Guiráʼ cani gúninu para guni adorarnu Dios riguucani gana laanu
Guiráʼ cani gúninu para guni adorarnu Dios riguucani gana laanu
«Lagudxiibaʼ ayubu stinneʼ xayanitu [...] ne zatadxí ladxidoʼto.» (MAT. 11:29)
1. Xi mandatu bidii Jiobá ca israelita que lu dani Sinaí, ne xi para bíʼnibe ni.
DXI gudixhestí Dios pactu stiʼ Ley que lu dani Sinaí, laaca biʼniʼ mandarbe guiziilaʼdxiʼ ca binni que dxi sábadu. Jiobá gudxi Moisés gabi guidxi Israel ca diidxaʼ riʼ: «Xhoopaʼ gubidxa naquiiñeʼ gúniluʼ xhiiñaluʼ; peru lu gadxe ca naquiiñeʼ gusaana de gúniluʼ ni, ti guiziilaʼdxiʼ yuze stiluʼ ne burru stiluʼ ne ti guiziilaʼdxiʼ xiiñiʼ esclava stiluʼ ne binni de sti ladu ni nuu ralídxiluʼ» (Éxo. 23:12). Ne ca diidxaʼ ca bisihuínnibe gunnaxhiibe ne biénebe ca israelita, ngue runi gudíxhebe ti dxi ndaaniʼ ti semana para guiziiláʼdxicaʼ ti guibiguetaʼ gápacaʼ stipa para gúnicaʼ dxiiñaʼ.
2. Xi guleendú guidxi Israel pur ley ni gucuaacaʼ de guiziiláʼdxicaʼ dxi sábadu.
2 Peru, ñee para si guiziilaʼdxiʼ binni nga dxi sábadu que la? Coʼ. Ca israelita que biquiiñecaʼ dxi que para guni adorarcaʼ Dios. Caadxi de ca cosa ni biʼniʼ cani napa xiiñiʼ que nga gusiidicaʼ binnilídxicaʼ guzuubaʼ stiidxaʼ Jiobá ne gúnicaʼ ni jneza (Gén. 18:19). Laaca gunda bidagulisaa ca familia que ne ca xhamígucaʼ para guníʼ íquecaʼ guiráʼ ni biʼniʼ Jiobá pur laacaʼ ne zaqué guyuucaʼ nayecheʼ (Isa. 58:13, 14). Peru ni jma risaca nga, sábadu ca bisihuínnini xi chiguni Cristu ora guni mandar lu Reinu stiʼ Dios lu ti mil iza, dxi maʼ cueebe guiráʼ ni cayuniná binni guidxilayú (Rom. 8:21). Xi zanda guininu de ca dxi stinu riʼ yaʼ. Ximodo zanda guibiguetaʼ gápanu stipa para sanu lu neza stiʼ Jiobá yaʼ.
Ora guidxaaganu xcaadxi xpinni Cristu riguuni gana laanu
3. Ximodo gucanesaa ca primé xpinni Cristu que, ne xi guleendúcabe.
3 Apóstol Pablu guníʼ neza binni ridagulisaa nga «cayapa [...] stiidxa [Dios] ndaani guidxilayú riʼ» (1 Tim. 3:15). Ca primé xpinni Cristu que gucanésaacaʼ laacaʼ. Guirácabe guluusaacabe gana laacabe ne gucanésaacabe ne guendarannaxhii (Efe. 4:11, 12, 16). Casi dxi guyuu apóstol Pablu Éfeso, yeganna caadxi xpinni Cristu ni guyuu ndaaniʼ neza binni ridagulisaa de Corinto laabe. Ximodo gucané ngue laabe yaʼ. Laabe guniʼbe ca diidxaʼ riʼ: «Cayeche purti beeda Estéfanas ne Fortunato ne Acaico [...]. Bisieche cabe ladxiduáʼ» (1 Cor. 16:17, 18). Ne zacaca biʼniʼ sentir Tito dxi bibiguetaʼ de yegacané ca xpinni Cristu de Corinto, ne despué bicaa Pablu ti carta ra nuucabe ne gudxi laacabe «nayeche beeda Titu pur irá modo bisieche tu laa» (2 Cor. 7:13). Zacaca nga ca dxi stinu riʼ, laanu ca testigu stiʼ Jiobá, laaca riguu ca bíʼchinu ne ca bizáʼnanu ni nuu ndaaniʼ xquidxi Dios gana laanu.
