«Na Espíritu Santu ne xheela Dendxu huiini que: Gudáʼ»
«Na Espíritu Santu ne xheela Dendxu huiini que: Gudáʼ»
«Na Espíritu Santu ne xheela Dendxu huiini que: Gudáʼ. [...] Ni cayati nisa la? gueda gué nisa ni rudii enda nabani sin quixe gastiʼ.» (APO. 22:17)
1, 2. Xiñee risaca gúninu xhiiñaʼ Jiobá lu xquendanabáninu.
ÑEE risaca nga gúninu xhiiñaʼ Jiobá lu xquendanabáninu la? Jesús gudxi ca discípulo stiʼ: «Nirudó laguyubi [reinu stiʼ] Dios». Óraque gúdxibe laacaʼ zudii Dios guiráʼ ni caquiiñecaʼ pa gúnicaʼ ni (Mat. 6:25-33). Laaca bisihuínnibe pabiáʼ risaca nga gúninu ni na Reinu ca ora guniʼbe: «Zeda gaca[ni] casi ti perla ni bidxela ti hombre ra canayubi perla chaʼhui para síʼ. Ora biʼya jma risaca ni que irá xixé perla la? yeutoo irá ni napa para uzíʼ ni» (Mat. 13:45, 46). Ca dxi stinu riʼ, laaca naquiiñeʼ gusisácanu dxiiñaʼ ni nápanu de gucheechenu diidxaʼ ne gacanenu binni gaca xpinni Cristu.
2 Lu guiropaʼ tema ni maʼ bidúʼndanu ca, bizíʼdinu racané espíritu santu laanu cadi guidxíbinu ora guininu ne gánnanu iquiiñenu Stiidxaʼ Dios jneza ora gucheechenu diidxaʼ. Lu tema riʼ zadúʼyanu laaca racaneni laanu cadi gusaana de gucheechenu diidxaʼ. Guidúʼyanu ximodo.
Cayaca invitar guiráʼ binni
3. Xi nisa nga cudiicabe guiráʼ binni guidxilayú.
3 Jiobá riquiiñeʼ espíritu santu para guni invitar guiráʼ binni guidxilayú (biindaʼ Apocalipsis 22:17). Guiranu cayábicabe: «Gudáʼ», ne caguucabe gana laanu guideʼnu ti clase nisa, peru cadi intiica nisa ni. Nisa ni cudiicabe laanu riʼ gadxé ni, laani nga nisa ni bizeeteʼ Jesús ora gudxi xa samaritana ni nuu ra bizé que ca diidxaʼ riʼ: «Tu gue nisa ni gudiee laa la? ma qué ziuu dxi gati nisa, purti de nisa que ziale nisa ni rudii enda nabani ni qué zaluxe» (Juan 4:14). Casi maʼ bidúʼyanu ca, cayaca invitarnu guideʼnu nisa ca, purtiʼ laani zudiini laanu guendanabani ni qué zaluxe.
4. Xii nga nisa ni rudii guendanabani, ne xiñee caquiiñeʼ binni ni.
4 Xiñee caquiiñeʼ binni nisa ni rudii guendanabani ca yaʼ. Lu relatu ni zeeda lu Biblia ridúʼyanu bicaalú Adán ne Eva Bixhózecaʼ, Jiobá (Gén. 2:16, 17; 3:1-6). Jiobá gudixhe ique cuee laacabe ndaaniʼ jardín ra gulézacabe que. Xiñee yaʼ. «Para cadi gusigaanáʼ [Adán] ne laaca guicaa cuananaxhi stiʼ yaga ni rudii guendanabani ne gó ni ne guibani dede maʼ qué chuʼ dxi gati.» (Gén. 3:22.) Pur bichee Adán ne Eva nga runi rátinu (Rom. 5:12). Peru Dios maʼ gudixhe xi caquiiñeʼ guni ca binni ni guzuubaʼ stiidxabe ti guilacaʼ de lu naʼ guendaruchee ne guendaguti ne guicaacaʼ ti guendanabani ni qué zaluxe lu Guidxilayú riʼ ora gácani ti paraísu. Guiráʼ cani maʼ gudixhe Dios pur guendaguti stiʼ Cristu, zeeda gácacani nisa ni rudii guendanabani ca (Mat. 20:28; Juan 3:16; 1 Juan 4:9, 10).
