Gucheechenu diidxaʼ ne stale gana

«Qué chuʼ dxi usaana tu de guni tu xhiiña Señor biaʼ ra ganda tiʼ.» (1 COR. 15:58)

1. Xi gudxi Jesús ca discípulo stiʼ gúnicaʼ.

 RA ZILUXE iza 30, biʼniʼ Jesús ti viaje neza Samaria, dxi zidíʼdibe gaxha de guidxi Sicar biziiláʼdxibe ruaa ti bizé ne gúdxibe ca discípulo stibe: «Laindisa lú, laguuya ca ñaa ca guʼya tu ma nuu cani para iree cani guela [o guiasa cosecha stícani]» (Juan 4:35). Laabe cadi caníʼdibe de guindisaʼ binni cosecha, sínuque de gutagulisaacabe hombre ne gunaa ni nayá ladxidóʼ, cani gueeda gaca xpínnibe. Ni cayabi Jesús laacabe nga gúnicabe xiixa nagueendaca: ¡nápacabe stale dxiiñaʼ ne huaxiéʼ tiempu nápacabe para gúnicabe ni!

2, 3. 1) Xi rusihuinni nabáninu lu tiempu ra cayasa cosecha. 2) Xi chiguidúʼyanu lu tema riʼ.

² Ca diidxaʼ ni guníʼ Jesús ca jma risácacani yanna purtiʼ stale binni maʼ nuu para guiziidiʼ de Dios, ne nga nga zeeda gaca casi ñaca maʼ nuu layú ca para guiasa cosecha stiʼ. Ne invitación ni cayaca tiempu riʼ de guiziidiʼ binni ni zeeda lu Biblia cayaca ni guiráʼ iza para millón de binni, ne mil de laacaʼ cayácacaʼ xpinni Cristu ne cayuunísacaʼ. Nabé risaca para laanu nga gúninu ti dxiiñaʼ ni cayaca lu guidubi naca Guidxilayú, ne Jiobá, Dios stinu nga Xpixuaanaʼ dxiiñaʼ ca ne laabe nga cayuuyabe gácani. Nga runi, guinabadiidxanu laca laanu: «Ñee napaʼ stale dxiiñaʼ guneʼ lu cosecha riʼ la?» (1 Cor. 15:58).

³ Lu chonna iza arondaʼ bicheeche Jesús diidxaʼ bisiidiʼ ca discípulo stiʼ para chiyúbicaʼ jma binni gaca xpinni Cristu. Lu tema riʼ, zazíʼdinu chonna si de ca cosa risaca ni bisiidibe laacaʼ. Cada tobi de laacani cusiene ti guenda nabé risaca ni naquiiñeʼ gapa cani racalaʼdxiʼ gacané guidxela jma binni para gaca xpinni Cristu. Yanna guidúʼndanu de ca guenda riʼ tobi pur tobi.

Naquiiñeʼ gusihuínninu qué rudxíʼbanu laca laanu

4. Ximodo bisihuinni Jesús risaca nga cadi gudxiibaʼ binni laca laa.

⁴ Guiníʼ íquenu ni cazaaca riʼ: Ca discípulo stiʼ Jesús maʼ gudinde diidxacaʼ purtiʼ nuucaʼ gánnacaʼ tu jma risaca ládecaʼ. Zándaca cusihuinnirúcabe qué runi crésaacabe laacabe ne naparúcabe xiana. Peru Jesús gudxi ti xcuidihuiiniʼ guzuhuaa galaa de laacabe. Óraque gúdxibe laacaʼ guuyadxicaʼ baʼduhuiiniʼ que ne guniʼbe: «Tu qué udxiiba laca laa sínuque gaca casi baʼdú ri la? laa jma risaca lade ca xpinni Dios» (biindaʼ Mateo 18:1-4). Binni guidxilayú rusisaca tuuxa purtiʼ napa bidxiichi, risaca nezalú xcaadxi binni ne purtiʼ runi mandar xcaadxi binni. Lugar de ñuni ca xpinni Cristu casi runi ca binni ca la? naquiiñeʼ guiénecaʼ zácacaʼ binni risaca pa qué gudxiibacaʼ laca laacaʼ nezalú binni. Pa racaláʼdxicabe uguu Jiobá ndaayaʼ laacabe ne iquiiñeʼ laacabe la? naquiiñeʼ gusihuínnicabe de guidubi ladxidóʼcabe qué rudxiibacabe laca laacabe.

