Xi zusihuinni dxi stiʼ Jiobá
Xi zusihuinni dxi stiʼ Jiobá
«[Dxi stiʼ Jiobá zeedani] casi reeda gubaana, [...] ne [...] zacá gui guidxilayú ne irá ni nuu ndaani ni.» (2 PED. 3:10)
1, 2. 1) Ximodo chiguiluxe guidxilayú malu ra nabézanu riʼ. 2) Xi guendarinabadiidxaʼ chiguicábinu lu tema riʼ.
GUIDXILAYÚ malu riʼ biasastini pur ti guendarusiguii, laani nga: ni runi cré binni ora riníʼ ique zanda guni mandar hombre ndaaniʼ Guidxilayú sin gacané Jiobá laa (Sal. 2:2, 3). Ñee zanda guindaa ti cosa ni zeeda de xiixa ni cadi dxandíʼ la? Coʼ xa. Peru cadi naquiiñeʼ diʼ cuézanu laaca guidxilayú stiʼ Binidxabaʼ ca gunitilú laca laa. Jiobá nga chigunitilú ni. Ne zúnibe ni ora nabe ne modo nabe, ne ni chigúnibe riʼ zusihuínnini rúnibe ni jneza ne nadxiibe binni (Sal. 92:7; Pro. 2:21, 22).
2 Apóstol Pedru bicaa sicaríʼ: «[Dxi stiʼ Jiobá zeedani] casi reeda gubaana huaxhinni, qué zaguixhená be irutíʼ. Zaxidxi laa ra initilú ibáʼ ne zacá gui irá luceru dede initilú, ne zaqueca zacá gui guidxilayú ne irá ni nuu ndaani ni» (2 Ped. 3:10). Lu versículo riʼ, xii nga zeeda gaca «ibáʼ» ne «guidxilayú». Xii nga ca «luceru» ni «initilú» ca. Xi riníʼ ca diidxaʼ guníʼ Pedru ra na: «Zacá gui guidxilayú ne irá ni nuu ndaani ni». Ra guicábinu ca guendarinabadiidxaʼ riʼ zánnanu ximodo guidxaagalunu ca cosa ni chigaca despué ni nabé zuchibi binni.
Guibáʼ ne guidxilayú ni chiguinitilú
3. Xii nga zeeda gaca «ibáʼ» ni ruzeeteʼ 2 Pedro 3:10, ne ximodo chiguinitilú ni.
3 Nuu tiru, ora guzeeteʼ Biblia de «ibáʼ» caniʼni de ca gobiernu, purtiʼ laacabe nápacabe ti puestu jma risaca que xcaadxi binni (Isa. 14:13, 14; Apo. 21:1, 2). Guibáʼ ni chiguinitilú ca nga zeeda gaca ca gobiernu ni qué runi ni na Dios ni nuu lu guidxilayú riʼ. Xiñee rieeteʼ nabé «zaxidxi laa» ora guinitilúcabe o casi na sti Biblia zaca «ti ruidu ni zusicuaataʼ diaga binni» yaʼ. Zándaca purtiʼ nabé nagueenda zanitilúcabe.
4. Xii nga «guidxilayú» ni ruzeeteʼ Biblia, ne ximodo chiguinitilú ni.
4 «Guidxilayú» ni ruzeeteʼ Biblia ca nga ca binni ni qué runi ni na Dios ni nabani lu Guidxilayú riʼ. Cásica yanna riʼ, dxi bibani Noé laaca guyuu ti guidxilayú malu ni guníʼ Dios guinitilú ne ti Nisaguié Naroʼbaʼ. «Peru ibáʼ ne guidxilayú ni nuu yanna ri la? cadi nisa di unitilú cani, sínuque ma gudixhe Dios unitilú ni ne gui. Ne laca gui que unitilú irá cani qué rulabi laabe, dxi cuidxi be cuenta laacaʼ.» (2 Ped. 3:7.) Dxi biaba Nisaguié Naroʼbaʼ que binitilú Dios guiráʼ binni ni qué iquiiñeʼ que tobi si tiru. Peru ra chigunitilú Dios ca binni malu nuu yanna riʼ, zácani chaahuidugá lu ca dxi «jma nagana» ca (Apo. 7:14). Primé ca ni chiguni Dios nga zucaabe ca políticu ni nuu lu guidxilayú riʼ gunitilucaʼ «Babilonia, guidxi roʼ» xhenemígabe, ni zeeda gaca guiráʼ ca religión ni guyuuné ca gobiernu políticu nuu lu Guidxilayú riʼ (Apo. 17:5, 16; 18:8) Ne últimu la? zunitilú Jiobá xcaadxi xpinni Binidxabaʼ lu Armagedón (Apo. 16:14, 16; 19:19-21).
