Lagacané ca xiiñitu gunibiáʼ chaahuicaʼ xquidxi Jiobá

CANI nahuiiniʼ ca riuuláʼdxicaʼ guiziidicaʼ. Laatu, cani napa xiiñiʼ, ñee huayuu ora guiníʼ íquetu xi zándaca gunabadiidxaʼ ca baʼduhuiiniʼ de Israel gueelaʼ gúpacaʼ primé Pascua ndaaniʼ guidxi Egipto que la? Zándaca ndiʼ nga caadxi de cani gunabadiidxacabe: «Xiñee biititu dendxuhuiiniʼ ca pue», «Xiñee cunéʼ bixhozeʼ rini ca ruaa puertaʼ ca pue», «Paraa chuunu pue». Ora guidúʼndanu cani bisiene Jiobá ca israelita ni napa xiiñiʼ que de ca Pascua ni chigúnicabe despué, ridúʼyanu qué ridxiichidibe ora chuʼ tu guinabadiidxaʼ zacá: «Ora gabi xiiñitu laatu: “Xii nga ni rúnitu ora runi adorartu zacá pue”, óraque naquiiñeʼ guiniʼtu: “Ruutidu ti maniʼ lu pascua para Jiobá purtiʼ laabe qué ñuube ralidxi ca xiiñiʼ Israel ndaaniʼ guidxi Egipto dxi biseendabe plaga luguiáʼ ca egipciu, peru bilabe lídxinu”» (Éxo. 12:24-27). Despué bisietenalaʼdxiʼ Jiobá cani napa xiiñiʼ pabiáʼ nga risaca guicábicabe ni guinabadiidxaʼ xiiñicabe laacabe de «ca ley ni caníʼ modo guibani binni» ne de «ca ley ni caníʼ modo gaca juzgar binni», cani  biʼniʼ mandarbe laacaʼ chinándacaʼ (Deu. 6:20-25).

Rihuinni dxíchica guyuulaʼdxiʼ Jiobá guicábicabe ca baʼduhuiiniʼ que ora guinabadiidxacaʼ laacabe ximodo gaca adorarbe, ne ni guicábicabe que gucaani laacaʼ gannaxhiicaʼ Jiobá, Dios sticaʼ, ni rulá laacaʼ. Zacaca racaláʼdxibe gúninu ne cani nahuiiniʼ nuu yanna riʼ. Ti modo zanda gusiiditu xiiñitu gannaxhii Dios ne xquidxi nga ra gacanetu laacabe gunibiáʼ chaahuicabe ni ne guiénecabe ximodo racaneni cada tobi de laanu. Guidúʼyanu caadxi modo zanda gusiidiʼ binni xiiñiʼ jma de xquidxi Dios.

Neza binni ridagulisaa

Caquiiñeʼ ganna chaahuiʼ ca baʼduhuiiniʼ ca ximodo nga neza binni ridagulisaa ra rié binnilídxicaʼ. Para nga bixhózecabe ne jñaacabe caquiiñeʼ chiné laacabe guiráʼ ca guendaridagulisaa ni gápacaʼ. Zacá zinándacabe cani gudixhe Jiobá guni ca israelita que: «Bicasaa guidxi ca, ca hombre ne ca gunaa ne cani nahuiiniʼ [...], ti gucaadiágacabe ne guiziidicabe, purtiʼ nápacabe xidé guiziidicabe guidxíbicabe Jiobá, Dios stitu, ne naquiiñeʼ gúnicabe guiráʼ ni na ley riʼ. Ne ca xiiñicabe, cani qué ganna, naquiiñeʼ gucaadiágacaʼ, ne naquiiñeʼ guiziidicaʼ guidxíbicaʼ Jiobá, Dios stitu» (Deu. 31:12, 13).