5, 6. Ora qué gudxíʼbanu laca laanu, ximodo racané nga gucheechenu diidxaʼ ne stale gana. Bizeeteʼ ti ejemplu.

⁵ Cásica dxiqué, yanna riʼ laaca nuu stale binni nabé riguixhe ique gapa bidxichi lu xquendanabani, gaca tuuxa nezalú xcaadxi ne guni mandar stale binni. Pur nga, huaxiéʼ tiempu nápacabe para guiziidicabe de Dios ne gúnicabe ni na (Mat. 13:22). Peru ti xpinni Jiobá nanna para uguu ndaayaʼ Xpixuaanaʼ cosecha ca laa ne chuuláʼdxibe ni cayuni la? cadi naquiiñeʼ gudxiibaʼ  laca laa nezalú xcaadxi binni. Ne nayecheʼ riuu guni zacá (Mat. 6:24; 2 Cor. 11:7; Fili. 3:8).

⁶ Guidúʼyanu ni bizaaca Francisco, ti binnigola ni nuu ndaaniʼ ti neza binni ridagulisaa de Sudamérica. Dxi nahuiinibe bisaanabe de chebe scuela roʼ para gúcabe precursor. Laabe guniʼbe: «Despué, bidieeʼ stiidxaʼ ti baʼdudxaapaʼ para guichaganaʼyaʼ laa. Ñándaca nuyubeʼ ti dxiiñaʼ ra ñuneʼ ganar stale bidxichi. Peru gudixhe íquedu guchaʼdu modo nabánidu ti ganda gúnidu jma lu xhiiñaʼ Jiobá. Despué gúpadu ca xiiñidu ne jma nagana gúcani para laadu. Peru Jiobá gucané laadu ne ni gudixhe íquedu. Maʼ ziniáʼ jma de treinta iza de naca binnigola ne huayuneʼ xcaadxi dxiiñaʼ risaca ndaaniʼ xquidxi Dios. Qué huayuu dxi gaca arrepentirdu pur nápadu biaʼ guibaninésidu».

7. Ximodo zanda gusihuínniluʼ cayúniluʼ ni na Romanos 12:16 lu xquendanabániluʼ.

⁷ Pa qué guyúbinu gácanu tuuxa binni risaca lu guidxilayú riʼ ne gúninu xiixa cosa ni «huaxiéʼ risaca» la? laaca zacaanu stale ndaayaʼ ne zápanu stale dxiiñaʼ lu cosecha ca (Rom. 12:16; Mat. 4:19, 20; Luc. 18:28-30).

Ribeendú binni ni galán ora runi dxiiñaʼ ne stale gana

8, 9. 1) Biquiiñeʼ chupa chonna si diidxaʼ para guiniʼluʼ ejemplu ni bizeeteʼ Jesús de ca talentu que. 2) Tuu nga zatadxí ladxidóʼ ora guʼndaʼ de ejemplu guníʼ Jesús que.

⁸ Sti guenda ni naquiiñeʼ gapa binni para guni dxiiñaʼ ra cayasa cosecha ca nga gúnini ne stale gana. Zacá bisihuinni Jesús ni dxi guníʼ de ejemplu stiʼ ca talentu que. a Luni rieeteʼ ni biʼniʼ ti hombre ante cheʼ ti guidxi zitu, bisaanané ca talentu stiʼ chonna mozo ni runi xhiiñaʼ. Primé mozo que bidiibe laa gaayuʼ talentu; guiropa que bidiibe laa chupa ne últimu que bidiibe laa tobi. Dxi biree hombre que zeʼ, primé ne guiropa mozo que bíʼnicaʼ xhiiñacaʼ ne stale gana. Qué liica nindaa, cada tobi de laacaʼ bíʼninecaʼ bueltu ni gucuaacaʼ dxiiñaʼ. Peru guionna mozo que bicaachiʼ ni ndaaniʼ yu purtiʼ nabé nachaabaʼ. Ora bibiguetaʼ xpixuaanaʼ ca mozo que, bidiibe primé ne guiropa mozo que jma talentu. Peru sti mozo que gúxhabe laa talentu ni gucuaa que ne guládxibe laa de ralídxibe (Mat. 25:14-30).

