Ni rinabadiidxaʼ cani ruundaʼ

Pora nga zanda guiníʼ ique ti binni chúʼnisa sti biaje.

Zándaca tuuxa guiníʼ ique caquiiñeʼ guinabaʼ chúʼnisa sti biaje, purtiʼ para laa qué nisaca ni biʼniʼ primé que. Xiñee yaʼ. Zándaca purtiʼ dxi mayaca chuʼnísabe que cayúnibe xiixa ni cadi jneza o xiixa ni nagaʼchiʼ, ne pa ñaca maʼ nácabe xpinni Cristu ñándaca nibeecabe laabe ndaaniʼ xquidxi Dios. Ñee rábiluʼ jneza nudiibe laabe Dios neca cucheebe que la? Coʼ. Primeru naquiiñeʼ nusaanabe de ñúnibe ni cadi jneza, oracaruʼ nudiibe laabe Dios para ñanda nisaca ni bíʼnibe que. Pa guyuunísabe neca cayúnibe ni cadi jneza, galán guiníʼ íquebe guibiguetaʼ chúʼnisabe.

Yanna guzéʼtenu sti ejemplu gadxé de ni guninu ca: dxi guyuunisa ti ni rucheeche diidxaʼ cadi cayuni xiixa cosa malu, peru despué bíʼnibe xiixa ni rinabaʼ chuʼbe nezalú ti comité judicial. Ñee zanda guiniʼbe qué nisaca ora guyuunísabe que purtiʼ si qué ñene chaahuibe xiñee ngue cayuunísabe la? Primé la? ora cayaca ti comité judicial cadi naquiiñeʼ guiníʼ ca binnigola ca zándaca cadi jneza biʼniʼ xpinni Cristu ca guyuunisa, ne laaca cadi naquiiñeʼ guinabadiidxacabe laabe xi riníʼ íquebe de laani. Xiñee yaʼ. Purtiʼ dxi guyuunísabe bicaadiágabe ti libana zeeda lu Biblia ni cuzeeteʼ xiñee nabé risaca nga ni gudixhe íquebe gúnibe que. Ne ora bíʼnicabe laabe chupa guendarinabadiidxaʼ de ni caníʼ ora gudii binni laa Dios ne ora chichuunisa, guniʼbe nánnabe xi cayúnibe. De raqué bichaabe lari ne guyuunísabe. Nga runi, zanda guininu nanna dxíchibe xi cayúnibe. Ne pur nga naquiiñeʼ guʼyaʼ ca binnigola ca laabe casi ti xpinni Cristu ni maʼ guyuunisa.

Pa binni ca guiníʼ ique qué ganna pa jneza nga ni biʼniʼ dxi guyuunisa la? ca binnigola ca zanda guinábacabe laabe gúʼndabe revista La Atalaya 15 stiʼ agosto 1960, yaza 511, ne 15 stiʼ julio 1964, yaza 443 dede 446, ni cusiene chaahuiʼ de tema ca. Ne pa tuuxa gacalaʼdxiʼ chúʼnisa sti biaje pur xiixa razón ni napa (zándaca purtiʼ qué ñene chaahuibe cani rusiidiʼ Biblia dxi guyuunísabe que), maʼ de laabe riaanani.

Xi guiráʼ naquiiñeʼ guʼyaʼ ti xpinni Cristu ni chindezané sti binni ndaaniʼ tobi si yoo.

Guiráʼ binni caquiiñeʼ ti lugar ra cueza, peru stale de laacaʼ qué gápacaʼ lídxicaʼ. Ca dxi nabáninu riʼ, stale binni qué gapa bueltu para gucuí lidxi, huaracaʼ ne cadxagalucaʼ xcaadxi guendanagana, nga runi nuu tu laa, neca qué naʼ, ribezané sti binni ndaaniʼ tobi si yoo neca maʼ familia zitu laacaʼ. Ndaaniʼ caadxi guidxi, cadi guendaridxagayaa diʼ nga cueza chupa chonna familia neca lade bola ndaaniʼ ti cuartu si, ne qué rápacabe lugar para chúʼcabe stúbicabe.

Cadi naquiiñeʼ cuézanu gudii xquidxi Jiobá laanu ti lista ra cá xipeʼ gúninu ora guyúbinu ti yoo ra chindézanu, purtiʼ cadi laadini nga naquiiñeʼ gábini laanu xi gúninu. Peru naquiiñeʼ gábini guiráʼ ca xpinni Cristu gúʼyacaʼ xiná ca conseju ni zeeda lu Biblia, ti gacaneni laacaʼ gúʼyacaʼ pa nabánicaʼ modo riuulaʼdxiʼ  Dios. Gunáʼ nga caadxi de ca conseju ca yaʼ.

