseju ni zeeda lu Biblia la? zabani galán.
6. Ximodo racané Biblia laanu para ganda gúninu ni na Dios.
6 Pablu guníʼ cani zeeda lu Biblia ca zeeda gaca cani casi «espada ni rudii espíritu santu» ne racaneni laanu para ganda gúninu ni na Dios (biindaʼ Efesios 6:12, 17). Zanda gacané Biblia laanu para gacanenu binni guireecaʼ de lu naʼ Binidxabaʼ. Gástiruʼ sti espada casi laani, purtiʼ rulani binni lugar de ñuutini laacaʼ. Ñee cadi galán nga gúninu stipa pur iquiiñenu ni jneza la?
Iquiiñenu Stiidxaʼ Dios jneza
7. Xiñee caquiiñeʼ guizíʼdinu iquiiñenu «espada ni rudii Espíritu Santu».
7 Para ganda guni ganar ti soldadu ra zitinde la? naquiiñeʼ gunibiáʼ chaahuiʼ ca guiibaʼ ni ziné ne cadi gusaana de iquiiñeʼ cani. Zacaca nga zeeda gaca ne «espada ni rudii Espíritu Santu». Galán chinándanu conseju bidii Pablu riʼ: «Bicaalaʼdxi guʼnu dxiiña modo chuʼlaʼdxi Dios ti qué gapu xi pur ituí lú lu nezalú. Bisiidi stiidxa be jneza» (2 Tim. 2:15).
8, 9. Xi zanda gacané laanu para guiene chaahuinu ca relatu ni zeeda lu Biblia. Biquiiñeʼ ti ejemplu para guicábiluʼ.
8 Xi zacané laanu iquiiñenu «stiidxa be jneza» ora gucheechenu diidxaʼ yaʼ. Pa racaláʼdxinu gusiene chaahuinu cani zeeda lu Biblia la? primeru naquiiñeʼ guiénenu ni. Para gúninu nga caquiiñeʼ guiénenu xidé caníʼ relatu ni cadúʼndanu ca. Ximodo zanda gánnanu xi caníʼ ti versículo o ti relatu yaʼ. Ti diccionariu na galán guʼyaʼ binni «guiráʼ ca diidxaʼ, ca oración ni zeeda ante o despué de ca diidxaʼ ni cayuundaʼ, [...] nga zacané binni guiene chaahuiʼ» ni cayuundaʼ (Gran Diccionario de Uso del Español Actual).
9 Casi maʼ bidúʼyanu ca, para ganda guiénenu xiixa relatu la? galán gánnanu xidé caníʼ ni. Iquiiñenu ti ejemplu para gusiénenu ni. Guidúʼyanu ca diidxaʼ ni guníʼ Pablu lu Gálatas 5:13: «Hermanu caʼ, cadi uníʼ né Dios laatu para icá tu yaga, peru xi si la? cadi pur nga guni tu intiica na ique tu, sínuque laganaxhii stobi ne lagacané laa». Paraa nga gucuá ca xpinni Cristu que yaga yaʼ. Lu naʼ guendaruchee ne guendaguti la? o lu naʼ religión ni rusiidiʼ ni cadi dxandíʼ. Coʼ. Ca diidxaʼ ni zeeda ante de textu ca, cusihuínnicani caníʼ Pablu biaanacabe libre purtiʼ gucané Jesús laacabe para bireecabe xaʼnaʼ «na ley» (Gál. 3:13, 19-24; 4:1-5). Cani gudii xquixe pur biaanacaʼ libre naquiiñeʼ gacanecaʼ xcaadxi binni ne gannaxhiisaacaʼ lugar de nisi maʼ «cayaʼsa saa[caʼ] ne nisi cayaani ná saa[caʼ]» laacaʼ (Gál. 5:15).
