Ca primé xpinni Cristu ne ca dios stiʼ guidxi Roma

PLINIO ni nahuiiniʼ, gobernador stiʼ Bitinia bicaa ti carta ra nuu Trajano, emperador stiʼ Roma, ne sicaríʼ guniʼbe lu carta que: «Ndiʼ nga cayuneʼ cani nácabe xpinni Cristu laacaʼ ni redanécabe ra nuaaʼ. Rinabadiidxaʼ laacabe pa dxandíʼ xpinni Cristu laacabe. Cani riníʼ xpinni Cristu laacaʼ la? lu guiropa ne guionna biaje guinabadiidxaʼ laacaʼ rabeʼ laacaʼ zunenaʼyaʼ laacaʼ pa guiníʼrucaʼ xpinni Cristu laacaʼ; ne cani qué gusaana de guiníʼ zaqué maca ziyuneʼ mandar gáticaʼ». Peru Plinio laaca bicaa: «Naa gudixheʼ guiaana [xcaadxi de laacabe] libre». Xiñee yaʼ. Purtiʼ guníʼcabe cadi xpinni Cristu laacabe ora guluudícabe Cristu ne ora biʼniʼ adorárcabe estatua stiʼ César ne ca dios ni yené gobernador que nezalú juez.

Guzanándacabe ca primé xpinni Cristu purtiʼ qué ninacaʼ ñuni adorarcaʼ emperador ne ca dios ni nuu Roma. Peru, ximodo nga xcaadxi religión guyuu ndaaniʼ ca guidxi ra biʼniʼ mandar ca romanu que yaʼ. Tuu nga ca dios biʼniʼ adorárcabe ne ximodo biiyaʼ ca romanu que cani yaʼ. Xiñee ngue nácabe cuchee ca xpinni Cristu ora qué ninacaʼ ñuuticaʼ tuuxa maniʼ para ca dios ni nuu ndaaniʼ guidxi Roma que yaʼ. Ora gánnanu cani gunabadiidxanu ca zacanécani laanu gánnanu ximodo gudxíʼlunu ca guendanagana ni gucaa laanu gusihuínninu pa qué zusaananu de gúninu ni na Jiobá, cásica bizaaca ca xpinni Cristu de dxiqué.

Ca religión ni guyuu ra biʼniʼ mandar Roma

Ca binni ni guleza guidubi ra biʼniʼ mandar Roma que biʼniʼ adorarcaʼ stale dios, laaca guníʼ stale de ca binni que gadxé gadxé diidxaʼ ne gúpacaʼ stale costumbre. Nécapeʼ huaxiéʼ runibiáʼ ca romanu que ni runi cré ca judíu que la? biiyacabe zanda gácani ti religión, ne pur ngue rápacabe ni. Ndaaniʼ yuʼduʼ ni guyuu Jerusalén que chupa biaje lu ti dxi ruuticabe chupa dendxuʼ ne ti yuze para césar ne para xquidxi. Ca romanu qué nizaaláʼdxicaʼ pa para ti dios si o pa para chupa chonna dios ngue cayuuticabe ca maniʼ que ti cadi guninacaʼ laacabe. Ni jma risaca para laacabe nga gusihuinni ca judíu que cadi cucheenecaʼ Roma.

Ndaaniʼ guiráʼ ca guidxi ra biʼniʼ mandar Roma que guyuu stale binni ni biʼniʼ adorar xcaadxi dios ne cada lugar gadxé gadxé modo biʼniʼ adorárcabe ca dios que. Stale binni biʼniʼ adorar ca dios stiʼ ca griegu que ne para laacabe gastiʼ naca nga guni adivinar binni. Ne laaca guyuu caadxi religión ni biasastí neza ra rindani gubidxa, ca binni de ca religión que rúnicaʼ caadxi cosa nagana para guiene binni. Xi laacani yaʼ. Rusiidicabe qué zati binni, nácabe rabi ca dios que binni xi chigaca ne ziuu binni tobi si ne ca dios que pa gúnicaʼ caadxi de ca cosa ni naguíxhecabe para gaca adorarcaʼ. Guiráʼ modo  biʼniʼ adorárcabe ca dios ca bireeche ni guiráʼ ca lugar ra biʼniʼ mandar Roma. Lu ca primé siglu despué de ca dxi stiʼ Jesús nabé maʼ biʼniʼ adorar binni dios Serapis ne diosa Isis (ni guyuu Egipto), ne diosa benda Atargatis (ni guyuu Siria) ne dios stiʼ Gubidxa Mitra (ni guyuu Persia).

