Laatu cani nahuiiniʼ, laguni stipa pur chuuláʼdxitu gúnitu ni na Jiobá

«Bietenalaʼdxiʼ, yanna, de [Dios] ni jma Nandxóʼ ni Bizáʼ lii, ca dxi nahuiiniluʼ.» (ECL. 12:1)

1. Xi invitación gucuaa ca hombrehuiiniʼ ne ca dxaapahuiiniʼ israelita que.

 RACA chonna mil gaayuʼ gayuaa iza, ti ni riguixhená ni láʼ Moisés, gúdxibe cani ruzaaquiʼ guʼxhuʼ ne ca binnigola stiʼ guidxi Israel «[gucasaacaʼ] guidxi ca, ca hombre ne ca gunaa ne cani nahuiiniʼ», de raqué guniʼbe xi para: «Ti gucaadiágacabe ne guiziidicabe, purtiʼ nápacabe xidé guiziidicabe guidxíbicabe Jiobá, Dios stitu, ne naquiiñeʼ gúnicabe guiráʼ ni na ley riʼ» (Deu. 31:12). Hombrehuiiniʼ ne dxaapahuiiniʼ, ñee biiyaluʼ cadi cani huaniisi si nga naquiiñeʼ guidagulisaacaʼ para guni adorarcaʼ Dios la? Dede ne cani jma nahuiiniʼ nga naquiiñeʼ gucaadiágacaʼ, ne guiziidicaʼ ne chinándacaʼ cani rusiidiʼ Jiobá.

2. Ximodo bisihuinni Jiobá bizaalaʼdxiʼ ca xpinni Cristu ni nahuiiniʼ de primé siglu que.

² Lu primé siglu que, laaca bisihuinni Jiobá rizaalaʼdxiʼ ca hombrehuiiniʼ ne ca dxaapahuiiniʼ ni nuu ndaaniʼ xquidxi. Biquiiñebe apóstol Pablu para gucaa caadxi conseju para cani nahuiiniʼ lu caadxi carta ni guyé ra nuu caadxi neza binni ridagulisaa (biindaʼ Efesios 6:1 ne Colosenses 3:20). Ne gunna dxichi ca hombrehuiiniʼ ne ca dxaapahuiiniʼ ni gucuaacaʼ ca conseju ca guizáʼ gunnaxhiicaʼ Jiobá, Bixhózecaʼ ni nuu guibáʼ, ne gucuaacaʼ stale ndaayaʼ.

3. Ximodo rusihuinni cani nahuiiniʼ ca riuuláʼdxicaʼ gúnicaʼ ni na Jiobá.

³ Laga ca dxi stinu riʼ yaʼ, ñee laaca cayuni invitar Jiobá cani nahuiiniʼ ca para guni adorarcaʼ laabe la? ¡Laaca pue! Guizáʼ riéchedu nga guidúʼyadu rié stale hombrehuiiniʼ ne dxaapahuiiniʼ ca guendaridagulisaa ca. Rihuinni dxíchica zinándacabe conseju ni bidii Pablu riʼ: «Ne naquiiñe ucáʼ ique nu acané saa nu para ganaxhii nu jma, ne guni nu ni nachaʼhuiʼ. Ne cadi guni nu casi cani rusaana de che cultu, sínuque cada tobi acané stobi para indisa ique, ne jma rusi yanna purti caduʼya nu ma zeda dxiña dxi gueeda Jesucristu Señor stícanu» (Heb. 10:24, 25). Ne stale de laacabe rucheechenécabe bixhózecabe ne jñaacabe ca diidxaʼ nacubi ne galán stiʼ Reinu (Mat. 24:14). Ne guiráʼ iza, stale hombrehuiiniʼ ne dxaapahuiiniʼ ni nuucaʼ lu guidubi naca Guidxilayú rusihuínnicaʼ pabiáʼ nadxiicaʼ Jiobá ora riuunísacaʼ. Cumu nácacabe discípulo stiʼ Cristu la? nabé naroʼbaʼ ca ndaayaʼ ricaacabe (Mat. 16:24; Mar. 10:29, 30).

