Rapa xquidxi Jiobá laanu
Rapa xquidxi Jiobá laanu
«Zusisacaʼ lii ra ridagulisaa stale binni.» (SAL. 35:18)
1-3. 1) Ximodo zanda guixheleʼ ti xpinni Cristu de xquidxi Dios casi tuuxa ni canaxuubaʼ ra ziáʼ. 2) Xi riquiiñeʼ Dios para gapa ca xpinni.
CA DXI yezá Joe ne xheelaʼ, guyecaʼ ndaaniʼ ti nisadóʼ ra dxá stale benda naroʼbaʼ ne nahuiiniʼ ne de guiráʼ color. Bicaalúcabe ti bizor ni napa ti tubu para guicaacabe bi, ne bixuubacabe dede yendácabe ra nuu ca coral ni nuu jma zitu. Ora yendácabe ra jma ziáʼ que xheelaʼ Joe guyuu xizaa ne na: «Zuluaʼsiaʼ maʼ zítupeʼ ndiʼ bixélenu», óraque bicábibe: «Cadi chuʼluʼ xizaa. Naa nannaʼ xi cayuneʼ». Peru qué nindaa de ngue bidxagayaabe ora biiyabe maʼ zeʼ guiráʼ ca benda que. Despué biénebe xiñee zécame ora biiyabe biree ti tiburón neza ra nacahui que ne zeeda neza ranuube. Qué gápacabe pa ladu chécabe. Nabé gaxha bidxiña maniʼ que laabe peru málasi bidiime buelta ne zeme.
2 Pa ti xpinni Cristu gudii lugar cubayú guidxilayú stiʼ Binidxabaʼ riʼ laa ne ca cosa sicarú nuu ndaaniʼ ni, casi chizá, guni xiixa dxiiñaʼ ne gapa stale cosa risaca la? qué zudii cuenta zacaná ne zacá nga casi ñaca nixuubaʼ ra jma ziáʼ. Joe naca binnigola ndaaniʼ ti neza binni ridagulisaa, laabe guniʼbe sicaríʼ: «Ni bizaacaʼ riʼ rusiidini naa ti cosa, para cadi guixeleʼ de Dios la? riquiiñeʼ guiaanaʼ ndaaniʼ xquídxibe, ni zeeda gaca casi “nisa ra qué zazaacaʼ nin ti cosa malu”, ne cadi guidxaagaʼ binni ni qué runi ni ná Dios». Zacá nga laani, cadi naquiiñeʼ diʼ guixélenu de xquidxi Dios, casi ñaca ñuʼnuʼ ndaaniʼ «nisa ra ziáʼ», purtiʼ zándaca gueeda guiráʼ fe stinu. Peru pa málasi guizaacanu zacá, naquiiñeʼ guibiguétanu nagueendaca ndaaniʼ xquidxi Dios para cadi guxuuxe xhenemígunu laanu.
3 Lu guidxilayú riʼ zanda chuʼ xquendanabani ca xpinni Cristu ra naxoo (2 Tim. 3:1-5). Cumu nanna Binidxabaʼ mayaca guinitilú la? nga runi naguixhe ique guxuuxe guiráʼ cani qué chuʼ cuidadu laa (1 Ped. 5:8; Apo. 12:12, 17). Peru galán nga cadi nuunu stúbinu, purtiʼ Jiobá cudii laanu ti lugar para ganda guilanu, ne laani nga ca neza binni ridagulisaa.
4, 5. Xi pur qué racalaʼdxiʼ binni guiníʼ ique xi chiguizaaca despué, ne xiñee.
4 Guidxilayú ni nabáninu lu riʼ, qué zanda gápani laanu lu guiráʼ cosa. Stale binni nabé ridxibi purtiʼ zándaca chuʼ tu guiree lucaʼ, nuu guendaridinde, nabé caru nuu guiráʼ cosa ne nabé cuchaa ca tiempu riʼ. Ne guiranu cudxíʼlunu guendahuará ne guendanayooxhoʼ. Dede cani napa dxiiñaʼ stiʼ, cani napa lidxi, cani cadi cayaadxaʼ bueltu laacaʼ ne nazaaca nuucaʼ, riníʼ íquecaʼ pabiáʼ tiempu ziuucaʼ zacá.