4. Ximodo riguu ca guendaridagulisaa ca gana laanu.
4 Guiranu nánnanu riuu binni nayecheʼ ora cheʼ ca guendaridagulisaa ca. Lu ca guendaridagulisaa ca riguusaanu gana laanu ne «[r]acané saa nu pur fe stinu» (Rom. 1:12). Cadi ti luguiáʼ si runibiaʼnu ca xpinni Cristu ne cadi nuu si biaje ridxaaganu laacabe. Coʼ, sínuque dxandipeʼ xhamígunu laacabe, ne racaláʼdxinu gannaxhiinu ne guni respetarnu laacabe. Ne ora guidúʼyanu laacabe guiráʼ semana ra ridagulisaanu riguuni gana laanu ne riguixhedxini ladxidoʼno (File. 7).
5. Ximodo zanda ugúʼsaanu gana laanu ora raca ca guendaridagulisaa roʼ ca.
5 Stobi de ca cosa ni riguu gana laanu nga chuunu ca guendaridagulisaa roʼ ni raca ndaaniʼ xquidxi Dios. Lu ca guendaridagulisaa ca cadi rizíʼdisinu cani dxandíʼ zeeda lu Biblia para guicaanu guendanabani, sínuque laaca racanécani laanu gápanu jma xhamígunu (2 Cor. 6:12, 13). Peru, xi zanda gúninu pa nabé natuinu ne raca nagana para laanu guidxaaganu sti binni yaʼ. Para ganda gápanu jma xhamígunu ndaaniʼ xquidxi Dios la? galán guiale de ndaaniʼ ladxidoʼno gacanenu ra raca ca guendaridagulisaa ca. Ti gunaa Testigu ni gucané lu ti guendaridagulisaa ra guyé binni de stale guidxi guníʼ: «Ca binnilidxesiáʼ ne chupa chonna si xhamiguaʼ nga runebiaayaʼ raqué. Peru ra gucaniáʼ guiá raqué binebiaayaʼ jma xpinni Cristu. Guizáʼ galán bineʼ sentir».
6. Gunáʼ nga tobi de ca cosa ni zanda gacané gápanu stipa para guni adorarnu Dios ora chuunu de vacación.
6 Ca israelita que guyecaʼ Jerusalén para gápacaʼ chonna clase saa ni rúnicaʼ guiráʼ iza (Éxo. 34:23). Ne stale biaje gupa xidé bisaanacabe xhiiñacabe ni rúnicabe lu layú stícabe ne bisaanacabe negocio stícabe ne guzácabe chupa chonna gubidxa ndaaniʼ ca neza dxaʼ yudé que. Peru xi guleendúcabe pur ngue yaʼ. Biʼniʼ sentírcabe nayecheʼ ora guyuucabe ra nuu ca binni ni «cusisaca Jiobá» ndaaniʼ yuʼduʼ que (2 Cró. 30:21). Zacaca nga yanna riʼ, stale de ca xpinni Dios maʼ bidiicaʼ cuenta galán nga chiné binni familia stiʼ chigunibiaʼcaʼ Betel. Ñee zanda chigunibiaʼluʼ Betel ni nuu jma gaxha de ra nabézaluʼ ora cheluʼ de vacación la?
7. 1) Ximodo racané ca reunión social ca laanu. 2) Ximodo zanda uguu ca reunión social ca gana laanu ne cadi gusiáʼndanu cani.
