Sanu modo rusiidiʼ espíritu santu ne guibáninu casi bidii stiidxanu

«[Cadi gusaana de satu] modo rusiidi Espíritu Santu laatu, ne óraque ma qué zinanda tu ni na ique tu.» (GÁL. 5:16)

1. Xi chupa clase de guendariuunisa guca lu saa stiʼ Pentecostés.

 DXI guca saa stiʼ Pentecostés lu iza 33, ca discípulo stiʼ Jesús guyuunísacaʼ pur espíritu santu ne óraque bizulú guníʼcabe gadxé gadxé diidxaʼ (1 Cor. 12:4-10). Despué bidii Pedru ti libana nabé sicarú. Xi bicaani ca binni ni nuu raqué gúnicaʼ yaʼ. Stale de laacabe «ucaná ladxidóʼ cabe», bíʼnicabe ni na apóstol que, guca arrepentírcabe ne guyuunísacabe. Historia ni zeeda lu Biblia na: «Cani ucuaa stiidxa be la? uyuu nisa, ne biaʼ chonna mil binni bini cre Cristu dxi que» (Hech. 2:22, 36-41). Ra guyuunísacabe «lu lá Bixhozeʼ, ne lu lá Xiiñiʼ ne lu lá espíritu santu» bisihuínnicabe cuzuubacabe stiidxaʼ Jesús (Mat. 28:19, NM).

2, 3. 1) Bisiene xiñee gadxé nga chúʼnisa binni pur espíritu santu ne gadxé nga chúʼnisa binni lu lá espíritu santu. 2) Xiñee caquiiñeʼ chúʼnisanu para gácanu xpinni Cristu.

² Ñee gadxé nga chúʼnisa binni pur espíritu santu ne gadxé nga chúʼnisa binni lu lá espíritu  santu la? Gadxé pue. Cani chúʼnisa si pur espíritu santu reeda gálecaʼ sti tiru casi xiiñiʼ Dios ne óraca nga ribibe laacaʼ pur espíritu santu (Juan 3:3). Ne laaca bibícabe para gácacabe rey ne ni ruzaaquiʼ guʼxhuʼ lu Reinu stiʼ Dios ni nuu guibáʼ ne reeda gácacabe casi cuerpu stiʼ Cristu (1 Cor. 12:13; Gál. 3:27; Apo. 20:6). Jiobá bizulú caguunisa binni pur espíritu santu dede dxi guca saa Pentecostés que para cuibe cani guni mandarné Cristu (Rom. 8:15-17). Yanna, xi rusihuinni tuuxa ora riuunisa lu lá espíritu santu casi raca lu ca guendaridagulisaa roʼ ni runi ca testigu stiʼ Jiobá yaʼ.

³ Ora riuunisa tuuxa rusihuinni maʼ bidii laa Jiobá de guidubi ladxidóʼ. Ca binni ni bibí para cheʼ guibáʼ gupa xidé guyuunísacaʼ lu lá espíritu santu ne zaqueca huayuni millón de hombre ne gunaa ni cabeza guibani sin qué chuʼ dxi gati lu Guidxilayú riʼ. Cásica cani cheʼ guibáʼ ne cani chiguibani lu Guidxilayú riʼ caquiiñeʼ chúʼnisacaʼ «lu lá Bixhozeʼ, ne lu lá Xiiñiʼ ne lu lá espíritu santu» para chuulaʼdxiʼ Dios ni gúnicaʼ. Peru laaca naquiiñeʼ saʼ guiráʼ xpinni Cristu «modo rusiidi Espíritu Santu» despué de maʼ guyuunísacaʼ (biindaʼ Gálatas 5:16). Guinabadiidxanu laca laanu: «Ñee canazayaʼ modo rusiidiʼ espíritu ne nabaneʼ casi maʼ bidiéʼ stiidxaʼ Jiobá la?».