5. Tuu nga cayabi binni «gueda gué nisa ni rudii enda nabani sin quixe gastiʼ». Bisiene ni guicábiluʼ.
5 Tuu nga cayabi binni «gueda gué nisa ni rudii enda nabani sin quixe gastiʼ». Ca versículo ni zeeda ante ca caníʼcani xi chiguni Reinu stiʼ Dios lu ti mil iza. Lu ca iza ca nga chiguicaa binni guidxilayú guiráʼ cani maʼ gudixhe Jiobá para laacaʼ ne zaquiiñebe Cristu para guicaacaʼ guendanabani ni qué zaluxe. Cani gudixhe Dios guicaa binni zeeda gaca cani casi guiiguʼ «ni rudii enda nabani, ne nayaʼni dxindxi ni casi vidriu». Ne guiiguʼ ca zeeda ni de «ra nuu trono sti Dios ne sti Dendxu huiini que» (Apo. 22:1). Xi cusihuinni ca diidxaʼ ca yaʼ. Cusihuinni cani de ra nuu Jiobá nga cadá nisa ca, ne laabe cudiibe laanu guendanabani (Sal. 36:9). Ne cudiibe ni laanu pur Jesucristu, «Dendxu huiini» (Juan 1:29). Cani riquiiñeʼ Dios para cuee guiráʼ cani cayuniná binni pur bicaalú Adán laa nga ni zeeda gaca casi guiiguʼ ca. Nga runi zanda guininu Jiobá nga cayabi laanu «Gudáʼ».
6. Padxí bizulú cuxooñeʼ «guiigu [...] ni rudii enda nabani» ca.
6 Nécapeʼ lu ti mil iza ca nga jma zadxatipa «guiigu [...] ni rudii enda nabani» ca, peru dede lu iza 1914 que maʼ cuxooñeʼ nisa ndaaniʼ ni, iza que nga bizulú «dxi stiʼ Señor» ora guca «Dendxu huiini que» Rey guibáʼ (Apo. 1:10). Dede dxiqué cacaa binni guidxilayú stale cosa ni zanda gacané laacaʼ guicaacaʼ guendanabani. Guiráʼ cani huayacané binni ca bireecani lu Stiidxaʼ Dios, ni zeeda gaca casi «nisa» (Efe. 5:26). Lu dxi stiʼ Señor, guiráʼ binni zanda guiziidiʼ ca diidxaʼ nacubi ne galán ca, ne zacá nga zusihuínnicabe cacaacabe invitación ni cudii Dios laacabe de guécabe «nisa ni rudii enda nabani». Yanna, tu laa cudii laacabe invitación ca yaʼ.
«Xheela Dendxu huiini» ca na: «Gudáʼ»
7. Tuu nga cani bizulú biʼniʼ invitar binni primé, ne tu cayuni invitárcabe.
7 «Xheela Dendxu huiini» ni zeeda gaca ca xpinni Cristu ni bibí pur espíritu santu nga bizulú cayuni invitar binni primé. Peru tu cayuni invitárcabe yaʼ. Qué zanda diʼ gácani laca laacabe. Nga runi, invitación ca cayúnicabe ni sti grupu: cani chiguibani lu Guidxilayú riʼ sin qué chuʼ dxi gáticaʼ tiidiʼ si guendaridinde stiʼ «Dios ni jma nandxóʼ» (biindaʼ Apocalipsis 16:14, 16).
