Xaíque stinu cadi cusaana de guni dxiiñaʼ dede yanna

«Biree zitixhe dxí cani ucaa lú laa.» (APO. 6:2)

1, 2. 1) Ximodo ruzeeteʼ Biblia de Rey Jesucristu ne de ca dxiiñaʼ cayúnibe dede lu iza 1914. 2) Xi guiráʼ maʼ biʼniʼ Cristu dede dxi guca Rey.

 LU IZA 1914, Jiobá biʼniʼ Jesús Rey para guni mandar. Ximodo riníʼ íquenu Rey ca yaʼ. Ñee nácabe ti Rey ni zuba lu trono stiʼ sin guni gastiʼ ne nuusi ora ruuyadxí lu Guidxilayú riʼ para guʼyaʼ ximodo nuu neza binni ridagulisaa stiʼ la? Pa zacá nga riníʼ íquenu la? galán guchaʼnu modo riníʼ íquenu purtiʼ cadi zacá diʼ laabe. Libru stiʼ Salmos ne libru stiʼ Apocalipsis ruzeetecani Jesús casi ti Rey ni dxiʼbaʼ deche maniʼ stiʼ ne «biree zitixhe dxí cani ucaa lú laa», zanírube para guni ganarbe (Apo. 6:2; Sal. 2:6-9; 45:1-4).

² Primé biaje biʼniʼ ganar Jesús despué de guca Rey nga dxi gudindenebe «dragón ne ca xpinni». Laabe bisihuínnibe nácabe Miguel, xaíque stiʼ ca ángel, ne biquiiñebe laacaʼ para guládxibe Binidxabaʼ ne ca demonio stiʼ de guibáʼ ne dede dxiqué maʼ lu Guidxilayú riʼ si nuucabe (Apo. 12:7-9). Despué beeda Jesús casi tobi «ni rizané diidxaʼ stiʼ pactu», bedaguuyanebe Bixhózebe ximodo nuu yuʼduʼ stiʼ (Mal. 3:1). Dxi beedacabe lu Guidxilayú riʼ, ra jma bihuinni cadi cayuni «Babilonia, [...] guidxi roʼ que» ni jneza nga ora bidxélacabe ca religión ni nacaʼ zinándacaʼ Cristu que nápacaʼ donda purtiʼ maʼ biiticaʼ stale binni ne purtiʼ nuucaʼ tobi si ne ca gobiernu stiʼ Guidxilayú riʼ (Apo. 18:2, 3, 24).

Bisiabe mozo stibe ni nuu lu Guidxilayú

3, 4. 1) Xi dxiiñaʼ biʼniʼ Jesús casi «ni rizané diidxaʼ» stiʼ Jiobá. 2) Xi bihuinni dxi beeda Jiobá ne Jesús ndaaniʼ yuʼduʼ que. 3) Tuu nga bidii Cristu, Xaíque stiʼ neza binni ridagulisaa, ti dxiiñaʼ para guni.

³ Dxi beeda Jiobá ne «ni rizané diidxaʼ stiʼ» lu patiu stiʼ yuʼduʼ stiʼ la? laaca bihuinni nuu ti  grupu de binni, ne laacabe nga cani dxandíʼ xpinni Cristu ni cadi nuucaʼ lade ca binni ni nacaʼ xpinni Cristu laacaʼ. Neca zacá, nin ca xpinni Cristu ni bibí pur espíritu santu —ni ruzeeteʼ diidxaʼ riguixhená ca casi «ca xiiñiʼ Leví»— caʼruʼ guiá chaahuicaʼ. Naquiiñeʼ guiácabe casi modo bizeeteʼ Malaquías ne ca diidxaʼ riʼ: «[Jiobá] napa xidé cuibe para gusiabe ca xiiñiʼ Leví casi rusiácabe plata; ne napa xidé gusiabe laacaʼ casi riá oro ne plata ne laacabe zeeda gácacabe para Jiobá binni ni cayuni ni jneza, zacá nga casi ñaca nudiicabe laabe ti ofrenda» (Mal. 3:3). Jiobá biquiiñeʼ Jesucristu, «ni rizané diidxaʼ stiʼ pactu», para bisiabe ca binni ni zeeda gaca Israel stiʼ Dios.

