Laatu ca hombre, ñee ruzuubatu stiidxaʼ Cristu casi xaíque la?

«Cristu nga xaíque sti irá hombre.» (1 COR. 11:3)

1. Xi rusihuinni riuulaʼdxiʼ Jiobá gata chaahuiʼ guiráʼ cosa.

 APOCALIPSIS 4:11 na: «[Jiobá] Dios stidu, lii siouʼ nga naquiiñe udxiʼba du ne usisaca du ne iní du nandxóʼ loʼ. Purti lii bizáʼ lu irá xixé ni nuu. Uyáʼ ni ne nuu ru ni purti nga ni na luʼ». Cumu Jiobá nga bizáʼ guiráʼ xixé cosa la? nga runi laabe nga xaíque stiʼ cani. Laabe nga jma nápabe poder luguiáʼ guiráʼ xixé cosa. Ne modo gudíxhebe guni cada grupu de ca ángel stibe dxiiñaʼ rusihuínnini «riulaʼdxi be gata chaahui irá cosa» (1 Cor. 14:33; Isa. 6:1-3; Heb. 12:22, 23).

2, 3. 1) Tuu nga bizáʼ Jiobá primé. 2) Tuu nga na Biblia naca xaíque stiʼ Jesús.

² Stale millón de iza bibani Jiobá stubi. Peru bedandá dxi guníʼ íquebe guzaʼbe sti binni de espíritu ni binibiáʼcabe laa casi «Diidxaʼ», purtiʼ biquiiñebe laa para guiníʼ xi racaláʼdxibe. Jiobá biquiiñeʼ Xiiñiʼ para guzáʼ xcaadxi cosa, ne despué biseendaʼ laabe para guibánibe casi ti hombre ni qué ruchee, Jesucristu (biindaʼ Juan 1:1-3, 14).

³ Tuu nga na Biblia naca xaíque stiʼ Jesús ya. Apóstol Pablu bicaa ca diidxaʼ riʼ pur espíritu santu: «Peru racaladxe ganna tu, Cristu nga xaíque sti irá hombre, ne hombre nga xaíque sti gunaa, ne Dios nga xaíque sti Cristu» (1 Cor. 11:3). Cristu ruzuubaʼ stiidxaʼ Bixhoze casi xaíque. Ne para cadi tinde guiráʼ xixé binni ne cadi tinde ca ángel ni bizáʼ Dios ne chuʼcaʼ tobi si la? naquiiñeʼ guzuubacaʼ stiidxabe. Dede ne Xiiñibe ni gucané «dxi bizáʼ be irá xixé» cosa naquiiñeʼ guzuubaʼ stiidxabe (Col. 1:16).

4, 5. Ximodo biiyaʼ Jesús derechu ni napa Jiobá de guni mandar.

⁴ Ximodo biiyaʼ Jesús derechu ni napa Jiobá de guni mandar ne xi bíʼnibe ora guníʼ Jiobá zuseendaʼ laabe lu Guidxilayú riʼ. Guidúʼyanu xi caníʼ Biblia de laani: «Cristu Jesús [...] neca Dios laabe peru qué ña be tu naca be, sínuque bisaana be enda Dios que para beda gaca be casi ti mozo ra gule be ndaani guidxilayú. Ne ra ma naca be binni guidxilayú, bidii be lugar uca be biaʼ ri tiʼ, ne bizuuba be diidxa dede uná be guti be lu [yaga] casi rati cani qué iquiiñeʼ» (Fili. 2:5-8).

⁵ Jesús qué liica nuyubi nudxiibaʼ laaca laa ne guiráʼ ora biʼniʼ ni na Bixhoze. Ngue runi guniʼbe sicaríʼ: «Qué zanda gune gasti de naa siaʼ [...]. Ne jneza rudxiiba donda purti qué rune ni racaladxe sínuque rune ni na Bixhoze ni biseenda naa» (Juan 5:30). Laaca guniʼbe: «Qué riaana dxie de gune ni riulaʼdxi [Dios]» (Juan 8:29). Dxi mayaca gátibe gúdxibe Bixhózebe ca diidxaʼ riʼ lu ti oración: «Ma bisisaca lii ndaani guidxilayú riʼ, ne ma binduuxe ni biseendu naa beda guneʼ» (Juan 17:4). Rihuinni dxíchica qué ñaca nagana para laabe ñuuyabe Bixhózebe casi xaíque stibe.