Zanitilú «irá luceru»
5. Xiruʼ zeeda gaca casi ca «luceru» ni bizeeteʼ Pedru que.
5 Gunáʼ nga ca «luceru» ni chiguinitilú ca yaʼ. Ti diccionariu ni rusiene de Biblia na diidxaʼ griegu ni bitiixhicabe casi «luceru» ca riniʼni «ca cosa ni jma risaca (ni jma rihuinni) ni nuu» o «ca cosa ni jma naquiiñeʼ» ne biquiiñecabe ca diidxaʼ ca para guiníʼcabe de «ca letra stiʼ alfabetu, purtiʼ laacani nga ca cosa ni jma risaca ni riquiiñeʼ para gucaa binni». Nga runi, ca «luceru» ni guníʼ Pedru chiguinitilú ca nga ca cosa ni jma rihuinni nuu lu guidxilayú riʼ, casi ca guendaquéiquiiñeʼ runi binni, xpiaʼcaʼ, modo laacaʼ, guiráʼ ni naguixhe íquecaʼ ugaandacaʼ ne xcaadxi cosa rúnicaʼ ni rusihuinni cadi zinándacaʼ ni na Dios. «Espíritu sti binni guidxilayú» ni «runi dxiiña ndaani ladxidóʼ cani qué na uzuuba stiidxa Dios» laaca zeeda gácani casi ca «luceru» ca (1 Cor. 2:12; biindaʼ Efesios 2:1-3). Espíritu ca laaca riníʼcabe nácani «bi» purtiʼ nuuni lu guidubi guidxilayú ni nuu lu naʼ Binidxabaʼ. Rucaani binni guiníʼ ique, casi riníʼ ique «xaíque ni naze bi ni runi mandar», laabe nga Binidxabaʼ ni rudxiibaʼ laca laa ne ni rucaalú. Ne laaca rucaa «bi» ca binni quixhe ique ugaanda xiixa, guiníʼ ne guni cásica runi Binidxabaʼ.
6. Ximodo rihuinni espíritu stiʼ binni guidxilayú.
6 Ca binni ni zinanda espíritu stiʼ guidxilayú riʼ rudiicaʼ lugar quite Binidxabaʼ íquecaʼ ne ladxidoʼcaʼ —neca gudiicaʼ cuenta o coʼ— ne rucaabe laacaʼ guiníʼ íquecaʼ ne gúnicaʼ casi rúnibe. Ne pur nga nabánicabe casi modo na íquecabe ne qué rizaaláʼdxicabe ximodo ruuyaʼ Dios ni rúnicabe. Qué rusaanacabe de gudxiibacabe laca laacabe ne guyúbicabe para laasicabe, qué ruzuubacabe stiidxaʼ cani runi mandar ne rúnicabe guiráʼ ni na íquecabe ne guiráʼ ni ruuyacabe (biindaʼ 1 Juan 2:15-17). a
