Ximodo rulá guendaguti stiʼ Jesús laanu

«Tu runi cre Xiiñi be la? napa enda nabani ni qué zaluxe, peru tu qué uzuuba stiidxa Xiiñi be, qué zapa di enda nabani, sínuque xiana stibe nuu luguiáʼ.» (JUAN 3:36)

1, 2. Gunáʼ nga tobi de ca razón nuu para bizulú biree revista riʼ.

 «PA TUUXA guʼndaʼ chaahuiʼ Biblia, zudii cuenta pabiáʼ risaca guendaguti stiʼ Cristu», zacá bizeeteʼ guidapa tema stiʼ revista riʼ ni biree lu beeu octubre stiʼ iza 1879. Ne últimu bizeeteni: «Naquiiñeʼ gucáʼnanu guiráʼ cosa ni gucaa laanu guiníʼ íquenu qué risaca guendaguti stiʼ Jesús ne qué zanda iquiiñeni casi ti ofrenda ni gudíxebe para guixá stóndanu» (biindaʼ 1 Juan 2:1, 2).

² Tobi de ca razón ni nuu para bizulú biree revista ni cadúʼndanu riʼ lu beeu julio stiʼ iza 1879 nga para gusihuínnini dxandíʼ guti Jesús para guixá stonda binni. Xiñee yaʼ. Purtiʼ dxi maʼ ziluxe siglu XIX que, stale de ca binni ni nacaʼ zinándacaʼ Cristu bizulú guniʼcaʼ ti cosa: ruluíʼ cadi caquiiñeʼ diʼ guendaguti stiʼ Jesús para guixá ca donda stinu. Ngue runi, ca tema ni beeda lu revista riʼ ca dxi que, biáʼsipeʼ laacani nga ni caquiiñeʼ ganna ca binni ni bibani tiempu que (Mat. 24:45). Ca dxi que, bizulú bidale binni ni biʼniʼ cré ziúpanu de maniʼ, peru cadi nga diʼ nga ni rusiidiʼ Biblia, purtiʼ ruzeeteni bichee primé hombre que, nga runi beeda gácanu binni ni napa donda. Cani runi cré ziúpanu de maniʼ nacaʼ chaahuiʼ chaahuiʼ ziguchaa binni dede zadxiña dxi guibánicaʼ jma galán ne pur nga cadi caquiiñeʼ chuʼ tu gati pur laacaʼ. Cumu zacá nga guníʼ ique ca binni ca dxiqué la? nga runi biáʼsipeʼ conseju bidii Pablu Timoteu: «Gupa dxiichi dxiiña ni biaana neuʼ. Qué chi ucaa diaʼgu ca diidxa ricaa yu né cabe ni cadi zeeda de Dios, nin ni na cabe enda biaani peru cadi dxandíʼ. Nuu caadxi zinanda ni, ne biree chu de ni runi cre» (1 Tim. 6:20, 21).

3. Xi guendarinabadiidxaʼ zacábinu lu tema riʼ.

³ Nin tobi de laanu qué racalaʼdxiʼ guireechú  «de ni runi cre». Nga runi jneza guinabadiidxanu laca laanu: «Xiñee caquiiñeʼ gulá guendaguti stiʼ Jesús naa yaʼ. Xi yuubaʼ gudiʼdiʼ Jiobá ne Jesús. Xi caquiiñeʼ guneʼ para cueenduáʼ ni galán pur ni cudii Dios para cadi gueeda xiana stiʼ luguiaʼyaʼ yaʼ».

Zanda guilanu de xiana stiʼ Dios

4, 5. Xi rusihuinni zeeda xiana stiʼ Dios luguiáʼ guidxilayú stiʼ Binidxabaʼ riʼ.

⁴ Ni rusiene Biblia ne ni rihuinni biaʼ dxi maʼ huabani binni nga nuu «xiana [stiʼ Dios] luguiáʼ» guiráʼ binni guidxilayú dede dxi bichee Adán (Juan 3:36). Ne zacá ni purtiʼ guirutiʼ qué huayanda guiree de lu naʼ guendaguti. Ne modo runi mandar Binidxabaʼ, xhenemigu Dios, qué huayanda gulani binni de guiráʼ guendananá ridxaagalucaʼ, ne nin ti gobiernu qué huayanda gudii binni ca cosa ni caquiiñeʼ (1 Juan 5:19). Ne dede ca dxi stinu riʼ nabé nuu stale guendaridinde, guendaquéiquiiñeʼ ne guendapobre.