7 Ora chinenu ca binnilídxinu ne ca xhamígunu ti reunión social, laaca racané ni laanu. Rey Salomón, ti hombre ni nuu xpiaaniʼ, bicaa ca diidxaʼ riʼ: «Para ti hombre, ni jma galán nga gó ne gueʼ ne guʼyaʼ ni galán guleendú dxiiñaʼ nadipaʼ biʼniʼ» (Ecl. 2:24). Ora guidagulisaanenu ca xpinni Cristu para chúʼnenu laacaʼ nayecheʼ lu ca reunión social ca, cadi riguusini gana laanu, sínuque jma raca xhamígunu laacabe purtiʼ runibiáʼ chaahuinu laacabe. Para uguu cani gana laanu ne qué chuʼ dxi gusiáʼndanu cani la? jma galán gácacani nahuiiniʼ ne chuʼ tu guʼyaʼ ximodo gácacani. Ne jma naquiiñeʼ chinanda binni conseju riʼ ora chigudii nisa dxuʼniʼ.
Ora gucheechenu diidxaʼ riguuni gana laanu
8, 9. 1) Xi rusihuinni gadxé nga modo bisiidiʼ Jesús ne gadxé modo bisiidiʼ ca escriba ne ca fariseu que. 2) Xi ribeendunu ora guininu de Reinu stiʼ Dios.
8 Jesús bicheeche diidxaʼ ne stale gana ne gudxi ca discípulo stiʼ gúnicaʼ zacaca. Laabe guniʼbe: «Ma stale binni cabeza si ucaa diaga stiidxa Dios. Tu güi ni nga huaxiéʼ. Yanna lainaba lu Dios useenda stale tu guni dxiiña ca, ti laabe nga xpixuaana ni» (Mat. 9:37, 38). Cani bisiidibe binni nabé gudixhedxícani ladxidoʼcaʼ purtiʼ para guiráʼ binni nga ca diidxaʼ nacubi ne galán ca (Mat. 4:23; 24:14). ¡Nabé gadxé modo bisiidiʼ Jesús de cani bicaa ca fariseu que binni guni! (biindaʼ Mateo 23:4, 23, 24.)
9 Ora rucheechenu diidxaʼ cadi rusiidisinu binni de stiidxaʼ Reinu, sínuque laaca rizíʼdinu jma de cani dxandíʼ rusiidiʼ Biblia ne riaana cani ndaaniʼ íquenu ne riaaziʼ cani ndaaniʼ ladxidoʼno. Nga runi, ne stale razón guníʼ hombre bicaa salmo que ca diidxaʼ riʼ: «Lagusisaca Jah, purtiʼ jneza nga gusisácanu laabe ne saa; purtiʼ nabé sicarú ni» (Sal. 147:1). Ñee zanda chuʼluʼ jma nayecheʼ ra gusisácaluʼ Jiobá la?
10. Xiñee rininu cadi pur modo ricabi binni laanu nga ribeendunu ni galán.
10 Dxandíʼ, nuu lugar ra rucheechenu diidxaʼ nabé rucaadiaga binni stiidxaʼ Dios ne nuu lugar huaxiéʼ rucaadiágacaʼ (biindaʼ Hechos 18:1, 5-8). Pa nabézaluʼ ti lugar ra huaxiéʼ rucaadiaga binni stiidxaʼ Dios la? biʼniʼ stipa pur guiníʼ íqueluʼ cani cabeenduluʼ lu dxiiñaʼ ni cayúniluʼ ca. Bietenalaʼdxiʼ cadi pur gana si stipa ni cayúniluʼ pur guiniʼluʼ de lá Jiobá (1 Cor. 15:58). Ne cadi pur modo guicabi binni lii lu dxiiñaʼ ni cayúniluʼ nga zabeenduluʼ ni galán. Gunna dxichi, Jiobá nga ruchiña binni ndaaniʼ xquidxi, ne laabe nga ruyúbibe modo para gusihuinni ca binni ca riuuláʼdxicaʼ gucaadiágacaʼ stiidxaʼ Reinu (Juan 6:44).