Ribeendú Xiiñiʼ Dios ni galán ora guzuubaʼ stiidxaʼ Bixhoze

6. Xi guenda sicarú bisihuinni Jesús.

⁶ Pur ca guenda sicarú ni gupa Jesús dxi bibani lu Guidxilayú riʼ qué nusaana de ñaca ti ejemplu. Ne tobi de ca guenda ni jma bisihuínnibe nga nabé gunnaxhiibe Jiobá, ne laapebe  guniʼbe ni: Naa «nadxiee Bixhozeʼ» (Juan 14:31). Ne laaca qué nusana de nusihuínnibe nadxiibe binni (biindaʼ Mateo 22:35-40). Laabe qué ñácabe naduxhuʼ, sínuque gúcabe nachaʼhuiʼ ne biénebe binni. Ngue runi gúdxibe ca binni nadóʼ sicaríʼ: «Latáʼ ra nuaa irá ni ma bidxaga de cuyubi modo guia ladxidóʼ, cani ma qué ganda guni irá ni rucaa cabe laa guni, purti para laa ruluíʼ naguixhe cabe ti ayubu xa yanni. Latáʼ ra nuaaʼ, zaziilaʼdxi ladxidóʼ to. Laudxiiba ayubu stinne xa yanni tu purti nasisi ni, cadi nanaa ni casi ni nua tu ca» (Mat. 11:28-30). Cásica cani nahuiiniʼ zaqueca cani maʼ huaniisi ratadxí ladxidoʼcaʼ ora gunibiáʼ chaahuicaʼ ximodo Cristu ne gánnacaʼ guiráʼ ca diidxaʼ sicarú ni guniʼbe, jma pa maʼ huayuu tu huaquichiná laacaʼ.

7, 8. 1) Casi na Ley que, xi cadi naquiiñeʼ ñuni gunaa ni caxii rini que. 2) Xi biʼniʼ Jesús ne gunaa ni huará que.

⁷ Yanna guidúʼyanu modo bidxaaga Jesús ca gunaa. Biaʼ dxi maʼ bibani binni lu Guidxilayú riʼ, maʼ bihuinni nabé runi ca hombre ca menu ca gunaa ca. Ne ca xaíque yuʼduʼ ni bibani ndaaniʼ guidxi Israel que laaca bíʼnicaʼ zacaca. Peru Xiiñiʼ Dios nabé biʼniʼ respetar laacabe. Ne ti ejemplu ni rusihuinni dxandíʼ ni nga ni bíʼnibe ne ti gunaa ni maʼ ziné doce iza de caxii rini. Maʼ birá guiráʼ ni nápabe pur huayebe ra nuu stale doctor purtiʼ racaláʼdxibe guiándabe, peru laga bininacaʼ laabe ne jmaruʼ si guca xiroo guendahuará stibe. Ne lu Ley ni gucuaa Moisés que na qué zanda diʼ chuʼbe lade binni ni nazaaca ne pa chuʼ tu canaʼ laabe laaca cadi naquiiñeʼ chuʼ lade binni (Lev. 15:19, 25).

⁸ Ora binadiágabe cusianda Jesús binni huará guyuube lade guiráʼ binni que ne guníʼ íquebe: «Neca xhaba si Jesús [canaʼ], [ziandaʼ]». Biʼniʼ gunaa que zaqué ne oraqueca bianda. Cristu nanna cadi naquiiñeʼ diʼ nigaʼnaʼ gunaa que laa. Peru lugar de nidindené Jesús laabe laga guca nachaʼhuiʼ ne laabe. Cumu nanna Jesús maʼ stale iza de qué guidxélabe ximodo guiándabe la? gudxi laabe ne diidxaʼ nadóʼ: «Bianda lu, xiiñeʼ, purti bini cre luʼ. Yanna, sicarú uyé, ma bianda lu ne ma qué zabigueta ru ni» (Mar. 5:25-34).

9. Xi biʼniʼ Jesús ora gucalaʼdxiʼ ca discípulo que nucueezacaʼ de nidxiña ca baʼduhuiiniʼ que laa.

⁹ Dede ne cani nahuiiniʼ biʼniʼ sentircaʼ galán ora nuucaʼ ra nuu Jesús. Ti biaje yené caadxi binni xiiñiʼ ra nuube, peru ca discípulo que gudindenecaʼ laacabe purtiʼ zándaca guníʼ íquecaʼ zuchiiñacabe Jesús. ¡Nin cadi jneza ngue modo guníʼ ique ca discípulo que! Relatu ni zeeda lu Biblia ca cusiene: «Ne ora biʼya Jesús xi cayaca la? bidxiichi, ne na: Cadi ucueeza tu ca baʼdu ca. Zaa gueeda cabe ra nuaaʼ purti stícabe irá ni napa Dios ladxi náʼ». Ne «oraque ucuaa be ca baʼdu que, uluu be laaca ndaani ná be ne udixhe ná be luguiá caʼ, uluu be ndaaya laacaʼ». Bíʼnibe ngue cadi purtiʼ si riuuláʼdxibe chuʼcaʼ gaxha de laabe, sínuque dxandíʼ nadxiibe laacaʼ (Mar. 10:13-16).

