Xi nicabi ca xiiñitu

CANI NAPA XIIÑIʼ: Lu revista 15 stiʼ enero 2010 (yaza 16 dede 20) bizeeteʼ galán nga guni ensayarnetu xiiñitu. Lu tema ni chiguidúʼndanu riʼ zeeda caadxi cosa ni zanda iquiiñetu para gacanetu ca xiiñitu gudxiilucaʼ guendanagana ni gápacaʼ ra scuela. Ne zanda guni ensayarnetu ca xiiñitu dxi naguíxhetu guni adorartu Dios né binnilídxitu.

NABÉ ridxaagalú ca hombrehuiiniʼ testigu stiʼ Jiobá stale guendanagana. Stale biaje, cani rinécabe scuela rinabadiidxaʼ laacabe xiñee qué ruundacabe himno, qué runi saludárcabe bandera, xiñee qué rúnicabe lanibidóʼ o labidóʼ ne xiñee qué rúnicabe xiixa saa o sti cosa casi cani maʼ guninu ca. Xi rábitu nicabi ca xiiñitu yaʼ.

Nuu de cani nahuiiniʼ ca ricábicaʼ: «Qué zanda diʼ guneʼ ni. Religión stinneʼ qué riná diʼ guneʼ ni». Galán gusisácanu stipa ni rúnicabe pur gúnicabe ni jneza. Ne pa guicábicabe zacá zándaca maʼ qué zanabadiidxaʼ tuuxa laacabe xcaadxi cosa ni qué racaláʼdxicabe. Peru sicaríʼ na Biblia naquiiñeʼ guni ca xpinni Cristu: «Lagataná para icabi tu [o gusiénetu] cani racalaʼdxi ganna xii nga runi cre tu» (1 Ped. 3:15). Ne para nga cadi caquiiñeʼ si guiníʼcabe: «Qué zanda diʼ guneʼ ni». Neca ziuu stale tu zaníʼ ique cadi jneza cani runi crenu, xcaadxi ziuuláʼdxicaʼ gusiénenu laacaʼ xiñee qué rúninu cani.

Stale de cani nahuiiniʼ ni naca Testigu riquiiñecaʼ ca relatu ni zeeda lu Biblia, casi cani zeeda lu libru Guizíʼdinu de Maestru Ni Jma Nanna Gusiidiʼ ne de xcaadxi libru ne revista para gusiénecaʼ ca xcompañérucaʼ xiñee rúnicaʼ o xiñee qué rinacaʼ gúnicaʼ xiixa. Nuu de ca xcompañérucabe rucaadiaga ca relatu ca ne dede ruzulú ruundacaʼ Biblia. Peru nuu tu laa ruzulú rucaadiaga ne despué gadxé ra maʼ nuu ique. Nuu de ca relatu ni zeeda lu Biblia raca nagana para cani nahuiiniʼ ca guiénecaʼ ni dede ora chuʼ tu gusiene ni laacaʼ. Zacá bizaaca Minhee, ti dxaapahuiiniʼ de 11 iza. Dxi biʼniʼ invitar ti xhamígabe laabe ni rinebe scuela lanixpidóʼ, laabe gúdxibe laa: «Biblia qué runi mandar diʼ laadu gúnidu lanibidóʼ. Nannuʼ xiñee la? Purtiʼ ruzeeteni biiticabe Juan ni Riguunisa lu tobi de ca saa ca». Neca jneza modo bicábibe, peru qué ñene diʼ dxaapahuiiniʼ ca laabe.

Dxandíʼ, ca relatu ne ca dibuju ni zeeda lu ca libru stinu nabé riquiiñeʼ cani. Peru nuu de ca maestru ca qué rudiicaʼ lugar chiné ca baʼduʼ scuela ca xiixa libru ne revista stiʼ religión sticaʼ para guluiʼcaʼ ni ca xcompañérucaʼ. Ora guizaaca nga, ñee zanda gusiene ca xiiñitu ni runi crecaʼ sin iquiiñeʼ cani la? Ximodo zanda gacanetu laacabe gúnicabe ni yaʼ.