⁹ Ni dxandíʼ nga guiranu racaláʼdxinu chinándanu ejemplu stiʼ guiropaʼ mozo ni bizeeteʼ Jesús lu ejemplu stiʼ que, ne gusíʼdinu binni ne stale gana. Peru, laga pa nuu xiixa ni rucueeza laanu para cadi gúninu jma lu dxiiñaʼ ca yaʼ. Zándaca pur qué gápanu bueltu quixhe íquenu gúninu jma dxiiñaʼ para gudiʼnu ni caquiiñeʼ binnilídxinu. O zándaca purtiʼ maʼ qué gápanu stipa ni gúpanu dxi gúcani nahuiiniʼ o maʼ cadi nazaacanu casi dxiqué. Pa  zacá ni la? ejemplu ni biquiiñeʼ Jesús de ca talentu ca zacaneni laanu gatadxí ladxidoʼno.

10. Ximodo bisihuinni xpixuaanaʼ cosecha que naca ti hombre ni riuu razón, ne xiñee riguuni gana laanu.

¹⁰ Xpixuaanaʼ guionnaʼ mozo ni rieeteʼ lu ejemplu ca nánnabe cadi biaʼca diʼ dxiiñaʼ zuni cada tobi de laacabe, ngue runi gudiizibe bueltu stibe ne bidiibe «cada tobi [...] biaʼ laa» (Mat. 25:15). Maca nánnanu, primé mozo que jma stale ni zuni ganar que guiropa que. Peru neca zaqué, xpixuaanaʼ guiropaʼ mozo que gudxi laacaʼ galán dxiiñaʼ bíʼnicaʼ, ne gúdxibe cada tobi de laacaʼ «galán, jneza biʼni lu xhiiñaʼ» ne biaʼca gudíxebe tobi que biáʼqueca gudíxebe stobi que (Mat. 25:21, 23). Zaqueca Jiobá, Xpixuaanaʼ cosecha riʼ, nánnabe ximodo nabáninu ne pur nga laaca nánnabe pabiáʼ zanda gúninu lu dxiiñaʼ ca. Ne nánnabe xi guiráʼ stipa rúninu para gúninu ni nabe de guidubi ladxidoʼno, ne qué ziuu dxi gusaanabe de gudiibe laanu biaʼ dxiiñaʼ maʼ bíninu (Mar. 14:3-9; biindaʼ Lucas 21:1-4).

11. Guníʼ ti ejemplu ni gusihuinni zanda guicaa ca binni ni nabé runi dxiiñaʼ stale ndaayaʼ neca guidxagalucaʼ guendanagana.

¹¹ Guidúʼyanu xi bizaaca ti gunaa Testigu de Brasil ni láʼ Selmira. Ni bizaacabe ca rusiidini laanu cadi caquiiñeʼ cuézanu guibáninu galán para gúninu xhiiñaʼ Jiobá ne stale gana. Gunaa riʼ, bireecabe lú xheelaʼ ne biiticabe laa raca gande iza ne biaananebe chonna dxaapahuiiniʼ para gusiniisibe. Gunaa riʼ criada laa ne stale hora runi dxiiñaʼ ralidxi binni, ne cumu stale binni nga rié ndaaniʼ ca carru ra riguíʼbabe para chebe dxiiñaʼ la? jmaruʼ si ridxágabe. Neca zaqué nabánibe, peru gudixhe chaahuibe tiempu stibe para gunda gúcabe precursora regular, ne despué chupa de ca xiiñibe laaca gúcacaʼ precursora regular. Laabe guniʼbe sicaríʼ: «Lu ca iza ni maʼ gudiʼdiʼ ca, maʼ biindaniáʼ jma de gande binni Biblia ne maʼ beeda gácacabe casi familia stinneʼ. Dede yanna nabé risaca para naa nga gaca xhamígacabe naa ne gannaxhiicabe naa. Ne zeeda gaca nga casi ti tesoro ni qué zanda siʼ binni ne guiráʼ oro nuu lu Guidxilayú». Rihuinni dxíchica, huaguu ndaayaʼ Xpixuaanaʼ cosecha ca Selmira purtiʼ runi dxiiñaʼ ne stale gana.

