Gusisácanu ca binni ni maʼ huaniisi

GURIÁ nisadóʼ ni nuu California (Estados Unidos) nuu tobi de ca yaga ni jma huabee binni foto lu guidubi naca Guidxilayú ne yaga ca lani: Ciprés Solitario. Nácabe nápani jma de 250 iza. Cumu nabé naguidxi yaga riʼ ne sicarú ni la? nga runi nabé rapa binni ni, dede maʼ bindiibicaʼ ti cable ni ne maʼ guluucaʼ ti barda huiiniʼ de guié guidubi ñee ni.

Zándaca rusietenalaʼdxiʼ Ciprés Solitario ca laanu ca xpinni Cristu ni maʼ nagola ni nuu ndaaniʼ xquidxi Dios. Laacabe qué rusaanacabe de gúnicabe ni na Dios ne jmaruʼ si ora rucheechecabe diidxaʼ. Joel ni riguixhená que guníʼ ziuu binni ni maʼ nagola ni zigucheeche ca diidxaʼ ni zeeda lu Biblia (Joel 2:28-32; Hech. 2:16-21). Ne zacá huayaca ni. Guiníʼ íquesinu pabiáʼ stale hora nga rucheeche ca xpinni Cristu ni maʼ huaniisi stiidxaʼ reinu (Mat. 24:14). Nuu de laacaʼ maʼ raca iza de cayuni huantarcaʼ cani canazananda laacaʼ ne xcaadxi guendanagana. Pa rusisaca binni ti yaga ciprés purtiʼ naguidxi ni, rucaacaʼ guié ñee ni ne rundiibicaʼ ni ne cable purtiʼ runi huantar ni, yanna laanu ñee cadi nápanu razón para gusisácanu ne guni respetarnu cani maʼ nagola purtiʼ qué huasaanacaʼ de gúnicaʼ ni na Dios la?

Jiobá gunabaʼ xquidxi de dxiqué guni ndiʼ: «Nezalú ti binni ni maʼ natoope ique naquiiñeʼ guiásaluʼ [pur respetu], ne naquiiñeʼ guiéneluʼ ti binnigola» (Lev. 19:32). Lade ca xpinni Dios ni nabani yanna riʼ, zadxélanu stale ejemplu stiʼ ca binni maʼ huaniisi ni maʼ ziné stale iza de qué huasaana de «sáne[caʼ] Dios» (Miq. 6:8). Cumu qué rusaana ca binnigola ca de chinándacaʼ ca conseju ni  zeeda lu Biblia la? nga runi zanda guininu «guicha toope [stícabe] zeeda gaca casi ti corona sicarú» (Pro. 16:31).

Pablu gudxi Timoteu: «Cadi tinde neu ti hermanu ni ma nagola, sínuque uníʼ né laa ne diidxa nadóʼ casi niníʼ neu bixhoʼzoʼ». Laaca gúdxibe laa: «zaqueca ca gunaa gola, laca gupa laaca casi jñoouʼ» (1 Tim. 5:1, 2). Ora guni Timoteu ni gunabaʼ Pablu laa que cusihuínnibe cayuni respetarbe ca binni ni maʼ natoope ique. Rihuinni dxíchica racalaʼdxiʼ Jiobá guinínenu ca binni ni maʼ nagola ca ne respetu.

Romanos 12:10 na: «Cada tobi usisaca stobi ne cadi laca laa». Cani naquiiñeʼ guni respetar ca binni huaniisi primé nga ca binnigola ni nuu ndaaniʼ ca neza binni ridagulisaa. Peru guiranu naquiiñeʼ chinándanu conseju ca.

Ne cani jma caquiiñeʼ guni zacá nga cani napa bixhoze ne jñaa ni maʼ nagola o cani napa bixhozebidaʼ ne jñaabidaʼ. Pa binni riníʼ ique ximodo guiaapaʼ yaga Ciprés Solitario ca, ñee cadi jma naquiiñeʼ guiníʼ íquenu ximodo gusisácanu bixhózenu ne jñaanu ni maʼ nagola, bixhozebídanu ne jñaabídanu la? Zanda gúninu zacá ora gucaadiáganu ni gábicabe laanu ne cadi guyúbinu modo gaca ni racaláʼdxinu sin guinabadiidxanu laacabe xi racaláʼdxicabe (Pro. 23:22; 1 Tim. 5:4).

Jiobá, Dios ni dxandíʼ, nabé rusisácabe ca xpínnibe ni maʼ nagola. Qué ziuu dxi gusaanabe laacaʼ (Sal. 71:18). Ne rudiibe stipa laacaʼ para gúnicaʼ ni nabe. Laanu laaca naquiiñeʼ gacanenu laacabe ne guni respetarnu laacabe.

[Ca dibuju/foto ni zeeda lu yaza 7]

Cásica caquiiñeʼ Ciprés Solitario gápacabe laa la? cani maʼ huaniisi ca laaca naquiiñeʼ guni respetarnu ne gusisácanu laacaʼ

[Ra gucuaacabe dibuju o foto]

American Spirit Images/age fotostock