8. Ximodo nánnanu dede lu iza 1918 cayuni invitar ca xpinni Cristu ni bibí pur espíritu santu binni.
8 Ca xpinni Cristu ni bibí pur espíritu santu bizulucaʼ cayuni invitarcaʼ binni dede iza 1918. Iza que bidiicabe ti libana ni láʼ: «Stale de ca binni nabani yanna riʼ qué ziuu dxi gáticaʼ». Ne luni bisiénecabe zabani stale binni lu Guidxilayú riʼ ndaaniʼ ti paraísu tiidiʼ si Armagedón. Ne lu iza 1922 gupa Cani ruundaʼ Biblia ti guendaridagulisaa roʼ ndaaniʼ guidxi Estados Unidos (Cedar Point, Ohio) ne raqué guluucabe gana guiráʼ ni cucaadiaga que guiniʼcaʼ de Rey ne Reinu stiʼ. Ni guníʼcabe raqué gucaneni xcaadxi de ca binni ni zeeda gaca «xheela Dendxu huiini» guni invitarcaʼ jma binni. Lu revista riʼ, ni biree lu diidxaʼ inglés lu iza 1929, biree ti tema ni láʼ: «Ti invitación sicarú», ne zeedani lu Apocalipsis 22:17. Revista que bisiene: «Xcaadxi de ca xpinni Cristu ni bibí pur espíritu santu que laaca cayúnicaʼ invitación sicarú [ni zeeda de Dios] ne nacaʼ: “Gudáʼ”. Ca diidxaʼ riʼ naquiiñeʼ ganna ca binni ni riuulaʼdxiʼ guibani jneza ne cani racalaʼdxiʼ ganna ni dxandíʼ. Yanna nga naquiiñeʼ gácani» (The Watchtower 15 stiʼ marzo 1929). Dede yanna cadi cusaana «xheela Dendxu huiini» ca de guni invitar binni.
«Ni guna diaga la? iníʼ: Gudáʼ»
9, 10. Ximodo huaguucabe gana cani zeeda gaca «jma binni» para guni invitarcaʼ xcaadxi.
9 Yanna, xi zanda guininu de ca binni ni cucaadiaga invitación stiʼ ca binni ni bibí ca yaʼ. Caguucabe gana laacaʼ guni invitarcaʼ xcaadxi binni. Revista La Torre del Vigía stiʼ noviembre 1932 (yaza 174) bizeeteʼ ca diidxaʼ riʼ: «Cani bibí ca naquiiñeʼ uguucaʼ gana guiráʼ cani racalaʼdxiʼ gucheecheʼ ca diidxaʼ nacubi ne galán stiʼ reinu. Cadi caquiiñepeʼ gácacabe binni ni gulí Señor para gucheechecabe stiidxaʼ Señor. Nabé ratadxí ladxidóʼ ca testigu stiʼ Jiobá gánnacaʼ cudiicabe lugar laacaʼ chinecaʼ nisa ni rudii guendanabani ra nuu guiráʼ ca binni ni tiidiʼ lu Armagedón ne [guicaacaʼ] guendanabani ni qué zaluxe lu guidxilayú riʼ».
10 Revista riʼ, ni biree lu diidxaʼ inglés lu iza 1934, bisiene: Ca xpinni Cristu ni cayuni invitar cásica cayuni xheelaʼ «Dendxu huiini» que zeeda gácacaʼ casi Jehonadab, ne laacaʼ «naquiiñeʼ sánecaʼ ca binni ni zeeda gaca casi Jehú ni bibani dxiqué, o cani bibí para cheʼ guibáʼ, ne gucheechecaʼ stiidxaʼ reinu, neca cadi nácacaʼ [...] de cani bibí para cheʼ guibáʼ». (Tema riʼ bireeni lu revista diidxastiá La Torre del Vigía lu beeu enero 1935, yaza 12.) Ne lu iza 1935 bihuinni laca laacabe nga «jma binni» ni cuzeeteʼ Apocalipsis 7:9-17. Ra biénecabe nga bicaani laacabe cadi guiaanadxícabe de guni invitárcabe binni. Dede dxiqué jma maʼ stale binni cacaa invitación ca ne cadaagucaʼ «jma binni» ne maʼ nácacaʼ jma de gadxe millón. Dxandíʼ, ca binni riʼ maʼ bicaadiágacaʼ stiidxaʼ Dios ne maʼ bidiicaʼ laacaʼ laabe, maʼ guyuunísacaʼ ne tobi si canazanecaʼ xheelaʼ «Dendxu huiini» ne cayábicaʼ guiráʼ binni «gueda gué nisa ni rudii enda nabani sin quixe gastiʼ».
