Gusihuínninu runi adorarnu Jiobá de guidubi ladxidoʼno

«Ma stale binni cabeza si ucaa diaga stiidxa Dios. Tu güi ni nga huaxiéʼ.» (MAT. 9:37)

1. Xi ejemplu zanda iquiiñenu para gúninu ca cosa ca nagueenda.

 PA CAQUIIÑEʼ guʼyaʼ tuuxa binni ti documentu stiluʼ ante guiluxe dxi, xi naquiiñeʼ guʼnuʼ ante guseendaluʼ ni ra nuube yaʼ. Cadi dxandíʼ zucaaluʼ lu guiʼchiʼ ca gúʼyabe ni «NAGUEENDA» la? Ne pa biaananeluʼ tuuxa gúʼyaluʼ laa ti lugar ne maʼ cayácaluʼ huadxí, ñee qué zábiluʼ ni cusá taxi ziné lii ca: «Zanda gaca puraluʼ la? purtiʼ maʼ huadxí ndiʼ ne naquiiñeʼ chindayaʼ NAGUEENDA ra ziaaʼ». Zacá ni, ora nápanu xiixa ni risaca gúninu ne maʼ zeeda ugaanda dxi que, cadi dxandíʼ riuʼnu xizaa ne dede qué ridxélanu xi gúninu la? Ruzulú ruxooñeʼ ti líquidu láʼ adrenalina lu xcuérpunu ne jmaruʼ si nagueenda rúninu dxiiñaʼ óraca. Nga nga ni rizaacanu ora maʼ cará tiempu ne caquiiñeʼ gúninu xiixa nagueendaca.

2. Xii nga dxiiñaʼ ni naquiiñeʼ guni guiráʼ xpinni Cristu nagueendaca.

² Ca dxi stinu riʼ, gástiruʼ stiʼ cosa ni naquiiñeʼ gaca nagueenda para cani dxandíʼ xpinni Cristu que gucheechecaʼ diidxaʼ nacubi ne galán stiʼ Reinu ne gusiidicaʼ binni de guiráʼ guidxi sananda Jesús (Mat. 24:14; 28:19, 20). Casi bicaa Marcos lu Evangeliu stiʼ, Jesús guníʼ napa xidé gaca dxiiñaʼ riʼ para guinitilú ca cosa malu nuu lu guidxilayú (Mar. 13:10). Ne nga nga ni zazaaca. Ne Jesús guníʼ: «Ma stale binni cabeza si ucaa diaga stiidxa Dios. Tu güi ni nga huaxiéʼ». Né ca diidxaʼ ca bisihuínnibe naquiiñeʼ ganna guiráʼ binni de Dios nagueendaca (Mat. 9:37).

3. Ximodo rusihuinni stale de ca xpinni Cristu naquiiñeʼ guireeche diidxaʼ nagueenda.

³ Cumu nabé risaca nga gucheechenu diidxaʼ la? naquiiñeʼ gudiʼnu guiráʼ tiempu stinu ne ca stipa stinu para gúninu ni. Ne zacapeʼ nga cayuni ca bíʼchinu ne ca bizáʼnanu dxiiñaʼ. Nuu tu laa maʼ nabaniné biaʼ caquiiñeʼ si ti ganda gúnicaʼ xiixa dxiiñaʼ ndaaniʼ xquidxi Dios, casi gácacaʼ precursor, cheʼcaʼ de misioneru o gúnicaʼ dxiiñaʼ Betel. Guirácabe nabé riuu xhiiñacabe. Dxandíʼ, naroʼbaʼ nga stipa rúnicabe ne ridxagalúcabe guiráʼ clase guendanagana, peru stale modo nga riguu Jiobá ndaayaʼ laacabe. Riéchenu stale pur laacabe (biindaʼ Lucas 18:28-30). Xcaadxi xpinni Cristu qué zanda gácacaʼ precursor, peru ribeecabe stale tiempu stícabe para gusiidicabe ca xpecínucabe ne ca xiiñicabe xi gúnicaʼ para guilacaʼ (Deu. 6:6, 7).

