Gúninu stipa pur gápanu «ladxidoʼno nayá» lú ca últimu dxi riʼ

TI PERIODISTA católicu ni láʼ Vittorio Messori bizeeteʼ rihuinni dxíchica ndaaniʼ religión católica riuuné ca cura ca ni cadi xheelacaʼ neca bidii stiidxacaʼ qué zachaganacaʼ. Nga bizeetebe ora caniʼbe de ca xaíque stiʼ yuʼduʼ católicu ndaaniʼ guidxi Italia ni guyuunecaʼ ni cadi xheelacaʼ. De racá guniʼbe: «Ne para guni chaahuicabe ni maʼ guninu ca la? cadi caquiiñeʼ si guiree ley ra na cadi guichaganáʼ ca xaíque yuʼduʼ ca, purtiʼ lu 80% de cani huazaaca ndaaniʼ ca yuʼduʼ ca rihuinni muxeʼ ca cura ca ne rilaxoocabe hombre ne hombrehuiiniʼ» (La Stampa).

Guiráʼ ni qué iquiiñeʼ ni cayaca yanna riʼ cusihuínnicani nabáninu lu ca últimu dxi (2 Tim. 3:1-5). Lu ca noticia ca rihuinni cadi stale si binni nga ni cayuni cosa dxabaʼ, sínuque dede ne ca binni ni na zinanda Dios peru rudiicaʼ lugar gaca yuudxuʼ ladxidoʼcaʼ ne nga rucaa laacaʼ gúnicaʼ stale cosa dxabaʼ (Efe. 2:2). Ne Jesús peʼ guníʼ «de ndaani ladxidóʼ cabe reeda ni cadi jneza ni cá ique cabe guni cabe: guuti cabe binni, o chuʼ né cabe ni cadi xheela cabe, gapa cabe jnadxii cabe, cuana cabe, indisa cabe falsu luguiá stobi, cuʼ dí cabe binni» (Mat. 15:19). Peru Jiobá racalaʼdxiʼ guʼyaʼ binni nayá ladxidóʼ ca xpinni (Pro. 22:11). Xi zanda gúninu para chuʼ ladxidoʼno nayá neca nabáninu lu ca dxi nagana riʼ yaʼ.

Xii nga riníʼ gaca «ladxidoʼno nayá»

Nuu biaje ora ruzeeteʼ Biblia de ladxidóʼ cadi caníʼdini de ladxidoʼno ni nápanu lu xcuérpunu ca. Ti libru ni láʼ Compendio del diccionario teológico del Nuevo Testamento, na diidxaʼ griegu para ladxidóʼ ca riquiiñecabe ni para guiníʼcabe de «ni nuu ndaaniʼ ladxidoʼno» ne laani nga «ni jma risaca para Dios, ni zanda gacané laanu guidxíñanu laabe ne gúninu ni jneza». Casi maʼ bidúʼyanu ca, ladxidoʼno ca nga ni rusihuinni ximódopeʼ laanu. Ne casi bizeeteʼ libru ni gúninu ca, Jiobá ruuyaʼ xi nuu ndaaniʼ ladxidóʼ ca xpinni ne nga nga ni rusisácabe stale (1 Ped. 3:4).

Lu Biblia nuu biaje riquiiñeʼ diidxaʼ nayá ca para guieeteʼ de xiixa ni cadi nabiidiʼ. Peru laaca riquiiñeʼ Biblia diidxaʼ nayá ca para guiniʼni de xiixa ni jneza, o para guiniʼni cadi gúninu cosa dxabaʼ, cásica lu xquendanabáninu ne zaqueca modo runi adorarnu Dios. Casi lu libana bidii Jesús lu dani que guniʼbe nayecheʼ nga cani «nayá ladxidóʼ» ne qué rucaachicaʼ tu laacaʼ (Mat. 5:8). Ca binni zacá nayá modo riníʼ íquecaʼ ne nayá ladxidoʼcaʼ, ne guizáʼ nadxiicaʼ Jiobá ne nabé rudiicaʼ xquíxepeʼ laabe (Luc. 10:27). Cadi dxandíʼ guiranu racaláʼdxinu gácanu zacá la?

Nagana raca para laanu gápanu «ladxidoʼno nayá»

Ti xpinni Jiobá cadi naquiiñeʼ si gusaana de guni cosa dxabaʼ, sínuque laaca naquiiñeʼ guʼyaʼ chuʼ ladxidóʼ nayá (Sal. 24:3, 4). Peru zeʼ dxi jma nagana cayaca para laanu gápanu ladxidoʼno nayá, purtiʼ cudxíʼlunu Binidxabaʼ ne ca xpinni, ne zaqueca cani ruquiinde beela ládinu laanu gúninu. Para cadi guixélenu de Jiobá, naquiiñeʼ gánnanu pabiáʼ risaca nga gúninu stipa para cadi gusaana de chuʼ ladxidoʼno nayá. Zacá zápanu laanu ne qué zudiʼnu lugar chuʼ xiixa ni guxheleʼ laanu de Dios. Peru xi naquiiñeʼ gúninu para gápanu ladxidoʼno nayá yaʼ.

