Jiobá rucaadiaga cani nabé cayuubaʼ ladxidóʼ

SALOMÓN, ti rey ni nabé nuu xpiaaniʼ guníʼ: «Tiempu ne ni málasi rizaaca rugaandani guiranu» (Ecl. 9:11). Zándaca guidxaagalunu xiixa desgracia o ti guendanagana nabé naroʼbaʼ ni guchaa xquendanabáninu. Casi ora málasi gati tuuxa binnilídxinu ni nadxiinu, nabé riuubaʼ ladxidoʼno. Nuu tu laa qué randa rudxiilú yuubaʼ ca ne ridiʼdiʼ semana o beeu maʼ nuucaʼ zacá ne riníʼ íquecaʼ qué zanda gudxiilucaʼ ni. Nuu tiru qué ridxélacaʼ xi gúnicaʼ dede runi sentircaʼ qué zanda guiníʼnecaʼ Jiobá.

Ora guni sentirnu zacá, ni caquiiñenu nga uguucabe gana laanu, gacanécabe ne gannaxhiicabe laanu. Salmista David biindaʼ ca diidxaʼ ni riguixhedxí ladxidoʼno riʼ: «Jiobá cayacané cani cayaba, ne candísabe guiráʼ cani nuu triste» (Sal. 145:14). Sti hombre ni bicaa Biblia na cayuuyaʼ Bixhózenu ni nuu guibáʼ «guiráʼ ni cayaca lu guidxilayú para guluiʼbe stipa stibe luguiáʼ cani runi cré laabe de guidubi ladxidóʼ» (2 Cró. 16:9). Ne Dios peʼ na nuuné «cani naná nuu ladxidóʼ ne cani qué rudxiibaʼ laca laa», ne cudii stiidxabe zacanebe «ca binni pobre ti chuʼcaʼ galán sti biaje [...] ne zaqueca cani cayacaná ladxidóʼ» (Isa. 57:15). Peru ximodo racanebe cani cayuubaʼ ladxidóʼ yaʼ.

Gábinu binni xiixa órapeʼ caquiiñeʼ ni

Tobi de ca cosa ni riquiiñeʼ Jiobá para gacané ca xpinni nga ca binni ridagulisaa. Ne Biblia cayabi laanu gacanenu cani nabé cayuubaʼ ladxidóʼ (1 Tes. 5:14). Zanda quixhedxí ca xpinni Cristu ladxidóʼ cani cayacaná ne cani nuu xizaa pur xiixa ora gusihuínnicaʼ rizaaláʼdxicaʼ ne nadxiicaʼ laacabe. Né chupa chonna si diidxaʼ zanda cuʼ binni gana laacabe, jmaruʼ si ora ti xhamígucabe ni nuu xpiaaniʼ o ni maʼ huadiʼdiʼ ra cadíʼdicabe ca gabi cani laacabe. Nánnanu zacá nga riguu Jiobá gana cani nuu triste.

Guidúʼyanu ni bizaaca ti binnigola ni láʼ Alex. Cadi tan xadxí de bichaganabe, málasi guti xheelabe pur ti guendahuará ni qué rianda. Ti binnigola ni riganna ca neza binni ridagulisaa ni maʼ guti xheelaʼ guyé ra nuube para quixhedxí ladxidoʼbe, peru binnigola riʼ maʼ bichaganáʼ sti biaje. Caadxi de ca cosa ni gúdxibe laa nga guyuu biaje biʼniʼ sentirbe intiica si runiná laabe ne nabé bisidxaga ngue laabe. Ora maʼ canazanebe ca xpinni Cristu canagucheechebe diidxaʼ o nuube ra cayaca ca guendaridagulisaa ca, runi sentirbe ratadxí ladxidoʼbe, peru casi chindabe ralídxibe ne guseegube xpuértabe, runi sentirbe nuube stúbibe. Sicaríʼ guníʼ Alex: «¡Nabé gutadxí ladxiduáʼ ora gunnaʼ  laaca huayuni sentir xcaadxi zaqueca ne cadi deruʼ naa ngue guneʼ sentir zaqué!». Nga runi, ora gábinu tuuxa binni ni cayuubaʼ ladxidóʼ xiixa órapeʼ caquiiñeʼ ni la? zacaneni laa ne zaguixhedxini ladxidóʼ (Pro. 15:23).