Laguni ensayarné ca xiiñitu

Galán guni ensayarnetu laacabe ralídxitu. Laatu, cani napa xiiñiʼ, zanda gúnitu casi ñácatu tobi de ca xcompañeru xiiñitu. Laguuyaʼ ximodo ruyubi xiiñitu gusiene cani runi cré, ne laguiechené laacabe pur stipa ni rúnicabe. Laaca zanda guluiʼtu laacabe ximodo gúnicabe ni jma jneza ne xi zabeendúcabe ra gúnicabe ni. Zanda gusiiditu laacabe iquiiñecabe diidxaʼ ni guiene ca xcompañérucabe. Joshua, ti hombrehuiiniʼ de gaʼ iza, na qué ñene ca xcompañérube laabe ora biquiiñebe ca diidxaʼ zuchiiñaʼ xquendabiaaneʼ naa ne ca diidxaʼ qué zusaanaʼ Dios, ngue runi gupa xidé  biquiiñebe xcaadxi diidxaʼ para bisiene chaahuibe cani laacaʼ (1 Cor. 14:9).

Nuu de ca baʼduʼ scuela ca rinabadiidxacaʼ laacabe, peru pa iquiiñecabe stale diidxaʼ para gusiénecabe laacaʼ la? qué zandaa zareecaʼ gana. Nga runi, pa ganna ca hombrehuiiniʼ Testigu ca modo gusiénecaʼ laacabe ne guyúbicaʼ modo guicábicaʼ ora guinabadiidxacabe laacaʼ la? jma nagueenda zucaadiágacabe laacaʼ. Haneul, ti dxaapahuiiniʼ de chii iza, huayuuyaʼ jneza guni binni zacá, laabe guniʼbe: «Ca xcompañeruaʼ riuuláʼdxicaʼ guiniʼcaʼ ni riníʼ íquecaʼ, peru qué riuuláʼdxicaʼ iquiiñecabe stale diidxaʼ para gusiénecabe laacaʼ xiixa». Para ganda güícabe diidxaʼ ne ca xcompañérucabe caquiiñeʼ guinabadiidxacabe ne gucaadiágacabe laacaʼ ne cani riníʼ íquecaʼ.

Cani zeeda lu cuadru ca cusihuinni ximodo zanda gusiene ca xiiñitu ca xcompañérucaʼ. Peru cadi caquiiñeʼ guiziidicabe cani de memoria. Xiñee yaʼ. Purtiʼ gadxé gadxé nga cada tobi de cani nahuiiniʼ ca ne gadxé modo zanda guiziidicaʼ. Jma galán pa guiénecabe xidé zeeda gusiénecani ne óraca guyúbicabe modo gusiénecabe ni, ne laaca naquiiñeʼ gánnacabe tu laa caniʼnécabe ne xidé caníʼcabe.  Galán guni cani rié xiiñiʼ scuela pa guni ensayarnecaʼ laacabe ca ejemplu ca.

Zaquiiñeʼ stale tiempu ne stipa para ganda gacanécabe xiiñicabe gánnacaʼ guicábicaʼ ora guinabadiidxaʼ tuuxa laacaʼ de cani runi crecaʼ. Ca Testigu ni napa xiiñiʼ zúnicaʼ stipa pur gusiidicaʼ laacabe ca conseju ni zeeda lu Biblia ne gusiénecaʼ laacabe xiñee naquiiñeʼ gúnicabe cani guiráʼ ora (Deu. 6:7; 2 Tim. 3:14).

Galán gúnitu pa guni ensayartu cani dxi naguíxhetu guni adorartu Dios né binnilídxitu ne zuuyatu pabiáʼ zacanécani laacabe. Peru ora gúnitu ni, cadi guiaandaʼ laatu cadi para guiziidicabe cani de memoria. Zándaca jma jneza guni ensayarnetu laacabe chupa biaje tobi de cani zeeda lu cuadru ca ne guicábitu gadxé gadxé modo ti gúʼyatu pa zanda guicábicabe jneza ni guinabadiidxaʼ ca xcompañérucabe laacabe. Ne ora gacaláʼdxicabe gusiénecabe xiixa, lagacané laacabe guyúbicabe modo guiníʼcabe sin guninácabe binni ne guni respetárcabe ni riníʼ íquecaʼ. Pa gúnitu zacá, despué zaziidicabe gusiénecabe cani runi crécabe ca xcompañérucabe, peru cadi ngasi, sínuque laaca zúnicabe ni nezalú ca maestru stícabe ne ca xpecínucabe.

[Cuadro ne dibuju/foto ni zeeda lu yaza 4]

LANIBIDÓʼ

Melisa: Julio, chigudieeʼ lii ti invitación para cheluʼ saa stinneʼ.

Julio: Xquíxepeʼ lii pur cayuni invitarluʼ naa. Peru xi chigúniluʼ yaʼ.

Melisa: Chiguneʼ lanibidóʼ stinneʼ.

Julio: Xquíxepeʼ lii. Peru qué rúnediaʼ lanibidóʼ ne laaca qué riaadiaʼ cani.