 Hebreos 3:12 caguixhená laanu ne ca diidxaʼ riʼ: «Yanna hermanu caʼ, laguuya gá laatu, cadi laca aca ladxidóʼ to nadxabaʼ ne qué guni cre tu Dios ni nabani, pacaa zaxele tu de laa». Qué zanda diʼ gápanu ladxidoʼno nayá pa qué gápanu fe Dios. Nga runi, Binidxabaʼ cayuni stale cosa para gucaa laanu gusaananu de gápanu fe Jiobá. Xii nga cani rúnibe yaʼ. Caadxi de cani rúnibe nga rucaabe binni guiníʼ ique cosa ni cadi jneza, cásixa ora rusiidicabe zeedanu de maniʼ ne nácabe gastiʼ ti ley ra caníʼ xii nga ni jneza ne ni cadi jneza, ne riníʼcabe stale cosa para cadi guni crenu de Dios zeeda cani cá lu Biblia. Qué zanda diʼ gudiʼnu lugar guicá modo riníʼ ique ca binni ca laanu ne guninácani laanu (Col. 2:8). Tobi de ca cosa ni zacané laanu para cadi guiníʼ íquenu zacá nga guidúʼndanu Biblia guiráʼ dxi ne guiníʼ íquenu ni nani. Pa gunibiáʼ chaahuinu Stiidxaʼ Dios la? jma zannaxhiinu Jiobá ne jma ziénenu ximodo laabe ne binni. Zacatiʼ nga zanda gucáʼnanu modo riníʼ ique binni guidxilayú ne gaca fe stinu naguidxi, ne nga zacané laanu gaca ladxidoʼno nayá (1 Tim. 1:3-5).

Xi gúninu ora uquiinde laanu gúninu ni cadi jneza

Sti cosa ni rucaa laanu cadi gaca ladxidoʼno nayá nga cani ruquiinde beela ládinu laanu gúninu ne guicá íquenu gápanu bidxichi (1 Juan 2:15, 16). Ti xpinni Cristu ni chuulaʼdxiʼ gapa stale bidxichi ne guyubi gapa stale cosa la? zanda gusiúʼdxuni ladxidoʼno ne gucaani laanu gúninu cosa ni que riuulaʼdxiʼ Dios. Nuu tu laa qué runi ni jneza ra dxiiñaʼ stiʼ, rusiguiicaʼ dede ribáʼnacaʼ bueltu ne cosa stiʼ sti binni (1 Tim. 6:9, 10).

Peru ca binni ni nayá ladxidóʼ ca rihuinni riuuláʼdxicaʼ gúnicaʼ ni jneza, ridxíbicaʼ gucheenecaʼ Jiobá ne riguixhe íquecaʼ chuʼ xquendabiaanicaʼ nayá. Nga rucaa laacabe gúnicabe ni jneza (Heb. 13:18). Ne modo rúnicabe ca rucaacabe binni chuulaʼdxiʼ ganna de Jiobá, casi rihuínnini lu ni bizaaca Emilio, ti Testigu ni rusá carru stiʼ ti compañía ndaaniʼ guidxi Italia. Ti dxi bidxélabe ti cartera ra nuu 470 euro (biaʼ 680 dólar) ne yesaanabe  ni ra nuu hombre ni ruuyaʼ dxiiñaʼ ni raca ndaaniʼ compañía ca, ne hombre ca bidxiguetaʼ ni binni ni biniti ni. Bidxagayaacabe ni biʼniʼ Emilio, ngue runi caadxi de ca xcompañérube bizulú biindacaʼ Biblia. Yanna la? lade chupa familia gadxe de laacaʼ maʼ cayuundacaʼ Biblia. Rihuinni dxíchica ora runi ca binni ni nayá ladxidóʼ ca jneza zanda gucaacaʼ binni gusisaca Dios (Tito 2:10).

Yanna riʼ stale binni cadi malu diʼ ruuyacaʼ chuʼné binni tuuxa ni cadi xheelaʼ ne gaca tuuxa muxeʼ, ne nga zanda gucaa ca xpinni Cristu gúʼyacaʼ cadi malu ca cosa ni cayúnicabe ca. Ne nga zándaca gucaa laacabe chuʼ cosa feu ndaaniʼ ladxidóʼcabe. Ne ca binni ni riuuné ni cadi xheelaʼ rucaachicaʼ ni bíʼnicaʼ ne rucaani laacaʼ gucaachicaʼ tu laacaʼ ne ora gúnicaʼ zacá maʼ qué riuudiʼ ladxidoʼcaʼ nayá.