10. Ximodo beeda gapa Jesús ca guenda sicarú stiʼ.

¹⁰ Ximodo beeda gapa Jesús ca guenda ni bisihuinni lu Guidxilayú riʼ yaʼ. Gúpabe cani purtiʼ bibánibe mil de iza cueʼ Bixhózebe guibáʼ, biiyaʼ chaahuibe ximodo Laa, ne ni jma gucané laabe nga ora bíʼyabe pabiáʼ nadxii Dios binni pur modo runi mandar laacabe (biindaʼ Proverbios 8:22, 23, 30). Qué ñanda diʼ ñúnibe nga pa qué nuzuubabe diidxaʼ. Rihuínnica nabé guyuuláʼdxibe gúnibe ni na Jiobá, ne laa nabé guyuulaʼdxiʼ gapa ti Xiiñiʼ ni nabé ruzuubaʼ diidxaʼ. Dxi bibani Jesús lu Guidxilayú casi hombre qué nusaana de nusihuinni ca guenda sicarú stiʼ Bixhoze. ¡Nabé riuʼnu nayecheʼ nga gánnanu gulí Dios laabe para gácabe Rey guibáʼ! Dxandíʼ, ti ndaayaʼ nga guni mandarbe laanu.

Gápanu ca guenda ni napa Cristu

11. 1) Tu ejemplu stiʼ nga rúninu stipa pur chinándanu. 2) Xiñee naquiiñeʼ guni ca hombre stipa pur gusihuínnicaʼ ca guenda stiʼ Jesús.

¹¹ Nécapeʼ guiráʼ ca xpinni Cristu ni nuu ndaaniʼ neza binni ridagulisaa nga naquiiñeʼ gúnicaʼ stipa guiráʼ dxi para guibánicaʼ casi  bibani Jesús la? ca hombre nga jma naquiiñeʼ gúnicaʼ ni. Xiñee yaʼ. Casi maʼ bidúʼyanu ca, Biblia ruzeeteʼ «Cristu nga xaíque sti irá hombre». Ne cásica yenándabe ejemplu stiʼ Dios ni dxandíʼ, Xaíque stibe, zacaca ca hombre ni maʼ guyuunisa naquiiñeʼ gúnicaʼ stipa pur gácacaʼ casi Jesús, xaíque sticaʼ. Ne ngaca nga ni biʼniʼ Pablu dxi beeda gaca xpinni Cristu, pur nga gunda bidiibe conseju riʼ ca xpinni Cristu de dxiqué: «Lachinanda ejemplu stinne casi zinanda ejemplu sti Cristu» (1 Cor. 11:1). Pedru laacaʼ bizeeteʼ de laani ora guníʼ ca diidxaʼ riʼ: «Para nga uníʼ né be laatu, purti laca ucaná Cristu pur laatu. Yanna laguni casi biʼni Cristu» (1 Ped. 2:21). Sti razón ni nuu para chinanda ca hombre ejemplu stiʼ Jesús nga purtiʼ laacabe zanda gácacabe siervu ministerial ne binnigola. Cásica biecheʼ Jesús ora yenanda ejemplu stiʼ Jiobá la? laacabe laaca naquiiñeʼ chúʼcabe nayecheʼ ora chinándacabe ejemplu stiʼ Maestru stícabe.

12, 13. Ximodo naquiiñeʼ gaca ca binnigola ca ne ca dendxuʼ ni cayápacaʼ.