Gucuaa invitación ca yánnaca

4. Panda iza naquiiñeʼ gapa binni para guni ni na Dios ne guni adorar laabe.

⁴ Nannuʼ panda iza naquiiñeʼ gapa binni para guni ni na Jiobá ne guni adorar laabe la? Qué ruzeeteʼ diʼ Biblia panda iza naquiiñeʼ gapa binni, peru zeeda ca diidxaʼ riʼ luni: «Bietenalaʼdxiʼ, yanna, de [Dios] ni jma Nandxóʼ ni Bizáʼ lii, ca dxi nahuiiniluʼ» (Ecl. 12:1). Nga runi, cadi guiníʼ íqueluʼ guizáʼ  nahuiiniluʼ para quixhe íqueluʼ gúniluʼ ni na Jiobá ne guni adorarluʼ laabe. Biaʼ tiica iza nápaluʼ, galán guicaaluʼ invitación ca yánnaca.

5. Xi huayuni stale binni para gacanecaʼ xiiñicaʼ guiniisi ndaaniʼ xquidxi Dios.

⁵ Stale hombrehuiiniʼ ne dxaapahuiiniʼ huayacané bixhózecaʼ ne jñaacaʼ laacaʼ, ne nuu tiru bixhózesicaʼ o jñaasicaʼ. Nga runi zanda guchaaganu laacabe ne Timoteu, ti hombrehuiiniʼ ni bibani lu primé siglu que. Jñaabe Eunice ne jñaabídabe Loida, bisiidicaʼ laabe cani cá lu Stiidxaʼ Dios dede dxi nahuiinirube (2 Tim. 3:14, 15). Zándaca zacaca cusiidiʼ bixhózeluʼ ne jñaaluʼ lii, cayuundanécabe lii Biblia ne runi orarnécabe lii, rinécabe lii ca guendaridagulisaa ca ne ca guendaridagulisaa roʼ ni rapa xquidxi Dios ne rucheechenécabe lii diidxaʼ. Zacá cayúnicabe tobi de ca dxiiñaʼ ni jma risaca bidii Jiobá laacabe: gusiidicabe lii gúniluʼ ni na Jiobá. Ñee rudiiluʼ cuenta pabiáʼ nadxiicabe lii ne rizaaláʼdxicabe lii la? (Pro. 23:22.)

6. 1) Casi na Salmo 110:3, ximodo racalaʼdxiʼ Jiobá gúniluʼ ni na. 2) Xidé chiguininu yanna.

⁶ Peru Jiobá riuulaʼdxiʼ gúniluʼ casi biʼniʼ Timoteu ora maʼ ziniisiluʼ ne liipeʼ gúʼyaluʼ gunáʼ nga ni nachaʼhuiʼ para Dios ne ni jnézapeʼ (Rom. 12:2). Zacá la? ziale de ndaaniʼ ladxidoʼloʼ gúniluʼ guiráʼ dxiiñaʼ ni runi ca binni ridagulisaa ne cadi para si guisiécheluʼ bixhózeluʼ ne jñaaluʼ. Pa gúniluʼ ni na Jiobá de guidubi ladxidoʼloʼ la? zusiécheluʼ laabe (Sal. 110:3). Nanna dxíchidu racaláʼdxiluʼ gucaadiágaluʼ stídxibe ne gusiidibe lii. Yanna, xi zanda gúniluʼ ti jma chuuláʼdxiluʼ gucaadiágaluʼ Jehová ne gúniluʼ ni nabe yaʼ. Ni zacané lii nga gúʼndaluʼ Biblia stúbiluʼ, guni orarluʼ ne gúniluʼ ni jneza. Guidúʼyanu guionnaʼ ni bizéʼtenu ca.

Binibiáʼ Jiobá ne guca xhamigu laabe

7. 1) Ximodo nánnanu guizáʼ biindaʼ Jesús Stiidxaʼ Dios. 2) Tu gucané Jesús para biʼniʼ zacá.