Ora guni adorarnu Dios ne binnilídxinu riguuni gana laanu
11. Xi dxiiñaʼ maʼ bidii Jiobá cani napa xiiñiʼ, ne ximodo zanda gúnicabe ni.
11 Laatu cani napa xiiñiʼ, naquiiñeʼ guiníʼnetu laacabe de Jiobá ne de ni racaláʼdxibe (Deu. 11:18, 19). Ñee maʼ gudíxhetu ti dxi ne ti hora para gusiiditu ca xiiñitu de Bixhózenu ni nuu guibáʼ ni nadxii laanu la? Laabe cayacanebe laatu para ganda gacanetu binnilídxitu chuʼcaʼ gaxha de laabe. Ximodo rúnibe nga yaʼ. Ra gudiibe laatu ca libru ne ca revista, videu ne ca discu ni gucaadiáganetu ca xiiñitu para chuʼcaʼ naguidxi ndaaniʼ xquidxi Dios.
12, 13. 1) Xi ribeendú ca familia ca ora guni adorarcaʼ Dios ne binnilídxicaʼ. 2) Xi zanda guni cani napa xiiñiʼ ca para uguucaʼ gana ca xiiñicaʼ dxi nexheʼ guni adorarcaʼ Dios ne laacabe.
12 Mozo ni nuu xpiaaniʼ ca maʼ gudixhe ti gueelaʼ guni adorarnu Dios ne Binnilídxinu, ti guidagulisaa ca familia ca ti dxi lu ti semana para gúʼndacaʼ Biblia. Stale de cani napa xiiñiʼ maʼ biiyacaʼ jma rannaxhii ca familia ca, riuucaʼ tobi si ne jma riuucaʼ gaxha de Jiobá ora guni adorarcaʼ Dios ne binnilídxicaʼ. Yanna, ximodo naquiiñeʼ gúnicabe ni para uguuni gana laacabe yaʼ.
13 Ora guni adorarnu Dios ne binnilídxinu naquiiñeʼ gácani casi ora caninu diidxaʼ ne cadi naquiiñeʼ cueeni gana laanu. Purtiʼ cayúninu ni na ti «Dios nayecheʼ», ne racaláʼdxibe chuʼnu nayecheʼ ora guni adorarnu laabe (1 Tim. 1:11; Fili. 4:4). Ti ndaayaʼ naroʼbaʼ nga gápanu ti gueelaʼ para guizíʼdinu ca cosa risaca ni zeeda lu Biblia. Cani napa xiiñiʼ naquiiñeʼ guyúbicaʼ modo gusiidicaʼ xiiñicaʼ ne gacanecaʼ laacabe guxuíʼlucabe ni cayuundacabe ne laaca naquiiñeʼ guyúbicabe xcaadxi modo gúnicabe ni. Casi ti hombrehuiiniʼ ni láʼ Brandon ni napa 10 iza, bidii binnilídxibe lugar guiniʼbe de ti tema ni zeeda lu Biblia ni láʼ: «Xiñee ruzeeteʼ Biblia zeeda gaca Binidxabaʼ casi ti beendaʼ». Tema ca nabé maʼ xadxí de cuchiiñaʼ ni laabe, purtiʼ laabe nabé riuuláʼdxibe ca beendaʼ ca ne qué riuuláʼdxidibe guiníʼcabe zeeda gaca Binidxabaʼ casi ti beendaʼ. Xcaadxi familia ruyúbicaʼ ti historia ni zeeda lu Biblia ne ruundaʼ cada tobi de laacaʼ ti ndaa de laani o rúnicaʼ modo biʼniʼ ca binni zeeda luni. Modo rúnicabe riʼ cadi rusiéchesini laacabe, sínuque rucaacani xiiñicabe guicabi ne chindá guiráʼ ni guiziidicaʼ ndaaniʼ ladxidoʼcaʼ. a
Gusaananu de gúninu ni cadi naquiiñeʼ
14, 15. 1) Xiñee nabé nuu stale cosa ni riguu xizaa binni ne ni ruchibi laanu lu ca últimu dxi riʼ. 2) Xiruʼ guendanagana ridxaagalú ca xpinni Cristu.