Xi riníʼ ca diidxaʼ cadi gusaana de satu «modo rusiidi Espíritu Santu»

4. Ximodo rizanu casi «rusiidi Espíritu Santu».

⁴ Ca diidxaʼ cadi gusaana de satu «modo rusiidi Espíritu Santu» ca riníʼcani gudiʼnu lugar iquiiñeʼ Dios stipa stiʼ para gabi laanu xi gúninu lu xquendanabáninu. Espíritu ca racaneni laanu lu cani rúninu guiráʼ dxi. Lu capítulo 5 stiʼ Gálatas cuzeeteʼ gadxé nga gudiʼnu lugar gabi espíritu santu laanu xi gúninu ne gadxé nga gúninu ni na íquenu (biindaʼ Gálatas 5:17, 18).

5. Xi cadi naquiiñeʼ gúninu para gusihuínninu qué rúninu ni na íquenu.

⁵ Cani nabani modo na espíritu ca rúnicaʼ stipa pur cadi gúnicaʼ ni na íquecaʼ, o cani racalaʼdxiʼ beela ládicaʼ gúnicaʼ. Ne lade cani nga nuu ni «riuu né ni cadi xheelaʼ, ricá ique ni nadxabaʼ, ne nisi nga si ruyubi guni. Rusisaca bidóʼ ne runi brujeriá. Raca nanalaʼdxi stobi ne ruyubi diidxaʼ, ne rapa envidia, ne ruyubi para laa si. Gasti si acaʼ maca cadxiichi, ne ruyubi xpinni. Rizabilaʼdxi sti stobi [...]. Rixudxi, ne rizá gueelaʼ» (Gál. 5:19-21). Zanda guininu ca xpinni Cristu ca rusaanacaʼ de «ibani[caʼ] modo na ique[caʼ]». Ximodo rúnicabe ni yaʼ. Pur «Espíritu Santu» (Rom. 8:5, 13). Cumu qué rudiicabe lugar gúnicabe ni ná íquecabe la? qué raca nagana para laacabe guiníʼ íquecabe modo rusiidiʼ espíritu ne gúnicabe ni nani.

6. Ximodo zanda gusihuínninu ca guenda ni rudii espíritu santu. Biquiiñeʼ ti ejemplu para gusiéneluʼ ni.

⁶ Ra gacané stipa stiʼ Dios laanu, zanda gápanu guiráʼ ca guenda ni riuulaʼdxiʼ Dios (Gál. 5:22, 23). Dxandíʼ, cada tobi de laanu nanna naquiiñeʼ guni stipa. Gusiénenu ni ne ejemplu stiʼ ti hombre runi dxiiñaʼ lu layú. Para ganda guiroobaʼ ni gudxiibabe la? caquiiñeʼ ni nisa ne gubidxa. Sin laacani qué zanda diʼ guindísabe cosecha stibe. Espíritu santu ca zeeda gácani casi gubidxa, purtiʼ sin laani qué zanda diʼ gusihuínninu ca guenda ni rudii espíritu stiʼ Dios. Peru pa qué guicá ique hombre ca guni dxiiñaʼ la? qué zanda guindisaʼ cosecha stiʼ (Pro. 10:4). Para gusihuínninu ca guenda ni rudii espíritu santu biá gándatiʼ lu xquendanabáninu ne gúninu cani jneza la?  naquiiñeʼ guʼyaʼ chaahuinu xi cudxíʼbanu lu layú stinu, ni zeeda gaca ladxidoʼno. Nga runi, galán guinabadiidxanu laca laanu: «Ñee rudieeʼ lugar gacané espíritu santu naa para ganda gusihuinneʼ ca guenda stini lu xquendanabaneʼ la?».

7. Pa racaláʼdxinu gápanu ca guenda ni rudii espíritu santu ca, xiñee caquiiñeʼ cueenu tiempu para guidúʼndanu ne guiníʼ íquenu de laani.