4. Xiñee raca nagana para caadxi xpinni Cristu guni cré mayaca guinitilú ca cosa malu nuu yanna.

⁴ Casi maʼ bidúʼyanu ca, stale binni runi ca cosa ca nagueendaca ora ruuyacaʼ maʼ cadxiña dxi gudíxhecaʼ gaca xiixa o maʼ cazaa tiempu stini. Laanu nabáninu lu ca últimu dxi, ne nuu stale razón ni rudii Biblia ne cosa ni huayaca ni rusihuinni zacá ni (Mat. 24:3, 33; 2 Tim. 3:1-5). Peru nin ti binni guidxilayú qué ganna diʼ padxí gunitilú Dios guiráʼ cosa malu, ne zacá bisihuinni Jesús ni ora bizeeteʼ de «seña ihuinni dxi mayaca [...] iluxe guidx[i]layú riʼ». Laabe guniʼbe: «Padxí ne pora la? iruti ganna, nin ca ángel ni nuu ibáʼ, dede nin naa qué gannaʼ sínuque Bixhoze siaʼ nga nanna» (Mat. 24:36). Cumu zacá nga laani la? stale xpinni Cristu —jmaruʼ si cani maʼ xadxí de cabeza— nuu tiru raca nagana para laacaʼ guni crecaʼ mayaca guinitilú ca cosa malu nuu yanna (Pro. 13:12). Ñee zacaca nuuluʼ la? Xi zanda gacané laanu  para gudiʼnu cuenta naquiiñeʼ gúninu dxiiñaʼ bisaanané Jiobá ne Jesús laanu nagueenda yaʼ.

Chinándanu ejemplu stiʼ Jesús

5. Ximodo bisihuinni Jesús biʼniʼ xhiiñaʼ né stale gana.

⁵ Jesucristu si nga binni ni jma biʼniʼ xhiiñaʼ Dios né stale gana ne ejemplu stibe nga naquiiñeʼ chinándanu. Tobi de ca razón ni bicaa laabe gúnibe ni nga, purtiʼ nápabe stale cosa ni gúnibe lu chonna iza arondaʼ si. Peru lu tiempu huiiniʼ ca, bíʼnibe stale cosa para gaca adorar Dios jneza, ne qué huayuu sti binni guni biaʼ bíʼnibe ca. Bisiidibe binni tu láʼ Bixhózebe ne xi naguixhe ique guni, guniʼbe nabé rusiguii ca xaíque yuʼduʼ que ne rusiidicaʼ ni cadi dxandíʼ, ne dede ora gútibe bisihuínnibe Jiobá si nga napa derechu de guni mandar. Ne neca bidxágabe, guzabe guidubi guidxi que bisiidibe binni, gucanebe laacaʼ ne bisiándabe cani huará (Mat. 9:35). Zacá nga laani, guirutiʼ qué huayuni biaʼ bíʼnibe ca lu huaxiéʼ tiempu. Guizáʼ stale dxiiñaʼ nga biʼniʼ Jesús (Juan 18:37).

6. Xii nga ni jma bisisaca Jesús dxi bibani lu Guidxilayú riʼ.

⁶ Jesús biʼniʼ dxiiñaʼ stiʼ né stale gana, purtiʼ nánnabe pabiáʼ tiempu bidii Dios laabe para gúnibe ni. Pur ca diidxaʼ riguixhená bicaa Daniel, bidiibe cuenta zaluxe dxiiñaʼ stiʼ Mesías que «galaa de ti semana», o tiidiʼ si chonna iza arondaʼ (Dan. 9:27). Ne cadi xadxí de guyuu Jesús Jerusalén casi rey lu primavera stiʼ iza 33 que, guníʼ ca diidxaʼ riʼ: «Naa nga Hombre Biseenda Dios ne ma bidxiña hora usisaca be naa» (Juan 12:23). Racá ridúʼyanu nánnabe mayaca guizaa ora gátibe. Peru cadi ngue diʼ razón ni jma bicaa laabe gúnibe dxiiñaʼ né stale gana. Ni jma risaca para laabe nga gúnibe ni na Bixhózebe ne gusihuínnibe nadxiibe binni lu guiráʼ ni gúnibe. Guendarannaxhii ca nga bicaa laabe gutagulisaabe ti grupu de discípulo ne gusiidibe laacaʼ para chigucheechecaʼ diidxaʼ guidubi guidxi que. Ne guiráʼ ni bisiidibe laacaʼ bidiibe cuenta zándaruʼ gúnicaʼ dxiiñaʼ bizulube que ne dede zúnicaʼ dxiiñaʼ jma naroʼbaʼ que ni bíʼnibe (biindaʼ Juan 14:12).