5 Stale tu riuulaʼdxiʼ guni sentir nuu tu cayapa laa. Peru triste nga guininu ni, purtiʼ nuu stale binni guleza ñuuné xheelaʼ tobi si ne nibeenducaʼ ni galán lu xquendaxheelacaʼ, peru cadi zacá ni, nin ni quixhe ca familia ca gúnicaʼ qué rireeni jneza. Neca nuu stale binni na nuu gaxha de Dios ne nápacaʼ religión sticaʼ, peru qué gánnacaʼ xi gúnicaʼ. Stale tu laa riníʼ ique pa jneza ni rusiidiʼ pastor sticaʼ laacaʼ, purtiʼ runi ca xaíque stícabe cosa dxabaʼ ne rusiidicaʼ ni cadi zeeda lu Biblia. Nga runi, jma rizaaláʼdxicabe ni rusiidiʼ ciencia o racanécabe xcaadxi binni ne rúnicabe ni riníʼ íquecabe jneza. Nga runi, stale binni nabé nuu xizaa ne pur nga qué rinacaʼ guiníʼ íquecaʼ xi chiguizaaca despué.
6, 7. 1) Xiñee gadxé modo rudxiilú ca xpinni Dios ca guendanagana ni rápacaʼ. 2) Xi chiguidúʼyanu yanna.
6 Ca xpinni Cristu gadxé modo ruuyacaʼ guendanabani que xcaadxi binni. Neca laaca nápanu ca guendanagana ni napa ca binni ca, maʼ gadxé modo rudxíʼlunu cani (biindaʼ Isaías 65:13, 14 ne Malaquías 3:18). Xiñee yaʼ. Purtiʼ Biblia cusiene chaahuiʼ laanu de modo nabani binni tiempu riʼ, ne maʼ bisiidiʼ ni laanu ximodo gudxíʼlunu ca guendanagana cadxaagalunu lu xquendanabáninu. Pur nga qué riúʼpenu xizaa de cani chiguizaaca. Cumu nácanu xpinni Jiobá la? cayápabe laanu de cani cadi dxandíʼ rusiidiʼ ca religión ca ne de cani runi cré binni ni cadi zeeda lu Biblia, laaca cayápabe laanu de ca cosa dxabaʼ ne de ca guendananá redané cani. Nga runi ratadxí ladxidoʼno, ti cosa ni qué randa rapa binni guidxilayú (Isa. 48:17, 18; Fili. 4:6, 7).
7 Lu Biblia zeeda stale ejemplu ni zacané laanu gusisácanu ca ndaayaʼ ni ribendunu pur runi adorarnu Jiobá. Ora guidúʼndanu ca ejemplu ca zacanécani laanu guidúʼyanu ximodo laanu ne ximodo xpiaʼnu. Zacá zanda chinándanu ca conseju ni cudii Dios para gapa laanu (Isa. 30:21).
Bilá nuxooñeʼ ñeeʼ
8. Xi qué huasaana de guni ca xpinni Jiobá.
8 Dede dxi bizulú guyuu binni lu Guidxilayú, guiráʼ tu quixhe ique guzuubaʼ stiidxaʼ Dios qué rinacaʼ guidxaagacaʼ cani qué runi ni na Dios. Jiobá maca guníʼ zeeda gaca ca xpinni Binidxabaʼ xhenemigu xquidxi Dios (Gén. 3:15). Cumu ca xpinni Jiobá riguixhe íquecaʼ chinándacaʼ ca conseju ni zeeda lu Biblia la? qué rinacaʼ gúnicaʼ guiráʼ ni runi binni guidxilayú (Juan 17:15, 16; 1 Juan 2:15-17). Peru stale biaje raca nagana para laacaʼ chinándacaʼ ca conseju ca. Nga runi, nuu tiru rinabadiidxacabe pa jneza nga cayúnicabe stipa pur gúnicabe ni na Dios.
9. Xi guluu xizaa hombre bicaa Salmo 73 que.
9 Tobi de ca xpinni Jiobá gunabadiidxaʼ pa jneza nga ni gudixhe ique guni, hombre riʼ nga bicaa Salmo 73, ne zándaca zabe de Asaf. Qué ñénebe xiñee stale biaje ribeendú ca binni malu ni galán ne riuucaʼ nayecheʼ, peru ca binni ni cayuni ni na Dios nabé racanacaʼ (biindaʼ Salmo 73:1-13).