⁷ Para ganda gudii ni gudxíʼbanu la? caquiiñeʼ ni nisa. Zacaca nga rizaaca ora gacaláʼdxinu gápanu guenda ni rudii espíritu ca: caquiiñeʼ guizíʼdinu cani rusiidiʼ Biblia ni zeeda gaca casi nisa ne zanda guidxélanu ni ndaaniʼ neza binni ridagulisaa (Isa. 55:1). Zándaca maʼ huasiénenu stale biaje gucuá Stiidxaʼ Dios pur espíritu santu, ne zanda guiénenu ni zeeda luni pur guiráʼ ni rudii mozo ni nuu xpiaaniʼ ne ni runi jneza laanu (Mat. 24:45-47; 2 Tim. 3:16). Nga rusihuinni pa racaláʼdxinu gacané espíritu santu laanu la? caquiiñeʼ guidúʼndanu Stiidxaʼ Dios ne guiníʼ íquenu ni guidúʼndanu. Pa gúninu zacá la? zusihuínninu cayúninu casi biʼniʼ cani riguixhená ni bibani dxiqué, purtiʼ laacaʼ «nabé undaa ique né[caʼ] ñene[caʼ]» guiráʼ ni maʼ bisihuinni Dios dxiqué. Laaca zinándanu ejemplu stiʼ ca ángel stiʼ Dios purtiʼ laacaʼ guyuuláʼdxicaʼ ñánnacaʼ guiráʼ ni bisiene Dios para bihuinni tuu nga binni ni za de gunaa que ne cani bibí pur espíritu santu (biindaʼ 1 Pedro 1:10-12).

Ximodo racané espíritu santu laanu

8. Xiñee caquiiñeʼ guinábanu Jiobá espíritu stiʼ.

⁸ Dxandíʼ, cadi caquiiñeʼ si guidúʼndanu ne guiníʼ íquenu de laani. Laaca cadi naquiiñeʼ gusaana de guni orarnu para guinábanu gacané Dios laanu ne uguu jneza laanu, purtiʼ «laa zanda guni jma que biaʼ iníʼ ique nu inaba nu laa» (Efe. 3:20; Luc. 11:13). Peru zándaca chuʼ tu guníʼ: «Xiñee caquiiñepeʼ guinabaʼ ca xpinni Cristu xiixa Dios pa maʼ nánnabe xi caquiiñenu ante guinábanu ni laabe yaʼ» (Mat. 6:8). Purtiʼ ora rinábanu laabe espíritu santu rusihuínninu runi crenu zacanebe laanu. Guiníʼ íquenu xi rucaa laanu gacanenu tuuxa binni. Ñee cadi dxandíʼ rúninu ni purtiʼ riéchenu runi cré binni ca zanda gúninu xiixa pur laa ne gunábabe laanu gacanenu laabe la? (Zanda gúʼndaluʼ Proverbios 3:27.) Zacaca runi sentir Jiobá, laabe riéchebe ora ridxíñanu ra nuube para guinábanu laabe gudiibe laanu espíritu stibe ne nánnanu zudiibe ni laanu (Pro. 15:8).

9. Ximodo racané ca guendaridagulisaa ca laanu guicaanu espíritu stiʼ Dios.

⁹ Sti cosa ni zanda gúninu ti gacané espíritu santu laanu nga chuunu ca guendaridagulisaa ni rápanu guiráʼ semana ne ca guendaridagulisaa roʼ. Caquiiñeʼ gúninu stipa pur cadi guiáʼdxanu nin tobi de laacani ne gucaadiáganu ora maʼ nuunu racá. Zacá ziénenu «irá ni riguixhe Dios, dede ni jma nagana» (1 Cor. 2:10). Galán nga cadi gusaana de guicábinu lu ca guendaridagulisaa ca. Zándaca guinabadiidxanu laca laanu: «Lu guidapaʼ semana gudiʼdiʼ ca, panda biaje gundisaʼ nayaʼ para guicabeʼ ne guiniéʼ nezalú guiráʼ cani nuu raqué de cani runeʼ cré yaʼ. Ñee zanda guicabeʼ jma galán la?». Pa caquiiñeʼ gúninu nga, galán quixhe íquenu gúninu ni ca semana ni zeeda ca. Jiobá zuuyaʼ racaláʼdxinu guicábinu lúcani ne zaquiiñebe espíritu stibe para gacanebe laanu guizíʼdinu jma lu ca guendaridagulisaa ca.