¹² Ca binnigola ni nuu ndaaniʼ ca neza binni ridagulisaa nga naquiiñeʼ gusihuínnicaʼ ca guenda stiʼ Cristu. Zacatiʼ nga zanda gúnicabe ni na conseju ni bidii Pedru laacabe: «Lagapa ca xpinni Dios, cani bisaana be lu ná tu. Laguni ni de idubi ladxidóʼ to casi racalaʼdxi Dios, ne cadi purti napa tu xidé guni tu ni, nin pur bidxichi, sínuque laguni ni de idubi ladxidóʼ to. Cadi guni mandar tu laacabe casi ñaca laatu nga xpixuaana cabe, sínuque lasá jneza ti guʼya cabe ximodo ibani cabe» (1 Ped. 5:1-3). Ca binnigola ca qué zanda diʼ guiniʼcaʼ de laasicaʼ  xi naquiiñeʼ guni ca xpinni Cristu ne laaca cadi naquiiñeʼ guquichinacaʼ laacabe. Naquiiñeʼ gácacabe casi Cristu, gannaxhiicabe ca xpinni, guiénecabe laacaʼ, cadi gudxiibacabe laca laacabe ne gácacabe nachaʼhuiʼ ne ca dendxuʼ ni maʼ bisaana Jiobá gápacabe.

¹³ Cani naca xaíque lade ca binni ridagulisaa cadi naquiiñeʼ guiaandaʼ laacaʼ nácacaʼ binni ruchee (Rom. 3:23). Nga runi naquiiñeʼ gúnicabe stipa pur gunibiáʼ chaahuicabe Cristu ne gannaxhiicabe binni cásica bíʼnibe. Laaca naquiiñeʼ guiníʼ íquecabe ximodo Jiobá ne ximodo Jesús para ne binni ne gúnicabe zacaca. Cadi naquiiñeʼ gusiaandacabe conseju ni bidii Pedru riʼ: «Ne irá tu laizaalaʼdxi saa, sin udxiiba tu laca laatu, purti cá lu guiʼchi ra na ni: “Nanalaʼdxi Dios ni runi cani rudxiiba laca laa, peru racané be cani qué rudxiiba laca laa”» (1 Ped. 5:5).

14. Xi guenda naquiiñeʼ gusihuinni ca binnigola ni cayapa ca xpinni Dios.

¹⁴ Ca hombre ni cayapa ca xpinni Dios ni nuu ndaaniʼ neza binni ridagulisaa naquiiñeʼ gusihuínnicaʼ ca guenda ni rieeteʼ lu Romanos 12:10: «Laganaxhii saa casi enda biʼchiʼ, cada tobi usisaca stobi ne cadi laca laa». Primeru ca binnigola ne ca siervu ministerial nga naquiiñeʼ gusisácacaʼ xcaadxi. Guiráʼ xpinni Cristu naquiiñeʼ gúnicaʼ ni na ca diidxaʼ riʼ: «Cadi guni tu xiixa para si tidi tu lú stobi, nin para chuʼ tu udxiiba laatu, sínuque cada tobi gaca nadóʼ ne usisaca stobi, ne cadi laca laa» (Fili. 2:3). Guiráʼ cani napa xiixa dxiiñaʼ ndaaniʼ xquidxi Dios cadi naquiiñeʼ guiníʼ íquecaʼ jma risácacaʼ que xcaadxi. Pa gúnicabe zacá zusihuínnicabe cayúnicabe ni na conseju bidii Pablu riʼ: «Laanu pa ma zuhuáʼ dxiichi nu la? cadi ixhacalaʼdxi nu de acané nu ca hermanu ni huaxiéʼ ru riene, ne cadi guni nu ni chuʼlaʼdxi si nu, sínuque guni nu ni chuʼlaʼdxi stobi, ti acané nu laa uzuhuaa chaahuiʼ. Nin Cristu qué ñuni di ni gucalaʼdxi laa si» (Rom. 15:1-3).

«Lagaca nachaʼhui» ne xheelatu

15. Ximodo naquiiñeʼ gaca ti xpinni Cristu ne xheelaʼ.

¹⁵ Yanna guidúʼyanu conseju bidii Pedru ca hombre ni maʼ bichaganáʼ: «Lauyubi modo guiene tu xheela tu. Lagaca nachaʼhui ne laacabe, [...] purti [...] jma nadá cabe que laatu (1 Ped. 3:7). Ximodo nga raca binni nachaʼhuiʼ ne xheelaʼ yaʼ. Gaca binni nachaʼhuiʼ nga gucaadiaga ora guiníʼ xheelaʼ xiixa, ora guʼyaʼ xi racaláʼdxibe, xi caquiiñebe ne guni ni riuuláʼdxibe, peru naquiiñeʼ chuʼ cuidadu cadi gácani xiixa ni uguu laacabe lu guendanagana. Zacá nga naquiiñeʼ gaca hombre ne xheelaʼ.