10. Xiruʼ caquiiñeʼ gánnanu ti guiénenu ca relatu ni zeeda lu Biblia, ne paraa zanda guyúbinu cani.
10 Sti cosa ni zanda gúninu para ganda guiénenu xiixa relatu ni zeeda lu Biblia nga gánnanu tu laa bicaani, padxí bicaabe ni, xiñee bíʼnibe ni ne xi cazaaca dxi bicaabe ni. Laaca galán gánnanu xi costumbre gupa binni dxi gucuá ni, ximodo xpiaʼcaʼ ne xi religión gúpacabe dxiqué. a
11. Ximodo naquiiñeʼ gusiénenu cani rusiidiʼ Biblia.
11 Para ganda gusíʼdinu «stiidxa be jneza» la? cadi naquiiñeʼ si gusiene chaahuinu cani cá lu Biblia, sínuque caquiiñeʼ gánnanu ximodo gusiénenu cani. Neca riquiiñenu Stiidxaʼ Dios para gusihuínninu cani cadi dxandíʼ rusiidiʼ binni casi biʼniʼ Jesús dxi biquiinde Binidxabaʼ laa guchee la? qué riquiiñenu ni para gusituinu lú binni o para guninanu laacaʼ (Deu. 6:16; 8:3; 10:20; Mat. 4:4, 7, 10). Laanu rinándanu conseju bidii Pedru riʼ: «Lausisaca Cristu ndaani ladxidóʼ to. Laguietenalaʼdxi laa nga Señor stitu. Ne lagataná para icabi tu cani racalaʼdxi ganna xii nga runi cre tu, peru laicabi laaca ne diidxa nadóʼ ne respetu» (1 Ped. 3:15).
12, 13. Ximodo zanda guchiá Stiidxaʼ Dios cani runi cré binni. Bizeeteʼ ti ejemplu.
12 Xi zabeendunu pa iquiiñenu Stiidxaʼ Dios jneza (biindaʼ 2 Corintios 10:4, 5). Primé la? cani rusiidiʼ Biblia ca zacanécani laanu «uchiá[nu] intiica ni quixhe [binni] para cadi chindá stiidxa Dios» ra nuucaʼ, o racanécani laanu guluinu binni cani cadi jneza rusiidiʼ ca religión ca, ca cosa malu ni runi binni ne guiráʼ cani runi cré binni ni riree si lu xquendabiaanicaʼ. Biblia zanda gacané laanu para gusihuínninu cadi jneza guiráʼ cani «riguixhe [binni] para qué chuʼ tu gunibiáʼ Dios». Zanda iquiiñenu guiráʼ cani rusiidiʼ Biblia para gacanenu binni guchaacaʼ modo riníʼ íquecaʼ ti gánnacaʼ xipeʼ nga rusiidiʼ Biblia.
13 Guzéʼtenu ni bizaaca ti gunaa de 93 iza ni nabeza ndaaniʼ guidxi India. Bizulú biindané xiiñibe laabe Biblia pur carta, purtiʼ laa nabeza ndaaniʼ sti guidxi ne chaahuidugá guyuulaʼdxiʼ gunaa riʼ guiráʼ cani caziidiʼ de Jiobá ne cani chiguni. Peru dede dxi nahuiinibe runi crebe riree xiixa ni qué rihuinni lu xcuerpu binni ora gati ne ráleni lu sti cuerpu. Ngue runi, dxi bicaa xiiñibe ra nuube ne gudxi laabe ximodo riuu ti binni ora maʼ guti la? laabe guniʼbe: «Qué zanda diʼ guneʼ cré guiráʼ ni na ca textu ca. Guiráʼ ca religión ca nacaʼ nápanu xiixa ni qué rati lu cuerpu stinu. Maʼ xadxí runeʼ cré riree xiixa ni qué rihuinni lu cuerpu stiʼ tuuxa ora gati ne ráleni biaʼ 8,400,000 biaje lu sti cuerpu. Ximodo nga naluʼ cadi dxandíʼ ni runeʼ cré. Ñee nuuluʼ guiniʼluʼ cadi jneza rusiidiʼ stale religión la?». Rihuínnica maʼ xadxí nga runi crebe ni nabe ca. Ñee zanda gacané «espada ni rudii Espíritu Santu» laabe para cueebe ni runi crebe que ndaaniʼ ladxidoʼbe la? Gudiʼdiʼ si caadxi semana ne despué de biindaʼ chaahuibe stale relatu ni zeeda lu Biblia, bicaabe ca diidxaʼ riʼ: «Maʼ cuzuluaʼ cayeneʼ xipeʼ nga rizaaca binni ora maʼ guti. Qué gannuʼ pabiáʼ riecheʼ gannaʼ ora guedandá dxi guiasa binni de lade gueʼtuʼ, zadúʼyanu guiráʼ ca binni ni nadxiinu ni maʼ guti sti biaje. Ribezaʼ guiuba guedandá Reinu stiʼ Dios».