⁴ Cristu biiyaʼ biʼniʼ ca xpinni ni bibí pur espíritu santu que stipa pur gudiicaʼ ni caquiiñeʼ guiráʼ cani nuu ndaaniʼ neza binni ridagulisaa que. Laacabe biquiiñecabe revista riʼ, ni bizulú biree dede lu iza 1879 para bisiidicabe binni de Reinu stiʼ Dios neca huadxaagalúcabe stale guendanagana. Jesús peʼ guníʼ «ora gueeda» para guʼyaʼ ximodo nuu ca xpinni dxi «iluxe guidx[i]layú riʼ», zadxélabe ti mozo ni cudii ni caquiiñeʼ ca xpínnibe. Ne laaca guniʼbe «dichoso de mozo que pa cayuni zacá» ora gueedabe ne zusaananebe laa guiráʼ ni nápabe (Mat. 24:3, 45-47). Ne zaquepeʼ bizaaca ni. Cristu, Xaíque stiʼ neza binni ridagulisaa, maʼ bisaanabe lu naʼ «mozo ni nuu xpiaani ne ni runi jneza» guʼyaʼ guiráʼ ni nápabe lu Guidxilayú riʼ. Jesús riquiiñeʼ Grupu ni Zaniruʼ para gusiene ca «xpinni» ni bibí pur espíritu santu ne cani naca de «xcaadxi dendxu» xi naquiiñeʼ gúnicaʼ (Juan 10:16).

Bitopa ca semiá ni maʼ nuu para iruuguʼ

5. Xi dxiiñaʼ bihuinni cayuni Rey que lu ti visión ni biʼyaʼ Juan.

⁵ Lu ti visión biiyaʼ apóstol Juan stobi de ca dxiiñaʼ ni chiguni Rey ca lu dxi stiʼ Señor, ne bizuluni dxi gúcabe Rey lu iza 1914. Apóstol Juan bicaa ca diidxaʼ riʼ: «Oraque biya dxie ne biiya ti za quichiʼ, ne zuba tobi lu za que ruluíʼ Hombre Biseenda Dios. Nuu ti laʼpa de oro ique ne naaze ti gandxu naduxhuʼ», ne maʼ nuu listu para guindisaʼ cosecha (Apo. 1:10; 14:14). Ne laaca binadiágabe ca diidxaʼ ni guníʼ ti ángel ni biseendaʼ Jiobá ra nuu Rey que: «Uluu gandxu stiuʼ, bichiña cani ma nuu para idxiña, purti ma gunda dxi idopa caʼ casi semiá ora ma nuu para iruuguʼ» (Apo. 14:15, 16).

6. Casi bisiene Jesús que, ximodo zaroobaʼ trigu que ne yagahuiiniʼ que dede dxi guiasa cosecha.

⁶ Ca diidxaʼ, «semiá [ni] ma nuu para iruuguʼ», rusietenaláʼdxicani laanu ejemplu ni biquiiñeʼ Jesús de semiá ne baladxiʼ, o «trigu» ne ti yagahuiiniʼ ni qué rudii lugar igaa trigu. Luni cuchaaga Jesús laa casi ti hombre ni bisaba trigu lu layú stiʼ ne cabeza guindisaʼ cosecha galán. Trigu ni bizeetebe ca nga zeeda gaca «ca xiiñiʼ reinu», o ca xpinni Cristu ni bibí pur espíritu santu ni chiguni mandarné Cristu. Peru Jesús guníʼ beeda ti enemigu huaxhinni ne nga nga Binidxabaʼ ne bidxiibaʼ ti yagahuiiniʼ ni qué rudii lugar igaa trigu lu layú que, yagahuiiniʼ que nga zeeda gaca «ca xiiñiʼ Binidxabaʼ». Hombre ni bisaba trigu que gudxi ca mozo stiʼ gudiicaʼ lugar guiroobaʼ yagahuiiniʼ ni bidxiibaʼ enemigu que ra caroobaʼ  trigu que dede ora guindísacabe cosecha que, o dxi guiluxe guidxilayú riʼ. Óraca nga guseendabe ca ángel stibe para chindeecaʼ trigu que lade ca yagahuiiniʼ ni qué rudii lugar guiroobaʼ trigu que (Mat. 13:24-30, 36-41, NM).