7. Xiñee caquiiñeʼ gápanu ladxidoʼno.
7 ¡Nabé risaca nga chinándanu conseju ni na: «Jma gupa chaahuiʼ ladxidoʼloʼ»! (Pro. 4:23.) Para gúninu nga la? naquiiñeʼ guiníʼ íquenu casi ti xpinni Cristu ora cuinu tu gaca xhamígunu, tu chizánenu, xi guidúʼndanu ne ora guyúbinu xiixa lu Internet. Pablu caguixhená laanu ne ca diidxaʼ riʼ: «Laguuya gá laatu né cani canayuíʼ ni biree de xquenda biaani binni. Cadi dxandí ni, sínuque binni guidxilayú gudixhe ni casi na ca naca guidxilayú, ne cadi de Cristu zeeda ni» (Col. 2:8). Ne yanna nga jma naquiiñeʼ chinándanu conseju stibe, purtiʼ maʼ gaxha nuu dxi stiʼ Jiobá. Dxi ca zusia ti «gui» ca «luceru» ni nuu lu guidxilayú stiʼ Binidxabaʼ riʼ, ne gui ca qué huayuu dxi guni sentir binni pabiáʼ nandáʼ ni. Zacá ni, qué zanda guni huantárcabe xiana stiʼ Jiobá. Ne zacaca nga ruzeeteʼ Malaquías 4:1: «Zeedandá dxi ni cayaʼquiʼ casi ti horno, ne guiráʼ cani runi cré laa ne guiráʼ cani runi ni qué iquiiñeʼ zeeda gácacaʼ casi guixi. Ne dxi zeeda ca dxandipeʼ zunduuxeʼ ni laacabe».
«Zacá gui guidxilayú ne irá ni nuu ndaani ni»
8. Ximodo nga «zacá gui» guidxilayú ne guiráʼ ni nuu luni.
8 Xii nga caníʼ Pedru ne ca diidxaʼ «zacá gui guidxilayú ne irá ni nuu ndaani ni» yaʼ. Diidxaʼ «zacá gui» ca laaca zanda guibíʼxhini casi «zahuinni xiixa» o «zanna binni nuu xiixa cosa», casi ñaca naquiiñeʼ gaca castigar ni ne gui. Ni na Pedru nga dxi guzulú ca dxi jma nagana ca zusihuinni Jiobá cucaalú guidxilayú stiʼ Binidxabaʼ riʼ Laabe ne Reinu Stibe, nga runi naquiiñeʼ guinitilú ni. Ne lu Isaías 26:21 maca bieeteʼ zuni juzgar Dios laacabe: «Caree Jiobá de ra nuu para cuidxi cuenta ca binni guidxilayú ni bicheené laa, ne guidxilayú ca zusihuinni pabiáʼ rini maʼ bixii ndaaniʼ ne zahuinni tuu nga ca binni ni maʼ guti luni».
9. 1) Xi cadi naquiiñeʼ gúninu, ne xiñee. 2) Xi naquiiñeʼ gápanu ni zacané laanu, ne xiñee naquiiñeʼ gápanu ni.
9 Ora guedandá dxi stiʼ Jiobá ca, ca binni ni maʼ bidii lugar guicá modo nabani binni guidxilayú riʼ ne espíritu stini laa, zahuinni dxichi ximodo nga laacabe dede zuuti saacabe laacabe. Ne zándaca guiráʼ cani rucaa binni tinde yanna, casi ni riguítecaʼ, ni ruuyacaʼ, ni ruundacaʼ, caguu cani binni listu para dxi guindisanáʼ saacaʼ lucaʼ (Zac. 14:13). Nga runi, cadi naquiiñeʼ guidúʼyanu intiica película, guidúʼndanu intiica libru, quítenu videojuego o gúninu xiixa ni gucaa laanu gudxíʼbanu laanu, chuuláʼdxinu guendaridinde o xcaadxi cosa ni nanalaʼdxiʼ Dios (2 Sam. 22:28; Sal. 11:5). Ne laaca naquiiñeʼ gápanu ca guenda ni rudii espíritu santu, purtiʼ laacani nga chigacanécani laanu para cadi guzaaquiʼ gui stiʼ Jiobá laanu ora guidxiichi (Gál. 5:22, 23).
«Ti guidxilayú cubi ne ti ibáʼ cubi»
10, 11. Xii nga «ibáʼ cubi» ne «guidxilayú cubi» ca.