⁵ Rihuinni dxíchica qué gapa diʼ guidxilayú malu riʼ ndaayaʼ stiʼ Jiobá. Pablu guníʼ: «Xiana sti Dios nuu luguiá irá cani qué rulabi laa» (Rom. 1:18-20). Nga runi, cani qué naʼ gulabi Dios, o cani cayuni ca cosa ni qué riuuláʼdxibe la? naná modo gusabanabe laacaʼ. Tiempu riʼ, cayanna binni zeeda xiana stiʼ Dios luguiacaʼ, ne cayánnacabe cani ra ritidxi ca xpinni Cristu laacabe zeeda ti dxi ra guni juzgar Dios laacabe, ne ca nga zeeda gácacani casi plaga ni dxaʼ ndaaniʼ ca copa ni guilate luguiáʼ guidxilayú stiʼ Binidxabaʼ. Ne lu ca libru ne revista ni caníʼ de Biblia ca nga cayeeteʼ zeeda xiana stiʼ Dios (Apo. 16:1).

6, 7. Gunáʼ nga dxiiñaʼ ra zaniruʼ ca xpinni Cristu ni bibí pur espíritu santu, ne xi puertaʼ nga zuxeleʼ ndaga para ca binni ni nuu lu guidxilayú stiʼ Binidxabaʼ.

⁶ Yanna, ñee maʼ qué zanda guiree binni de lu naʼ Binidxabaʼ ne guicaa ndaayaʼ stiʼ Dios la? Zanda pue, purtiʼ cudiiruʼ Jiobá lugar guyubi binni laa, casi ora nuxheleʼ ndágabe ti puertaʼ para ganda chuʼ binni gaxha de laabe. Ca xpinni Cristu ni bibí pur espíritu santu, cani «biseenda Cristu», laacaʼ nga zanírucaʼ lu dxiiñaʼ ni cayaca de guireeche diidxaʼ ne dxiiñaʼ ca cayacaneni binni de guiráʼ guidxi. Ne ora rucheechecabe diidxaʼ ca nga rábicabe binni ca diidxaʼ riʼ: «[Laguyubi] chuʼ né tu Dios tobi si» (2 Cor. 5:20, 21).

⁷ Apóstol Pablu guníʼ: «[Jesús] zulá laanu dxi usaba ná [Dios] binni guidxilayú» (1 Tes. 1:10). Jiobá zusihuinni xiana stiʼ ora gunitilú ca binni malu ni qué naʼ gaca arrepentir (2 Tes. 1:6-9). Tu laa nga zalá dxicá yaʼ. Biblia cacabi guendarinabadiidxaʼ ca ne ca diidxaʼ riʼ: «Tu runi cre Xiiñi be la? napa enda nabani ni qué zaluxe, peru tu qué uzuuba stiidxa Xiiñi be, qué zapa di enda nabani, sínuque xiana stibe nuu luguiáʼ» (Juan 3:36). Casi maʼ bidúʼyanu ca, ora guedandá dxi guedané Jiobá xiana stiʼ ne guinitilú guidxilayú malu riʼ, zalá guiráʼ cani gusihuinni napa fe Jesús ne cani napa fe lu guendaguti stibe.

Ximodo rulá guendaguti stiʼ Jesús laanu

8. 1) Xi ti cosa sicarú biniti Adán ne Eva. 2) Ximodo bihuinni qué rusaana Jiobá de guni ni jneza.