7. Ximodo cutopa Cristu «semiá [ni] ma nuu para iruuguʼ» lu Guidxilayú riʼ.

⁷ Cahuinni cayaca ni biʼyaʼ Juan lu visión que, purtiʼ candisaʼ Cristu ti cosecha lu guidubi naca Guidxilayú riʼ: cadopa «semiá [ni] ma nuu para iruuguʼ». Primé ni chigúnibe ra cutópabe cosecha ca nga chigutagulisaabe xcaadxi xpinni Cristu ni riaana de 144,000, cani zeeda gaca «xiiñiʼ reinu» o «trigu» ni bizeeteʼ Jesús lu ejemplu que. Gudiʼdiʼ si primé guendaridinde ni guca lu guidubi naca Guidxilayú que jma maʼ bihuinni gunáʼ nga ca binni ni dxandíʼ xpinni Cristu ne gunáʼ nga cani riníʼsicaʼ nácacaʼ ni. Ne zacá huayaca ni, dede maʼ gunda bitagulisaabe sti biaje ca binni ni zeeda gaca casi «semiá [ni] ma nuu para iruuguʼ» ne nga nga ca binni ni zeeda gaca xcaadxi dendxuʼ. Ca binni ni bizéʼtenu últimu riʼ, cadi laadícabe nga «ca xiiñiʼ reinu», sínuque laacabe nga nácacabe «jma binni» ni chiguni mandar reinu ca. Ne zeedacabe de guiráʼ «ca guidxi ca, ca guidxi roʼ ne guiráʼ diidxaʼ», ne laacabe cayéchecabe chiguni mandar Reinu ca laacabe, ne lu reinu ca chiguni mandar Jesús ne 144,000 binni ni maʼ bibí ne espíritu santu dede guibáʼ (Apo. 7:9, 10; Dan. 7:13, 14, 18).

Culuiʼbe ca neza binni ridagulisaa ca xi gúnicaʼ

8, 9. 1) Ximodo nánnanu cadi ni runi si ca neza binni ridagulisaa ca nga cayuuyaʼ Jesús, sínuque cayuuyabe ni cayuni cada tobi de cani nuu ndaaniʼ cani. 2) Casi rihuinni lu foto ni zeeda lu yaza 26, gunáʼ nga caadxi cosa «ni na cabe enda nuu xpiaani sti binidxabaʼ» ni cadi naquiiñeʼ chinándanu.

⁸ Lu tema ni gudídinu ca guninu biiyaʼ Jesús ximodo nuu cada neza binni ridagulisaa lu primé siglu que. Yanna, ra maʼ «irá xixé ni nuu ibáʼ ne ni nuu guidxilayú ma nexhe ladxi [naʼ]» Xaíque stinu, jmapeʼ culuiʼbe ca neza binni ridagulisaa ni nuu lu guidubi naca Guidxilayú ne ca binnigola ni ruuyaʼ gaca dxiiñaʼ ndaaniʼ cani xi naquiiñeʼ gúnicaʼ (Mat. 28:18; Col. 1:18). Jiobá maʼ «biʼni laabe xaíque sti ca xpinni» ni bibí pur espíritu santu (Efe. 1:22). Nga runi, ruuyabe guiráʼ ni raca ndaaniʼ jma de ti gayuaa mil neza binni ridagulisaa stiʼ ca testigu stiʼ Jiobá.