Guzéʼtenu de sti binnigola, laabe runibiaʼbe caadxi xpinni Cristu ni maʼ guti xheelacaʼ, ne yeyúbibe Alex para gábibe laa diidxaʼ ni quixhedxí ladxidóʼ. Bisihuínnibe runi sentirbe xi cadiʼdiʼ Alex ne gúdxibe laa nanna Jiobá ximodo nuunu ne xi caquiiñenu. Binnigola ca gudxi laabe: «Ora maʼ zidiʼdiʼ ca beeu ca o ca iza ca zándaca guni sentirluʼ caquiiñeluʼ sti compañera. Pa zacá ni la? Jiobá na zanda guyúbiluʼ stobi». Dxandíʼ, cadi guiráʼ diʼ binni ni maʼ guti xheelaʼ nga randa richaganáʼ sti biaje neca racalaʼdxiʼ. Peru ora guníʼ ique Alex ni gudxi xpinni Cristu que laa la? guníʼ sicaríʼ: «Nuu biaje ora guiníʼ iqueʼ guichaganaʼyaʼ sti biaje runeʼ sentir casi ora zucheeniáʼ xheelaʼ o Jiobá. Nga runi, sicarú nga ora gábicabe lii zanda guichaganaluʼ sti biaje casi na Jiobá lu Stiidxaʼ» (1 Cor. 7:8, 9, 39).

Ti binni ni gudiʼdiʼ lu stale yuubaʼ ne desgracia nga David. Lu tobi de ca salmo ni bicaabe guniʼbe: «Guielú Jiobá cayuuyaʼ ca binni runi ni jneza, ne rucaadiágabe ora rinábacaʼ gacanebe laacaʼ» (Sal. 34:15). Nga rusihuinni ricabi Jiobá ca binni ni cayuubaʼ ladxidóʼ ora caquiiñecaʼ ni. Ne stale biaje rúnibe ni ora riquiiñebe ca xpinni Cristu ni zuhuaa dxiichiʼ ndaaniʼ xquidxi Dios ne ni zanda guiene laanu. ¡Nabé galán nga gánnanu nuu ca xpinni Cristu ca para gacanecaʼ laanu!

Nabé racané ca guendaridagulisaa ca laanu

Ora ca xpinni Cristu nuucaʼ triste, jma nagueenda zaníʼ íquecaʼ cosa ni cuee gana laacaʼ ne nga zándaca guxheleʼ laacabe de xcaadxi binni. Peru Proverbios 18:1 caguixhená laanu ne ca diidxaʼ riʼ: «Tuuxa ni rixeleʼ de xcaadxi la? cuyubi para laasi, ne qué riuulaʼdxiʼ guni ca cosa ca casi ti binni nuu xpiaaniʼ». Sicaríʼ guníʼ Alex: «Ora gati xheelaʼ binni, nabé riníʼ ique stale cosa ni cadi jneza. Casi naa la? qué nusaanaʼ de ninabadiidxaʼ  laca naa: “Ñanda ñuneʼ ca cosa ca sti modo la? Ñee naquiiñeʼ ñacaʼ jma nachaʼhuiʼ né xheelaʼ ne ñeneʼ laabe la?”. Ne laaca qué ñacalaʼdxeʼ ñuaaʼ stubeʼ ne ñaanaʼ zaqué. Ne nabé nagana guca para naa gusaanaʼ de guiníʼ iqueʼ zacá, purtiʼ guiráʼ dxi rietenalaʼdxeʼ nuaaʼ stubeʼ».

Ora guni sentirnu nabé nuunu triste, óraca nga jma caquiiñenu tuuxa ni gacané laanu, ne ra zanda guidxélanu binni ni gacané laanu nga ndaaniʼ Yoo stiʼ Reinu. Racá laaca rusiidiʼ Jiobá laanu ca cosa ni zanda gacané laanu ne uguu gana laanu.

Ca guendaridagulisaa ca racanécani laanu guidúʼyanu ca cosa ca jneza. Ora guiníʼ íquenu ca ejemplu ni zeeda lu Biblia ni rieeteʼ lúcani, racanécani laanu gusiáʼndanu neca ti ratu yuubaʼ stinu ne jma ricá íquenu ca cosa ni jma risaca: gusihuínninu napa Jiobá derechu de guni mandar ne guisaca lá. Laaca racané cani laanu gánnanu nanna Jiobá ni cayuni sentirnu, neca xcaadxi binni cadi gudii cuenta pa cayuubaʼ ladxidoʼno o neca qué guiénecaʼ xi cayácanu. Nánnabe riuʼnu triste ora cayuubaʼ ladxidoʼno ne racaláʼdxibe gacanebe laanu (Pro. 15:13). Nga racané laanu cadi guireʼnu gana ne gápanu stipa (Sal. 27:14).