10 (Biindaʼ 2 Pedro 3:13.) Yanna, xii nga «ibáʼ cubi» ca yaʼ. Laani nga Reinu stiʼ Dios ni bizulú cayuni mandar guibáʼ lu iza 1914 dxi biluxe tiempu gudixhe Dios para guni mandar ca guidxi roʼ ca (Luc. 21:24). Jesús nga cayuni mandar guibáʼ ne stale de ca binni ni nuu lu grupu de 144,000 binni ni maʼ nuu guibáʼ. Libru stiʼ Apocalipsis ruzeeteʼ naca ca binni ni bibí riʼ casi: «Jerusalén cubi, guidxi roʼ sti Dios, zeda yete de ibáʼ de ra nuu Dios. Zuchaahui casi ti gunaa ora chi chaganáʼ» (Apo. 21:1, 2, 22-24). Casi dxiqué la? ndaaniʼ guidxi Jerusalén que nga biʼniʼ mandar ca rey ni guyuu Israel. Cani chiguni mandar lu guidxilayú cubi ca nga Jesús ne xnovia, ni zeeda gaca «Jerusalén cubi». Guidxi riʼ casi ñaca ñéteni «de ibáʼ» purtiʼ zuuyani xi caquiiñeʼ gaca lu Guidxilayú riʼ.
11 «Guidxilayú cubi» ruzeeteʼ Biblia ca nga ca binni ni chiguibani lu Guidxilayú riʼ ne laacabe nga ca binni ni maʼ bisihuinni cayuni ni na Reinu stiʼ Dios. Ca xpinni Dios ni nabani yanna riʼ casi ñaca maʼ ñuucaʼ ndaaniʼ ti paraísu. Peru despué ni zeeda gaca ti paraísu ca maʼ dxandipeʼ zácani ti paraísu ora maʼ gaca guidxilayú riʼ nacubi (Heb. 2:5). Xi caquiiñeʼ gúninu para guibáninu racá yaʼ.
Chuʼnu listu ora gueeda dxi jma risaca stiʼ Jiobá
12. Xiñee nabé zadxagayaa binni guidxilayú ora gueeda dxi stiʼ Jiobá.
12 Pablu ne Pedru tobi si ni bizeetecaʼ ora guniʼcaʼ zeeda dxi stiʼ Jiobá «casi reeda gubaana», o guirutiʼ zudii cuenta ne zeedani ora guirutiʼ tu cabeza ni (biindaʼ 1 Tesalonicenses 5:1, 2). Dede né cani dxandíʼ xpinni cristu ni maʼ racaláʼdxicaʼ gueeda dxi ca zadxagayaacaʼ purtiʼ málasi zedandá dxi ca (Mat. 24:44). Peru ca binni ni nuu zitu de Jiobá jma zadxagayaacaʼ ora gueeda dxi ca. Pablu bicaa: «[Ora guiníʼ binni] ruluíʼ gasti chi gaca, nuu dxí guidxi, mala inaaze be laaca casi rinaaze yuuba ti gunaa ora ma gunda dxi gapa baʼduʼ. Zacá zazaaca cabe, ne óraque ma qué zalá cabe» (1 Tes. 5:3).
13. Xi zanda gúninu para cadi quite ca demonio ca laanu ora guiníʼ binni «gasti chi gaca, nuu dxí guidxi».
13 Ora guiníʼ binni «gasti chi gaca, nuu dxí guidxi» la? zusihuinni nga caguite ca demonio ca laacaʼ; peru ca xpinni Jiobá qué ziuu dxi quítecabe laacaʼ. Apóstol Pablu guníʼ: «Peru laatu, hermanu caʼ, ma biree tu ra nacahui, ma qué zanda inaaze dxi que laatu, purti cabeza tu ni. Ma cadi nuu tu lu guelacahui, purti ma zinanda tu ni dxandí ni gudixhe Dios, casi ñaca cuzaani be laatu» (1 Tes. 5:4, 5). ¡Naquiiñepeʼ nga chinándanu cani dxandíʼ gudixhe Dios, ni zeeda gaca casi biaaniʼ ne guixélenu de guidxilayú cahui stiʼ Binidxabaʼ riʼ! Pedru gudxi ca xpinni Cristu ziuu maestru ni qué zusiidiʼ ni dxandíʼ ndaaniʼ neza binni ridagulisaa, laabe guniʼbe: «Hermanu ni nadxiee caʼ, yáquexa ma nanna tu ni la? laguuya cadi chi nanda tu ni rusiidi binni ni qué ruzuuba stiidxa Dios ti cadi guiaba tu de ra ma zuhuaa dxiichi tu» (2 Ped. 3:17).