14 Lu ca últimu dxi riʼ jma zidale ca cosa ni riguu xizaa ne ni ruchibi laanu. Millón de binni qué gapa bueltu o qué gápacaʼ dxiiñaʼ. Ne cani napa dxiiñaʼ la? runi sentircaʼ nagueenda rirá xpuéltucaʼ, casi ñaca nuchácani ndaaniʼ ti bolsa ni nade, ne qué rugaanda xpuéltucaʼ para sicaʼ ni caquiiñeʼ binnilídxicaʼ (zanda gúʼndaluʼ Ageo 1:4-6). Ca políticu ne xcaadxi xaíque ni nuu ndaaniʼ guidxilayú riʼ gastiʼ randa rúnicabe para gucueezacabe cani cayuuti binni para guchibi gobiernu ne qué randa ribeecabe xcaadxi cosa malu cayaca lu guidxilayú riʼ. Ne cada binni napa xidé gudxiilú guendanagana pur ca cosa malu biʼniʼ (Sal. 38:4).
15 Laanu ca xpinni Cristu laaca cudxíʼlunu ca guendanagana ne ca guendananá ni nuu lu guidxilayú stiʼ Binidxabaʼ riʼ (1 Juan 5:19). Ne nuu tiru rápanu xcaadxi guendanagana purtiʼ ridxaagalunu xcaadxi cosa ni rucaa laanu gusihuínninu pa qué zuchéʼnenu Jiobá. Jesús guníʼ: «Pa huazabi nanda cabe naa, laca zazabi nanda cabe laatu» (Juan 15:20). Ne neca nuu «tu canaladxi laa[n]u, peru qué rusaana Dios laa[n]u» (2 Cor. 4:9). Xiñee rininu zacá yaʼ.
16. Xi racané laanu para cadi gusaana de chuʼnu nayecheʼ.
16 Jesús cayuni invitación riʼ: «Latáʼ ra nuaa irá ni ma bidxaga [...], cani ma qué ganda guni irá ni rucaa cabe laa guni [...]. Latáʼ ra nuaaʼ, zaziilaʼdxi ladxidóʼ to» (Mat. 11:28). Ora gusihuínninu nápanu fe lu rini bixhii Cristu, zeeda gácani casi ñaca nusaananu xquendanabáninu lu naʼ Jiobá, ne laa zudii stipa laanu biaʼ caquiiñenu (2 Cor. 4:7). Ne ni racané laanu iguidxi fe stinu nga, espíritu santu. Cani maʼ bizéʼtenu ca cadi zacané si cani laanu gudxíʼlunu ca guendanagana rápanu, sínuque laaca zacané cani laanu cadi gusaana de chuʼnu nayecheʼ (Juan 14:26; Sant. 1:2-4).
17, 18. 1) Xi cadi naquiiñeʼ guni ca xpinni Dios. 2) Xi zándaca guizaaca pa guicá íquenu gúninu puru si ni riuuláʼdxinu.