⁸ Dios bizáʼ Adán ne Eva sin donda. Pa qué nusaanacabe de nuzuubacabe stiidxabe la? guidubi Guidxilayú riʼ ñácani ti paraísu ra  ñuu ca xiiñicabe, nibánicaʼ nayecheʼ ne ñuucaʼ tobi si. Triste guininu ni, peru Adán ne Eva gudixhe íquecaʼ gucheenecaʼ ley stiʼ Dios, ngue runi guníʼ Dios naquiiñeʼ gátibe ne gulee laacabe de ndaaniʼ jardín ni guyuu Edén que. Cumu bisaana de gácacabe binni sin donda la? laacabe nga beeda gácacabe bixhoze guiráʼ binni ruchee. Despué bióʼxhocabe ne gúticabe, ne nga bisihuinni runi Jiobá ni riníʼ ne qué rusaana de gúnibe ni jneza. Jiobá maca gudxi Adán zati ne zati xheelaʼ pa gocaʼ cuananaxhi ni gúdxibe laacaʼ cadi gocaʼ, ne nguepeʼ nga ni bizaaca.

9, 10. 1) Laanu ca xiiñiʼ Adán, xiñee rátinu. 2) Ximodo zanda guilanu de guendaguti.

⁹ Laanu ca xiiñiʼ Adán nápanu ti cuerpu ni napa donda, ni rucaa laanu gucheʼnu ne rátini. Beeda gácanu zacá, purtiʼ neca caʼruʼ gálenu dxi bichee Adán que, peru cumu de laabe nga ziúpanu la? nga runi gúcanu binni ruchee ne rátinu. Yanna, pa nucueeza Jiobá de ñoʼxhoʼ binni ne de ñáticaʼ sin nudii xquendanabani Xiiñiʼ la? nihuinni cadi dxandíʼ ni guniʼbe. Nga runi, para guiranu nga ca diidxaʼ ni guníʼ Pablu riʼ, laabe guniʼbe: «Nanna nu de xquenda biaani Dios zeeda ley que, peru naa rune ni na iqueʼ, ne caya yaga lu ná pecadu. [...] Pobre de naa. Nanna xi gueda iree xaʼyaʼ. Tuu nga cuee naa de enda guti ni naaze naa ri pue» (Rom. 7:14, 24).

¹⁰ Jiobá si nga zanda guni ni na ca ley stiʼ para gutiidilaʼdxiʼ donda stinu ne cuee laanu de lu náʼ guendaguti sin gusaana de guni ni jneza. Ximodo bíʼnibe ni yaʼ. Ra biseendabe Xiiñibe ni nadxiibe para beeda gale casi ti binni ni qué gapa donda ne despué bidii xquendanabani para gulá guiráʼ binni. Adán bichee, peru Jesús qué ñuu dxi nuchee. Biblia na «qué nuchee be» (1 Ped. 2:22). Ngue runi, ñanda ñapa Jesús xiiñiʼ ni qué ñalené donda. Peru bidiibe lugar guuti ca xhenemigu Dios laabe, purtiʼ zacá zanda gueeda gaca ca xiiñiʼ Adán casi xiiñibe ne gudiibe laacaʼ guendanabani ni qué zaluxe pa gápacaʼ fe laabe. Stiidxaʼ Dios na: «Tobi lucha Dios nuu, ne tobi si tu zanda iníʼ né laabe pur laanu, Jesucristu ni beda gaca binni guidxilayu. Dxi bidxiña dxi gudixhe Dios ihuinni racalaʼdxi ulá irá binni la? beda gati Cristu, beda tixe saca ilá cabe» (1 Tim. 2:5, 6).

11. 1) Xi ejemplu zacané laanu guiénenu ximodo racané guendaguti stiʼ Cristu laanu. 2) Tu guiráʼ nga nuu lade ca binni ni chiguicaa ndaayaʼ pur guti Cristu.