10. Xiñee jneza nga guiníʼ íquenu ni guluu xizaa hombre ni bicaa salmo que.
10 Ñee huayápaluʼ guendanagana casi gupa hombre bicaa salmo ca la? Pa zacá ni, cadi caquiiñeʼ diʼ guiníʼ íqueluʼ nápaluʼ donda ne maʼ cunítiluʼ fe stiluʼ. Stale xpinni Jiobá —dede né caadxi de cani bicaa Biblia— huayuni sentircaʼ casi modo biʼniʼ sentir hombre bicaa salmo ca (Job 21:7-13; Sal. 37:1; Jer. 12:1; Hab. 1:1-4, 13). Ne guiráʼ cani racalaʼdxiʼ gusiecheʼ Jiobá naquiiñeʼ guinabadiidxaʼ ndiʼ laca laa: ñee jma jneza nga guzuubaʼ binni stiidxaʼ Jiobá ne saʼ lu neza stibe la? Cásica ni gunabadiidxanu ca nga bicaa Binidxabaʼ guiníʼ ique ca primé binni ni guleza ndaaniʼ jardín ni guyuu Edén que. Ni bicaabe laacaʼ guiníʼ íquecaʼ nga pa napa Jiobá derechu de guni mandar guibáʼ ne lu guidubi naca Guidxilayú (Gén. 3:4, 5). Nga runi, jneza nga guiníʼ íquenu ni guluu xizaa hombre bicaa salmo ca. Ñee naquiiñeʼ gápanu envidia ca binni malu ni ruluíʼ galán modo nabánicaʼ la? Ñee naquiiñeʼ guiree cueʼnu de ca neza stiʼ Jiobá ne gúninu casi rúnicabe la? Ngapeʼ nga ni ñuulaʼdxiʼ Binidxabaʼ ñúninu.
11, 12. 1) Xi gucané hombre ni bicaa salmo que gusaana de guiníʼ ique pa jma jneza nga guni ni na Jiobá, ne xi rusiidiʼ ejemplu stibe ca laanu. 2) Xi huayacané lii guiníʼ íqueluʼ casi guníʼ ique hombre ni bicaa salmo que.
11 Xi gucané hombre ni bicaa salmo ca gusaana de guiníʼ ique pa jma jneza nga guzuubaʼ stiidxaʼ Jiobá yaʼ. Nécapeʼ guniʼbe bilá nixélebe de lu neza stiʼ Jiobá la? bichaabe modo nácabe ra guyuube ndaaniʼ yuʼduʼ stiʼ Dios, raqué bidxaagabe binni ni cayuni ni na Dios ne guníʼ íquebe de ni maʼ gudixhe Dios guni. Zacá gunda biénebe xii nga ni cabeza ca binni malu ne qué ninabe ñácabe casi laacaʼ. Bidiibe cuenta de ti cosa, modo nabánibe que ne cani riguixhe íquebe gúnibe casi ñaca niguu cani laabe ti lugar ra nachuuchi. Guiráʼ tu gusaana Jiobá pur guni xiixa guendaquéiquiiñeʼ la? dede zacaditi tantu guidxibi ora gunduuxeʼ Jiobá laa. Peru cani guni ni nabe zacanebe laacaʼ (biindaʼ Salmo 73:16-19, 27, 28). Laanu nánnanu dxandíʼ ni ná ca diidxaʼ ca. Zándaca stale tu riuulaʼdxiʼ guibani modo racalaʼdxiʼ sin chinanda ni na ca ley stiʼ Dios, peru nabé naná ni zabeenducaʼ pur cani gúnicaʼ (Gál. 6:7-9).
12 Xiruʼ rusiidiʼ ejemplu ca laanu yaʼ. Laaca rusiidiʼ ni sti cosa, ndaaniʼ xquidxi si Jiobá nga zanda guidxélanu tu gapa laanu ne tu gusiidiʼ laanu jma. Hombre bicaa salmo que bizulú biene chaahuiʼ ne guníʼ ique ni jneza dxi guyé ra guca adorar Jiobá. Ca dxi stinu riʼ laaca ridxélanu conseju ni zacané laanu ne guizíʼdinu de Dios lade ca binni ridagulisaa. ¡Pur nga rinabaʼ Jiobá laanu cadi guiáʼdxanu ca guendaridagulisaa ca! Racá riguucabe gana laanu ne racanécabe laanu para ganda gúninu ni jneza (Isa. 32:1, 2; Heb. 10:24, 25).
Cuí chaahuinu tu guidxaaganu
13-15. 1) Xi bizaaca Dina, ne xi rusiidiʼ ni bizaacabe ca laanu yaʼ. 2) Xiñee galán guidxaaganu ca xpinni Cristu.
