Cadi guixéleluʼ de Dios ora cayápaluʼ ti binnilídxiluʼ ni huará

TI GUNAA Testigu ni láʼ Kim bihuinni napa ti tumor gaxha de dxita deche, despué de ngue bihuinni nápabe cáncer. a Xheelabe Steve guníʼ: «Primeru guleecabe tumor que ne despué bidiicabe laabe radioterapia ne quimioterapia. Cumu binítibe stale stipa pur cani bidiicabe laabe que la? maʼ qué ñándapeʼ niniibibe».

Ñee ruxuíʼluluʼ yuubaʼ biʼniʼ sentir Steve ora bíʼyabe modo cudxiilú xheelabe ni nadxiibe guendahuará malu que la? Zándaca nápaluʼ ti binnilídxiluʼ ni napa ti guendahuará ni ziyaca xiroo chaahuidugá o zándaca nápaluʼ ti binnilídxiluʼ ni maʼ nagola (Ecl. 12:1-7). Pa zacá ni, zanda gápaluʼ laabe pa gápaluʼ lii. Cadi naquiiñeʼ guixéleluʼ de Jiobá, purtiʼ pa guixéleluʼ de laabe ziuuluʼ triste ne qué ziuuluʼ nazaaca, ne qué zanda gacaneluʼ binnilídxiluʼ ni huará ca. Ximodo zanda gúninu dxiiñaʼ ni nápanu ndaaniʼ neza binni ridagulisaa ne gúʼyanu ti binnilídxinu ni huará o ni maʼ nagola yaʼ. Ximodo zanda gacané ca binni ni nuu ndaaniʼ neza binni ridagulisaa yaʼ.

Ximodo gúninu chupa cosa juntu

Para gápanu ti binnilídxinu ni huará sin guixélenu de Dios ne cadi gaca huaranu la? naquiiñeʼ quixhe chaahuinu tiempu stinu ne iquiiñenu stipa stinu jneza. Casi na Proverbios 11:2, «binni ni qué rudxiibaʼ laca laa la? nuu xpiaaniʼ», ni na ca diidxaʼ ca nga nuu xpiaaniʼ ca binni ni nanna nuu xiixa ni qué zanda gúnicaʼ. Nga runi, pa qué racaláʼdxinu guidxáganu la? naquiiñeʼ quixhe chaahuinu tiempu stinu ne ca dxiiñaʼ nexheʼ gúninu.

Bihuinni qué rudxiibaʼ Steve laa ne nuu xpiaaniʼ ra biʼniʼ zacá. Aparte de gúnibe dxiiñaʼ para gacanebe xfamíliabe la? gúcabe ni  ruuyaʼ dxiiñaʼ runi grupu de binnigola ne gúcabe binnigola ni ruuyaʼ modo rireeche diidxaʼ ndaaniʼ ti neza binni ridagulisaa ni nuu Irlanda. Laaca gúcabe tobi de cani nuu lu Grupu de Binnigola ni Riniʼné ca doctor neza ra nabézabe. Steve guníʼ: «Qué ñuu dxi niníʼ Kim cadi cayuneʼ tender laa pur guiráʼ dxiiñaʼ ni napaʼ que, peru naa nannaʼ stale dxiiñaʼ ngue para naa. Ngue runi despué de bineʼ orar Dios gudixhe iqueʼ gusaanaʼ de gacaʼ ni ruuyaʼ dxiiñaʼ runi grupu de binnigola. Qué nusaanaʼ de ñacaʼ binnigola, peru ra bisaanaʼ de guneʼ caadxi de ca dxiiñaʼ que gupaʼ tiempu para guuyaʼ xheelaʼ ne gacaniáʼ laa lu cani caquiiñeʼ».

Gudiʼdiʼ si tiempu, dxi maʼ guyuu Kim xcaadxi galán bibiguetaʼ biiyacabe xi zanda gúnicabe. Cumu maʼ gunda gucané xheelaʼ Steve laa la? gunda bíʼnibe ca dxiiñaʼ ni maca rúnibe ndaaniʼ neza binni ridagulisaa. Steve guníʼ: «Guirópadu maʼ bizíʼdidu nuu cosa ni qué zanda gúnidu pur guendahuará que. Rudieeʼ xquíxepeʼ Jiobá pur gucané laadu ne laaca rudieeʼ xquíxepeʼ xheelaʼ purtiʼ neca nadaruʼ nuube qué ruzeetebe de laani ne racanebe naa».

Yanna guidúʼyanu ni bizaaca ti binnigola ni riganna ca neza binni ridagulisaa ni láʼ Jerry ne xheelabe Mary. Laacabe bichaacabe ni naguixhe íquecabe gúnicabe para  yegápacabe bixhoze ne jñaa Jerry. Mary guníʼ: «Naa ne xheelaʼ gúpadu gana ñácadu misioneru ndaaniʼ sti guidxi, peru laasibe xiiñiʼ jñaabe ne bixhózebe ne caquiiñecaʼ chuʼ tu gacané laacaʼ. Ngue runi gudixhe íquedu guiaanadu Irlanda para gápadu laacabe. Ne zaqué gunda gúpadu bixhoze Jerry biaʼ tiempu gutaʼ ra hospital dede dxi guti. Yanna guiráʼ dxi rinínedu suegraʼ ne riuʼduʼ gaxha de laabe pa iquiiñebe laadu. Ca binni ni ridagulisaanebe nabé racanecaʼ laadu ne nga huayacané laadu cadi gusaanadu de gúnidu xhiiñaʼ Jiobá».