Ti cosa nabé risaca ni naquiiñeʼ gúʼyacabe nga xi zándaca gucaa ca binni ni nabezanécabe laacabe gúnicabe ne pa qué zuxheleʼ ca binni ca laacabe de Dios. Tu ca binni ca yaʼ. Ñee xpinni Jiobá laacabe la? Nabánicabe modo rusiidiʼ Biblia la? Qué chuʼ dxi guiaandaʼ laanu conseju bidii apóstol Pablu riʼ: «Cadi udii tu lugar chuʼ tu quite Iaatu. Casi na cabe: “Pa idxaagu ni nadxaba la? zacá ni lii”» (1 Cor. 15:33).

Stiidxaʼ Dios laaca cusiene chaahuiʼ laanu qué riuulaʼdxiʼ Jiobá gapa binni xnadxii ne chuʼné ni cadi xheelaʼ (Heb. 13:4). Jiobá qué riuulaʼdxiʼ cueza chupa chonna binni ndaaniʼ tobi si yoo purtiʼ zándaca guibani ti hombre ne ti gunaa ni caʼruʼ guichaganáʼ juntu casi ñaca maʼ bichaganacaʼ. Ti xpinni Cristu cadi naquiiñeʼ cueza ndaaniʼ ti yoo ra rudiicabe lugar chuʼné binni ni cadi xheelaʼ.

Ne Biblia caguixhená guiráʼ ca binni ni riuulaʼdxiʼ guni ni na Dios ne ca diidxaʼ riʼ: «Lausaana enda rapa jnadxii» (1 Cor. 6:18). Nga runi, cadi jneza nga quixhe ique tuuxa chindeza sti lugar ra nabeza xcaadxi binni ra zándaca chuʼné ni cadi xheelaʼ. Guzéʼtenu ti ejemplu. Pa nindeza caadxi xpinni Cristu ndaaniʼ tobi si yoo, ñee ziuu xiixa ni gucaa laacabe gucheecabe la? Xi nizaaca pa málasi niree ca binni ni nabeza raqué ne ñaana chupa binni ni cadi xheelacaʼ stúbisicaʼ yaʼ. Laaca zándaca gueeda guchee chupa binni ni caʼruʼ guichaganáʼ pa nabézacaʼ ndaaniʼ tobi si yoo ne riuulaʼdxisaacaʼ. Peru zusihuínnicabe nuu xpiaanicabe pa qué gudiicabe lugar guizaaca cani maʼ guninu ca.

Laaca cadi jneza cueza chupa binni ni maʼ guca divorciar ndaaniʼ tobi si yoo. Xiñee yaʼ. Cumu maʼ gulézacabe juntu casi xheelacabe la? zándaca gatanebe binni ca sti biaje (Pro. 22:3).

Laaca nuu sti cosa risaca naquiiñeʼ guietenaláʼdxicabe: xi riníʼ ique ca xpecínucabe. Neca para ti xpinni Cristu gastiʼ naca cuezané xcaadxi binni, peru zándaca pur nga guiníʼ ca xpecínube mal de laabe. Qué racaláʼdxinu gaca nga, purtiʼ qué gápanu gana guiníʼ binni mal de Jiobá pur ni gúninu. Guiranu racaláʼdxinu chinándanu conseju stiʼ Pablu riʼ: «Cadi guni tu gasti ni uchenda ca judíu, nin ca binni ni cadi judíu, nin ca xpinni Dios, sínuque laguni casi runeʼ: ruyube ni chuʼlaʼdxi irá cabe. Qué ruyube ni acané naa siaʼ, sínuque ni acané stale binni, ti ilá caʼ» (1 Cor. 10:32, 33).

Dxandíʼ, nuu tiru zaca nagana para laanu gúninu cásipeʼ modo na ca conseju stiʼ Jiobá ora guyúbinu ti lugar ra cuézanu. Peru guiráʼ ca xpinni Cristu naquiiñeʼ guyúbicaʼ gánnacaʼ «xii nga riulaʼdxi Señor». Naquiiñeʼ chúʼcabe seguru cadi gaca xiixa ni cadi jneza ndaaniʼ lídxicabe (Efe. 5:5, 10). Para nga naquiiñeʼ guinábacabe Dios gabi laacabe xi gúnicabe, ne gúnicabe stipa para gápacabe laacabe, cadi guiníʼ binni mal de laacabe ne cadi guni biidicabe lá Jiobá.