¹¹ Guzéʼtenu ti ejemplu para gusiénenu ximodo rulá guendaguti stiʼ Jesús laanu. Caadxi binni ni qué gapa donda biaanacaʼ sin ti degaayuʼ ra gulaʼnaʼ ti bancu xpuéltucaʼ ne bizaabicaʼ stale bueltu. Ca xpixuaanaʼ bancu que biseguyoocabe laacaʼ pur stale iza. Peru xi guizaaca de ca binni ni guláʼnacabe xpuéltucaʼ yaʼ. Ni zanda si gacané laacabe nga ti hombre ni napa stale bueltu ni guiá laacabe, siʼ bancu que ne gudxiguetaʼ xpuéltucabe para ganda quíxecabe ni nuzaabicabe. Zacaca nga biʼniʼ Jiobá ne Xiiñiʼ ni nadxii, casi ñaca nizíʼcabe ca xiiñiʼ Adán ne pur rini bixhii Cristu bitiiláʼdxicabe ca donda sticaʼ. Ngue runi gunda guníʼ Juan ni Riguunisa que ca diidxaʼ riʼ de Jesús: «Laguuyaʼ, ndi nga Dendxu huiini sti Dios ni ribee xpecadu binni guidxilayú» (Juan 1:29). Guidxilayú ni chiguixiá xpecadu nga ca binni ni nabeza lu Guidxilayú riʼ, cásica ca binni ni nabani zaqueca cani maʼ guti.

Pabiáʼ naná yuubaʼ gudíʼdicabe

12, 13. Xi rizíʼdinu de yuubaʼ ni biʼniʼ sentir Abrahán ora chiguuti Isaac.

12 Nécapeʼ qué zanda guiene chaahuinu pabiáʼ naná yuubaʼ gudiʼdiʼ Jiobá ne Jesús ora gudixe pur pecadu stiʼ binni la? lu Biblia zeeda caadxi relatu ni zacané laanu gánnanu xi biʼniʼ sentírcabe. Guietenaláʼdxinu historia stiʼ Abrahán. Guxuíʼlunu xi biʼniʼ sentirbe ora bíʼnibe ti viaje de chonna gubidxa para chindabe ti lugar láʼ Moria ti guzuubabe stiidxaʼ Dios: «Gucuaa xiiñiluʼ, Isaac, tobi lucha xiiñiluʼ ni nabé nadxiiluʼ, ne biʼniʼ ti biaje para chindaluʼ lu layú stiʼ Moria, raqué bidii laabe casi ti ofrenda lu ca dani ni chiguluéʼ lii» (Gén. 22:2-4).

¹³ Guxuíʼlunu de yuubaʼ ni bizulú biʼniʼ sentir Abrahán ora yendá lugar que, bizaʼbe ti altar ne bindiibisibe ñee ne naʼ xiiñibe gudíxhebe laa luni. Guiníʼ íquenu pabiáʼ naná yuubaʼ biʼniʼ  sentirbe ndaaniʼ ladxidoʼbe ora gundísabe gudxíu que para guutibe xiiñibe. Yanna guiníʼ íquenu de Isaac. Ximodo biʼniʼ sentirbe ora néxhebe lu altar que, cabézabe guni sentirbe pabiáʼ naná guidaabi gudxíu que laabe dede ra gátibe yaʼ. Nécapeʼ bicueeza ángel stiʼ Jiobá Abrahán ante ñuuti xiiñiʼ la? ni bíʼnibe ca ne ni biʼniʼ xiiñibe ca racaneni laanu guiénenu pabiáʼ naná guca para Jiobá gudii lugar guuti ca xpinni Binidxabaʼ Xiiñiʼ. Ne cásica bidii Isaac lugar gaca ni na Dios la? ngaca nga ni biʼniʼ Jesús ora bidii lugar guninácabe ne guuticabe laa pur laanu (Heb. 11:17-19).