⁷ Tobi de cani zacané lii para chuuláʼdxiluʼ gúniluʼ ni na Jiobá nga gúʼndaluʼ Biblia guiráʼ dxi, nga zacané lii chuʼluʼ jma gaxha de laabe ne zacá zaziidiluʼ stale cosa ni risaca (Mat. 5:3). Pa gúniluʼ zacá zinándaluʼ ejemplu stiʼ Jesús. Dxi nápabe 12 iza, bidxelaʼ bixhózebe ne jñaabe laabe ndaaniʼ yuʼduʼ, «zuba be galahui de cani rusiidi ley sti Dios, cucaa diaga be laacaʼ ne canaba diidxa be laacaʼ» (Luc. 2:44-46). Racá rihuinni neca nahuiinibe nabé guyuuláʼdxibe guiziidibe de ni cá lu Stiidxaʼ Dios ne guiénebe ni na ni. Tu gucané laabe gúnibe zacá yaʼ. Rihuinni dxíchica nabé gucané jñaabe María ne bixhózebe José laabe ne risaca ni bíʼnicabe ca, laacabe nabé bizuubacabe stiidxaʼ Jiobá, ne laacabe nga bisiidicabe laabe de Dios dede dxi jma nahuiinibe (Mat. 1:18-20; Luc. 2:41, 51).

8. 1) Pora nga maʼ zanda guzulú binni gusiidiʼ ca xiiñiʼ ni cá lu Biblia ti chuuláʼdxicabe ni. 2) Guníʼ ni bizaaca tuuxa ni rusihuinni pabiáʼ nga risaca gusiidiʼ binni xiiñiʼ dede ora gale.

⁸ Zacaca nga yanna, cani napa xiiñiʼ ne ridxibi Dios nánnacaʼ pabiáʼ risaca nga gusiidicaʼ xiiñicaʼ chuuláʼdxicaʼ cani cá lu Biblia (Deu. 6:6-9). Ngapeʼ nga ni biʼniʼ ti gunaa Testigu ni láʼ Rubi ne primé xiiñibe ni láʼ Joseph. Dede dxi baʼduhuiiniruʼ Joseph biindané jñaabe laabe Libru stinneʼ de ca historia stiʼ Biblia. Ne ra jma ziniisi huiinibe gucané jñaabe laabe guiziidibe caadxi textu de memoria. Ñee raʼbuʼ gucané nga Joseph la? Dxi maʼ biziidibe guiniʼbe la? maʼ laapebe gunda guniʼbe de ca historia que. Ne dxi maʼ bisaabe gaayuʼ iza bidiibe primé libana stibe lu Scuela stiʼ cani Rucheeche Diidxaʼ.

9. Xiñee nabé risaca nga gúʼndaluʼ Biblia ne guiníʼ íqueluʼ ni cá luni.

⁹ Para guiniisiluʼ ndaaniʼ xquidxi Dios la? naquiiñeʼ gusiaaluʼ lii gúʼndaluʼ Biblia guiráʼ dxi ne zacá gúniluʼ ni lu guidubi naca xquendanabániluʼ (Sal. 71:17). Xiñee zacané nga lii guiniisiluʼ ndaaniʼ xquidxi Dios yaʼ. Purtiʼ zacá zunibiáʼ chaahuiluʼ Jiobá. Sicaríʼ guníʼ Jesús ora guníʼnebe Bixhózebe: «Ne zacaa  cabe enda nabani ca ra gunibiáʼ cabe lii [...]. Lii nga tobi lucha Dios ni dxandíʼ» (Juan 17:3). Ora jma gunibiaʼluʼ Jiobá, jma zuuyaluʼ laabe casi ti binni ne jma zannaxhiiluʼ laabe (Heb. 11:27). Nga runi, cada gúʼndaluʼ Biblia, biʼniʼ stipa pur guiziidiluʼ jma de laabe. Guníʼ ique: «Ximodo culuíʼ historia riʼ naca Jiobá. Ximodo cusihuínnini nadxiibe naa ne rizaaláʼdxibe naa». Pa guiníʼ íqueluʼ cani gunabadiidxanu ca la? jma ziéneluʼ modo riníʼ ique Dios, xi runi sentirbe ne xi ribézabe gúniluʼ (biindaʼ Proverbios 2:1-5). Cásica Timoteu, hombrehuiiniʼ que, zudiiluʼ cuenta dxandíʼ zeeda cani runi creluʼ lu Biblia ne zucaa nga lii gúniluʼ ni na Dios de guidubi ladxidoʼloʼ (2 Tim. 3:14).