16. Xiná Biblia zándaca guizaaca ti hombre pa qué gusisaca xheelaʼ.

¹⁶ Apóstol Pedru cadi guluusi gana ca xpinni Cristu gusisácacaʼ xheelacaʼ. Laaca gúdxibe laacaʼ pa qué gúnicaʼ ni zándaca ziuu xiixa ni «uchiiña [laacaʼ] ora iníʼ né [caʼ] Dios» (1 Ped. 3:7). Ca diidxaʼ ca rusihuinni cani racalaʼdxiʼ Jiobá gusisaca ca hombre ca xheelacaʼ. Pa qué guni hombre ca zacá qué zucaadiaga diʼ Dios ca oración stibe. Ne pa gusihuínnibe rusisácabe xheelabe la? ziuu gunaa ca jma nayecheʼ ne zaná gacané laabe lu cani gúnibe.

17. Pabiáʼ nga naquiiñeʼ gannaxhii hombre xheelaʼ.

¹⁷ Pablu bidii sti conseju riʼ cani maʼ bichaganáʼ. Laabe gúdxibe laacaʼ: «Naquiiñe ganaxhii hombre xheela casi nadxii cuerpu stiʼ. Ni nadxii xheela la? nadxii laca laa. Purti iruti raca nanalaʼdxi cuerpu stiʼ, sínuque ruyaana  ni ne ranaxhii ni. Ne zacaca runi Cristu ca xpinni. [...] Naquiiñe ganaxhii hombre xheela casi nadxii laca laa» (Efe. 5:28, 29, 33). Pabiáʼ nga naquiiñeʼ gannaxhii hombre xheela yaʼ. Laaca lu relatu ca bicabi apóstol ca guendarinabadiidxaʼ ca: «Ne laatu, ca hombre ni ma bichaganáʼ, laganaxhii xheela tu cásica gunaxhii Cristu ca xpinni, dede bidii xpida pur laacaʼ» (Efe. 5:25). Cásica bidii Cristu xpida pur binni, zacaca naquiiñeʼ gudii hombre xquendanabani pur xheelaʼ. Pa gusihuinni hombre ca nadxii xheelaʼ, guiénebe laa ne guizaaláʼdxibe laa la? qué zaca nagana para laa guzuubaʼ stiidxabe.

18. Xi zanda gacané ca hombre ni maʼ bichaganáʼ gusisácacaʼ xheelacaʼ.

¹⁸ Ñee nagana nga gusisaca ca hombre ca xheelacaʼ la? Coʼ. Jiobá qué zanabaʼ laacabe xiixa ni qué zanda gúnicabe. Ne ca xpinni Jiobá nápacaʼ ti stipa ni jma nadipaʼ ni nuu guibáʼ ne lu guidubi naca Guidxilayú ni zanda gacané laacaʼ: Nga nga espíritu santu. Jesús guníʼ: «Pa laatu cadi nachaʼhui tu ne nanna tu gudii tu ni galán xiiñi tu la? lágaxa Bixhoze tu ni nuu ibáʼ qué udii Espíritu Santu ni inaba laa» (Luc. 11:13). Nga runi ca hombre ni maʼ bichaganáʼ zanda guinábacaʼ Jiobá gacané laacaʼ gácacaʼ nachaʼhuiʼ ne binni ne jmaruʼ si ne xheelacaʼ (biindaʼ Hechos 5:32).

19. Xi chiguidúʼyanu lu sti tema ca.

¹⁹ Dxandíʼ, naroʼbaʼ dxiiñaʼ nga napa ca hombre ca purtiʼ naquiiñeʼ guzuubacaʼ stiidxaʼ Cristu ne guni mandarcaʼ casi runi mandarbe. Yanna, ximodo naquiiñeʼ guʼyaʼ ca gunaa ca ne jmaruʼ si cani maʼ bichaganáʼ dxiiñaʼ bidii Jiobá laacaʼ yaʼ. Zadúʼyanu nga lu sti tema ca.

Guidúʼyanu pa biénenu ni

• Gunáʼ nga ca guenda stiʼ Jesús ni naquiiñeʼ gápanu.

• Ximodo naquiiñeʼ gaca ca binnigola ca ne ca dendxuʼ ni cayápacaʼ.

• Ximodo naquiiñeʼ gaca hombre ne xheelaʼ.

[Guendarinabadiidxaʼ stiʼ párrafo]

[Ca dibuju/foto ni zeeda lu yaza 10]

Chinándanu ejemplu stiʼ Jesús ra gusisácanu xcaadxi binni