14. Ximodo racané ni bizaaca Jacob laanu guiénenu ni biʼniʼ sentir Jiobá ora guti xiiñiʼ.

¹⁴ Sti ejemplu ni zacané laanu gánnanu pabiáʼ naná yuubaʼ gudiʼdiʼ Jiobá nga ni bizaaca Jacob. Laabe gúpabe ti xiiñibe láʼ José ne laa nga ni jma gunnaxhiibe, peru xcaadxi xiiñibe que gúpacaʼ envidia ne guca nanaláʼdxicaʼ José. Ti dxi biseendaʼ Jacob laabe para chiguuyabe ximodo nuu ca bíʼchibe ra cayápacaʼ dendxuʼ ti lugar láʼ Hebrón, ni nuu biaʼ ti gayuaa kilómetru ladu guiaʼ de ralídxicabe. Neca nanalaʼdxiʼ ca bíʼchibe laabe, peru bizuubabe stiidxaʼ bixhózebe. ¡Guníʼ ique pabiáʼ naná yuubaʼ biʼniʼ sentir Jacob ora bedané ca xiiñibe xhaba José nazeni rini! Ora biiyaʼ Jacob lari que guníʼ: «¡Lari ziuulaʼ stiʼ xiiñeʼ ndiʼ! ¡Zándaca ti maniʼ duxhuʼ nga bixuuxe laabe! ¡Nannadxiicheʼ gucadé José!». Ni bizaaca que nabé bininani laabe ne guyuube triste stale dxi (Gén. 37:33, 34). Dxandíʼ, Jiobá qué ruuyaʼ diʼ ca cosa ca casi modo ruuyaʼ ti binni ruchee cani. Peru ni bizaaca ca racaneni laanu guiníʼ íquenu ximodo biʼniʼ sentir Jiobá ora bíʼyabe cayuninácabe xiiñibe ni nadxiibe ne pabiáʼ naná modo biiticabe laa lu Guidxilayú riʼ.

Ximodo racané guendaguti stiʼ Jesús laanu

15, 16. 1) Ximodo bisihuinni Jiobá guyuulaʼdxiʼ ni biʼniʼ Xiiñiʼ. 2) Ximodo huayacané guendaguti stiʼ Cristu lii.

¹⁵ Jiobá gundisaʼ Xiiñiʼ ni qué nucheené laa de lade gueʼtuʼ ne ti cuerpu de espíritu (1 Ped. 3:18). Bizaaca si ngue bihuinni Jesús nezalú ca discípulo que biaʼ cuarenta dxi, biquídxibe fe  sticaʼ ne gucanebe laacaʼ chuʼcaʼ listu para gucheechecaʼ diidxaʼ. Despué guyebe guibáʼ ra biluiʼbe Dios pabiáʼ risaca rini bixhiibe dxi gútibe para guixá donda stiʼ cani dxandí xpínnibe, cani napa fe lu guendaguti stibe. Jiobá guyuulaʼdxiʼ ni biʼniʼ Xiiñiʼ que, ngue runi gúdxibe laa gusaba espíritu santu luguiáʼ ca discípulo ni dagulisaa ndaaniʼ guidxi Jerusalén lu Pentecostés stiʼ iza 33 (Hech. 2:33).

¹⁶ Ca xpinni Cristu ni bibí pur espíritu santu que, nagueendaca bizulucaʼ gúdxicaʼ binni naquiiñeʼ chúʼnisacaʼ lu lá Jesucristu para gutiidilaʼdxiʼ Dios stóndacaʼ ti guilacaʼ de xiana stibe (biindaʼ Hechos 2:38-40). Dede dxiqué, cuchiña Dios millón de binni de guiráʼ guidxi pur fe ni nápacaʼ lu guendaguti stiʼ Cristu para chuʼcaʼ gaxha de laabe (Juan 6:44). Pur guiráʼ ni maʼ guninu lu tema riʼ, naquiiñeʼ guicábinu xhupa guendarinabadiidxaʼ: Ñee zanda guibáninu sin gátinu purtiʼ si rúninu cosa galán la? Yanna, ñee zanda gunítinu ni cabézanu gudii Dios laanu riʼ la?

17. Ximodo naquiiñeʼ guidúʼyanu ndaayaʼ ni nápanu pur nácanu xhamigu Dios.

¹⁷ Cadi naquiiñeʼ diʼ ñati Cristu pur binni, purtiʼ guirácabe nácacabe binni napa donda. Peru pur fe ni napa millón de hombre ne gunaa laabe randa raca xhamígucaʼ Dios ne cabézacaʼ guibánicaʼ ndaaniʼ ti paraísu sin qué chuʼ dxi gáticaʼ. Peru naquiiñeʼ gánnanu zanda gusaana de gaca xhamígunu Jiobá. Pa racaláʼdxinu guilanu ora gueeda xiana stiʼ Dios luguiáʼ binni la? guiráʼ dxi naquiiñeʼ gusihuínninu pabiáʼ risaca para laanu «gudixe [Cristu] saca ni bichéʼ nu» (Rom. 3:24; biindaʼ Filipenses 2:12).

