Ximodo ruuyaʼ Jiobá ca razón o ca pretextu ni riguixhe binni

«GUNAA ni bidiiluʼ chuʼné naa que nga bidii naa cuananaxhi stiʼ yaga [ca], ne pur nga gudahuaʼ ni», zacá guníʼ hombre que. Binadiaga si gunaa que ni guníʼ xheelaʼ, óraque bicabi: «Beendaʼ ca... laame bisiguiime naa, nga runi gudahuaʼ ni». Ne ca diidxaʼ ni gudxi Adán ne Eva Dios que bizulú binni guidxilayú gudixhe pretextu (Gén. 3:12, 13).

Castigu ni gudixhe Jiobá para Adán ne Eva pur qué ninacaʼ nuzuubacaʼ stiidxabe cusihuínnini qué ñuuláʼdxidibe ca razón ni bidiicaʼ laabe que (Gén. 3:16-19). Ñee zaníʼ íquenu cada quíxhenu ti pretextu nezalú Jiobá zaníʼ íquebe cudiʼnu xiixa razón laabe la? Ñee jneza nga zuuyabe caadxi razón ni gudiʼnu laabe la? Ante guicábinu cani gunabadiidxanu ca, caquiiñeʼ guidúʼyanu xiñee nuu binni riguixhe pretextu.

Nuu binni riguixhe pretextu ora guni xiixa cosa malu o qué ñanda ñuni xiixa ni bidiicabe laa guni o qué racalaʼdxiʼ guni xiixa. Zanda iquiiñenu ti razón para gusiénenu xiñee qué ñúninu xiixa ne zanda gusihuínnini canábanu gutiidiláʼdxicabe stóndanu pur xiixa ni bíninu. Peru casi bidúʼyanu ni bizaaca Adán ne Eva que, nuu tiru riquiiñeʼ binni ni para cadi gudii xcaadxi cuenta xiñee bíʼnicabe xiixa. Ne nuu tu laa riguixhe pretextu para cadi gacaná pur ca cosa ni qué ñuni jneza.

Peru qué racaláʼdxinu quíxhenu pretextu para cadi gúninu xhiiñaʼ Dios. Naquiiñeʼ gápanu laanu para cadi «quíte[n]u laca laa[n]u» (Sant. 1:22). Nga runi, guidúʼyanu caadxi conseju ne ejemplu ni zeeda lu Biblia ni zacané laanu guyúbinu «ganna [n]u xii nga riulaʼdxi Señor» (Efe. 5:10).

Xi ribeza Jiobá gúninu

Lu Stiidxaʼ Dios zeeda ca mandamientu ni naquiiñeʼ guni ca xpínnibe. Casi mandatu bidii Jesús lu primé siglu que: «Lachiusiidi irá xixé binni sa nanda naa», dede yanna naquiiñeʼ guni guiráʼ ca xpínnibe ni (Mat. 28:19, 20). Nabé risaca gúninu ni, purtiʼ dede apóstol Pablu guníʼ: «Pa qué güe ni la? nanna xi gueda iree xaʼ yaʼ» (1 Cor. 9:16).

Peru nuu binni, neca maʼ xadxí cayúʼndanenu laacaʼ Biblia, qué rinacaʼ chigucheechecaʼ ca diidxaʼ nacubi ne galán stiʼ Reinu (Mat. 24:14). Xcaadxi bíʼnicaʼ dxiiñaʼ riʼ, peru maʼ bisaana de gúnicaʼ ni. Xi razón rudiicabe para cadi gúnicabe ni yaʼ. Guidúʼyanu xi biʼniʼ Jiobá dxi guníʼ ique caadxi xpínnibe qué zanda gúnicaʼ cani biʼniʼ mandarbe laacaʼ.

Ca pretextu ni qué riuulaʼdxiʼ Dios quixhe binni

«Nabé nagana ni.» Zándaca guʼyaʼ binni nagana nga chigucheeche diidxaʼ, jmaruʼ si para cani natuí lú. Peru ejemplu stiʼ Jonás rusiidiʼ laanu stale cosa. Jiobá gudxi laabe guiniʼbe maʼ cadi candaa zanitilú guidxi Nínive, ngue runi nabé bidxíbibe pur dxiiñaʼ ni chigúnibe que. Xiñee bidxíbibe yaʼ. Purtiʼ nabé binibiáʼ binni Nínive, capital stiʼ Asiria, casi ti guidxi ra nuu stale binni malu ne pur  ca guendaquéiquiiñeʼ ni rúnicaʼ. Nánnanu gunabadiidxaʼ Jonás laca laa: «Xi zazaacaʼ pa chaaʼ ra nuucabe yaʼ. Ñee zuninácabe naa la?». Ngue runi, lugar de ñebe Nínive para nigúnibe dxiiñaʼ bidii Dios laabe que, laga guyebe sti ladu. Peru Jiobá qué ñuulaʼdxiʼ diʼ pretextu ni gudixhe Jonás, ngue runi bibiguetaʼ gudxi laabe chitixhenabe ca binni de Nínive. Oraqueruʼ guca Jonás nadxibalú para yeguni dxiiñaʼ bidii Dios laa, ne guluube ndaayaʼ laa (Jon. 1:1-3; 3:3, 4, 10).