7, 8. Xiñee guladxi Jesús ca binni ni cutoo ndaaniʼ yuʼduʼ que, ne xi bietenalaʼdxiʼ ca discípulo stibe ora biiyacaʼ ni.

⁷ Chupa chonna despué de bizulú Jesús dxiiñaʼ stiʼ, dxi cayaca Pascua lu iza 30 que, bisihuínnibe pabiáʼ rizaaláʼdxibe gúnibe xhiiñaʼ Jiobá. Ora yendanebe ca discípulo stibe Jerusalén, «biuu be ndaani yuʼdu roʼ biiya be nuu cani cutoo buey ne dendxuʼ ne paloma, ne cani cuchaa bidxichi, zuba ca ruaa jmexa caʼ». Xi biʼniʼ Jesús óraque ne xi bicaani ca discípulo guiníʼ íquecaʼ yaʼ (biindaʼ Juan 2:13-17).

⁸ Ni guníʼ Jesús dxi que ne ni biʼniʼ bisietenalaʼdxiʼ ni ca discípulo que ca diidxaʼ riguixhená guníʼ salmista David: «Tantu racaladxeʼ gapa liʼdxuʼ dede runduuxeni naa» (Sal. 69:9). Xiñee bietenaláʼdxicabe relatu ca yaʼ. Purtiʼ biʼniʼ maestru stícabe xiixa ni zándaca uguu laa ra naxoo. Cadi jneza diʼ gaca negocio ndaaniʼ yuʼduʼ que, ne ni jma feu nga purtiʼ ca xaíque stiʼ yuʼduʼ que, cani ruzaaquiʼ guʼxhuʼ ne ca escriba cudiicaʼ lugar  gácani raqué. Ora bicueeza Jesús laacabe ne bisihuinni cadi jneza ni cayúnicabe la? casi ora nucaalube ca xaíque yuʼduʼ que. Biene ca discípulo que pabiáʼ racaláʼdxibe gaca adorar Dios jneza ndaaniʼ yuʼduʼ que. Guidúʼyanu xipeʼ nga gucalaʼdxiʼ Jesús niníʼ ne ca diidxaʼ ca ne ximodo rucaani binni guni xhiiñaʼ Dios nagueenda.

Gannaxhiinu xhiiñaʼ Jiobá ne gúninu ni nagueendaca

9. Xi riníʼ íquenu ora ridúʼndanu ca diidxaʼ guníʼ David que.

⁹ Ora tuuxa nabé riuulaʼdxiʼ guni xiixa dxiiñaʼ, zanda guininu cayúnibe ni de guidubi ladxidoʼbe ne rusiecheʼ nga laabe. Ne zacá nga biʼniʼ Jesús dxiiñaʼ stiʼ dxi guyuu ndaaniʼ Guidxilayú riʼ. Lu caadxi diidxaʼ ni riníʼcabe Asia, nácabe zeeda gaca ni bizéʼtenu ca casi ora ñuu xiixa ni cacaguí ndaaniʼ ladxidóʼ binni. Traducción en lenguaje actual bicaa ca diidxaʼ guníʼ David ca sicaríʼ: «Guendarannaxhii ni runeʼ sentir pur yuʼduʼ stiluʼ ruzaaquini naa casi ti gui». Nga runi, qué ridxagayaadinu ora bietenalaʼdxiʼ ca discípulo que ca diidxaʼ guníʼ David ca ora biiyacabe ni biʼniʼ Jesús ndaaniʼ yuʼduʼ que. Peru ximodo ndiʼ guyuu xiixa casi ti gui ndaaniʼ ladxidóʼ Jesús ni bicaa laa guni ni biʼniʼ que yaʼ.