Cani nahuiiniʼ ca zanda guzulú guiziidicaʼ de Stiidxaʼ Jiobá dede naríʼnirucaʼ. Sicaríʼ gudxi apóstol Pablu Timoteu: «Dede dxi nahuiini lu biziidi lu ni cá lu Xquiʼchi Dios» (2 Tim. 3:15). Lu ca guendaridagulisaa ni rápanu ndaaniʼ Yoo stiʼ Reinu dede né cani nahuiiniʼ ca zanda guiénecaʼ cani gusiidicabe racá ne guzulú guiziidicaʼ ca diidxaʼ riuundaʼ ca. Lu ca guendaridagulisaa ca riziidicabe iquiiñecabe Biblia ne ca libru ne revista, ne laaca riziidicabe chúʼcabe  cuidadu cani. Laaca rudiicabe cuenta xii nga ni rusihuinni cani dxandíʼ xpinni Cristu: nadxiisaacaʼ de guidubi ladxidoʼcaʼ. Jesús guníʼ: «Chi tixhe caʼ xiixa nacubi guni tu, ganaxhii saa tu cásica huayanaxhiee laatu. Zacá laganaxhii saa. Pa ganaxhii saa tu zacá la? zanna binni xpinne laatu» (Juan 13:34, 35). Ora guʼyaʼ cani nahuiiniʼ ca pabiáʼ nadxiisaa ca binni ridagulisaa ne qué runinacaʼ laacaʼ la? ziuuláʼdxicabe chécabe ca guendaridagulisaa ca sin guiaadxacabe cani.

Pa laatu, cani napa xiiñiʼ, gápatu costumbre chindatu tempranu ra Yoo stiʼ Reinu ne guiaanatu ti ratu guiluxe si guendaridagulisaa la? zanda guyubi ca xiiñitu tuu nga cani gaca xhamígucaʼ. Ne para cadi guidxaagacabe puru si biaʼ laacabe la? xiñee qué guyúbitu modo gunibiáʼcabe xcaadxi xpinni Cristu ni maʼ huaniisi yaʼ. Cani nahuiiniʼ ca zanda guiziidicaʼ stale de cani huaniisi ca pa guidxaagacaʼ laacabe, purtiʼ laacabe maʼ huadíʼdicabe stale cosa ne nánnacabe stale. Cásica biʼniʼ Zacarías, ti hombre ni bibani dxiqué, laa «bisiidiʼ binni guidxibi Dios ni dxandíʼ», ne nabé galán modo gucanebe Uzías, ti hombrehuiiniʼ ni guca rey stiʼ Judá. Zacaca ca binni huaniisi ni maʼ xadxí de cayúnicaʼ ni na Jiobá ca dxi stinu riʼ, laaca zanda gacanécabe cani nahuiiniʼ ca (2 Cró. 26:1, 4, 5). Ne laga nuunetu laacabe ndaaniʼ Yoo stiʼ Reinu, galán gusiénetu laacabe ximodo zanda iquiiñecabe biblioteca nuu ndaaniʼ ni, xi guiráʼ zeeda lu ca guiʼchiʼ ni ricá lu tableru ne xcaadxi cosa ni nuu ndaaniʼ Yoo stiʼ Reinu.

Xquidxi Jiobá ni nuu lu guidubi naca Guidxilayú

Cani nahuiiniʼ ca naquiiñeʼ gánnacaʼ neza binni ridagulisaa ra riecaʼ nuuni lade jma de ti gayuaa mil neza binni ridagulisaa ni nuu lu guidubi naca Guidxilayú, ni zeeda gaca xquidxi Dios. Lagusiene laacabe ximodo nga xquidxi Dios, ximodo rúnini dxiiñaʼ ne ximodo zanda gacanécabe lu dxiiñaʼ ni rúnini. Lagacané laacabe gánnacabe xiñee riéchetu ora maʼ chiganda dxi gaca guendaridagulisaa ni raca ti dxi, ni raca chupa gubidxa ne de chonna gubidxa (laguuyaʼ cuadru  «Ca tema ni zanda gúʼndatu dxi naguíxhetu guni adorartu Dios né binnilídxitu», yaza 28).