14, 15. 1) Ximodo rusihuinni Jiobá rusisaca laanu. 2) Xi conseju stiʼ Biblia rusietenaláʼdxicabe laanu ni naquiiñeʼ gucaadiáganu.
14 Jiobá cadi cayabi si laanu «laguuya», o «cadi gusaana de gápatu laatu» (El libro del Pueblo de Dios), sínuque rusihuínnibe rusisácabe laanu ra gusiidibe laanu dede ante, o ra gusiénebe laanu xi guiráʼ chiguizaaca despué.
15 Triste guininu ni, peru ora rusietenaláʼdxicabe laanu ra ridagulisaanu naquiiñeʼ gatananu la? nuu tu laa qué rizaalaʼdxiʼ o dede runi burla ne qué runi cré. Zándaca guiniʼcaʼ: «Maʼ xadxí nga runadiaʼgaʼ guiníʼcabe zacá». Peru naquiiñeʼ gánnacabe cadi de mozo ni nuu xpiaaniʼ si nga caníʼcabe cadi jneza ni cayuni, sínuque de Jiobá peʼ ne de Xiiñiʼ nga caníʼcabe zacá. Dxandíʼ, Jiobá peʼ nga cayabi cada tobi de laanu cuézanu dxi stiʼ (Hab. 2:3). Ne laaca Jesús peʼ nga cayabi laanu: «Lagataná purti qué ganna tu pora gueeda Señor stitu» (Mat. 24:42). Ne Pedru bicaa: «Yáquexa ma nanna tu ximodo chi initilú irá ni la? lauyubi udii tu idubi xpida tu Dios para guni tu ni na, laga cabeza tu dxi stiʼ» (2 Ped. 3:11, 12). Mozo ni nuu xpiaaniʼ ne Grupu ni Zaniruʼ stiʼ nánnacaʼ dxandíʼ ni na ca diidxaʼ ca ne qué ziuu dxi gusaana de gatanacaʼ.
16. Ximodo nga cadi naquiiñeʼ gácanu, ne xiñee.
16 Ti mozo ni «qué iquiiñe» nga ni riníʼ ique candaa xpixuaanaʼ (Mat. 24:48). Ne zacá nga riníʼ ique ca binni ni ruzeeteʼ 2 Pedro 3: 3, 4 ra na: «Dxi mayaca gueeda [dxi stiʼ Jiobá la?] ziasa caadxi ni nabani casi na ique, ne zuni burla Dios». Ca binni ca ruxídxicaʼ de cani ruzuubaʼ diidxaʼ ne cani rusihuinni pur modo nabánicaʼ cabézacaʼ dxi stiʼ Jiobá. Ne lugar de quixhe íquecaʼ gúnicaʼ jma lu xhiiñaʼ Reinu la? ruyúbicaʼ gúnicaʼ puru para laasicaʼ ne ni riuuláʼdxisicaʼ. ¡Qué chuʼ dxi gácanu binni ni qué ruzuubaʼ diidxaʼ ne uguʼnu xquendanabáninu ra naxoo! Ni naquiiñeʼ gúninu nga «[guietenaláʼdxinu] cabeza Señor stinu sin ixhacalaʼdxi purti racalaʼdxi ilá binni» ne iquiiñenu tiempu stinu para gucheechenu diidxaʼ ne gacanenu binni gaca xpinni Cristu. Qué chuʼ dxi gacaláʼdxinu gánnanu padxipeʼ gaca caadxi cosa, purtiʼ Jiobá si nga nanna pora gaca cani (2 Ped. 3:15; biindaʼ Hechos 1:6, 7).