10. Xi riníʼ ca diidxaʼ ni biquiiñeʼ David ora guníʼ: «Tantu racaladxeʼ gapaʼ liʼdxuʼ dede runduuxeni naa».

¹⁰ Ora guníʼ David lu Salmo 69:9 ca diidxaʼ ra na: «Tantu racaladxeʼ gapaʼ liʼdxuʼ dede runduuxeni naa», qué riníʼ diʼ nga gúpasibe lidxi Dios né stale gana, o riuuláʼdxibe gaca adorar Dios jneza. Ni gucaláʼdxibe niniʼbe nga qué riuuláʼdxibe chuʼ xiixa o tuuxa ni gucaalú Jiobá o guchani lú Dios. De guidubi ladxidóʼ David racalaʼdxiʼ gapa lá Dios o guni chaahuiʼ guiráʼ ni cadi jneza ni maʼ guníʼcabe de lá Dios. Ngaca nga ni runi sentir Jiobá, ne nga nga ni rucaa laabe guinábabe ca xpínnibe guni adorarcaʼ laasibe. Biblia na: «Cadi naquiiñeʼ guzuxíbiluʼ xañee [ca bidóʼ ca] ne cadi guicá íqueluʼ guʼnuʼ dxiiñaʼ para laacani, purtiʼ naa Jiobá Dios stiluʼ, nacaʼ ti Dios ni rinabaʼ guni adorárcabe laa si, ne redané castigu pur guendaruchee stiʼ ca bixhoze luguiáʼ ca xiiñiʼ, lu guionna generación ne lu guidapa generación, casi cani nanalaʼdxiʼ naa» (Éxodo 20:5). Ngaca nga ni runi sentir ti binni ni maʼ bichaganáʼ pur xheelaʼ. Laabe rinábabe gannaxhii xheelabe laasibe. Zacaca nga Dios, laa napa derechu de guinabaʼ laanu guni adorarnu laa si, purtiʼ stibe laanu ne rinábabe gácani zacá.

11. Xiñee bicheeche Jesús diidxaʼ né stale gana.

¹¹ Biáʼsipeʼ ngue ni guníʼ ique ca discípulo stiʼ Jesús ora bichaagacaʼ ni guníʼ David né ni biʼniʼ Maestru sticaʼ ndaaniʼ yuʼduʼ que. Peru naquiiñeʼ guietenaláʼdxinu qué ñuni Jesús dxiiñaʼ stiʼ né stale gana purtiʼ si maʼ cará tiempu stibe, sínuque purtiʼ nadxiibe Bixhózebe de guidubi ladxidoʼbe, o casi ora ñuu xiixa ni cacaguí ndaaniʼ ladxidoʼbe ni cucaa laabe gusihuínnibe nuu ti religión ni dxandíʼ ne para gusisácabe lá Bixhózebe nezalú binni. Ngue runi, ora biiyabe caníʼcabe mal de lá Dios ne cayúnicabe menu ni la? biale de ndaaniʼ ladxidoʼbe guni chaahuibe guendanagana que né stale gana. Ne ngaca nga ni bicaa laabe guiniʼbe cadi jneza ni rusiidiʼ ca xaíque yuʼduʼ ne gacanebe ca binni pobre ni cayacaná purtiʼ cayuni huantarcaʼ modo cuquiichináʼ ca binni que laacaʼ (Mat. 9:36; 23:2, 4, 27, 28, 33).

Gusihuínninu né stale gana runi adorarnu Dios jneza

12, 13. Xi riníʼ ique cani naca xaíque ca yuʼduʼ ca de 1)lá Jiobá. 2)de Reinu stiʼ Dios.