⁹ Dxiqué gudxi Jesús ca binni ridagulisaa de Tiatira ca diidxaʼ riʼ: «Sicarí na Xiiñi Dios ni ruzaani guielú casi bele [...]: Nanna xi irá runi tu» (Apo. 2:18, 19). Biiyabe nuu de ca binni ridagulisaa que rúnicaʼ guiráʼ ni rápacaʼ gana ne riuunecaʼ ni cadi xheelacaʼ, ngue runi gúdxibe laacaʼ: «Nanna xi cá lu xquenda biaani binni ne xi nuu ndaani ladxidóʼ. Ne zaguixe cada tobi de laatu biaʼ ni biʼniʼ» (Apo. 2: 23). Ca diidxaʼ ca rusihuínnicani cadi ruuyaʼ si Jesús xpiaʼ ti neza binni ridagulisaa, sínuque ruuyabe ximodo nuu cada tobi de ca binni ni nuu ndaaniʼ ni. Peru Jesús laaca bisisaca caadxi xpinni Cristu de Tiatira purtiʼ «qué huaziidi[caʼ] ni na cabe enda nuu xpiaani sti binidxabaʼ» (Apo. 2: 24). Ca dxi stinu riʼ laaca riuuláʼdxibe ni runi guiráʼ ca xpínnibe, neca biaʼ tiica iza nápacaʼ purtiʼ qué rinándacaʼ «ni na cabe enda nuu xpiaani sti binidxabaʼ» ni riree lu Internet, lu ca videojuego ra cadíndecabe, ne laaca qué rinándacabe ni riníʼ ique ca binni ni riuulaʼdxiʼ guni ni gapa gana. ¡Nabé riecheʼ Jesús guʼyaʼ stale xpinni cayúnicaʼ stipa pur guzuubacaʼ stiidxabe lu guidubi naca xquendanabánicaʼ!

10. 1) Xi ejemplu riquiiñeʼ Biblia para gusiene Cristu nga cayabi ca binnigola ca xi naquiiñeʼ gúnicaʼ. 2) Xi nanna ca binnigola ca de grupu ni riquiiñeʼ Jesús para gabi ca xpinni xi naquiiñeʼ gúnicaʼ.

¹⁰ Jesús riquiiñeʼ ca binnigola para gabi ca neza binni ridagulisaa ca ne stale guendarannaxhii xi naquiiñeʼ gúnicaʼ (Efe. 4:8, 11, 12). Ca hombre ni biʼniʼ dxiiñaʼ ca lu primé siglu que ruzeeteʼ libru stiʼ Apocalipsis laacabe casi Beleguí ni naaze Cristu ladu derechu stiʼ (Apo. 1:16, 20). Dxiqué ca xpinni si Cristu ni bibí pur espíritu santu nga naaze Cristu ladu derechu stiʼ. Yanna riʼ neca stale de ca binnigola ca nácacaʼ de xcaadxi dendxuʼ peru laaca zanda guininu naaze Cristu laacabe ladu derechu stiʼ, o laa nga cayabi laacabe xi naquiiñeʼ gúnicabe, purtiʼ espíritu santu nga gucané para bibícabe ne gúcani despué de ti oración (Hech. 20:28). Peru guiráʼ ca binnigola nánnacaʼ riquiiñeʼ Jesús ti grupu  nahuiiniʼ de ca xpinni ni maʼ bibí pur espíritu santu, Grupu ni Zaniruʼ, para gabi ca xpinni xi naquiiñeʼ gúnicaʼ (biindaʼ Hechos 15:6, 28-30).

«Gudáʼ Señor Jesús»

11. Xiñee maʼ racaláʼdxinu gueeda Xaíque stinu nagueenda.

¹¹ Lu visión ni biʼyaʼ Juan que guníʼ Jesús stale biaje zabiguetaʼ nagueenda (Apo. 2:16; 3:11; 22:7, 20). Nga cusihuinni caniʼbe de dxi gueedabe para gunitilube Babilonia guidxi roʼ ne xcaadxi cosa ni napa Binidxabaʼ (2 Tes. 1:7, 8). Apóstol ca bisihuinni nabé racaláʼdxibe gúʼyabe gaca cani bíʼyabe lu visión que, ngue runi guniʼbe ca diidxaʼ riʼ: «Zacá gaca ni. Gudáʼ Señor Jesús». Laanu, cani nabáninu lu ca últimu dxi riʼ laaca racaláʼdxinu guidúʼyanu ximodo gusihuinni ni naca Xaíque ne Rey stinu napa Jiobá derechu de guni mandar ne gusisácabe lá.

12. Xi dxiiñaʼ zunduuxeʼ Cristu ante gundaa ca ángel bi ni chigunitilú guiráʼ cosa malu.

¹² Ante gueeda Jesús para gunitilú ca xpinni Binidxabaʼ ni nuu lu Guidxilayú riʼ naquiiñeʼ gaca sellar xcaadxi binni ni naca de Israel stiʼ Dios ni cayaadxaʼ. Biblia na zundaa ca ángel stiʼ Dios «bi» ni chigunitilú ca cosa malu ni nuu lu guidxilayú stiʼ Binidxabaʼ riʼ dede ora maʼ guca sellar 144,000 binni ni cheʼ guibáʼ (Apo. 7:1-4).