Iquiiñenu ni para ucuudxinu binni
14. Xi caquiiñeʼ gúninu para ucuudxinu binni.
14 Pa racaláʼdxinu gánnanu iquiiñenu Biblia jneza ora gucheechenu diidxaʼ la? cadi naquiiñeʼ si guidúʼndanu xiixa textu, sínuque caquiiñeʼ gánnanu iquiiñenu ni para ucuudxinu binni cásica biʼniʼ Pablu (biindaʼ Hechos 19:8, 9 ne 28:23). Para ganda ucuudxinu binni la? caquiiñeʼ gacanenu laa «guni cré xiixa». Randa rúninu zacá ora racanenu binni guni cré cani rusiidiʼ Biblia. Xi zanda gúniluʼ para ucuudxiluʼ cani cucaadiaga lii ti gánnacaʼ dxandíʼ nga cani cusiidiluʼ laacaʼ yaʼ.
15. Xi zanda gúninu para guni respetar binni Biblia.
15 Biyubi modo guzeeteluʼ cani zeeda lu Biblia ti guni respetárcabe ni. Ante guidúʼndanu ti versículo, galán guzéʼtenu pabiáʼ risaca nga gánnanu ximodo ruuyaʼ Jiobá xiixa ni cuzéʼtenu. Despué de guicabi binni xiixa ni guinabadiidxanu laa la? zanda guininu sicaríʼ: «Guidúʼyanu xi riníʼ ique Dios» o «Ximodo rábiluʼ ruuyaʼ Dios ni caninu riʼ yaʼ». Pa guininu zacá ante guidúʼndanu xiixa relatu la? zusihuínninu de Dios nga zeeda Biblia ne zacaneni binni gusisaca cani zeeda luni. Galán gúninu zacá jmaruʼ si ora cucheechenu diidxaʼ ne guidxélanu ti binni ni gabi laanu runi cré Dios, peru qué runibiáʼ chaahuiʼ cani zeeda lu Biblia (Sal. 19:7-10).
16. Xi zanda gacané laanu para gusiénenu ca relatu ni guidúʼndanu.
16 Cadi gúʼndaluʼ ca versículo casi: bisiene cani. Yenanda ejemplu stiʼ Pablu, purtiʼ laa qué nuzeeteʼ si cani zeeda lu Biblia, sínuque bisiénebe cani (Hech. 17:3). Cumu nánnanu stale cosa nga ni ruzeeteʼ ca textu ca la? nga runi nuu tiru caquiiñeʼ guzéʼtenu xiixa diidxaʼ ni zeeda lúcani para gacanenu binni guiene ni cayábinu laa. Zanda gúninu zacá pa guibiguetaʼ guininu ca diidxaʼ ni racaláʼdxinu guiene binni ca o guzéʼtenu ca diidxaʼ ni caquiiñeʼ gánnabe, o guinabadiidxanu laabe xiixa cosa ni zanda guicábibe. Óraca bisiene textu ca ne biluíʼ ximodo zanda gacaneni laabe.