¹² Cásica biʼniʼ ca xaíque yuʼduʼ ni guyuu lu primé siglu que, zacaca nga cayuni cani nuu yanna o pa cadi jma feu ni cayúnicaʼ. Guidúʼyanu xi riníʼ íquecabe de lá Dios. Dxi bisiidiʼ Jesús ca discípulo stiʼ ximodo guni orarcaʼ, primé ca ni guniʼbe nga: «Guisácapeʼ laluʼ» (Mat. 6:9, NM). Peru, xi cayuni ca xaíque yuʼduʼ ca yanna riʼ, ne grupu ni nápacabe para gusiidiʼ binni yaʼ. Lugar de nusiidicabe ca xpínnicabe ñánnacaʼ tu láʼ Dios ne nusisácacaʼ laabe la? laga ruchéndacabe laacaʼ ne guiráʼ ni cadi jneza rusiidicabe de Dios, casi ora riníʼcabe naca Dios ti Trinidad, napa binni ti alma ni qué rati ne nuu ti lugar láʼ infiernu. Zacá rucaacabe binni guiníʼ ique naca Jiobá ti Dios ni guirutiʼ  ganna ximodo laa, qué riénebe laanu ne nabé riuuláʼdxibe guninabe binni. Ne pur guiráʼ ni cadi jneza runi ca xaíque yuʼduʼ ca ne modo rusiguiicaʼ qué rusisácacaʼ lá Dios (biindaʼ Romanos 2:21-24). Ne laaca ribeecabe lá Dios lu Biblia stícabe, zacá nga casi ora nuchácabe yú luni, nga runi jmaruʼ si nagana raca para binni guidxiña Jiobá ne gaca xhamigu laabe (Sant. 4:7, 8).

¹³ Jesús laaca bisiidiʼ ca discípulo stiʼ guni orarcaʼ pur Reinu stiʼ Dios: «Biseendaʼ reinu stiluʼ. Gaca ni naluʼ cásica guibáʼ zaqueca lu guidxilayú» (Mat. 6:10, NM). Nécapeʼ guiráʼ ora rinabaʼ ca xaíque yuʼduʼ gueeda Reinu stiʼ Dios la? rucaacabe ca xpínnicabe chuʼcaʼ lu política ne chuʼcaʼ pur xcaadxi grupu. Ne cadi ngasi, sínuque laaca rúnicabe menu cani runi stipa pur gucheeche stiidxaʼ Reinu. Nga runi, ca binni ni nuu ndaaniʼ ca yuʼduʼ ca huaxiéʼ riniʼcaʼ de Reinu ca, purtiʼ qué runi crédicabe ni.

14. Ximodo qué rusisaca ca xaíque yuʼduʼ ca Stiidxaʼ Dios.

¹⁴ Ora biʼniʼ orar Jesús Bixhoze gúdxibe laa ca diidxaʼ riʼ: «Dxandíʼ stiidxa luʼ» (Juan 17:17). Ne ante guibiguétabe guibáʼ bisaanabe ti «mozo ni nuu xpiaaniʼ ne ni runi jneza» para gudii ni caquiiñeʼ ca binni ridagulisaa, o gusiidiʼ laacabe de Dios (Mat. 24:45). Qué ñe ñeeda cani naca xaíque yuʼduʼ ora guniʼcaʼ laacaʼ nga bisaana Jesús para gusiidicaʼ binni stiidxaʼ Dios. Peru dxandíʼ cayúnicabe dxiiñaʼ bisaana Jesús la? Nin gaxha. Purtiʼ stale de laacabe riníʼcabe zeeda stale cuentu lu Biblia. Ne lugar de nusiidicabe ca xpínnicabe de Dios para ñatadxí ladxidoʼcaʼ ne nixeleʼ xpiaanicaʼ la? rusiidicabe laacaʼ ni riníʼ ique binni guidxilayú ti zacá chuuláʼdxicaʼ ni gusiidicabe. Ne gadxé modo rusiénecabe stale cosa ni rusiidiʼ Biblia, purtiʼ rápacabe gana chinanda binni cani neca cadi jneza cani (2 Tim. 4:3, 4).