13. Ximodo zusihuinni Cristu maʼ nuu lade binni ora guizaaca primé cosa ni guzuluné ca dxi jma nagana.

¹³ Stale binni qué rulábicaʼ pa maʼ nuu Cristu lade binni dede lu iza 1914 (2 Ped. 3:3, 4). Peru maʼ cadi candaa zusihuinni Jesús maʼ nuu lade binni. Ximodo zusihuínnibe ni yaʼ. Ora gúnibe cani guníʼ Dios para guinitilú ca cosa malu nuu lu guidxilayú stiʼ Binidxabaʼ. Ti cosa ni gusihuinni maʼ beedabe nga ra guinitilú «ti hombre nuu né binidxabaʼ», hombre ca nga zeeda gaca xaíque stiʼ ca yuʼduʼ ni na zinanda Cristu (biindaʼ 2 Tesalonicenses 2:3, 8). Ra gúnibe nga zusihuínnibe nácabe ti Juez ni gulí Jiobá (biindaʼ 2 Timoteo 4:1). Ora maʼ guzulú guinitilú Babilonia Guidxi roʼ, primeru zanitilú guiráʼ ca religión ni nacaʼ zinándacaʼ Cristu, cani jma rusihuinni cadi jneza ni cayuni, ne despué maʼ zanitilú xcaadxi religión ni qué rusiidiʼ ni dxandíʼ, purtiʼ laaca nácacaʼ de Babilonia. Jiobá zucaa ca políticu ca gunitilucaʼ gunaa dxabaʼ ca (Apo. 17:15-18). Nga nga primé cosa ni chigaca ora guzulú ca dxi jma nagana ca (Mat. 24:21).

14. 1) Xiñee zucueeza Dios ca dxi jma nagana. 2) Xi zuni sentir xquidxi Jiobá ora gúʼyacaʼ «ibigueta Hombre Biseendaʼ Dios sti tiru».

¹⁴ Jesús guníʼ «zucueeza» Dios ca dxi jma nagana ca pur ca xpinni ni bibí pur espíritu santu, cani nuuruʼ lu Guidxilayú riʼ (Mat. 24:22). Ora gunitilú ca gobiernu ni nuu yanna riʼ religión ni qué rusiidiʼ ni dxandíʼ ca qué zudii Jiobá lugar gunitilúcabe xcaadxi xpinni Cristu ni bibí pur espíritu santu ni nuu lu Guidxilayú riʼ ne cani naca de xcaadxi dendxuʼ. Jesús laaca guníʼ tiidiʼ si «enda naná ni gaca ca dxi que» laaca «adxé zahuinni gubidxa ne beeu ne ca luceru», «oraque zahuinni seña ibáʼ ma chi ibigueta Hombre Biseenda Dios sti tiru». Ora guizaaca cani maʼ bizéʼtenu ca, zuunaʼ ca guidxi ca. Peru ca xpinni Cristu ni bibí pur espíritu santu ni chiguibani guibáʼ qué zazaacacaʼ zacá, nin ca binni ni chiguibani lu Guidxilayú riʼ. Lugar de gúʼnacabe la? zinándacabe conseju stiʼ Jesús: «Lauzuhuaa chaahuiʼ, laindisa ique purti ma cadxiña dxi ilá tu» (Mat. 24:29, 30; Luc. 21:25-28).