Ora ganda la? laguni ti guendaró para guni invitartu ralídxitu cani jma riquiiñeʼ tiempu stiʼ para guni xhiiñaʼ Jiobá, casi ca binnigola ni riganna ca neza binni ridagulisaa, ca misioneru, ca betelita ne xcaadxi ni runi xhiiñaʼ Jiobá zacá. Cadi guiníʼ íquetu qué gapa ca xpinni Cristu riʼ tiempu para ca xiiñitu. Laacabe rúnicabe stipa pur chinándacabe ejemplu stiʼ Jesús, purtiʼ laa nabé guyuulaʼdxiʼ guidxaagalú cani nahuiiniʼ ne guiniʼné laacabe (Mar. 10:13-16). Ora gunadiaga ca xiiñitu guiráʼ ni huadiʼdiʼ ca xpinni Jiobá ne gúʼyacabe pabiáʼ nayecheʼ nuucaʼ pur cayúnicaʼ xhiiñaʼ Jiobá, zándaca laaca quixhe íquecabe gácacabe casi tobi de laacaʼ.

Xiruʼ zanda gúnitu para gacanetu ca xiiñitu gunibiáʼ chaahuicaʼ xquidxi Jiobá yaʼ. Tobi de cani zanda gúnitu nga gúʼndanetu binnilídxitu libru Los testigos de Jehová, proclamadores del Reino de Dios, para guluiʼtu laacabe modo biʼniʼ adorar ca xpinni Cristu Jiobá, ne qué ñuni crecaʼ laca laacaʼ ne qué nusaanacaʼ de ñúnicaʼ ni nabe ne ximodo biquiiñeʼ Jiobá laacabe para gucheechecabe ca diidxaʼ nacubi ne galán ca lu guidubi Guidxilayú. Laaca zanda iquiiñetu ca videu ni ribee xquidxi Jiobá para guluiʼtu laacabe xi zanda guiziidicabe de ca binni ni bibani dxiqué ne ni nabani yanna. Ne pa ganda la? lachiné laacabe ra Yoo Betel ni nuu ndaaniʼ xquídxitu o ni nuu ndaaniʼ sti guidxi. Ora chigánnatu ca lugar ca, zuuyaʼ ca xiiñitu ximodo cusiidiʼ ne cudii xquidxi Jiobá ni nuu lu Guidxilayú riʼ guiráʼ ni iquiiñeʼ ca xpinni Dios ne nga nga ni riquiiñeʼ mozo ni nuu xpiaaniʼ ca para guni dxiiñaʼ, cásica gúcani lu primé siglu que (Mat. 24:45-47; Hech. 15:22-31).

Lagusiidiʼ xiiñitu biaʼ guiénecaʼ

Ora gusiiditu ca xiiñitu laguietenalaʼdxiʼ modo bisiidiʼ Jesús ca apóstol stiʼ. Ti dxi gúdxibe laacaʼ: «Napa ruaʼ stale ni ñabe laatu, peru  nagasi qué zanda guni huantar tu ni» (Juan 16:12). Jesús qué nusiidiʼ laacabe tobi si tiru guiráʼ ni naquiiñeʼ gánnacabe de Dios para cadi nireecabe gana, sínuque chaahuiʼ chaahuiʼ bisiidiʼ laacabe ti ganda guiene chaahuicabe cani. Nga runi, laatu laaca laguni stipa para cadi guiree xiiñitu gana ora gusiiditu laacaʼ. Lagacané laacabe gunibiáʼ chaahuicabe xquidxi Jiobá ne laiquiiñeʼ chupa chonna si diidxaʼ para gusiénetu ni laacabe ne cadi gusaana de gúnitu ni. Zacá qué zareecabe gana ne ziéchecabe guiziidicabe de xquidxi Jiobá. Ora maʼ ziniisi xiiñitu jma la? laguundané laacabe sti biaje cani maca nánnacabe ne lagusiidiʼ laacabe xcaadxi cosa ni qué gánnacabe de laacani.