Pa riníʼ íqueluʼ nabé nagana para lii gucheecheluʼ diidxaʼ la? bietenalaʼdxiʼ «gasti ni nagana para Dios» (Mar. 10:27). Nga runi cadi gusaanaluʼ de guinábaluʼ gacané Dios lii. Gunna dxichi pa qué gusaanaluʼ de guinábaluʼ laabe gacanebe lii la? zudiibe lii stipa ni caquiiñeluʼ. Ne pa gácaluʼ nadxibalú, zaguube ndaayaʼ lii (Luc. 11:9-13).

«Qué gapa gana guneʼ ni.» Xi zanda gúniluʼ pa maʼ qué ruquiinde lii chigucheecheluʼ diidxaʼ yaʼ. Bietenalaʼdxiʼ, zanda guniibi Jiobá ladxidoʼno para gúninu ni na. Sicaríʼ bicaa Pablu: «Cadi stubi tu nuu tu, sínuque nuu Dios cayacané laatu uluiʼlaʼdxi tu guni tu ni na, ne zaqueca ti ganda guni tu ni» (Fili. 2:13). Nga runi, guinábanu Jiobá gacané laanu guiale de ladxidoʼno gúninu ni na. Laaca zacaca nga ni gunabaʼ rey David Dios ora guníʼ: «Biluíʼ naa ca neza stiluʼ» (Sal. 25:4, 5). Nga runi, guinábanu Jiobá de guidubi ladxidoʼno gacané laanu gúninu ni na.

Dxandíʼ, ziuu biaje zuni sentirnu guizáʼ maʼ bidxáganu o qué gápanu gana chuunu ca guendaridagulisaa ca o chigucheechenu diidxaʼ, ne pur nga gucaʼnu laanu chuunu cani. Ñee rusihuinni nga maʼ cadi nadxiinu Jiobá la? Coʼ. Ca xpinni Dios ni bibani dxiqué laaca gupa xidé bíʼnicaʼ stipa para gúnicaʼ ni na Dios. Nápanu ejemplu stiʼ Pablu, laabe guniʼbe: «Rucueeza laca naa purti rune mandar naa», ngue runi gunda bíʼnibe ni na Jiobá (1 Cor. 9:26, 27). Neca ziuu biaje zucaʼnu laanu chigucheechenu diidxaʼ, naquiiñeʼ gánnanu zaguu Jiobá ndaayaʼ laanu, purtiʼ nánnabe cayúninu ni pur nadxiinu laabe. Laaca zusihuínninu rusiguii Binidxabaʼ, purtiʼ laa na zusaananu de gúninu ni na Jiobá ora guidxaagalunu xiixa guendanagana (Job 2:4).

«Qué gápadiaʼ tiempu.» Pa nuu tuuxa riníʼ ique nabé nuu xhiiñaʼ para chigucheeche diidxaʼ la? caquiiñeʼ guʼyaʼ chaahuiʼ xii nga ni jma risaca guni primé. Jesús bidii ti conseju ni zacané laanu gúninu ni: «Cadi gusaanatu de guyúbitu primeru reinu stiʼ Dios» (Mat. 6:33, NM). Para ganda gúninu ni na conseju ca, zándaca caquiiñeʼ quixhe chaahuinu modo nabáninu para gápanu ni iquiiñesinu o maʼ cadi guicá íquenu gúninu ca cosa ni rucaa laanu chuʼnu nayecheʼ, ti gápanu jma tiempu para gucheechenu diidxaʼ. Zanda chuʼnu nayecheʼ ne gúninu xcaadxi cosa ni riuuláʼdxinu, peru qué zanda diʼ iquiiñenu cani casi ti razón para guininu qué zúninu xhiiñaʼ Dios. Ni naquiiñeʼ quixhe ique ti xpinni Cristu guni primé lu xquendanabani nga xhiiñaʼ Dios.

