Ni rinabadiidxaʼ cani ruundaʼ

Ximodo zanda guni binni ni guníʼ Jesús lu Mateo 5:48 ra na: «Lagaca nachaʼhui ne irá binni, cásica nachaʼhui Bixhoze tu ni nuu ibáʼ».

Diidxaʼ nachaʼhuiʼ ca riquiiñeʼ Biblia ni para guzeeteʼ de cani runi Jiobá. Lu diidxazá zanda guininu diidxaʼ ca casi xiixa ni «guizáʼ», «biaʼsi», o «ni qué gapa donda». Cadi guiráʼ diʼ biaje guzeeteʼ Biblia de xiixa ni qué gapa donda nga guininu zacapeʼ nga laani. Jiobá si nga zanda guininu zacá laa. Peru ora guininu de binni o de xcaadxi cosa, qué zanda guininu qué gápacabe o qué gápacani donda. Lu hebreu ne lu griegu la? diidxaʼ «ni qué gapa donda» ca riquiiñeni para guzeetecabe de xiixa ni guizáʼ, o ni cadi cayaadxaʼ gastiʼ laa, ora gaca cani casi na ca ley stiʼ tuuxa ni runi mandar. Yanna riʼ riquiiñeʼ binni diidxaʼ «biaʼsi» ca ora cuzeeteʼ de xiixa dxiiñaʼ ni guca jneza.

Dxi guyáʼ Adán ne Eva la? gúcacaʼ binni ni qué gapa donda, ngue runi ñanda ñúnicaʼ ni jneza, ñuucaʼ gaxha de Dios ne qué ñuu dxi ñaca huaracaʼ, purtiʼ ñanda ñúnicaʼ guiráʼ ni na Dios ni bizáʼ laacaʼ. Peru dxi maʼ qué nuzuubacabe diidxaʼ la? maʼ qué ñanda diʼ ñúnicabe guiráʼ ni na Dios, zaqué nga beeda gácacabe binni ni napa donda, ne laaca maʼ qué ñanda ñápacabe xiiñicabe ni qué gapa donda. Zacá nga bisaanané Adán guiráʼ ca xiiñiʼ donda, guendaruchee ne guendaguti (Rom. 5:12).

Yanna, dxi bidii Jesús libana lu dani que la? bisihuínnibe zanda gaca binni nachaʼhuiʼ cásica Dios neca nácacaʼ binni napa donda. Lu libana que bisihuínnibe ximodo nga naquiiñeʼ gannaxhii tuuxa sti binni de guidubi ladxidóʼ, cásica nadxii Dios guiráʼ binni nuu lu Guidxilayú. Guidúʼndanu ca diidxaʼ guniʼbe que: «Peru naa rabeʼ: Laganaxhii cani nanalaʼdxi laatu, ne lainíʼ né Dios pur cani riguu di laatu. Lagacané cani runi pur uchiichi laatu, ne lainaba lu Dios pur cani riladxi latu. Laguni zacá ti chi ndee tu Bixhoze tu ni nuu ibáʼ, purti laa rudii lugar guzaani gubidxa sti ra nuu cani nachaʼhui ne ra nuu cani nadxabaʼ, ne rusaba nisa guie ra nuu cani runi ni na, ne ra nuu cani qué runi ni na» (Mat. 5:44, 45). Ora gannaxhii ca discípulo que binni casi guníʼ Jesús que la? cayúnicabe casi modo runi Dios, laa nadxii guiráʼ binni.

Ca dxi riʼ, ca testigu stiʼ Jiobá ni nuu lu guidubi naca Guidxilayú rusihuínnicaʼ nadxiicaʼ binni casi runi Dios ni. Laanu rúninu stipa para gacanenu binni guiziidiʼ ni dxandíʼ, gastiʼ naca pa de sti raza laa, o pa de gadxé religión laa o pa de gadxé guidxi laa. Rúʼndanenu jma de gadxe millón binni de Biblia lu 236 guidxi roʼ.

Jesús gunabadiidxaʼ: «Pa ganaxhii tu cani nadxii si laatu la? ñee na tu zacaa tu xiixa de Dios pur nga la? Cadi xa laca nga ca runi cani ruquixe impuestu, ne napa tu laacaʼ de malu. Ne pa gulabi tu cani ridxaaga si laatu la? xi caguu tu lú ni yaʼ. Cadi xa laca nga ca runi cani qué runibiáʼ Dios» (Mat. 5:46, 47). Cani dxandíʼ xpinni Cristu qué rúnicaʼ jma pur ca binni ni napa bueltu o pur tuuxa de sti raza. Laaca qué rannaxhiicabe ca binni si ni nadxii laacabe. Laacabe racanécabe ca pobre, cani huará, cani nahuiiniʼ ne cani maʼ nagola. Nga runi, zanda guininu reeda gácacabe casi Jiobá, purtiʼ rannaxhiicabe guiráʼ binni cásica rúnibe.

Ñee zadxiña dxi gácanu binni ni qué gapa donda casi Adán que la? Zadxiña pue. Guiráʼ ca binni ni guzuubaʼ diidxaʼ ne gápacaʼ fe lu guendaguti stiʼ Jesús, zeeda gácacaʼ binni ni qué gapa donda ora maʼ guni mandar Cristu lu ti mil iza. Tiempu ca nga guchiá «Xiiñiʼ Dios [...] xhiiñaʼ binidxabaʼ» (1 Juan 3:8).