Guni crenu Dios ni zulá laanu
17. Xi biʼniʼ ca xpinni Cristu ni qué nusaana de ñuni ni na Dios ora gudxi Jesús laacaʼ guxooñecaʼ de Jerusalén, ne xiñee bíʼnicabe zaqué.
17 Ca soldadu romanu bicaalucaʼ guidxi Judea lu iza 66 despué de ca dxi stiʼ Jesús. Ca xpinni Cristu ni qué nusaana de ñuni ni na Dios nánnacaʼ gudxi Jesús laacaʼ naquiiñeʼ guireecaʼ de Jerusalén cásipeʼ ganda, ne biiyasícabe maʼ zanda la? bireecabe de raqué (Luc. 21:20-23). Xiñee nagueendaca bireecabe de raqué ne qué nudiicabe lugar ñuu xiixa ni nucueeza laacabe yaʼ. Bihuinni dxíchica qué ñaandaʼ laacabe ni guníʼ Jesús que. Nécapeʼ nánnacabe zadxagalúcabe guendanagana pur ni gúnicabe que, purtiʼ Cristu maca gudxi laacabe zácani zaqué, peru laaca nánnacabe qué zusaana Jiobá laacabe pa qué gusaanacabe de gúnicabe ni na (Sal. 55:22).
18. Ximodo naquiiñeʼ gúʼyaluʼ ca dxi jma nagana zeeda ca, casi cuzeeteʼ Lucas 21:25-28.
18 Laanu laaca naquiiñeʼ guni crenu Jiobá de guidubi ladxidoʼno, purtiʼ laasibe nga zanda gulabe laanu ora maʼ cadiʼdiʼ binni guidxilayú lu ca dxi jma nagana, ni qué huayuudxí guizaaca biaʼ dxi huabani binni. Ante gunitilú Jiobá xcaadxi binni guidxilayú, zadiʼdiʼ ca binni ni qué nuzuubaʼ diidxaʼ ca lu ca dxi jma nagana ca ne zedandá ti ora «zadxibi binni dede zieeguʼ, purti ma nuu xizaa xi chi aca ndaani guidxilayú». Peru ca xpinni Jiobá ni qué gusaana laa qué zadxíbicaʼ casi guidxibi ca xhenemigu Dios. Laga ziéchecaʼ purtiʼ zudiicaʼ cuenta maʼ zedadxiña dxi gulá Dios laacaʼ (biindaʼ Lucas 21:25-28).
19. Xi chiguidúʼyanu lu sti tema ca.
19 Dxandíʼ, ca binni ni cadi zinanda ni runi binni guidxilayú ne guiráʼ ni nuu ndaaniʼ ni nabé sicarú ni cabeza laacaʼ. Sti tema ca chigusiene cadi naquiiñeʼ si gusaananu de gúninu cosa malu para guicaanu guendanabani ni qué zaluxe. Laaca naquiiñeʼ gúninu stipa pur gápanu ca guenda ni riuulaʼdxiʼ Jiobá ne gúninu ca cosa ni riuuláʼdxibe (2 Ped. 3:11).
[Cani cá ñee yaza]
a Libru Razonamiento a partir de las Escrituras, yaza 140 dede 144, cusiene chaahuiʼ xi guiráʼ rucaa espíritu stiʼ binni guidxilayú riʼ binni guni.
Zanda gusiéneluʼ ca ndiʼ la?
• Xii nga zeeda gaca «ibáʼ» ne «guidxilayú» ni nuu yanna riʼ.
• Xii nga zeeda gaca ca «luceru» ca.
• Xii nga zeeda gaca «ibáʼ cubi» ne «guidxilayú cubi» ca.
• Xiñee runi crenu Dios de guidubi ladxidoʼno.
[Guendarinabadiidxaʼ stiʼ párrafo]
[Dibuju/foto ni zeeda lu yaza 5]
Ximodo zanda gápanu ladxidoʼno ne cadi gúninu ca cosa ni runi binni guidxilayú
[Dibuju/foto ni zeeda lu yaza 6]
Ximodo rusihuínninu «[rietenaláʼdxinu] cabeza Señor stinu sin ixhacalaʼdxi purti racalaʼdxi ilá binni»