15. Xi runi sentirluʼ ora ruuyaluʼ guiráʼ ca cosa ni cayuni ca xaíque yuʼduʼ ca ne guiniʼcaʼ cayúnicaʼ ni lu lá Dios.

¹⁵ Ora ganna binni xi guiráʼ runi ca xaíque yuʼduʼ —purtiʼ nacaʼ nga nga na Dios lu Biblia gaca—, stale de laacaʼ maʼ qué ridxélacaʼ xi gúnicaʼ dede maʼ qué runi crecaʼ Dios nin Stiidxabe, zacá reeda guiaanacaʼ ndaaniʼ náʼ Binidxabaʼ ne guidxilayú ra cayuni mandarbe. Xi runi sentirluʼ ora ruuyaluʼ nga nga ni cayaca guiráʼ dxi yaʼ. Xi runi sentirluʼ ora gúʼyaluʼ caníʼcabe mal de Bixhózenu ni nadxii laanu ne guiníʼcabe cosa feu de labe yaʼ. Cadi dxandíʼ racaláʼdxiluʼ gúniluʼ guiráʼ ni nuu lu naluʼ para guni chaahuiluʼ ni la? Ora gúʼyaluʼ pabiáʼ cayacaná stale binni ni nayá ladxidóʼ purtiʼ cusiguii ca xaíque sticaʼ laacaʼ ne cayúnicabe laacaʼ stale cosa ni cadi jneza, cadi dxandíʼ racaláʼdxiluʼ quixhedxiluʼ ladxidóʼcabe la? Ora biiyaʼ Jesús «qué ganna ca [binni que] xi guni ca ne iruti cayaca né laacaʼ», ne  nuucaʼ «casi dendxu ni qué gapa pastor» la? qué ñásibe laacaʼ, sínuque bizulú bisiidibe laacaʼ stale cosa (Mat. 9:36; Mar. 6:34). ¡Né stale gana bisihuínnibe racaláʼdxibe gaca adorar Dios jneza! Nápanu stale razón para gúninu casi bíʼnibe ca.

16, 17. 1) Xi rucaa laanu gúninu stipa para gucheechenu diidxaʼ. 2) Xi zazíʼdinu lu sti tema ca.

¹⁶ Ora rúninu xhiiñaʼ Jiobá né stale gana jma rindá ca diidxaʼ bicaa apóstol Pablu lu 1 Timoteo 2:3, 4 ndaaniʼ ladxidoʼno (biindaʼ ni). Cadi purtiʼ si nabáninu lu ca últimu dxi nga rúninu stipa pur gucheechenu diidxaʼ, sínuque purtiʼ maʼ biénenu xii nga racalaʼdxiʼ Jiobá. Laabe racaláʼdxibe ganna binni ni dxandíʼ, guiziidicaʼ guni adorarcaʼ laabe ne guicaacaʼ ndaayaʼ. Dxandíʼ, ni jma risaca para laanu nga gacaláʼdxinu gusisácanu lá Dios ne gusíʼdinu sti binni xi racalaʼdxiʼ Jiobá, ne cadi purtiʼ si maʼ cará tiempu. Zacá nga rusihuínninu ne stale gana racaláʼdxinu guni adorarnu Jiobá jneza (1 Tim. 4:16).

¹⁷ Para laanu la? ti ndaayaʼ nga gabi Jiobá laanu xi naguixhe ique guni para binni ne para Guidxilayú. Ne ni maʼ nánnanu ca zanda gacanenu ca vecinu stinu yanna, gábinu laacaʼ nuu xiixa ni galán para laanu despué ne guilacaʼ ora guinitilú guidxilayú stiʼ Binidxabaʼ (2 Tes. 1:7-9). Nga runi, lugar de chuʼnu triste purtiʼ ruluíʼ candaa dxi stiʼ Jiobá, riéchenu purtiʼ náparunu tiempu para gusihuínninu né stale gana cayuni adorarnu Jiobá jneza (Miq. 7:7; Hab. 2:3). Sti tema ca zusihuinni xi naquiiñeʼ gúninu para cadi gusaana de guni adorarnu Jiobá de guidubi ladxidoʼno.

Ñanda nusiéneluʼ ni la?

• Xi bicaa Jesús gucheeche diidxaʼ neca maʼ bidxaga.

• Xi zanda guiénenu de ca diidxaʼ «tantu racaladxeʼ gapaʼ liʼdxuʼ dede runduuxeni naa».

• Xi rucaa laanu gusihuínninu racaláʼdxinu gaca adorar Jiobá jneza.

[Guendarinabadiidxaʼ stiʼ párrafo]

[Dibuju/foto ni zeeda lu yaza 8]

Ni jma bisisaca Jesús nga guni ni na Bixhoze ne gusihuinni nadxii binni

[Dibuju/foto ni zeeda lu yaza 10]

Nápanu stale razón para gusihuínninu racaláʼdxinu gaca adorar Jiobá jneza