10. Xi invitación runi cani canazá casi rusiidiʼ espíritu santu.

 ¹⁰ Para ganda sa binni casi rusiidiʼ espíritu santu caquiiñeʼ guicaa invitación ni zeeda lu Apocalipsis 22:17: «Na Espíritu Santu ne xheela Dendxu huiini que: Gudáʼ. Ne ni guna diaga la? iníʼ: Gudáʼ. Ni cayati nisa la? gueda gué nisa ni rudii enda nabani sin quixe gastiʼ». Espíritu ca riquiiñeni «xheela Dendxu» (ca xpinni Cristu ni bibí) para guni invitar guiráʼ binni gueeda gueʼ nisa ni cudii guendanabani. Yanna lii yaʼ. Maʼ gucuaaluʼ invitación ca ne maʼ gudixhe íqueluʼ guni invitarluʼ binni la? ¡Nabé risaca nga gúninu dxiiñaʼ riʼ para gacanenu binni guilá!

11, 12. Ximodo racané espíritu santu guireeche diidxaʼ.

¹¹ Dxiiñaʼ risaca de guireeche diidxaʼ riʼ cayanda cayácani pur espíritu santu, cásica gúcani lu primé siglu que. Dxiqué gucané espíritu santu stiʼ Dios ca xpinni Cristu para guyecaʼ ca lugar ra caʼruʼ guireeche diidxaʼ. Ti ejemplu ni nápanu nga stiʼ apóstol Pablu. Laabe ne ca xcompañérube «udiʼdi cabe Asia peru qué niná Espíritu Santu ñuiʼ cabe stiidxa Dios raque. [...] Ucalaʼdxi cabe ñe cabe Bitinia, peru laca qué niná Espíritu sti Jesús». Neca qué gánnanu xiñee bicueeza espíritu ca laacabe de ñécabe ca lugar que, peru ni nánnanu nga gucaneni laacabe chécabe Europa, purtiʼ raqué nuu stale lugar ra guireeche diidxaʼ. Ne pur espíritu ca gucuaabe ti visión ra bíʼyabe ti hombre de Macedonia canabaʼ gacanécabe laa (Hech. 16:6-10).

¹² Yanna riʼ laaca riquiiñeʼ Jiobá espíritu stiʼ para guireeche diidxaʼ lu guidubi naca Guidxilayú. Neca maʼ qué rudii Dios visión binni yanna, riquiiñerube stipa stibe para gábibe ca binni ni bibí xi gúnicaʼ. Ne laaca riquiiñebe ni para gucaabe guiráʼ ca xpinni Cristu gucheechecaʼ diidxaʼ ne gusiidicaʼ ne stale gana. Zándaca cayúninu dxiiñaʼ riʼ, peru zándaruʼ quixhe íquenu gúninu jma luni.