12. Ximodo zanda gusihuínninu rucheechenu diidxaʼ ne stale gana.

¹² Cadi guiranu nga nápanu stale tiempu para gucheechenu diidxaʼ. Peru zanda gúninu stipa para gúninu xhiiñanu jma jneza. Pa gúninu guiráʼ ni rizíʼdinu lu Guendaridagulisaa stiʼ Dxiiñaʼ Stinu ni rápanu guiráʼ semana la? jma zánnanu gusíʼdinu ne zadxélanu xcaadxi modo gucheechenu diidxaʼ (2 Tim. 2:15). Ne zándaca guchaʼnu hora naguíxhenu gúninu xiixa o gusaananu de gúninu xiixa cosa ni huaxiéʼ risaca para gucheechenu diidxaʼ dxi nexheʼ gácani ra ridagulisaanu (Col. 4:5).

13. Xi zacané laanu para cadi gusaana de gúninu dxiiñaʼ ne stale gana.

¹³ Cadi guiaandaʼ laanu, dede ndaaniʼ ladxidoʼno nga riale gúninu ca cosa ca ne stale gana (Sal. 40:8). Guionna esclavu ni bizeeteʼ Jesús lu ejemplu stiʼ que bidxibi xpixuaanaʼ ne biiyabe laa casi ti hombre ni naduxhuʼ ne qué riuu razón. Ngue runi, bicaachibe bueltu que lugar de niquiiñebe ni para nidale xpueltu xpixuaanabe. Ni zanda gacané laanu para cadi gácanu nachaabaʼ nga chuʼnu gaxha de Jiobá, Xpixuaanaʼ cosecha ca. Pa cueenu tiempu para guidúʼndanu ne guiníʼ íquenu de guendarannaxhii stiʼ Dios, modo qué ridxiichibe nagueenda, modo rilaseláʼdxibe binni ne de xcaadxi guenda sicarú nápabe la? zucaa cani laanu gúninu jma lu xhiiñaʼ Dios de guidubi ladxidoʼno (Luc. 6:45; Fili. 1:9-11).

«Naquiiñeʼ gácatu nayaguieʼ»

14. Ximodo naquiiñeʼ gaca xquendanabani cani racalaʼdxiʼ guni dxiiñaʼ lu cosecha ca.

¹⁴ Apóstol Pedru biquiiñeʼ cani zeeda lu Stiidxaʼ Dios ni gucuá lu diidxaʼ hebreu para bisiene xi racalaʼdxiʼ Dios guni ca xpinni: «Laaca lagaca nayá lu guiráʼ ni gúnitu, cásica nayá Dios ni guniʼné laatu, purtiʼ ca: “Naa naca nayaguieʼ, zacaca laatu naquiiñeʼ gácatu nayaguieʼ”» (1 Ped. 1:15, 16, NM; Lev. 19:2; Deu. 18:13). Ca diidxaʼ ca cusihuínnicani naquiiñeʼ gaca xquendanabani  cani chindisaʼ cosecha ca nayá ne chuʼcaʼ nayá nezalú Dios. Zanda gúninu dxiiñaʼ ca pa gusianu laanu, casi ñaca niguíʼbinu laanu. Xii nga ni zanda gusiá laanu yaʼ. Laacani nga guiráʼ ni rabi Dios laanu lu Stiidxaʼ.