Biblia cuzeeteʼ lu libru stiʼ Hechos pabiáʼ biʼniʼ cré ca binni que stale dios dxi bibani ca primé xpinni Cristu. Guidúʼyanu caadxi ejemplu. Ndaaniʼ guidxi Chipre gupa gobernador stiʼ Roma ti bruju judíu ni bidii conseju laa (Hech. 13:6, 7). Ca binni ni nabeza ndaaniʼ guidxi Listra guníʼ íquecaʼ Pablu ne Bernabé nga ca dios stiʼ ca griegu Hermes ne Zeus (Hech. 14:11-13). Ndaaniʼ guidxi Filipos, biiyaʼ Pablu ti criada ni runi adivinar (Hech. 16:16-18). Dxi guyuube Atenas gúdxibe ca binni de guidxi que «nabé runi cre[caʼ] bidóʼ» ne biiyabe ti altar ndaaniʼ guidxi que ra cá ca diidxaʼ riʼ: «Para dios ni qué runibiáʼ du» (Hech. 17:22, 23). Ndaaniʼ guidxi Éfeso biiyabe nabé biʼniʼ adorar ca binni que diosa Ártemis (Hech. 19:1, 23, 24, 34). Ne lu isla stiʼ Malta gúdxicabe laabe nácabe dios purtiʼ qué ñaca huarabe ora biquiichiʼ ti beendaʼ laabe (Hech. 28:3-6). Pur modo nabani ca binni que, rihuinni dxíchica naquiiñeʼ chuʼ ca xpinni Cristu que cuidadu ti cadi gúnicaʼ xiixa ni cadi jneza ora guni adorarcaʼ Jiobá.

Religión ni gupa ca binni de Roma

Dxi maʼ ziyuni ganar ca romanu que xcaadxi guidxi la? biiyacabe gastiʼ naca guni crécabe ca dios ni napa ca guidxi que, purtiʼ nácabe laaca ca dios ni maca nápacabe que nga cani runi adorar ca binni que. Ne lugar de nucueezacabe binni de ñuni adorar ca dios que la? laapecabe biʼniʼ adorárcabe laacaʼ. Ra biguuchacabe ni runi guiráʼ ca religión que bisihuínnini pabiáʼ stale nga ca costumbre ni gúpacabe dxiqué. Ngue runi biiyaʼ ca romanu que zanda guni adorarcaʼ stale dios lugar de guni adorarcaʼ tobi si.

Dios ni jma risaca stiʼ ca romanu que nga Júpiter, ne laa nga ni rábicabe Óptimo Máximo («ni riníʼcani nga ni jma galán ne ni jma risaca que xcaadxi»). Laacabe guníʼ íquecabe rihuinni maʼ nuu dios que ora rundubi bi, ora riaba nisaguié, ora rihuinni xpiaaniʼ rayu ne ora rixidxi rayu. Ne xheelabe nga ti bizáʼnabe ni biree lá Juno, diosa stiʼ beeu, ne guníʼcabe rápabe ca gunaa lu guiráʼ ni rúnicaʼ. Ne xiiñibe nga Minerva, diosa stiʼ ca binni ni ridinde lu guerra, stiʼ ca artesanu ne ca binni runi dxiiñaʼ.

Ca romanu que gúpacaʼ stale dios. Gúpacabe ca dios ni rábicabe lares ne penates ni gupa ca familia que, ne diosa Vesta, ni rapa gui ni napa ca binni que ralídxicaʼ. Jano napa chupa lú, laabe  nga dios stiʼ guiráʼ cosa ni guzulúcabe gúnicabe. Ne nápacabe ti dios para cada dxiiñaʼ ni rúnicabe. Dede gúpacabe casi dios cani riníʼ íquecabe ne ca guenda stícabe, casi Paz, Salud, Pudicia (guendanayá), Fe, Virtud (guendanadxiibalú), Voluptousidad (gustu) ne xcaadxi casi laacani. Cumu biʼniʼ crécabe cayúnicabe ni na ca dios que lu guiráʼ ni rúnicabe nezalú binni ne zaqueca cani rúnicabe ora guirutiʼ cayuuyaʼ laacabe la? ngue runi biʼniʼ orárcabe ca dios ni zanda gacané laacabe guireendú ni naguixhe íquecabe gúnicabe, ne biiticabe maniʼ ne bíʼnicabe saa para laacaʼ.

Para gánnacabe xi racalaʼdxiʼ ca dios que la? ruyúbicabe xiixa seña ni gusihuinni xi ziuuláʼdxicaʼ guicaacaʼ, ne para nga ruuyaʼ chaahuicabe ca cosa ni dxaʼ ndaaniʼ ca maniʼ ni maʼ biiticabe para ca dios que, casi laʼdxiʼ stícame, purtiʼ nácabe modo nuucani rusihuínnicani pa jneza modo ruuyaʼ ca dios stícabe ni cá íquecabe gúnicabe.

