Rietenalaʼdxuʼ la?

Ñee biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

• Xiñee guti Mesías que.

Tobi de ca razón ca nga para gusihuínnibe zanda guni ti hombre ni qué ñalené donda ni na Dios, neca tiidiʼ lu guendanagana jma naroʼbaʼ. Sti razón ca nga para gulabe laanu de lu náʼ guendaruchee ni bisaanané Adán laanu ne guicaanu guendanabani ni qué zaluxe (15/12, yaza 22).

• Xi caquiiñeʼ guni binni para ganda guiniʼné xiiñiʼ diidxaʼ ni gacané laa.

Caquiiñeʼ gánnacabe guiniʼnécabe laacaʼ diidxaʼ. Galán guinabadiidxacabe ne gucaadiágacabe laacaʼ sin guidxiichicabe. Stale de cani napa xiiñiʼ maʼ biiyacaʼ galán guiníʼnecaʼ xiiñicaʼ ora chitocaʼ gueta (15/1, yaza 18, 19).

• Pora nga zanda guiníʼ ique ti binni chúʼnisa sti biaje.

Zanda gaca nga pa dxi mayaca chúʼnisabe que cayúnibe xiixa ni cadi jneza o xiixa ni nagaʼchiʼ, ne pa ñaca maʼ nácabe xpinni Cristu ñándaca nibeecabe laabe ndaaniʼ xquidxi Dios (15/2, yaza 22).

• Lu ejemplu stiʼ trigu ne baladxiʼ, xii nga zeeda gaca trigu ni bidxiibacabe que.

Biaʼ tiempu bicheeche Jesús diidxaʼ, «Hombre Biseenda Dios» que, casi ñaca niguube listu layú ra chigúnibe dxiiñaʼ. Dede lu Pentecostés stiʼ iza 33 bizulú cudxiibabe trigu ca ra cabibe ca xpínnibe pur espíritu santu para gueeda gácacaʼ xiiñiʼ Dios o «xiiñiʼ reinu» (15/3, yaza 20).

• Ximodo nga cadopa trigu ni zeeda gaca ca xpinni Cristu ca ndaaniʼ troja stiʼ Jiobá yaʼ (Mat. 13:30).

Bizulú cadopa trigu ni zeeda gaca ca xpinni Cristu ca lu ca últimu dxi nabáninu riʼ. Cani zeeda gaca xiiñiʼ Reinu o ca xpinni Cristu ni bibí ca riuucaʼ ndaaniʼ troja stiʼ Jiobá ora reeda gácacaʼ de xquidxi Jiobá ni cayuni ni jneza o ra ricaacabe premiu stícabe guibáʼ (15/3, yaza 22).

• Tuu nga gudixhe xi libru guiaana lu Stiidxaʼ Dios ni gucuá lu diidxaʼ griegu.

Cadi ti grupu de sacerdote diʼ o xaíque stiʼ ti yuʼduʼ gudixhe ni, sínuque cani dxandíʼ naca xpinni Cristu, ne espíritu santu gucané laacaʼ gánnacaʼ gunáʼ nga ca libru dxandíʼ Stiidxaʼ Dios. Ne biáʼsipeʼ nga cani guninu ca, purtiʼ tobi de ca gracia ni bidii espíritu que ca xpinni Cristu lu ca primé iza bizulú bidagulisaacaʼ nga gánnacaʼ gunáʼ nga ni «zeeda de Dios ne uná nga ni cadi zeeda de Dios» (1 Cor. 12:4, 10; 1/4, yaza 28).