 «Qué zanda diʼ guneʼ ni.» Zándaca guni sentirluʼ qué gánnaluʼ gusiidiluʼ para chigucheecheluʼ diidxaʼ. Peru cadi naquiiñeʼ guireeluʼ gana, purtiʼ caadxi de ca xpinni Dios ni guyuu dxiqué laaca biʼniʼ sentircaʼ qué zanda gúnicaʼ ca dxiiñaʼ ni gucuaacaʼ. Guidúʼyanu ejemplu stiʼ Moisés. Dxi bidii Jiobá laabe ti dxiiñaʼ gúnibe, laabe bicábibe: «Bitiidilaʼdxiʼ naa Jiobá, peru cadi ti binni ni riníʼ nagueenda naa, nin neegueʼ nin dede ante nin dede dxi guníʼneluʼ siervu stiluʼ, purtiʼ nanene riniéʼ ne nanaa ludxeʼ». Neca guníʼ Jiobá zacané Moisés, laa gunábaruʼ laabe guseendabe sti binni: «Bitiidilaʼdxiʼ naa Jiobá, peru rinabaʼ lii guseendaluʼ [stiidxaluʼ] né binni ni chiguseendaluʼ ca» (Éxo. 4:10-13). Xi biʼniʼ Dios óraque yaʼ.

Qué ñaxha diʼ Dios dxiiñaʼ bidii Moisés que, sínuque gulibe Aarón para gacané laa (Éxo. 4:14-17). Ne despué de nga, guiráʼ ca iza bibánibe qué nusaana de ñacané Jiobá laabe ne bidii laabe guiráʼ ni biquiiñebe para gunda bíʼnibe xhiiñabe. Ca dxi stinu riʼ, Jiobá zanda iquiiñeʼ ca xpinni Cristu ni maʼ xadxí de cucheeche diidxaʼ para gacané laanu gúninu ni. Ne Stiidxabe cuzeeteʼ zusiidibe laanu para ganda gúninu dxiiñaʼ bisaananebe laanu (2 Cor. 3:5; biiyaʼ cuadru ni na «Ca iza ni jma nayecheʼ bibaneʼ»).

«Naná nuaaʼ pur ni bíʼnicabe naa.» Nuu tu laa rusaana de gucheeche diidxaʼ o de cheʼ ca guendaridagulisaa ca purtiʼ naná nuu pur ni biʼniʼ ti xpinni Cristu laa. Neca dxandíʼ naná nuube, ñee jneza ruuyaʼ Jiobá pretextu ca para maʼ cadi gúnibe xhiiñaʼ la? Guidúʼyanu ni bizaaca Pablu ne Bernabé. Laacabe gúpacabe ti guendanagana ne «nabé ucuaa yu  cabe ni peru qué ñanda ñuu cabe tobi si», ne nanna dxíchinu gucanácabe despué de bizaaca ngue (Hech. 15:39). Peru ñee bisaana de gucheechecabe diidxaʼ la? Coʼ.

Ora ti xpinni Cristu guni laanu xiixa, naquiiñeʼ gánnanu laaca binni ruchee laabe, ne cadi naquiiñeʼ gúʼyanu laabe casi xhenemígunu. Binidxabaʼ nga xhenemígunu, purtiʼ laa racalaʼdxiʼ guxuuxe laanu. Cadi gudiʼnu lugar gúnibe nga, sínuque gucáʼlunu laabe ne guzuhuaa dxiichinu lu ni runi crenu (1 Ped. 5:8, 9; Gál. 5:15). Pa naguidxi nuu fe stinu, zanda gudxíʼlunu cani gúnicabe laanu (Rom. 9:33).

Ora gucueeza xiixa laanu de gucheechenu diidxaʼ

Casi maʼ bidúʼyanu ca, gastiʼ nin ti razón para gusaana de gúninu ni na ca mandamientu stiʼ Dios, casi gucheechenu diidxaʼ. Peru nuu tiru zándaca chuʼ xiixa razón ni gucaa laanu maʼ cadi gucheechenu diidxaʼ jma. Zándaca nápanu xidé gúninu xcaadxi cosa ni canabaʼ Dios laanu lu Biblia ne pur nga maʼ qué gápanu tiempu. O zándaca nabé maʼ bidxáganu o nabé huaranu ne pur nga maʼ qué zanda gucheechenu diidxaʼ biaʼ racaláʼdxinu. Pa cadídinu lu cani maʼ bizéʼtenu ca, riuʼnu nayecheʼ ora gánnanu cuzeeteʼ Biblia ruuyaʼ Jiobá stipa ni rúninu para gúninu ni na ne ruuyabe xiñee qué zanda gúninu jma (Sal. 103:14; 2 Cor. 8:12).