15. Ximodo zanda gacané guiráʼ ni zeeda lu Stiidxaʼ Dios laanu yaʼ.

¹⁵ Biblia na zeeda gaca guiráʼ ni rabi Dios laanu lu Stiidxaʼ casi nisa ni rusiá. Casi bicaa apóstol Pablu, bisiá Cristu xnovia, nga nga ca xpínnibe ni bibí pur espíritu santu, «bisiá ladxidóʼ cabe ra uyuu nisa cabe, purti bini cre cabe stiidxaʼ» para ganda chúʼcabe nayá, nga runi para Jiobá maʼ nayácabe (Efe. 5:25-27). Caadxi iza ante, Jesús maca guníʼ napa stiidxaʼ Dios poder para gusiá, ne laapebe guniʼbe diidxaʼ ca. Jesús gudxi ca discípulo stiʼ: «Laatu ma nayá tu, purti ma bini cre tu ca diidxa byue nia laatu» (Juan 15:3). Nga runi, guiráʼ ni rabi Dios laanu lu Stiidxaʼ nápacani poder para gusiani laanu ne gacaneni laanu gúninu ni jneza nezalube. Pa racaláʼdxinu chuulaʼdxiʼ Dios dxiiñaʼ ni cayúninu la? naquiiñeʼ gudiʼnu lugar gusiá stiidxabe laanu.

16. Xi zacané laanu para cadi gusaana de gúninu ni jneza ne chuʼnu nayá nezalú Dios yaʼ.

¹⁶ Casi maʼ bidúʼyanu ca, tu racalaʼdxiʼ gacané lu xhiiñaʼ Jiobá naquiiñeʼ gusaana de guni ca cosa ni cadi jneza ruuyaʼ Dios. Pa racaláʼdxinu gúnirunu dxiiñaʼ nabé risaca riʼ, cadi naquiiñeʼ gusaananu de gácanu ti ejemplu para xcaadxi ra gúninu ni na ca ley stiʼ Jiobá (biindaʼ 1 Pedro 1:14-16). Cásica rusianu laanu gatigá para chuʼnu nayá la? zacaca ca xpinni Cristu naquiiñeʼ gudiʼnu lugar gusiá stiidxaʼ Dios laanu gatigá para chuʼnu nayá nezalú Dios. Ne zúninu nga ora guidúʼndanu Biblia, chuunu ca guendaridagulisaa ca ne gúninu stipa pur chinándanu ca ley stiʼ Jiobá. Pa gúninu cani, zacanécani laanu para cadi guchéʼnenu Dios ne para cadi gúninu ca cosa dxabaʼ ni nuu lu guidxilayú riʼ (Sal. 119:9; Sant. 1:21-25). ¡Nabé ratadxí ladxidoʼno ora gánnanu zanda gacané stiidxaʼ Dios laanu para chuʼnu nayá dede zanda gusiani laanu pa gúninu xiixa cosa nabé malu! (1 Cor. 6:9-11.)

17. Xi conseju zeeda lu Biblia naquiiñeʼ chinándanu para cadi gusaana de chuʼnu nayá.

¹⁷ Ñee rudiʼnu lugar gusiá stiidxaʼ Dios xquendanabáninu la? Guiníʼ íquenu lu caadxi cosa. Xi rúninu ora chuʼ tu gabi laanu zándaca chuʼnu ra naxoo pur xiixa ni quítenu, gucaadiáganu ne ni guidúʼyanu yaʼ (Sal. 101:3). Ñee rúninu stipa pur cadi guidxaaganu cani runinenu dxiiñaʼ, cani rinenu scuela ni cadi naca xpinni Cristu la? (1 Cor. 15:33.) Ñee cayúninu stipa de guidubi ladxidoʼno para gusaananu de gúninu xiixa ni cadi jneza ni zándaca guni biidiʼ laanu nezalú Jiobá la? (Col. 3:5.) Ñee riuʼnu lu política ni nuu lu guidxilayú riʼ o rusisácanu xquídxinu ora quítecaʼ xiixa juegu la? (Sant. 4:4.)