«Espíritu Santu» na: «Gudáʼ»
11. Ximodo gucané espíritu santu para gunda bireeche diidxaʼ lu primé siglu.
11 Lu primé siglu que, nabé gucané espíritu santu para gunda bireeche diidxaʼ. Ti biaje bicheeche Jesús diidxaʼ ndaaniʼ ti sinagoga ni nuu Nazaret. Raqué bixhélebe rollo stiʼ Isaías ne biindabe ca diidxaʼ riʼ: «Nuu né Espíritu sti Dios naa, purti ma ulí naa güe nia ca pobre diidxa ni usieche laacaʼ. Biseenda be naa gueda ndee yuuba ladxidóʼ binni, ne gabe cani nundiibi pecadu laa ximodo zanda iree ca de laani, ne usinaya cani nacheepa lú, ne ulaʼya cani cuxhii cabe laa, ne gabe binni ma bidxiña dxi gudixhe Dios para ilá caʼ». Óraque guniʼbe laabe nga cayúnibe ni na ca diidxaʼ que: «Yanadxí pe cayaca ni cá lu Xquiʼchi Dios ni bina diaga tu nagasi ca» (Luc. 4:17-21). Ne ante chebe guibáʼ, gúdxibe ca discípulo stibe ca diidxaʼ riʼ: «Ora ma ucuaa tu Espíritu Santu la? zapa pe tu enda nandxóʼ sti Dios, ne óraque ma zanda iree tu, chi güi tu stiidxa [...] idubi naca guidxilayú» (Hech. 1:8).
12. Ximodo racané espíritu santu laanu yanna para guni invitarnu binni.
12 Ximodo cayacané espíritu santu cheʼ invitación ra nuu binni ca dxi stinu riʼ yaʼ. De Jiobá nga zeeda espíritu santu ca ne riquiiñebe ni para guniibibe ladxidóʼ ca binni ni bibí pur espíritu santu ne rusiaanibe xpiaanicaʼ para guiénecaʼ Stiidxabe. Laaca riquiiñebe ni para uguube gana laacaʼ ti guni invitarcaʼ ne gusiénecaʼ Stiidxaʼ Dios cani riuulaʼdxiʼ guibani ndaaniʼ ti paraísu. Ora guiziidiʼ ca binni riʼ ni na Cristu, laaca racané espíritu stiʼ Dios laacaʼ para guni invitarcaʼ xcaadxi binni. Ne cumu riuunísacabe «lu lá espíritu santu» la? racaneni laacabe para gúnicabe dxiiñaʼ ne rudiicabe lugar gabi ni laacabe xi gúnicabe (Mat. 28:19, NM). Cásica ca xpinni Cristu ni bibí, laacabe laaca rusiidicabe binni cani zeeda lu Biblia ni gucuá pur espíritu santu stiʼ Dios. Guiráʼ cani maʼ bizéʼtenu ca cusihuínnicani pur espíritu santu nga careeche invitación ca guiráʼ ladu. Nga runi, cada tobi de laanu cudiʼnu lugar gábini laanu xi gúninu. Ximodo zanda gacané nga laanu gucheechenu diidxaʼ yaʼ.