Oración ca zacané lii gannaxhiiluʼ Dios jma

10, 11. Xiñee zanda gacané oración ca lii para chuuláʼdxiluʼ gúniluʼ ni na Jiobá.

¹⁰ Oración ca nga guiropa cosa ni zacané lii chuuláʼdxiluʼ gúniluʼ ni na Jiobá. Lu Salmo 65:2 na: «Lii, Ni rucaadiaga oración, ra nuuluʼ zié guiráʼ xixé binni». Dxi nácaruʼ Israel guidxi ni gulí Dios que gunda guyé binni de sti guidxi ndaaniʼ yuʼduʼ stiʼ Jerusalén que para guinábacaʼ Jiobá gacané laacaʼ (1 Rey. 8:41, 42). Jiobá qué ribí diʼ tu gucaadiaga ne laabe cudii stiidxabe zucaadiágabe guiráʼ tu guzuubaʼ stiidxabe (Pro. 15:8). Lii naquiiñeʼ ganna dxíchiluʼ laaca nuuluʼ lade «guiráʼ xixé binni», ni nácacaʼ de gadxé gadxé guidxi, ni rucaadiaga Dios laacaʼ.

¹¹ Guiranu nánnanu ora nabé xhamigu chupa binni ora tiica si riniʼcaʼ diidxaʼ. Ñee cadi dxandíʼ nga galán ñápaluʼ tuuxa ni ñábiluʼ laa xi runi sentirluʼ, xi riníʼ íqueluʼ ne xi riguu xizaa lii la? Ngapeʼ nga ni racalaʼdxiʼ Jiobá guniné lii. Ne para guiníʼneluʼ laabe naquiiñeʼ guni orarluʼ laabe (Fili. 4:6, 7). Gudxi laabe guiráʼ ni nuu ladxidoʼloʼ, casi niníʼneluʼ bixhózeluʼ, jñaaluʼ o tuuxa ni nabé xhamíguluʼ. Ne modo guni orarluʼ zahuinni xi runi sentirluʼ pur Jiobá. Zudiiluʼ cuenta jma zánnaluʼ xi gábiluʼ laabe ora jma gaca xhamíguluʼ laabe.

12. 1) Ximodo zanda gusihuínniluʼ runi orarluʼ Jiobá de guidubi ladxidoʼloʼ. 2) Xi zacané lii gúʼyaluʼ nuu Jiobá gaxha de lii.

¹² Naquiiñeʼ gánnaluʼ qué runi orárdinu Dios para si gábinu laa stale diidxaʼ. Gudxi laabe ximodo runi sentirluʼ. Gudxi laabe nadxiiluʼ laabe, runi respetarluʼ laabe de guidubi ladxidoʼloʼ ne runi creluʼ zacanebe lii. Ora gúʼyaluʼ modo guicábibe lii la? zánnaluʼ «Jiobá nuu gaxha de guiráʼ cani rinabaʼ ruaa laabe» (Sal. 145:18). Ya, zadxíñabe lii ne zudiibe stipa ni caquiiñeluʼ para gudxiiluluʼ ca guendanagana ni gulaa Binidxabaʼ luguialuʼ ne zacanebe lii quixhe íqueluʼ gúniluʼ ni jneza lu xquendanabániluʼ (biindaʼ Santiago 4:7, 8).

13. 1) Xi biʼniʼ ti dxaapahuiiniʼ pur guca xhamigu Dios. 2) Ximodo huayanda huadxiiluluʼ ca guendanagana ni huayápaluʼ ne ca xcompañéruluʼ purtiʼ xhamíguluʼ Jiobá.