Ora ridagulisaanu, racané nga laanu chuʼnu jma gaxha de Jiobá. Nga runi, cani nahuiiniʼ ni runi xhiiñaʼ Jiobá ne stale gana jma zanda gudxiilucaʼ ni gucaa binni guidxilayú laacaʼ gúnicaʼ (Rom. 12:2). Nanna dxíchidu pa gacanetu xiiñitu gunibiáʼ chaahuicaʼ xquidxi Jiobá ziuucaʼ nayecheʼ. Ni racaláʼdxidu nga uguu Jiobá ndaayaʼ stipa cayúnitu para cadi gusaana de guni ca xiiñitu ni nabe ne ni na xquídxibe.

[Cuadro ne dibuju/foto ni zeeda lu yaza 28]

 Ca tema ni zanda gúʼndatu dxi naguíxhetu guni adorartu Dios né binnilídxitu

Raríʼ zeeda caadxi tema ra caníʼ de xquidxi Jiobá ni zanda gacané laatu.

▪ Historia stiʼ ca binni ridagulisaanetu. Laguiníʼ padxí ne ximodo bizulú neza binni ridagulisaa ca, ne laguiníʼ gunáʼ nga ca Yoo stiʼ Reinu ni huaquiiñetu para guidagulisaatu. Dede zanda guni invitartu tuuxa ni maʼ xadxí de nuu lade ca binni ridagulisaa para guicabi cani guinabadiidxaʼ ca xiiñitu.

▪ Lagusiene laacabe xi para ridagulisaanu ne rápanu ca guendaridagulisaa roʼ ca, ne xi zabeendúcabe lúcani.

▪ Laguiníʼ xi para ca scuela ni nuu ndaaniʼ xquidxi Jiobá. Laguiníʼ xi huabeendú ca xpinni Cristu ni huayé ca scuela ca.

▪ Lagacané cani nahuiiniʼ ca gúʼyacaʼ pabiáʼ risaca gácacaʼ tobi de cani rucheecheʼ diidxaʼ ne cadi gusaanacaʼ de gúnicaʼ ni. Lagusiidiʼ xiiñitu ximodo zahuinni dxiiñaʼ ni gúnicaʼ, neca huaxiéʼ ni, ra reeda pabiáʼ dxiiñaʼ raca lu guidubi naca Guidxilayú ni riree lu Anuario de los testigos de Jehová.

▪ Laguluíʼ xiiñitu modo zanda guni cani nahuiiniʼ ni nuu ndaaniʼ xquidxi Jiobá jma lu xhiiñabe. Lu ni rizaané Xhiiñaʼ Reinu ni Rúninu, marzo 2007, cusiene jma de laacani.

▪ Lagacané ca xiiñitu guiénecaʼ xiñee runi ca xpinni Cristu caadxi cosa ni maca nexheʼ gaca ndaaniʼ ti neza binni ridagulisaa. Lagusiene xiñee cadi jneza gusaanacabe de chinándacabe ni na xquidxi Jiobá dede lu ca cosa ni jma nahuiiniʼ. Laguluíʼ laacabe ora chinándacabe ca conseju stiʼ ca binnigola ca zacaneni ca binni ridagulisaa guzuubacaʼ diidxaʼ.

[Dibuju/foto ni zeeda lu yaza 28]

Pa gaca xhamigu ca xiiñitu ca xpinni Cristu ni maʼ xadxí nuu ndaaniʼ xquidxi Dios zacaneni laacaʼ

[Ca dibuju/foto ni zeeda lu yaza 26]

Cásica biʼniʼ guidxi Israel dxiqué, cani napa xiiñiʼ rúnicaʼ stipa pur guicábicaʼ jneza ni guinabadiidxaʼ xiiñicaʼ laacaʼ de xquidxi Jiobá