18. Ora gúninu ni nayá lu xquendanabáninu ne nezalú Dios, ximodo zacané nga laanu gacanenu jma binni guiziidiʼ de Dios yaʼ.

¹⁸ Pa guzúʼbanu stiidxaʼ Dios lu cani maʼ guninu ca, zabeendunu ni galán. Jesús bichaaga ca xpinni ni bibí pur espíritu santu casi ramahuiiniʼ stiʼ lubaʼ uva, laabe guniʼbe: «Irá rama stinne ni qué icá lú maca ziugá [Bixhozeʼ cani], peru cani icá lú la? zusiá be laaca para jma rusi gudii caʼ» (Juan 15:2). Nga runi, pa gudii tuuxa lugar gusiá stiidxa Dios laa la? jma stale binni zanda gacané.

Ca ndaayaʼ ni cacaanu yanna ne ni zacaanu despué

19. Xi ndaayaʼ gucuaa ca discípulo stiʼ Jesús pur dxiiñaʼ nadipaʼ ni bíʼnicaʼ.

¹⁹ Lu saa Pentecostés ni guca lu iza 33 que, ca  xpinni Jesús ni bidii lugar gusiidibe laacaʼ gucuaacaʼ espíritu santu, ne laani bidiini stipa laacabe para gucheechecabe diidxaʼ lu «idubi naca guidxilayú» (Hech. 1:8). Ca hombre que nabé gucanécabe para bireeche ca diidxaʼ nacubi ne galán lu «idubi naca guidxilayú», dede beeda gácacabe cani guyuu lu Grupu ni Zaniruʼ, misioneru ne binnigola ni riganna neza binni ridagulisaa (Col. 1:23). ¡Nabé stale ndaayaʼ gucuaacabe, ne nabé gucanécabe binni chuʼ nayecheʼ!

20. 1) Xi ndaayaʼ huacaaluʼ pur qué rusaanaluʼ de gucheecheluʼ diidxaʼ. 2) Xi naquiiñeʼ quixhe íquenu gúninu.

²⁰ Pa qué rudxíʼbanu laca laanu, gucheechenu diidxaʼ ne stale gana ne guni respetarnu ca ley stiʼ Dios la? qué zusaana de gúninu dxiiñaʼ risaca biaananenu ca. Ca binni ni qué ruzuubaʼ stiidxaʼ Dios ricá íquecaʼ puru si ni rusiecheʼ binni lu guidxilayú riʼ ne gápacaʼ bidxichi. Cumu qué riníʼ íquenu casi laacabe la? qué ridídinu lu guiráʼ yuubaʼ ni ridíʼdicabe ne qué riuʼnu triste casi laacabe purtiʼ qué rireendú ni riguixhe íquecabe, sínuque dxandipeʼ nuunu nayecheʼ ne ridxá tipa ladxidoʼno (Sal. 126:6). Ne ni jma risaca nga, nánnanu cadi pur gana si cayúninu ni na Jiobá (1 Cor. 15:58). Jiobá, Xpixuaanaʼ cosecha ca, zudii laanu guendanabani ni qué zaluxe pur dxiiñaʼ ni maʼ bíninu ne purtiʼ nadxiinu labe (Heb. 6:10-12).

[Cani cá ñee yaza]

Ñee biénenu cani zeeda raríʼ la?

• Xiñee cadi naquiiñeʼ gudxíʼbanu laca laanu para ganda gucheechenu diidxaʼ ne stale gana.

• Ximodo zanda gucheechenu diidxaʼ ne stale gana ne cadi gusaana de gúninu ni.

• Xiñee naquiiñeʼ guni cani rucheeche diidxaʼ stipa pur chuʼ xquendanabánicaʼ nayá ne chuʼcaʼ nayá nezalú Dios.

[Guendarinabadiidxaʼ stiʼ párrafo]

[Dibuju/foto ni zeeda lu yaza 17]

Zusihuínninu qué rudxíʼbanu laca laanu pa guchaʼnu modo nabáninu ne quixhe íquenu gúninu jma lu xhiiñaʼ Reinu