13 Ejemplu stiʼ Dina, xiiñiʼ Jacob, ruluiʼni laanu zanda gápanu guendanagana pa guidxaaganu cani cadi naca xpinni Jiobá. Historia ni zeeda lu Génesis cuzeeteʼ, nabé bidxaagabe ca baʼdudxaapaʼ ni guyuu Canaán ni guleza gaxha de ra guleza binnilídxibe. Peru, ca binni de Canaán qué ninándacaʼ ca ley ni rusiidiʼ ximodo naquiiñeʼ guibani ca xpinni Jiobá. Rihuinni gadxé modo bibani ca binni que. Caadxi arqueólogo guniʼcaʼ bichácabe xquídxicabe de bidóʼ, nabé guyuunécabe ni cadi xheelacabe, gudíndecabe ne gutanécabe binni ndaaniʼ ca yuʼduʼ stícabe (Éxo. 23:23; Lev. 18:2-25; Deu. 18:9-12). Xi bizaaca Dina pur bidxaaga ca baʼdudxaapaʼ que yaʼ.
14 Relatu ca ruzeeteʼ gutané ti cananeu ni láʼ Siquem Dina ne gulaxoo laabe, hombre que nda nácabe jma «risaca de lade guiráʼ binnilidxi bixhoze» (Gén. 34:1, 2, 19). ¡Nabé triste nga ni bizaaca Dina ca! Ñee rábiluʼ guníʼ ique Dina nizaaca ni bíʼnicabe laa que la? Zándaca ni guyuuláʼdxibe nga guidxaagasibe ca baʼdudxaapaʼ de raqué ne qué niníʼ íquebe pa zuninacaʼ laabe. Peru cadi jneza diʼ nga modo guníʼ íquebe que.
15 Relatu ca cusiidini laanu xiixa ni nabé risaca: cadi galán diʼ guiníʼ íquenu qué zazaacanu xiixa pa guidxaaganu ca binni ni cadi naca xpinni Cristu. Casi na Biblia, «Pa idxaagu ni nadxaba la? zacá ni lii» (1 Cor. 15:33). Peru pa guidxaaganu cani nadxii Jiobá ne cani runi cré cani runi crenu ne cani rinanda ca ley stiʼ Jiobá la? zápacaʼ laanu. Laacabe qué zusaanacabe de uguucabe gana laanu gúninu ni jneza (Pro. 13:20).
«Ma bia ladxidóʼ to»
16. Xi guníʼ apóstol Pablu de caadxi xpinni Cristu ni guyuu Corinto.
16 Xquidxi Dios huayacané stale binni gusaana de guni cosa dxabaʼ ni biʼniʼ dxiqué. Lu primé carta bicaa apóstol Pablu ra nuu ca xpinni Cristu de Corinto, gúdxibe laacaʼ modo bichaacaʼ xquendanabánicaʼ para yenándacaʼ ca ley stiʼ Jiobá. Nuu de laacaʼ gúpacaʼ jnadxiicaʼ guyuunecaʼ ni cadi xheelacaʼ, biʼniʼ adorarcaʼ bidóʼ, gúcacaʼ muxeʼ, guláʼnacaʼ ne guxúdxicaʼ. Peru apóstol Pablu gudxi laacabe: «Ma bia ladxidóʼ to» (biindaʼ 1 Corintios 6:9-11).
17. Ximodo huayacané ca conseju stiʼ Jiobá xquendanabani stale binni para ganda guchaa.
17 Ca binni ni qué gapa fe la? qué gápacaʼ conseju ni gacané laacaʼ lu xquendanabánicaʼ. Laca laacaʼ riguíxhecaʼ xi gúnicaʼ lu xquendanabánicaʼ, o rúnicaʼ ni cadi jneza runi binni nuu gaxha de laacaʼ, cásica biʼniʼ ca binni de Corinto ni bibani lu primé siglu ante gácacaʼ xpinni Cristu (Efe. 4:14). Peru guiráʼ ni riziidiʼ binni de Stiidxaʼ Dios ne guiráʼ ni naguixhe ique Dios guni nápani stale stipa. Ruchaani xquendanabani binni ni chinanda ni nani (Col. 3:5-10; Heb. 4:12). Stale de ca binni ni naca xpinni Cristu yanna bíʼnicaʼ guiráʼ ni gucaláʼdxicaʼ ante gunibiaʼcaʼ ca ley stiʼ Jiobá. Laacabe nánnacabe gastiʼ qué nuchá ladxidóʼcabe ne qué nibánicabe nayecheʼ, peru dxi maʼ guyuucabe ndaaniʼ xquidxi Jiobá ne yenándacabe ley stibe la? dxiqueruʼ nga maʼ gutadxí ladxidóʼcabe.