Nga runi, cadi naquiiñeʼ guni juzgarnu laca laanu ne cadi guni juzgarnu xcaadxi. Cadi guiaandaʼ laanu ca diidxaʼ guníʼ Pablu riʼ: «Tu naca lu para udxiiba lu donda ique xpinni stobi. Xpixuaana be nga iníʼ pa cayuni be jneza o pa cuchee be» (Rom. 14:4). Lugar de guchaaganu ni rúninu ne ni runi sti xpinni Cristu, naquiiñeʼ gánnanu «cada tobi nu zabidxi Dios cuenta laanu» (Rom. 14:12; Gál. 6:4, 5). Laaca cadi naquiiñeʼ guiaandaʼ laanu, ora guni orarnu Jiobá ne gusiénenu laabe xiñee qué zanda gúninu xiixa, naquiiñeʼ gápanu ladxidoʼno nayá, o cadi chuʼ xiixa ni guchiiñaʼ xquendabiaaninu (Heb. 13:18).

Nayecheʼ riuʼnu ora rúninu ni na Jiobá

Neca gadxé gadxé nga ni cazaacanu, guiranu zanda chuʼnu nayecheʼ ora gúninu ni na Dios, purtiʼ laabe riénebe ni cadídinu ne qué rinábabe laanu xiixa ni qué zanda gúninu. Ximodo nánnanu ni yaʼ.

Stiidxaʼ Dios cayabi laanu: «Cadi gusaana de gacaneluʼ tuuxa ni caquiiñeʼ ni, pa nuu lu naluʼ gúniluʼ ni» (Pro. 3:27). Ñee biiyaluʼ ca diidxaʼ ni na «pa nuu lu naluʼ gúniluʼ ni» la? Xi rusiidiʼ ca diidxaʼ ca laanu de ni ribeza Jiobá gúninu. Laabe ribézabe gúninu biaʼ nuu lu nanu; qué rinábabe laanu gúninu biaʼ cayuni xcaadxi. Guiráʼ xpinni Cristu, pa nuu lu naʼ guni stale o guni huaxiéʼ, zanda guni ni na Jiobá de guidubi ladxidóʼ (Luc. 10:27; Col. 3:23).

[Cuadro ne dibuju/foto ni zeeda lu yaza 14]

«Ca iza ni jma nayecheʼ bibaneʼ»

Pa nápanu ti guendahuará ni cucueeza laanu gúninu xiixa o nabé naná nuu ladxidoʼno la? cadi guiníʼ íquenu nagueendaca qué zanda gucheechenu diidxaʼ jma. Zacá rihuínnini lu ejemplu stiʼ Ernest, ti hombre Testigu de Canadá.

Guca nagana para Ernest guiníʼ galán ne nabé natuí. Despué de gucaná déchebe, bisaanabe de gúnibe xhiiñabe de albañil. Peru biiyabe pur ni bizaacabe que zápabe jma tiempu para gucheechebe diidxaʼ. Guiráʼ ca conseju ni binadiágabe para gaca binni precursor auxiliar ni bieeteʼ lu guendaridagulisaa, yendácani ladxidoʼbe, peru guníʼ íquebe qué zanda gácabe precursor.

Para gusihuínnibe dxandíʼ modo riníʼ íquebe ne qué zanda gácabe precursor auxiliar la? bichabe ti guiʼchiʼ para gácabe ni ti beeu. Nabé bidxagayaabe ora biiyabe gunda bisaabe tiempu stibe. Óraque guníʼ íquebe: «Nannaʼ qué zanda guneʼ ni sti biaje». Ne para gusihuínnibe nápabe razón la? bichabe sti guiʼchiʼ para gácabe precursor sti beeu. Laaca gunda bisaabe ca hora stibe sti biaje.

Ti iza guca Ernest precursor auxiliar. Peru guníʼ íquebe: «Nannaʼ dxicheʼ qué liica ziuu dxi gacaʼ precursor regular». Sti biaje ca gucaláʼdxibe nusihuínnibe dxandíʼ qué zanda gúnibe ni. ¡Nabé bidxagayaabe ora bisaabe primé iza stibe casi precursor regular! Laabe gudixhe íquebe gácarube precursor ne gunda bíʼnibe ni ne stale guendanayecheʼ xhupa iza dede dxi gútibe pur guendahuará stibe. Peru ante gátibe, dede maʼ daʼ nisa lube rábibe cani chiganna laabe: «Ca iza ni jma nayecheʼ bibaneʼ nga dxi bineʼ xhiiñaʼ Jiobá casi precursor».

[Dibuju/foto ni zeeda lu yaza 13]

Zanda gudxíʼlunu ca guendanagana ni cucueeza laanu de gucheechenu diidxaʼ

[Dibuju/foto ni zeeda lu yaza 15]

Nabé riecheʼ Jiobá ora rúninu ni na de guidubi ladxidoʼno, ora gúninu biaʼ gándatiʼ neca huaranu