¹³ Guidúʼyanu ximodo gupa Cherie stipa  pur guca xhamigu Jiobá. Biʼniʼ ganarbe stale premiu ra scuela purtiʼ guizáʼ bicaa íquebe gúʼndabe ne nabé gudxítebe carrera, ngue runi gúdxicabe laabe pa zacaabe ti beca para chebe ti Universidad. Dxaapahuiiniʼ ca guníʼ sicaríʼ: «Guca nagana para naa gucaa nayaʼ ni. Ca entrenador que ne ca xcompañeruaʼ guizáʼ gúdxicabe naa guicaaʼ ni». Peru biiyabe stale tiempu zaquiiñebe para gúʼndabe ne para chuʼbe listu ti ganda guni ganarbe lu ca carrera ra chebe que, ne guizáʼ huaxiéʼ tiempu zápabe para guni adorarbe Dios. Xi gudixhe íquebe gúnibe yaʼ. Laabe guniʼbe: «Biluxe bineʼ orarsiáʼ Jiobá maʼ qué nicaadiaʼ beca que ne gucaʼ precursora regular». Gudiʼdiʼ si gaayuʼ iza guniʼbe ca diidxaʼ riʼ: «Qué raca arrepentirdiáʼ pur ni bineʼ ca. Nannaʼ dxicheʼ zacá rusiecheʼ Jiobá, ne naa laaca riuaaʼ nayecheʼ. Dxandíʼ, pa guyúbiluʼ Reinu stiʼ Dios primé la? laaca zudiibe lii xcaadxi cosa (Mat. 6:33, NM).

Ora gúniluʼ ni jneza zusihuínniluʼ nayá nuu ladxidoʼloʼ

14. Xi rusihuínniluʼ nezalú Jiobá ora rúniluʼ ni jneza.

¹⁴ Guionna modo zanda guluiʼluʼ riuuláʼdxiluʼ gúniluʼ ni na Jiobá nga gúniluʼ ni jneza. Bietenalaʼdxiʼ, Dios riguu ndaayaʼ cani nahuiiniʼ ni nápacaʼ xquendanabánicaʼ nayá (biindaʼ Salmo 24:3-5). Nápanu ejemplu stiʼ Samuel, laabe qué ninabe ñúnibe ca cosa malu ni biʼniʼ ca xiiñiʼ Elí, xaíque stiʼ cani ruzaaquiʼ guʼxhuʼ ni guyuu Israel. Biblia na laga cayúnicabe cosa dxabaʼ, «ziniisi Samuel, hombrehuiiniʼ que ne zeʼ dxi jma guyuulaʼdxiʼ Jiobá modo laabe ne zaqueca biiyaʼ binni laabe» (1 Sam. 2:26). Casi maʼ bidúʼyanu ca, bidii binni cuenta rúnibe ni jneza.

15. Xi razón nápaluʼ para gúniluʼ ni jneza.

¹⁵ Casi guníʼ Pablu zaca binni, yanna riʼ nabé nuu binni ni ruyubi puru para laasi, runi crecaʼ laacaʼ, qué ruzuubacaʼ stiidxaʼ bixhózecaʼ ne jñaacaʼ, qué rudiicaʼ xquíxepeʼ guirutiʼ, runinacaʼ binni, rudxiibacaʼ laca laacaʼ ne ruyúbicaʼ ni chuuláʼdxicaʼ lugar de guyúbicaʼ Dios (2 Tim. 3:1-5). Nánnadu nagana raca para lii gúniluʼ ni jneza, purtiʼ nuuluʼ ra cayuni binni stale guendaquéiquiiñeʼ. Peru bietenalaʼdxiʼ guiráʼ biaje gucaanaluʼ xiixa ni gucaa lii gucheeluʼ la? zusihuínniluʼ nuuluʼ pur derechu ni napa Jiobá de guni mandar guibáʼ ne lu guidubi naca Guidxilayú (Job 2:3, 4). Ne zuni sentirluʼ nayecheʼ purtiʼ gucuaaluʼ invitación riʼ: «Guluu xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cucaalú [...] naa» (Pro. 27:11). Ne cadi ngasi, laaca zusiécheluʼ Dios, ne zudii nga stale stipa lii para ganda gúniluʼ ni nabe.