15. Xi dxiiñaʼ chiguni Cristu ora maʼ gueeda.

¹⁵ Peru ante quixhedxí Jesús, hombre biseendaʼ Dios cani cucaalú laa, zeedabe de sti modo. Zácani casi modo ruzeeteʼ ca diidxaʼ riguixhená riʼ: «Dxi ibigueta Hombre Biseenda  Dios la? zeeda casi rey, zedané irá ca ángel stiʼ, ne zabí para guni mandar. Ne zadxiña binni de irá guidxi ra nuu be. Zabee chu be caadxi lade xcaadxi, casi ribee chu pastor chiba lade dendxuʼ. Ne zuzuhuaa be ca dendxu ladu derechu stibe ne ca chiba ladu bigaʼ» (Mat. 25:31-33). Ca diidxaʼ ca rusihuínnicani zeeda Cristu casi ti Juez para cueechube ca «binni de irá guidxi» ne gúnibe laacaʼ chupa grupu. Zabeechube ca «dendxuʼ», ni cayacané ca biʼchiʼ Rey, ca xpinni Cristu ni bibí pur espíritu santu ni nabániruʼ lu Guidxilayú, ne ca chiva, «cani qué nicaa stiidxaʼ [Jesús]» (2 Tes. 1:7, 8). Ca binni ni zeeda gaca casi dendxuʼ, cani rábicabe laacaʼ «cani nachaʼhuiʼ», zacaacaʼ «enda nabani ni qué zaluxe» lu Guidxilayú riʼ, peru ca binni ni zeeda gaca casi chiva zuuti Dios laacaʼ ne maʼ qué ziuu dxi guibánicaʼ (Mat. 25:34, 40, 41, 45, 46).

Jesús zaguixhedxí cani cucaalú laa

16. Ximodo zaguixhedxí Xaíque stinu cani cucaalú laa.

¹⁶ Ora maʼ guca sellar guiráʼ xpinni Cristu ni chigaca Rey ne ni ruzaaquiʼ guʼxhuʼ ne ora maʼ nuu cani zeeda gaca de xcaadxi dendxuʼ ca ladu derechu stiʼ Jesús para gulabe laacaʼ la? Xaíque stinu zazaniruʼ para «[qui]xhe dxí cani ucaa lú laa» (Apo. 5:9, 10; 6:2). Laabe zazanírube nezalú ca ángel stibe —ne zaquiiñebe ca xpínnibe ni maʼ bibí pur espíritu santu ni maʼ biasa de lade gueʼtuʼ— para gunitilube ca políticu, ca soldadu ne ca negocio ni nu lu guidxilayú stiʼ Binidxabaʼ riʼ (Apo. 2:26, 27; 19:11-21). Casi maʼ guninu ca, zaguixhedxibe cani cucaalú laabe ora maʼ guinitilú guidxilayú malu riʼ. Despué de nga zuteguyoobe Binidxabaʼ ne ca demonio stiʼ ti lugar ni zeeda gaca casi ti bizéʼ roʼ ra chiguiaanacabe ti mil iza ne qué zanda guireecabe (Apo. 20:1-3).

17. Xi para chigacané Cristu cani zeeda gaca xcaadxi dendxuʼ ca lu ti mil iza, ne xi naquiiñeʼ quixhe íquenu.

¹⁷ Apóstol Juan guníʼ ca diidxaʼ riʼ de ca «jma binni» ni chiguilá lu ca dxi jma nagana: «Zapa Dendxu huiini ni zuhuaa nezalú trono que laacabe casi riaapa dendxuʼ. Ziné laacabe ra candani nisa rudii enda nabani» (Apo. 7:9, 17). Casi maʼ bidúʼyanu ca, dxi guni mandar Cristu lu ti mil iza zuluíʼrube cani zeeda gaca de xcaadxi dendxuʼ ca xi naquiiñeʼ gúnicaʼ ne zucaadiágacaʼ stiidxabe ne zacanebe laacaʼ ugaandacaʼ guendanabani ni qué zaluxe (biindaʼ Juan 10:16, 26-28). ¡Qué chuʼ dxi gusaananu de chinándanu Rey stinu, Xaíque ni culuíʼ laanu ximodo chuʼnu lu guidxilayú cubi ni chigudii Dios laanu!

Xi bizíʼdinu

• Xi guiráʼ maʼ biʼniʼ Cristu despué de guca Rey.

• Tu riquiiñeʼ Jesús para gabi ca neza binni ridagulisaa xi naquiiñeʼ gúnicaʼ.

• Ximodo zusihuinni Xaíque stinu maʼ nuu lade binni.

• Ximodo zábiruʼ Cristu laanu xi naquiiñeʼ gúninu lu ti mil iza.

[Guendarinabadiidxaʼ stiʼ párrafo]

[Dibuju/foto ni zeeda lu yaza 29]

Jesús zusihuinni maʼ nuu lade binni ora gunitilú guidxilayú malu stiʼ Binidxabaʼ riʼ