Dxi nabé guzananda ca xhenemigu David laa, guníʼ ca diidxaʼ riʼ: «Triste guyuu ladxiduáʼ; casi ñaca nuzuhuaadxí ladxiduáʼ» (Sal. 143:4). Cásica bizaaca rey que, laaca zanda gusidxaga ca guendanagana ca laanu ne chuʼnu triste, dede qué guidxélanu xi gúninu. Pa málasi gaca huaranu, o maʼ xadxí nápanu xiixa guendahuará o sti guendanagana la? naquiiñeʼ ganna dxíchinu zacané Jiobá laanu guni huantarnu cani (Sal. 41:1-3). Dxandíʼ nga qué zúnibe ti milagru para gusiándabe laanu, peru zudiibe laanu guendabiaaniʼ ne stipa para gudxíʼlunu ni cadiidinu. Galán guietenaláʼdxinu ora maʼ qué ñanda ñuni huantar David guendanagana ni cadiʼdiʼ que biyúbibe Jiobá. Sicaríʼ bicaabe: «Maʼ bietenaladxeʼ de ca dxi ni maʼ gudiʼdiʼ ca; ne maʼ guníʼ iqueʼ lu guiráʼ ni maʼ bizaʼluʼ; de guidubi ladxiduáʼ bizaaladxeʼ cani bizáʼ naluʼ» (Sal. 143:5).

Cumu bidii Jiobá lugar guicá ca diidxaʼ ca lu Biblia la? nga rusihuinni riénebe xi runi sentirnu ne rucaadiágacabe ora rucaʼnu ridxi laabe. Ne pa gudiʼnu lugar la? «laapebe zacanebe» laanu (Sal. 55:22).

Cadi gusaana de guni orarnu

Santiagu 4:8 na: «Laidxiña gaxha de Dios, ne laa zadxiña gaxha de laatu». Zusihuínninu zinándanu conseju ca ora guni orarnu. Apóstol Pablu bidii conseju riʼ: «Lainíʼ né Dios sin guiaana dxí tu» (1 Tes. 5:17). Ne pa raca nagana para laanu gánnanu xi guininu la? «Espíritu que riníʼ pur laanu ra nuu Dios» (Rom. 8:26, 27). Rihuinni dxíchica riene Jiobá cani runi sentirnu.

Monika, ti gunaa ni nabé runi orar Dios, guníʼ: «Runeʼ sentir Jiobá nga ni jma xhamiguaʼ purtiʼ runeʼ orar, ruundaʼ Biblia ne ruyubeʼ guieneʼ ni nani. Yanna runeʼ sentir nuube jma gaxha de naa ne rudieeʼ cuenta qué huasaanabe naa. Ratadxí ladxiduáʼ gannaʼ, neca qué ganda gusieneʼ chaahueʼ laabe ximodo nuaaʼ la? laabe riénebe naa. Nannaʼ qué ziuu dxi gusaanabe de gácabe nachaʼhuiʼ ne de gusihuínnibe nadxiibe naa».

Nga runi, gudiʼnu lugar quixhedxí xcaadxi xpinni Cristu ladxidoʼno ne gusihuínnicabe nadxiicabe laanu. Cadi gusaana de chinándanu ca conseju ni gudiicabe laanu lu ca guendaridagulisaa ca ti iguidxi fe stinu. Ne guni orarnu de guidubi ladxidoʼno. Cadi guiaandaʼ laanu laacani nga cani riquiiñeʼ Dios para gusihuinni nadxii laanu. Pur cani gudiʼdiʼ Alex que guníʼ ca diidxaʼ riʼ: «Stale modo racané Jiobá laanu para chuʼnu jma gaxha de laa. Ne pa gudiʼnu lugar gacanebe laanu la? zudiibe laanu stipa ni caquiiñenu ti ganda gudxíʼlunu intiica guendanagana» (2 Cor. 4:7).

[Cuadro ne dibuju/foto ni zeeda lu yaza 18]

Cani zacané ca binni ni cayuubaʼ ladxidóʼ

Lu stale salmo rihuinni xi runi sentir ca xpinni Dios ora guidxaagalucaʼ guendanagana. Ne laaca rusihuínnicani zucaadiaga Jiobá ora guinábacaʼ laabe gacanebe laacaʼ. Zacá rihuínnini lu ca diidxaʼ ni zeeda raríʼ:

«Dxi cayacanaʼyaʼ qué nusaanaʼ de nucaaʼ ridxi Jiobá, ne qué nusaanaʼ de ninabaʼ Dios stinneʼ gacané naa. Dede ndaaniʼ yuʼduʼ stibe binadiágabe stidxeʼ, ne binadiágabe ora gunabaʼ laabe gacanebe naa.» (Sal. 18:6.)

«Jiobá nuu gaxha de cani maʼ gucadé ladxidóʼ; ne rulabe cani maʼ biree gana.» (Sal. 34:18.)

«Jiobá cusianda cani cayuubaʼ ladxidóʼ, ne cuchéndabe benda ra naná laacaʼ.» (Sal. 147:3.)

[Dibuju/foto ni zeeda lu yaza 17]

Ora gábinu ti binni ni nuu triste xiixa órapeʼ caquiiñeʼ ni zaguixhedxinu ladxidóʼ