Xi zanda guni xcaadxi para gacanecaʼ

Ora guníʼ Pablu ximodo naquiiñeʼ gacané ca binni ridagulisaa ca viuda ni maʼ nagola la? guniʼbe sicaríʼ: «[Pa tuuxa] qué ulabi ca lisaa ne jma rusi pa qué ulabi ca binni lidxi, ma biree de ni runi cre, ne zeda aca jma nadxaba que ni qué runi cre». Apóstol ca guníʼ naquiiñeʼ gudii ca xpinni Cristu ni caquiiñeʼ bixhozecaʼ ne jñaacaʼ ni maʼ nagola ne bixhozebídacaʼ ne jñaabídacaʼ «purti nga nga riulaʼdxi Dios guni binni, ne jneza ni» (1 Tim. 5:4, 8). Peru xcaadxi xpinni Cristu ni nuu ndaaniʼ neza binni ridagulisaa laaca zanda gacanecaʼ ne naquiiñeʼ gúnicaʼ ni.

Yanna guininu de Hakan ne Inger, ti guendaxheelaʼ ni maʼ huaniisi ni nabeza Suecia. Hakan guníʼ: «Ora gúnnadu napa xheelaʼ cáncer la? nabé bidxíbidu. Inger qué huayuu dxi gaca huará ne naguidxi nuu. Peru yanna nápadu xidé chuudu ra hospital guiráʼ dxi para guicaabe tratamientu. Ca medicina que rusirácani stipa stibe. Ca dxi huarabe que nisi ndaaniʼ yoo guyuube ne gupa xidé biaananiáʼ laabe para gapaʼ laabe». Xi biʼniʼ neza binni ridagulisaa que para gucané guendaxheelaʼ riʼ yaʼ.

Ca binnigola ni runi dxiiñaʼ ndaaniʼ neza binni ridagulisaa que biyúbicaʼ modo gucaadiágacabe ca guendaridagulisaa que pur teléfono. Ne laaca yeganna ca xpinni Cristu que laacabe, guníʼnecaʼ laacabe pur teléfono ne biseendacaʼ carta ne tarjeta ra nuucabe. Sicaríʼ guníʼ Hakan: «Biʼniʼ sentirdu gucané Jiobá laadu ne ca xpinni Cristu. Pa qué ñacanécabe laadu nirá fe stidu. Nayéchepeʼ nuudu purtiʼ Inger maʼ bianda ne maʼ riuudu ra Yoo stiʼ Reinu sti biaje». Dxandíʼ, ca xpinni Cristu ni guni guiráʼ ni ganda para gacané cani huará ne cani maʼ nagola ni nuu ndaaniʼ neza binni ridagulisaa, laacaʼ nga «dxandíʼ xhamígunu [ne] guiráʼ ora nadxii laanu, ne zeeda [gaca] casi ti bíchinu o ti bizánanu ni nuuca para gacané laanu ora nápanu xiixa guendananá» (Pro. 17:17).

Jiobá rusisaca dxiiñaʼ ni rúniluʼ

Neca ridxaga binni nga ora gapa ti binnilidxi ni huará la? laaca ricaa ndaayaʼ ora gúnini. Rey David na nayecheʼ nga tutiica gacané cani caquiiñeʼ chuʼ tu gacané laacaʼ dede ne cani napa xiixa guendahuará malu (Sal. 41:1).

Ñee zanda chuʼ ti binni ni cayapa binnilidxi ni huará nayecheʼ la? Zanda pue, Proverbios 19:17 na: «Ni rilaselaʼdxiʼ binni pobre la? cutiiñeʼ Jiobá ne laabe zaguíxebe laa». Dios ni dxandíʼ jma rizaalaʼdxiʼ ca xpinni ni huará ni qué rusaana de guni ni na ne riguube ndaayaʼ cani rapa laacaʼ. David biindaʼ sicaríʼ: «Jiobá zudii stipa [binni huará ca] ora maʼ huarabe; dxandipeʼ [zapa] laabe ora maʼ néxhebe huarabe» (Sal. 41:3). Ne cadi guiaandaʼ laanu, pa guidxaagalú ni cayapa binni huará ca guendanagana la? laaca zacané Jiobá laa.

¡Galán nga gánnanu rusisaca Jiobá cani rúninu ora gápanu ca binnilídxinu ni huará! Neca riquiiñeʼ stale stipa para gúninu ni, peru Biblia cayabi laanu «casi ñaca nusigaʼde [n]u ni Dios ne nga nga ni riulaʼdxiʼ» (Heb. 13:16).

[Ni cá ñee yaza]

[Ca dibuju/foto ni zeeda lu yaza 18]

Cadi gusaanuʼ de guʼnuʼ ni na Jiobá ne bidii lugar gacanécabe lii