Ra maʼ ziluxe siglu II ante de ca dxi stiʼ Jesús, ca binni de Roma bidiicaʼ cuenta laaca ca dios ni jma risaca ni nápacaʼ ngueca nga ca dios stiʼ ca griegu. Júpiter ca nga zeeda gaca Zeus; Juno ca zeeda gaca Hera, ne zacá bichaagacabe ca dios stícabe ne xcaadxi dios. Ora biʼniʼ cré ca romanu que ca dios stiʼ ca griegu la? laaca biʼniʼ crecaʼ ca cuentu stiʼ ca dios que. Peru lu ca cuentu que cadi galán diʼ ni rieeteʼ de laacabe, purtiʼ ruzeetecani nuu ra ruchee ca dios que ne nuu cosa ni qué zanda gúnicabe cásica ti binni. Casi Zeus nácabe gulaxoo binni ne laaca gulaxoo cani nahuiiniʼ ne gutané cani nabani ne cani nácabe qué rati. Guiráʼ ca cosa dxabaʼ ni runi ca dios que —ca cosa ni rihuinni lu ca teatru ni riuuláʼdxicabe chiguuyacabe dede rigapanácabe que— gupa ca binni que cani casi razón para gúnicaʼ guiráʼ cosa dxabaʼ ni riuuláʼdxicaʼ.

Stale de ca binni ni nuu xpiaaniʼ que guniʼcaʼ cadi dxandíʼ ca historia que, ne guyuu biaje biiyacabe cani casi cuentu ni bizáʼ si binni. Zándaca pur nga gunabadiidxaʼ Poncio Pilatu «Xii nga ni dxandí yaʼ» (Juan 18:38). Ti binni ni nanna de historia guníʼ xi rusihuinni ni gunabadiidxaʼ Pilatu que, laabe guniʼbe: «para stale de ca binni nuu xpiaaniʼ de dxiqué la? guníʼ íquecaʼ casi ora cunitisicaʼ tiempu nga gúʼyacaʼ pa dxandíʼ xiixa cosa o pa cadi dxandíʼ ni».

Biʼniʼ adorárcabe emperador

Augusto bizulú biʼniʼ mandar lu iza 27 ante de ca dxi stiʼ Jesús dede lu iza 14 despué de ca dxi stiʼ Jesús, ne dxi ca nga bizulú biʼniʼ adorárcabe ca emperador que. Ne ndaaniʼ ca guidxi huiiniʼ ni nuu neza ra rindani gubidxa stiʼ guidxi que, ra riníʼcabe griegu, nabé bidii ca binni que xquíxepeʼ Augusto purtiʼ despué de gudíndecaʼ stale tiempu gucanebe laacaʼ gusaana de tíndecaʼ ne guibánicaʼ galán. Ni racalaʼdxiʼ ca binni de guidxi que nga chuʼ tuuxa ni napa poder ni cadi gusaana de gapa laacabe. Biʼniʼ sentírcabe caquiiñecabe ti ley ni gacané chuʼ ca religión que tobi si, guni adorarcaʼ xquídxicaʼ ne chuʼ guiráʼ binni tobi si lu náʼ ti binni «ni gulá» laacaʼ. Ngue runi bíʼnicabe emperador que dios stícabe.

Nécapeʼ dxi bibani Augusto qué niná ñábicabe laa dios la? laabe guniʼbe naquiiñeʼ gaca adorar diosa Roma. Peru laapebe bíʼnicabe dios dxi maʼ gútibe. Ne zacá bizulú ca binni ni guleza ndaaniʼ ca guidxi huiiniʼ ra biʼniʼ mandar Roma que biʼniʼ adorarcaʼ guidxi que ne cani runi mandar ndaaniʼ ni. Ca binni que gudíxhecaʼ gaca adorar emperador que. Ni gudíxhecabe que nagueenda bizulú biʼniʼ ca binni ni nabeza ndaaniʼ ca guidxi huiiniʼ que ni. Ne ora guni adorárcabe emperador que cusihuínnicabe cayuni respetárcabe xquídxicabe ne qué zusaanacabe de gúnicabe ni nani.

Domicianu biʼniʼ mandar lu iza 81 dede lu iza 96 despué de ca dxi stiʼ Jesús, laabe nga primé emperador ni gunabaʼ gaca adorar casi ti dios. Ca dxi que, maʼ nanna ca romanu que tuu nga ca xpinni Cristu lade ca judíu, ne biiyacabe ca xpinni Cristu que casi ti secta «nacubi» biasa ne pur ngue guzanándacabe laacaʼ. Zándaca dxi biʼniʼ mandar Domicianu nga biseguyoocabe Juan lu isla stiʼ Patmos purtiʼ cananíʼ «irá ni nanna de Jesucristu» (Apo. 1:9).