13. Biquiiñeʼ ti ejemplu para gusiéneluʼ xi sti modo rusihuínniluʼ rusiidiʼ espíritu santu lii.

¹³ Sti modo zusihuínninu cayúninu ni na espíritu santu ca nga ra chinándanu guiráʼ ni gabi xquidxi Dios laanu. Guidúʼyanu ejemplu stiʼ ti baʼdudxaapaʼ de Japón ni láʼ Mihoko. Dxi bizulube de precursora biʼniʼ sentirbe qué zanda guibiguetaʼ chigánnabe binni, purtiʼ guníʼ íquebe qué zanda gacanebe binni chuulaʼdxiʼ guiziidiʼ jma. Peru despué biindabe ca conseju ni zeeda lu Xhiiñaʼ Reinu ni Rúninu ni caníʼ de tema ca, ne despué biree folletu ni láʼ Cómo lograr una vida llena de satisfacción, ni nabé huayacané ca japonés. Gunaa Testigu riʼ biʼniʼ modo nexheʼ iquiiñecabe folletu riʼ ne ni jma bíʼnibe nga ni caníʼ ximodo cadi gusaana de guibiguetaʼ chigánnabe binni neca ti ratuhuiiniʼ si. Nin qué nindaa biiyabe guná stale binni ni qué niná ñuundanebe laa bizulucaʼ cayuundacaʼ. Laabe guniʼbe: «Biindaniáʼ stale binni (nuu tiru biindaniáʼ doce binni) dede gupa xidé gudxeʼ caadxi de laacabe cuézacabe naa». Dxandíʼ, ora rinándanu ca conseju ni ricaanu, rusihuínninu canazanu modo rusiidiʼ espíritu santu ne ricaanu stale ndaayaʼ.

Gudiʼnu lugar gacané espíritu santu laanu

14, 15. 1) Ximodo randa ribani ti binni ni ruchee casi bidii stiidxaʼ. 2) Ximodo zanda guidxélanu binni ni dxandíʼ gaca xhamígunu.

¹⁴ Cumu maʼ bisaana Dios gucheechenu diidxaʼ la? caquiiñeʼ gúninu ni (Rom. 10:14). Zándaca guiníʼ íquenu qué zanda gúninu  dxiiñaʼ riʼ, peru Dios rusiidiʼ laanu ximodo gúninu ni, casi pa nácanu o cadi nácanu de cani bibí pur espíritu santu (biindaʼ 2 Corintios 3:5). Pa gúninu guiráʼ ni nuu lu nanu ne gudiʼnu lugar gacané espíritu santu laanu, zabáninu casi bidii stiidxanu Dios.

¹⁵ Cumu binni ruchee laanu la? raca nagana para laanu gúninu ni bidii stiidxanu dxi bidiʼnu laanu Jiobá, Dios ni qué ruchee. Zándaca guidxiichi ca binni ni bidxaaganu dxiqué purtiʼ maʼ bichaʼnu modo laanu ne guzulú guiniʼcaʼ mal de laanu (1 Ped. 4:4). Peru cadi guiaandaʼ laanu maʼ nápanu xcaadxi xhamígunu, ne chupa de ca xhamígunu jma risaca nga Jiobá ne Jesucristu (biindaʼ Santiago 2:21-23). Ne laaca naquiiñeʼ guyúbinu guidxaaganu ca xpinni Cristu ni ridagulisaanenu purtiʼ né laacabe nga zeeda gácacabe «ca hermanu» stinu ni nuu lu guidubi naca Guidxilayú (1 Ped. 2:17; Pro. 17:17). Jiobá riquiiñeʼ espíritu stiʼ para gacané laanu guidxélanu tu guidxaaganu ne ni gacané gúninu ni jneza ne ni uguu gana laanu.