18. Xi bizaaca ti baʼdudxaapaʼ Testigu, ne xi rusiidini laanu.
18 Triste guininu ni, peru chupa chonna de cani bisaana neza binni ridagulisaa ni zeeda gaca casi nisa ra qué rizaaca binni nin ti cosa malu, riuubaʼ ladxidoʼcaʼ pur bisaanacaʼ ni. Ti gunaa Testigu ni chindee lanu laa Tania guníʼ binibiáʼ Jiobá dede dxi nahuiiniʼ, peru dxi maʼ napa 16 iza, bixeleʼ de ca xpinni Jiobá purtiʼ guyuulaʼdxiʼ guiráʼ ca «cosa ni ruluíʼ sicarú para binni lu guidxilayú riʼ». Peru nabé naná ca yuubaʼ ni biaananebe purtiʼ dede gucaxiiñibe neca qué gápabe gana ne bitiidiʼ xiiñibe. Yanna guniʼbe: «Guionnaʼ iza ni qué ñuaaʼ ndaaniʼ xquidxi Jiobá que nabé bininá cani naa ne qué ziuu dxi gusiaandaʼ cani bineʼ que. Ti cosa ni qué rusisiaasiʼ naa nga gannaʼ laca naa biiteʼ xiiñeʼ. [...] Nannaʼ nuu stale hombrehuiiniʼ ne dxaapahuiiniʼ ñuuláʼdxicaʼ nibánicaʼ neca ti ratu si casi modo nabani binni ni cadi cayuni ni ná Jiobá. Conseju ni zanda gudieeʼ laacabe nga: “¡Cadi gúnitu ni!”. Zándaca nacubigá la? ziuuláʼdxitu ni, peru ra tiidiʼ dxi naná zácani para laatu. Puru guendananá nga cudii guidxilayú riʼ. Ne canieeʼ ni pur ni bizaacaʼ. Cadi guireetu de ndaaniʼ xquidxi Jiobá. Zacatiʼ nga zanda guibánitu nayecheʼ».
19, 20. Ximodo rapa neza binni ridagulisaa laanu, ne xi naquiiñeʼ gúninu para gápacabe laanu.
19 Xi nizaacanu pa nusaananu xquidxi Jiobá, lugar ra nuu tu cayapa laanu riʼ yaʼ. Stale tu laa dede ridxibi guiníʼ ique de laani, purtiʼ qué rinacaʼ guietenaláʼdxicaʼ ximodo guyuu xquendanabánicaʼ ante guiziidicaʼ de Dios (Juan 6:68, 69). Para cadi gusaana de gapa Jiobá laanu ne cadi gacananu casi racaná binni nuu lu guidxilayú riʼ la? naquiiñeʼ chuʼnu gaxha de ca xpínnibe. Guyúbinu guidxaaganu laacabe ne cadi gusaananu de chuunu ca guendaridagulisaa ca, purtiʼ nga nga ni zacané laanu cadi gusiáʼndanu pabiáʼ jneza nga ca ley stiʼ Dios ne riguucani gana laanu guzúʼbanu stiidxabe. ¡Nápanu stale razón para gusisácanu Jiobá «ra ridagulisaa stale binni», cásica biʼniʼ hombre bicaa salmo que ni! (Sal. 35:18.)
20 Dxandíʼ, guiráʼ ca xpinni Cristu ridíʼdicaʼ lu guendanagana pur stale cosa, ne raca nagana para laacaʼ gúnicaʼ ni na Jiobá. Ora guizaacanu zacá, zándaca ni caquiiñesinu nga chuʼ tu gacané laanu gánnanu gunáʼ nga ni jneza. Xi zanda guni cada tobi de ca binni ridagulisaa para gacané stobi yaʼ. Sti tema ca chigusiene ximodo zanda quixhedxinu ladxidóʼ ca bíʼchinu ne ca bizáʼnanu ne gacanenu laacaʼ (1 Tes. 5:11).
Xi nicábiluʼ
• Xi rizíʼdinu de ni bizaaca hombre ni bicaa salmo 73.
• Xi rizíʼdinu de ni bizaaca Dina.
• Ximodo rapa neza binni ridagulisaa laanu.
[Guendarinabadiidxaʼ stiʼ párrafo]
[Ca dibuju/foto ni zeeda lu yaza 7]
Cadi gusaananu neza binni ridagulisaa ni zeeda gaca casi nisa ra qué rizaaca binni nin ti cosa malu