Ti hombre Testigu ni lá Gabriele guyuunisa dxi napa 15 iza ne despué de nga nagueendaca gúcabe precursor. Peru despué bizulube gúpabe xhamígube ni qué runi ni jneza ne bizulube guyebe ndaaniʼ ca cabaré (Sal. 26:4). Zacá bizulube bíʼnibe cosa dxabaʼ lu xquendanabánibe ne bicaachibe xi cayúnibe ne pur nga despué bireebe de ndaaniʼ xquidxi Dios. Peru ora guluu jnézacabe laabe bidiibe cuenta naquiiñeʼ guchaabe. Sicaríʼ guniʼbe: «Chaahuidugá bineʼ ca cosa ni bisaanaʼ de guneʼ dxiqué. Bizuluáʼ biindaʼ Biblia, para ganda guieneʼ xi guiráʼ napa jiobá gana gusiidiʼ naa, ne guleeʼ tiempu para guundaʼ chaahueʼ guiráʼ ca libru ne revista ni rudii xquídxibe laanu. Bidieeʼ cuenta pabiáʼ ribeendú binni ni galán ora guʼndaʼ Biblia stubi si. Laaca bidieeʼ cuenta ora guʼndaʼ binni Biblia ne guni orar Dios rudiicani stipa laanu biaʼ caquiiñenu». Guiráʼ nga gucané laabe gusaanabe ca cosa malu ni bíʼnibe ne chuʼbe gaxha de Jiobá.

Yanna maʼ naca Gabriele precursor sti biaje ne xheelabe laaca maʼ naca precursora. Ni bizaacabe ca rusiidini laanu ora guidúʼndanu Biblia ne ca libru ne revista ni rudii «mozo ni nuu xpiaani ne ni runi jneza» ca nabé racanécani laanu chuʼ ladxidoʼno nayá ne laaca racanécani laanu cadi chúʼnenu ni cadi xheelanu (Mat. 24:45; Sal. 143:10).

Ximodo zanda chuʼ «ladxidoʼno nayá» ora cadídinu ra nagana

Nuu xpinni Cristu qué runi sentircaʼ galán o dede nabé riuucaʼ triste pur ca cosa ni rucaa binnilídxicaʼ ni cadi Testigu laacaʼ gúnicaʼ, pur guendapobre ne pur xiixa guendahuará ni naxoo. Rey David laaca biʼniʼ sentir zacá. Laabe guniʼbe: «Triste guyuu ladxiduáʼ; casi ñaca nuzuhuaadxí ladxiduáʼ» (Sal. 143:4). Xi gucané laabe para maʼ cadi chuʼbe zacá yaʼ. Ni gucané laabe nga ora bietenaláʼdxibe modo gucané Dios laabe ne ora bietenaláʼdxibe modo gucané Dios xcaadxi xpinni dxiqué. David laaca guníʼ ique guiráʼ ni bizáʼ Dios ne guiráʼ ni biʼniʼ Dios para guisaca lá (Sal. 143:5). Zacaca nga laanu, pa guiníʼ íquenu de Dios ne lu guiráʼ ni maʼ bíʼnibe ne guiráʼ ni cayúnibe pur laanu la? nga zacané laanu ora maʼ cadídinu ra nagana.

Ñee huayuni sentirnu triste pur xiixa ni biʼniʼ tuuxa xpinni Cristu laanu la? Pa nápanu razón para guni sentirnu zacá o pa coʼ la? zándaca gápanu xiana laabe ne maʼ cadi jneza cani zaníʼ íquenu de laabe pa qué gusiáʼndanu cani bíʼnibe laanu. Ne dede zanda gucaa nga laanu guixélenu de binni. Pa gúninu zacá, ñee raʼbuʼ nayá nuu ladxidoʼno la? Coʼ. Nga runi para chuʼ ladxidoʼno nayá la? naquiiñeʼ gápanu cuidadu modo guinínenu ca xpinni Cristu.

Ndaaniʼ guidxilayú riʼ nabé runi binni stale cosa dxabaʼ, nga runi rudii binni cuenta nayá ladxidoʼno, ca xpinni Cristu, ne ribeendunu stale cosa galán pur rúninu zacá. Tobi de cani ribeendunu nga ratadxí ladxidoʼno gánnanu cayúninu ni na Dios. Ne ni jma risaca nga jma gaxha riuʼnu de Jiobá, purtiʼ laabe nadxiibe cani «nayá ladxidóʼ» (Sal. 73:1). Nga runi, pa gúninu stipa pur chuʼ «ladxidoʼno nayá» la? ziuʼnu lade ca binni ni guníʼ Jesús ziuucaʼ nayecheʼ ne «zuuya[caʼ] Dios», ne nga riníʼ zuuyacabe ora gúnibe xiixa pur laacaʼ (Mat. 5:8).