«Espíritu ne novia que caníʼrucaʼ: “Gudáʼ”»
13. Xi rusihuinni ca diidxaʼ: «Espíritu ne novia que caníʼrucaʼ: “Gudáʼ”».
13 Ora riníʼ «Espíritu Santu ne xheela Dendxu huiini» ca «Gudáʼ» cadi ti biaje si rúnicabe ni. Verbo griegu ni biquiiñecabe raríʼ cusihuínnini cadi cusaanacabe de gúnicabe invitación ca. Nga runi, Traducción del Nuevo Mundo rutiixhi ca diidxaʼ ca sicaríʼ: «Espíritu ne novia que caníʼrucaʼ: “Gudáʼ”». Ndiʼ cusihuinni cadi cusaanacabe de guni invitárcabe binni. Ne casi maʼ bidúʼyanu, cani guicaa invitación ca laaca cadi cusaanacaʼ de guiniʼcaʼ: «Gudáʼ». Ne laaca ridúʼndanu cusisaca jma binni Dios «ridxí ne huaxhinni ndaani yuʼdu roʼ stiʼ» (Apo. 7:9, 15). Xi rusihuinni ca diidxaʼ «ridxí ne huaxhinni» ca yaʼ. Ni cusihuinni cani nga caquiiñeʼ gúninu stipa para cadi gusaana de gúninu xiixa, casi rusihuinni ejemplu stiʼ Ana, ti gunaa gola ni gudixhená dxiqué, ne stiʼ apóstol Pablu (biindaʼ Lucas 2:36, 37, Hechos 20:31 ne 2 Tesalonicenses 3:8).
14, 15. Ximodo bisihuinni Daniel gástiruʼ sti cosa jma risaca para laa que guni stipa pur cadi gusaana de guni adorar Dios.
14 Sti binni ni qué nusaana de ñuni adorar Dios nga Daniel (biindaʼ Daniel 6:4-10, 16). Ni riguixhená riʼ qué niná nuchaa modo maca naguixhe guni adorar Dios, laabe runi orarbe «chonna biaje lu ti dxi» casi «maca rúnibe». Qué ninabe nusaanabe costumbre ni gúpabe que nin ti beeu, neca nánnabe zándaca gusábacabe laabe ndaaniʼ ti bizé ra dxaʼ lión. Zaqué bisihuínnibe nezalú guiráʼ binni gástiruʼ sti cosa jma risaca para laabe que gúnibe stipa pur cadi gusaanabe de guni adorarbe Jiobá (Mat. 5:16).
15 Gudiʼdiʼ si Daniel ti gueelaʼ ndaaniʼ bizé que, guyé rey que yeguuyaʼ laabe ne na: «Daniel, xpinni Dios ni dxandíʼ, ñee gunda bilá Dios ni qué rusaanuʼ de gúniluʼ ni na ca lii de ca lión ca la?». Óraque bicabi Daniel laabe: «Señor rey, ribezaʼ guibániluʼ xadxí. Dios stinneʼ biseendaʼ ángel stiʼ para biseeguʼ ruaa ca lión ca, ne qué nuxuuxecame naa, purtiʼ qué huacheeniáʼ laabe; ne laaca qué huacheeniáʼ lii rey stinneʼ». Jiobá guluu ndaayaʼ laabe purtiʼ qué nusaanabe de ñúnibe ni na (Dan. 6:19-22).
16. Ne ejemplu stiʼ Daniel ca, xi naquiiñeʼ guinabadiidxaʼ cada tobi de laanu de modo rucheeche diidxaʼ.
16 Guyuu xquendanabani Daniel ra naxoo purtiʼ qué niná nusaana ca cosa ni runi para guni adorar Dios. Yanna laanu yaʼ. Xi guiráʼ cayúninu o racaláʼdxinu gúninu para cadi gusaana de gucheechenu diidxaʼ. Cadi naquiiñeʼ tiidiʼ nin ti beeu sin guininu de Jiobá. Naquiiñeʼ gúninu stipa pur gucheechenu diidxaʼ guiráʼ semana. Ne pa nuu xiixa guendahuará ni cucueeza laanu de gucheechenu diidxaʼ ne zanda guinínenu binni de Dios neca quince minutu si la? cadi gusaana de guni informarnu ni. Xiñee yaʼ. Purtiʼ racaláʼdxinu gacanenu espíritu santu ne xheelaʼ Dendxuʼ huiiniʼ ca lu dxiiñaʼ ni cayúnicaʼ. Guiranu naquiiñeʼ quixhe íquenu gúninu biaʼ gándatiʼ para cadi gusaana de gucheechenu stiidxaʼ Reinu.