16. Xiñee zanda guininu casi guníʼ Pablu: «Rieche ora racanaʼya pur Cristu».

¹⁶ Nuu tiru neca gacané ca xpinni Cristu laanu raca nagana para laanu gudxíʼlunu ca guendanagana ni ridxaagalunu guiráʼ dxi. Nuu biaje nabé nagana guiráʼ cani guidxaagalunu dede qué ránnanu ximodo gudxíʼlunu cani, casi ñaca ñuʼnuʼ ndaaniʼ ti túnel ne qué ridúʼyanu pa ladu guireʼnu. Ora chuʼnu zacá óraca nga jma naquiiñeʼ guni orarnu Jiobá ne guinábanu gudii laanu espíritu stiʼ. Guidúʼyanu ejemplu stiʼ Pablu, laa guníʼ: «Nanna ora riaadxa stipa naa la? jma rusi racané Cristu naa» (biindaʼ 2 Corintios 4:7-10 ne 12:10). Laabe gúnnabe racané espíritu ca laanu ora riaadxaʼ stipa laanu ne ora maʼ qué ganda sanu. Peru xiñee guniʼbe «rieche ora racanaʼya pur Cristu». Purtiʼ ora qué gápabe stipa biiyabe modo gucané espíritu stiʼ Dios laabe. Guiranu zanda guizaacanu casi bizaacabe ca (Rom. 15:13).

17. Ximodo racané espíritu santu ca laanu para chindá barcu stinu ra naquiiñeʼ chindá.

¹⁷ Casi maʼ bidúʼyanu, caquiiñenu stipa stiʼ Dios para guibáninu casi bidii stiidxanu. Zeeda gácanu casi ti capitán stiʼ ti barcu ni zeʼ para guicaa guendanabani ni qué zaluxe ne pur laani maʼ qué zusaana de gúninu ni na Jiobá. Espíritu santu ca zeeda gaca casi bi ni caquiiñenu para guilanu. Naquiiñeʼ guyúbinu pa ladu zeʼ bi ca ne gudxiʼnu barcu stinu neza ca. Qué racaláʼdxinu cueechú espíritu stiʼ guidxilayú ni nuu lu naʼ Binidxabaʼ riʼ laanu de neza ziuunu (1 Cor. 2:12). Stiidxaʼ Dios ne xquidxi Jiobá zanda gacané laanu para cadi guiréʼchunu de ladu naquiiñeʼ chuunu.

18. Xi naquiiñeʼ quixhe íquenu gúninu ne xiñee.

¹⁸ Ñee maʼ xadxí de cayuundané ca testigu stiʼ Jiobá lii ne riuuláʼdxiluʼ guidxaagaluʼ laacabe, peru caʼruʼ gudiiluʼ lii ne caʼruʼ chúʼnisaluʼ la? Pa zacá ni, gunabadiidxaʼ laca lii: «Xi cucueeza naa guneʼ ni». Pa nánnaluʼ xi dxiiñaʼ runi espíritu santu para ganda gaca ni na Jiobá ne cudiiluʼ xquíxepeʼ pur cayacaneni lii la? galán gúniluʼ ni caquiiñeʼ gúniluʼ. Nabé zaguu ndaayaʼ Jiobá lii. Zudiibe lii espíritu santu stibe. Ne pa maʼ zineluʼ iza de guyuunísaluʼ, zándaca maʼ biiyaluʼ ximodo huayuni espíritu santu dxiiñaʼ lu xquendanabániluʼ. Maʼ biiyaluʼ ne maʼ biʼniʼ sentirluʼ ximodo riquiiñeʼ Dios stipa stiʼ para gacané lii. Ne zándaruʼ gacaneni lii biaʼ dxi guibániluʼ. Nga runi ¡qué chuʼ dxi gusaana de saluʼ modo rusiidiʼ espíritu santu!

Biénenu cani zeeda raríʼ la?

• Xi riníʼ ca diidxaʼ cadi gusaana de sanu «modo rusiidi Espíritu Santu».

• Xi zacané laanu cadi gusaana de sanu «modo rusiidi Espíritu Santu».

• Xi caquiiñeʼ gúninu para guibáninu casi bidii stiidxanu.

[Guendarinabadiidxaʼ stiʼ párrafo]

[Dibuju/foto ni zeeda lu yaza 15]

Riquiiñeʼ stipa para ganda guiniisi ni nuu ndaaniʼ ladxidóʼ binni

[Ca dibuju/foto ni zeeda lu yaza 16, 17]

Ñee rudiʼnu lugar gacané espíritu stiʼ Dios laanu lu xquendanabáninu la?