17 Ca xpinni Jiobá cadi naquiiñeʼ gudiicaʼ lugar guicá modo riníʼ ique binni guidxilayú laacaʼ purtiʼ ca binni ca ruyúbicaʼ puru ni riuuláʼdxisicaʼ (biindaʼ Efesios 2:2-5). Stiidxaʼ Dios na zándaca chuulaʼdxiʼ «binni guni ni na ique ne gapa irá ni guʼyaʼ, ne gaca tuuxa nezalú ca xcaadxi» (1 Juan 2:16). O zándaca guiníʼ íquenu zabáninu nayecheʼ pa gúninu ca cosa ni qué riuulaʼdxiʼ Dios (Rom. 8:6). Casi nuu tu laa ruyubi cubaʼ guixi, gueʼ nisa dxuʼniʼ, guʼyaʼ película de diidxaʼ guidxa o de cosa dxabaʼ, quítecaʼ xiixa ni uguu xquendanabánicaʼ ra naxoo ne gúnicaʼ xcaadxi cosa ni cadi jneza para guni sentircaʼ galán. Binidxabaʼ riquiiñeʼ stale cosa para quite laanu ne gucaa laanu guni crenu ribani binni nayecheʼ ora guni ni cadi jneza (Efe. 6:11).
18 Gastiʼ naca nga guidoʼno, guideʼnu o quítenu xiixa, pa gúninu cani biaʼ galán. Peru cadi guicá íquenu puru si laacani gúninu. Laaca naquiiñeʼ guicá íquenu gúninu xhiiñaʼ Jiobá, ne jmaruʼ si ca dxi nabáninu riʼ. Pa guyúbinu gúninu xiixa para laasinu la? zándaca guidxáganu ne maʼ qué gúninu xhiiñaʼ Dios casi modo cazíʼdinu gúninu (2 Ped. 1:8).
19, 20. Xii nga ni zaguu gana laanu sti biaje.
19 Cani ruuyaʼ ca cosa ca casi ruuyaʼ Jiobá cani, riénecaʼ zidiʼdiʼ si guiráʼ cosa ni nuu lu guidxilayú riʼ. Moisés bidii cuenta zacá ni, ne laanu laaca (Heb. 11:25). Casi maʼ bidúʼyanu ca: pa racaláʼdxinu chuʼnu naguidxi ndaaniʼ xquidxi Dios ne guidxá tipa ladxidoʼno la? naquiiñeʼ gúninu ni na Bixhózenu ni nuu guibáʼ (Mat. 5:6).
20 Cadi gusaana de gúninu xhiiñaʼ Jiobá purtiʼ riguuni gana laanu. Zacá zanda «usaana nu irá ni bini nu dxi caʼru gunibiáʼ nu laabe, ne irá ni riulaʼdxi binni guidxilayú guni [...] laga cabeza nu enda nayeche uníʼ be udii be laanu, o zanda gabi nu dxi iduʼya nu enda nandxóʼ guedané [Dios, ne Jesucristu] ni bilá laanu» (Tito 2:12, 13). Gudxíʼbanu ayubu stiʼ Cristu xayánninu. Dxandíʼ, naquiiñeʼ guidúʼyanu laabe casi tobi ni runi mandar ne cadi gusaana de gúninu ni nabe. Nga nga ni dxandíʼ zaguu gana laanu ne zusiecheʼ laanu.
[Cani cá ñee yaza]
a Lu Nuestro Ministerio del Reino ni biree lu beeu diciembre stiʼ iza 1990, yaza 1 ne 2 zadxélaluʼ xcaadxi modo zanda guni adorarluʼ Dios ne binnilídxiluʼ modo chuuláʼdxicaʼ.
Xi nicábiluʼ
• Xi racané ca xpinni Jiobá para guibiguetaʼ gápacaʼ stipa.
• Ora rucheechenu diidxaʼ, ximodo riguuni gana laanu ne ximodo riguuni gana cani rucaadiaga laanu.
• Xi zanda guni cani napa xiiñiʼ para uguucaʼ gana xiiñicaʼ gueelaʼ ni naguíxhecaʼ guni adorarcaʼ Dios.
• Xii nga zanda guxheleʼ laanu de Dios.
[Guendarinabadiidxaʼ stiʼ párrafo]
[Ca dibuju/foto ni zeeda lu yaza 26]
Stale modo riguu ayubu stiʼ Jesús gana laanu