17. Xi zanda gúniluʼ para gacaneluʼ binni guni cré cani zeeda lu Biblia.
17 Iquiiñenu cani zeeda lu Biblia para ucuudxinu binni. Pablu biquiiñeʼ Stiidxaʼ Dios para guniʼné cani cucaadiaga laa, biyúbibe modo para chindá ni caniʼbe ndaaniʼ ladxidoʼcaʼ ne guníʼnebe laacaʼ maca para guiénecaʼ laabe (Hech. 17:2, 4). Lii laaca naquiiñeʼ guyúbiluʼ modo para chindá ni cusiidiluʼ ndaaniʼ ladxidóʼ binni. Pa guinabadiidxaluʼ binni xiixa ni gusihuinni rizaaláʼdxiluʼ laacaʼ la? zánnaluʼ xi nuu ndaaniʼ ladxidóʼcabe (Pro. 20:5). Lugar de gábinu laabe cadi jneza ni cayúnibe la? naquiiñeʼ guluinu laabe xi razón rudii Biblia, ne gusiénenu laabe xiñee cayabi Dios laanu cadi gúninu xiixa. Jma galán guidúʼndanu ti versículo ne gusiénenu ni que guidúʼndanu chupa o chonna sin gusiénenu. Ni zanda gacané laanu ucuudxinu binni nga gábinu laacaʼ paraa cá cani caninu (Pro. 16:23). Dxandíʼ, nuu tiru laaca naquiiñeʼ guyúbinu xiná xcaadxi libru ne revista. Gunaa ni maca bizéʼtenu que gupa xidé biénebe xiñee runi cré stale binni napa ti alma o ti espíritu ni qué rati. Despué de biénebe paraa biasastí ni runi crebe que ne ximodo bireecheni ndaaniʼ stale religión la? oraqueruʼ gunabe biʼniʼ crebe cani rusiidiʼ Biblia. b
Cadi gusaana de iquiiñenu ni jneza
18, 19. Xiñee cadi naquiiñeʼ gusaana de iquiiñenu «espada ni rudii Espíritu Santu» laanu jneza.
18 Casi na Stiidxaʼ Dios: «Ma cadiʼdi guidxilayú caduʼya nu riʼ» ne cadale cosa malu ndaaniʼ ni (1 Cor. 7:31; 2 Tim. 3:13). Nga runi yanna nga jma naquiiñeʼ «uchiá[nu] intiica ni quixhe [binni] para cadi chindá stiidxa Dios» ra nuucaʼ, ne para ganda gúninu nga la? iquiiñenu «espada ni rudii Espíritu Santu laa[nu], ne nga nga stiidxa Dios».
19 Nabé nayecheʼ riuʼnu purtiʼ nápanu Biblia ne randa riquiiñenu ni para chindá ni cusíʼdinu ndaaniʼ ladxidóʼ binni ni racalaʼdxiʼ guiziidiʼ ne gacanenu laacaʼ gusaanacaʼ cani cadi dxandíʼ runi crecaʼ. Cani rusiidiʼ Biblia jma nandxóʼ cani que intiica ni runi cré binni, neca ruluíʼ guirutiʼ tu zanda gusihuinni cadi dxandíʼ ni runi crecaʼ. Nga runi, naquiiñeʼ guyúbinu modo iquiiñenu «espada ni rudii Espíritu Santu» laanu jneza ti ganda gucheechenu stiidxaʼ Reinu stiʼ Jiobá.
[Cani cá ñee yaza]
a Lade guiráʼ ca libru ne revista ni zanda gacané laanu nuu “Toda Escritura es inspirada de Dios y provechosa”, Perspicacia para comprender las Escrituras ne Torre stiʼ ni rapa, ra zeeda tema ni láʼ «Stiidxaʼ Jiobá nabani».
b Biiyaʼ xiná folletu ¿Qué nos sucede cuando morimos?, yaza 5 dede 16.
Xi bizíʼdinu
• Pabiáʼ nandxóʼ ca diidxaʼ ni zeeda lu Biblia.
• Xi zacané laanu iquiiñenu Stiidxaʼ Dios jneza.
• Ximodo zanda guchiá Stiidxaʼ Dios cani runi cré binni.
• Xiruʼ caquiiñeʼ gúninu para ganda ucuudxinu binni ora maʼ canagucheechenu diidxaʼ.
[Guendarinabadiidxaʼ stiʼ párrafo]
[Cuadro ne dibuju/foto ni zeeda lu yaza 12]
Ximodo iquiiñenu Biblia para ucuudxinu binni
▪ Biyubi modo guni respetárcabe Biblia
▪ Bisiene ca textu ni gúʼndaluʼ
▪ Biquiiñeʼ cani zanda gacané lii ucuudxiluʼ binni ti chindácani ndaaniʼ ladxidoʼcaʼ
[Dibuju/foto ni zeeda lu yaza 11]
Naquiiñeʼ guyúbinu modo iquiiñenu «espada ni rudii Espíritu Santu» ca laanu jneza