Cadi gusaana de gusihuínninu nápanu fe lu guendaguti stiʼ Jesús

18. Gunáʼ nga tobi de ca modo rusihuínninu nápanu fe lu guendaguti stiʼ Cristu.

¹⁸ Juan 3:36, textu ni cá ra bizulú tema riʼ cusiéneni gunáʼ nga tobi de ca modo rusihuínninu nápanu fe Jesucristu: guzúʼbanu stiidxabe. Pa rusisácanu guendaguti stiʼ Cristu la? zucaani laanu guibáninu casi modo na ca ley ni bisiidibe ne tobi de laacani nga gaca xpiaʼnu casi modo racalaʼdxiʼ Dios (Mar. 7:21-23). Cani qué naʼ gusaana de guni cosa malu casi «enda rapa jnadxii», guiníʼ «diidxa huati» ne guni guiráʼ xixé cosa «ni nadxabaʼ», casi ni runi cani maʼ biaa guʼyaʼ película de idxa guidxa o cosa dxabaʼ, ni cabeza laacabe nga xiana stiʼ Dios (Efe. 5:3-6).

19. Xi dxiiñaʼ racané laanu gusihuínninu nápanu fe lu guendaguti stiʼ Jesús.

¹⁹ Para gusihuínninu rudiʼnu xquíxepeʼ pur guti Jesús pur laanu la? naquiiñeʼ gúninu ni na Dios (2 Ped. 3:11). Naquiiñeʼ cueenu stale tiempu para gúninu xhiiñaʼ Cristu casi guni orarnu, guidúʼndanu Biblia stúbinu, chuunu ca guendaridagulisaa ca, guni adorarnu Dios ne binnilídxinu ne gucheechenu stiidxaʼ Reinu. Ne cadi guiaandaʼ laanu naquiiñeʼ gácanu «nachaʼhui ne binni, ne udii [nu] tindaa de ni napa [nu] cani qué gapa, purti casi ñaca nusigaʼde [nu] ni Dios ne nga nga ni riulaʼdxiʼ» (Heb. 13:15, 16).

20. Xi ndaayaʼ zacaa cani gusihuinni napa fe lu guendaguti stiʼ Jesús dede dxi gueeda xiana stiʼ Jiobá.

²⁰ Ora guedané Jiobá xiana stiʼ luguiáʼ ca binni malu nuu lu guidxilayú riʼ, ¡nabé nayecheʼ ziuʼnu purtiʼ bisihuínninu nápanu fe lu guendaguti stiʼ Jesús! Lu guidxilayú cubi ni maʼ guníʼ Dios gudii laanu ca, qué zusaana de gudiʼnu xquíxepeʼ Jiobá pur ni biʼniʼ para guilanu de xiana stiʼ (biindaʼ Juan 3:16 ne Apocalipsis 7:9, 10, 13, 14).

Guicábinu ca

guendarinabadiidxaʼ riʼ

• Xiñee caquiiñenu gulá guendaguti stiʼ Jesús laanu.

• Pabiáʼ naná yuubaʼ biʼniʼ sentir Jiobá ora guti Xiiñiʼ.

• Ximodo racané guendaguti stiʼ Jesús binni.

• Ximodo rusihuínninu nápanu fe lu guendaguti stiʼ Jesús.

[Guendarinabadiidxaʼ stiʼ párrafo]

[Dibuju/foto ni zeeda lu yaza 13]

Zándaruʼ chuʼ binni tobi si ne Dios, casi ñaca zuxeleʼ ndaga ti puertaʼ para ganda chuʼ binni gaxha de laa

[Dibuju/foto ni zeeda lu yaza 15]

Ora guiníʼ íquenu ni biʼniʼ sentir Abrahán, Isaac ne Jacob riene chaahuinu pabiáʼ naná yuubaʼ biʼniʼ sentir Jiobá ora guti Xiiñiʼ