16. Ximodo bisiecheʼ ti xpinni Cristu ladxidóʼ Jiobá dxi nahuiiniʼ.

¹⁶ Ti dxaapahuiiniʼ xpinni Cristu láʼ Carol nabé yenándabe ni na ca conseju stiʼ Biblia ne bíʼnibe ni jneza, ne biiyaʼ ca xcompañérube zacá rúnibe. Neca guyuu tu biʼniʼ burla laabe purtiʼ qué runi saludarbe bandera ne qué rúnibe ca saa ni rúnicaʼ la? nuu biaje bisiénebe laacaʼ xiñee qué rúnibe cani. Gudiʼdiʼ si stale iza, bicaa tobi de cani guca xcompañera Carol ti carta ra nuu, ne lu carta que na: «Maʼ raca stale iza racalaʼdxeʼ guinieniáʼ lii para gudieeʼ xquíxepeʼ lii. Naa biiyaʼ nabé jneza cani rúniluʼ ne pabiáʼ nadxibalú gúcaluʼ ora bisiéneluʼ xiñee qué rieluʼ xiixa saa. Lii nga primé testigu stiʼ Jiobá ni bineʼ  biaayaʼ». Cumu nabé bidxagayaabe modo runi Carol que la? despué bizulube biindabe Biblia. Ne maʼ nápabe cuarenta iza de guyuunísabe ora bicaabe carta que ra nuu Carol. Pa gúniluʼ cásica biʼniʼ Carol ca, zándaca gacaneluʼ tuuxa ni dxandíʼ racalaʼdxiʼ guiziidiʼ de Jiobá.

Cani nahuiiniʼ ni rusisácacaʼ Jiobá

17, 18. 1) Ximodo ridúʼyanu cani nahuiiniʼ ni nuu lade ca binni ridagulisaanenu. 2) Xi zabeendú cani nahuiiniʼ ca purtiʼ cadi cusaanacaʼ de gúnicaʼ ni na Dios.

¹⁷ Nabé riéchedu nga ridúʼyadu nuu stale hombrehuiiniʼ ne dxaapahuiiniʼ ni nuu lu guidubi naca Guidxilayú cayúnicaʼ ni na Dios ni dxandíʼ ca de guidubi ladxidoʼcaʼ. Xi racané laacabe cadi gusaanacabe de gúnicabe zacá yaʼ. Ruundacabe Biblia guiráʼ dxi, runi orárcabe ne rúnicabe ni jneza casi riuulaʼdxiʼ Jiobá. Ne nanna dxíchidu rusiéchecabe ladxidóʼ bixhózecabe ne jñaacabe ne ladxidóʼ guiráʼ ca xpinni Cristu (Pro. 23:24, 25).

¹⁸ Ca hombrehuiiniʼ ne ca dxaapahuiiniʼ ni cayúnicaʼ ni na Jiobá ca ziuucabe lade ca xpinni Dios ni chiguibani lu guidxilayú cubi ni bizabiruaa Dios chiguni (Apo. 7:9, 14). Racá zacaacabe stale ndaayaʼ ne jma zunibiáʼcabe Jiobá ne qué ziuu dxi gusaanacabe de gusisácacabe laabe (Sal. 148:12, 13).

Ñanda nusiéneluʼ ni la?

• Xi dxiiñaʼ zanda guni cani nahuiiniʼ ca lade ca binni ridagulisaa.

• Xiñee naquiiñeʼ guiníʼ íquenu cani cá lu Biblia lugar de gúʼndasinu cani.

• Ximodo racané oración ca laanu para guidxíñanu Jiobá jma.

• Xi zabeendú cani nahuiiniʼ ca pa gúnicaʼ ni jneza.

[Guendarinabadiidxaʼ stiʼ párrafo]

[Dibuju/foto ni zeeda lu yaza 5]

Ñee maʼ biaaluʼ gúʼndaluʼ Biblia guiráʼ dxi la?