Lu libru stiʼ Apocalipsis ni bicaa Juan dxi nuseguyoocabe laa lu isla stiʼ Patmos, rieeteʼ de ti xpinni Cristu ni láʼ Antipas ni biiticabe ndaaniʼ  guidxi Pérgamo, ti lugar ra biʼniʼ adorar binni ca emperador que (Apo. 2:12, 13). Zándaca lu ca iza que nga gunabaʼ gobiernu stiʼ Roma ca xpinni Cristu que gúnicaʼ guiráʼ ni runi religión stiʼ guidxi Roma. Pa zacá ni o pa cadi zacá ni, lu iza 112 despué de ca dxi stiʼ Jesús, maʼ canabaʼ Plinio ca xpinni Cristu de Bitinia gúnicaʼ ni, casi bidúʼyanu lu carta bicaabe ra nuu Trajano ni bizéʼtenu ora bizulunu que.

Trajano nabé guyuulaʼdxiʼ modo biʼniʼ tender Plinio ca guendanagana yenécabe nezalú, ne gúdxibe laa guuti guiráʼ ca xpinni Cristu ni qué náʼ guni adorar ca dios ni nuu Roma. Peru laaca gúdxibe laa: «Binni ni guiníʼ cadi xpinni Cristu laa ne gusihuinni ni ora guinabaruaa ca dios stinu la? [naquiiñeʼ] gutiidiláʼdxiluʼ stóndabe purtiʼ maʼ guca arrepentirbe, nécapeʼ dxiqué bihuinni gúcabe xpinni Cristu».

Ca romanu que cadi jneza biiyacaʼ guinabaʼ ti religión ca xpinni guni adorarcaʼ tobi si dios. Pa ca dios stiʼ ca romanu qué ninábacaʼ gaca adorar ti dios si, xiñee guinabaʼ Dios stiʼ ca xpinni Cristu que gácani zaqué yaʼ. Ne para laacabe ora guni adorárcabe ca dios stiʼ Roma que cusihuínnicabe cayuuláʼdxicabe ni cayuni ca políticu stiʼ guidxi que. Ngue runi, ora qué nácabe gúnicabe cani bizéʼtenu ca, cusihuínnicabe cudxiidéchecabe guidxi que. Peru casi biiyaʼ Plinio que, qué ñanda diʼ nucaacabe guiráʼ ca xpinni Cristu ñuni adorarcaʼ ca dios stiʼ Roma. Para ca xpinni Cristu que cudxiidéchecaʼ Jiobá ngue pa gúnicaʼ zaqué, ngue runi stale de laacabe guníʼ zaa gati lugar de guni adorarcaʼ emperador que.

Xiñee risaca ca ndiʼ para laanu yaʼ. Nuu guidxi ribeza guni adorar ca binni ni nabeza ndaaniʼ ni escudu ne bandera sticaʼ. Laanu ca xpinni Cristu ruzúʼbanu stiidxaʼ cani runi mandar (Rom. 13:1). Peru ora rúnicabe homenaje ra riquiiñecabe bandera stiʼ ca guidxi ca la? rinándanu ni na Biblia ra caníʼ Jiobá laasi nga naquiiñeʼ guni adorarnu ne laaca cudiibe laanu conseju riʼ: «Lausaana bidóʼ, ne cadi guni cre tu laacaʼ» ne «cadi ucuí tu stobi jlugar Dios» (1 Cor. 10:14; 1 Juan 5:21; Nah. 1:2). Ne sicaríʼ bisiene chaahuiʼ Jesús ni: «Dios si nga naquiiñe usisaca cabe, ne guni cabe ni na» (Luc. 4:8). Nga runi naguixhe íquenu cadi gusaananu de gúninu ni na Dios ni runi adorarnu.

[Ni caníʼ yaza 5]

Cani dxandíʼ xpinni Cristu Jiobá si runi adorarcaʼ

[Ca dibuju/foto ni zeeda lu yaza 3]

Ca primé xpinni Cristu qué ninacaʼ ñuni adorarcaʼ emperador ne ca dios stiʼ ca romanu

[Paraa gucuaacabe dibuju o foto]

Emperador Domicianu

[Paraa gucuaacabe dibuju o foto]

Zeus

[Ra gucuaacabe dibuju o foto]

Emperador Domicianu: Todd Bolen/Bible Places.com; Zeus: foto stiʼ Todd Bolen/Bible Places.com, ni guleecabe ndaaniʼ Museo Arqueológico ni nuu Estambul

[Dibuju/foto ni zeeda lu yaza 4]

Ca xpinni Cristu de Éfeso qué ninacaʼ ñuni adorarcaʼ Ártemis diosa ni nabé biʼniʼ adorar binni dxiqué (Hech. 19:23-41)