Rietenalaʼdxuʼ la?

Ñee biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

• Xi zazaaca pa gusihuínninu riuuláʼdxinu tuuxa peru qué gápanu gana guichagananu laa.

Zanda guxheleʼ nga laanu de Jiobá ne de xquidxi ne jma nagueenda zaca para laanu chúʼnenu ni cadi xheelanu. Ne pa ti binni ni maʼ bichaganáʼ nga cusihuinni riuulaʼdxiʼ sti binni la? zanda gucaa nga laa chuʼné binni ca ne dede gaca divorciar de xheelaʼ ne guniná xheelaʼ ne ca xiiñiʼ. Dxandíʼ, ca cosa dxabaʼ ca qué racanécani binni chuʼcaʼ tobi si (15/9, yaza 19).

• Tu ángel nga biseendaʼ Dios nezalú ca israelita que ora guleebe laacaʼ de Egipto (Éxo. 23:20, 21).

Jiobá guníʼ de ángel que sicaríʼ: «Zinebe laʼyaʼ ndaaniʼ ladxidoʼbe», nga runi zanda guininu laabe nga tobi lucha Xiiñiʼ Dios, ni beeda gaca Jesús gudiʼdiʼ si stale siglu (15/9, yaza 21).

• Ñee zadxiña dxi guinitilú Guidxilayú stinu riʼ la?

Biblia qué rusiidiʼ zanitilú Guidxilayú ra nabáninu riʼ, sínuque rusiidini qué ziuu dxi guinitilú Guidxilayú (Sal. 104:5). Jesucristu peʼ guníʼ ziuu ti grupu de binni ni zalá ora guedandá dxi ca (Mat. 24:21, 22) (1/10, yaza 5).

• Pa biʼniʼ xheelaluʼ xiixa ni bichiichi lii, ximodo zanda gábiluʼ ni laabe.

Guníʼ ique ximodo ñábiluʼ ni laabe, pa ñácabe tuuxa ni nabé xhamíguluʼ o ti jefe stiluʼ. Galán pa cada tobi de laatu gucaa lu ti guiʼchiʼ xiñee jma naquiiñeʼ guiniʼné xheelaʼ né respetu que ora niniʼné ti xhamigu o ti jefe stiʼ (Col. 4:6) (1/10, yaza 12).

• Ñee ribeendú binni xiixa ora uxhuba donda la?

Razón ni jma risaca nápanu para uxhuba dóndanu pur bichéʼnenu tuuxa binni o bichéʼnenu Dios nga purtiʼ racaláʼdxinu uguube ndaayaʼ laanu. Jesucristu guníʼ para gúninu ni na Dios sin guchiiñaʼ xquendabiaaninu laanu la? primeru caquiiñeʼ guyúbinu ximodo guni chaahuinu xiixa bichenda ni gapanenu tuuxa ti chúʼnenu laabe tobi si (Mat. 5:23, 24). Nga runi, pa qué gudxíʼbanu laca laanu nezalú Jiobá ne guinábanu gutiidiláʼdxibe stóndanu la? ziuuláʼdxibe cani gúninu ne zaguube ndaayaʼ laanu (1 Ped. 5:6) (1/10, yaza 24).

• Xi pretextu qué riuulaʼdxiʼ Dios quixheʼ cani nuu ndaaniʼ religión ni dxandíʼ.

«Nabé nagana ni.» «Qué gapa gana guneʼ ni.» «Qué gápadiaʼ tiempu.» «Qué zanda diʼ guneʼ ni.» «Naná nuaaʼ pur ni bíʼnicabe naa.» Cadi jneza diʼ quixheʼ binni ca pretextu ca para cadi guni ni na Dios (15/10, yaza 12-15).

• Xi zanda gúninu para gacané ca guendaridagulisaa ca laanu.

Gúʼndanu dede ante. Cadi guiáʼdxanu. Chindanu tempranu. Chinenu guiráʼ ni zaquiiñeʼ. Gucaadiaga chaahuinu. Guicábinu ne iquiiñenu huaxiéʼ diidxaʼ ora gúninu ni. Gutíʼdinu ca libana ni gudiicabe laanu. Uguʼnu gana cani gutiidiʼ libana ne cani guicabi. Guinínenu cani cheʼ raqué ante ne despué de ca guendaridagulisaa ca (15/10, yaza 22).

• Xi rizíʼdinu de ni bizaaca Aarón ora bidii lugar gucaa ca israelita que laa guni ti bidóʼ.

Dxi qué guinni Moisés, gunabaʼ ca israelita que Aarón guni ti bidóʼ para laacabe, ne laabe bíʼnibe ni. Nga rusihuinni cadi cani nahuiiniʼ si nga raca nagana para laacaʼ gudxiilucaʼ tuuxa ni rucaa laacaʼ gúnicaʼ xiixa ni cadi jneza. Laaca rácani nagana para cani maʼ huaniisi ni racalaʼdxiʼ guni ni jneza. Cadi naquiiñeʼ diʼ gudiʼnu lugar chuʼ tu gucaa laanu gúninu xiixa ni cadi jneza (15/11, yaza 8).

• Xiñee nabé risaca nga guidúʼndanu né stale gana ra ridagulisaanu.

Raca jma de ti gayuaa iza guníʼ revista riʼ: «Ora guidúʼndanu cani dxandíʼ cazíʼdinu de Dios jma zacané nga laanu guiaana cani ndaaniʼ íquenu ne chindácani ndaaniʼ ladxidoʼno». Cumu guiráʼ cani zeeda lu ca diidxaʼ riuundaʼ ca riree cani de lu Biblia la? ora rizíʼdinu cani de memoria riaazicani dede ndaaniʼ ladxidoʼno (15/12, yaza 22).