17. Xi xcaadxi lugar zanda gucheechenu diidxaʼ.
17 ¡Ti ndaayaʼ naroʼbaʼ nga guni invitarnu binni «gueda gué nisa ni rudii enda nabani sin quixe gastiʼ»! Nga runi cadi ora si maʼ gudíxhenu gucheechenu diidxaʼ nga guni invitarnu binni. Naquiiñeʼ guinínenu binni de Dios guiráʼ ora, casi ora chisinu, chuunu de viaje, ora maʼ cayúninu dxiiñaʼ o ra scuela. Ne pa guiníʼ cani runi mandar ndaaniʼ xquídxinu cadi gucheechenu diidxaʼ la? naquiiñeʼ guyúbinu modo gúninu ni sin gudiicabe cuenta. Zanda gucheechenu diidxaʼ ti ra yoo de racá guyúbinu stobi ni nuu jma zitu o gúninu ni ratiica nuunu.
Cadi gusaana de guininu: «Gudáʼ»
18, 19. Ximodo rusihuínninu rusisácanu dxiiñaʼ ni cayuninenu Dios.
18 Maʼ raca jma de noventa iza de cayuni invitar espíritu ne xheelaʼ Dendxuʼ huiiniʼ ca binni gueeda gueʼ nisa ni rudii guendanabani. Yanna lii yaʼ. Ñee maʼ gucuaaluʼ invitación ca la? Pa maʼ gucuaaluʼ ni, rinábadu lii chineluʼ ni ra nuu xcaadxi binni.
19 Qué gánnadinu padxí nga guiluxe guni invitarnu binni. Peru nánnanu ra gúninu zacá cayacanenu Dios lu dxiiñaʼ stiʼ (1 Cor. 3:6, 9). Ni racaláʼdxinu nga gusihuínninu rusisácanu dxiiñaʼ sicarú ni cudiibe laanu. Nga runi, «cadi guiaana dxí nu de usisaca nu Dios» ra cadi gusaana de gucheechenu diidxaʼ (Heb. 13:15). Cásica pa nácanu de ca binni ni zeeda gaca xheelaʼ Cristu o pa nuunu lade jma binni ni chiguibani lu Guidxilayú riʼ, cadi naquiiñeʼ gusaana de guni invitarnu binni «gueda gué nisa ni rudii enda nabani sin quixe gastiʼ».
Xi maʼ bizíʼdinu
• Tuu nga cayábicabe: «Gudáʼ».
• Xiñee zanda guininu de Jiobá nga zeeda invitación riʼ.
• Ximodo cayacané espíritu santu laanu para guni invitarnu binni.
• Xiñee naquiiñeʼ gúninu stipa pur cadi gusaana de gucheechenu diidxaʼ.
[Guendarinabadiidxaʼ stiʼ párrafo]
[Tabla ne dibuju/foto ni zeeda lu yaza 16]
Cadi cusaanacaʼ de guiniʼcaʼ: «Gudáʼ»
1914
5,100 ni rucheeche diidxaʼ
1918
Zabani stale binni ndaaniʼ ti paraísu sin qué chuʼ dxi gáticaʼ
1922
Laguiníʼ, laguiníʼ, laguiníʼ de Rey ne de reinu stiʼ
1929
Xcaadxi de cani bibí caniʼcaʼ: «Gudáʼ»
1932
Cadi cani bibí ca si nga nápacaʼ dxiiñaʼ de guiniʼcaʼ «Gudáʼ»
1934
Guca invitar ca xpinni Cristu ni zeeda gaca casi Jehonadab gucheechecaʼ diidxaʼ
1935
Bihuinni tuu nga cani zeeda gaca «jma binni»
2009
7,313,173 ni rucheeche diidxaʼ