Melisa: Xiñee yaʼ. Guiráʼ binni runi lanibidóʼ ne rié ora raca cani. Nabé biecheʼ bixhozeʼ ne jñaaʼ dxi guleʼ.

Julio: Bixhozeʼ ne jñaaʼ laaca. Peru qué rúnidu ti saa dxi ca. Nuu tiru, binni ni cusaa iza ca runi cré laa nga binni ni jma risaca. Peru Dios nga ni jma risaca, cadi dxandíʼ la? Ñee cadi rábiluʼ jma galán nga gudiʼnu xquíxepeʼ laabe pur xquendanabáninu la?

Melisa: Peru xii nga nuuluʼ guiniʼluʼ pue. Nuuluʼ guiniʼluʼ cadi naquiiñeʼ guneʼ ti saa dxi gusaaʼ iza la?

Julio: Pue, nga maʼ lii naquiiñeʼ gúʼyaluʼ. Lii nánnaluʼ stale nga tu riuulaʼdxiʼ gusigáʼdecabe laa xiixa dxi gusaa iza, peru Biblia na jma nayecheʼ riuu binni ora gudii que ora guicaa. Para naa la? jma risaca nga gudieeʼ xquíxepeʼ Dios ne gacaniáʼ xcaadxi que intiica ni gusigáʼdecabe naa.

Melisa: Qué huayuu dxi guiníʼ iqueʼ ni naluʼ ca. Peru ñee qué rudii bixhózeluʼ ne jñaaluʼ lii regalu la?

Julio: ¡Rudiicabe pue! Peru qué ribézacabe ganda dxi gusaa iza para gudiicabe ni naa. Ora tiica rudiicabe ni naa. Yanna, ñee nannuʼ ximodo bizulú biʼniʼ binni lanibidóʼ la?

Melisa: Lii nannuʼ ximodo bizulú ni la?

Julio: Guixíʼ güeniáʼ lii ti historia ni nannaʼ ziuuláʼdxiluʼ, de ti binni ni bibani dxiqué ne biʼniʼ lanixpidóʼ.

BANDERA NE HIMNO

Gisela: Carla, xiñee qué runi saludarluʼ bandera ne qué ruundaluʼ himno pue.

Carla: ¡Nabé galán nga ni canabadiidxaluʼ ca! Peru napaʼ gana guinabadiidxaʼ lii ti cosa: xiñee rúniluʼ ni yaʼ.

Gisela: Purtiʼ nadxieeʼ xquidxeʼ xa.

Carla: Lii laaca nadxiiluʼ jñaaluʼ, peru qué rucaanaluʼ ladxidoʼloʼ para ugapadiúxiluʼ laabe ne laaca qué ruundaluʼ himno nezalube, cadi dxandíʼ la?

Gisela: Coʼ pue, peru runeʼ ni purtiʼ runeʼ respetar xquidxeʼ. Lii pue, qué runi respetarluʼ xquídxiluʼ la?

Carla: Runeʼ respetar ni pue, peru qué runi saludarnu guiráʼ cosa ne guiráʼ binni zacá, cadi dxandíʼ la?

Gisela: Napuʼ razón. Ne qué gánnadiaʼ xiñee runeʼ ni. Zándaca purtiʼ runi guiráʼ binni ni.

Carla: Ñee nannuʼ xi pur runi stale binni ni la? Purtiʼ bandera ca ne himno ca culuíʼ gunáʼ nga xquidxi tuuxa. Nga runi ora runi saludar binni bandera ne guʼndaʼ himno cusihuinni dede zanda gueeda gudii xquendanabani pur laani. Peru naa qué riníʼ iqueʼ zacá. Qué zanda gudieeʼ xquendanabaneʼ pur xquidxeʼ purtiʼ Dios bidii ni naa, laasibe nga rapaʼ gana gudieeʼ ni. Nga runi, neca runeʼ respetar bandera ca, qué runeʼ saludar ni, ne laaca qué ruundaʼ himno.

Gisela: ¡Ah! Yánnaruʼ maʼ nannaʼ.

Carla: Nannuʼ xi la? Galanpeʼ nga gunabadiidxaluʼ ni naa. Ora gápaluʼ gana gánnaluʼ xiñee runeʼ caadxi cosa o xiñee qué runeʼ xcaadxi cosa la? gunabadiidxaʼ naa. Yanna, ñee nannuʼ cuzeeteʼ Biblia biʼniʼ mandar ti rey ni bibani dxiqué guzuxibi binni nezalú ti bidóʼ la? Peru guyuu caadxi qué ninacaʼ nuzuubacaʼ stiidxabe, neca gúdxicabe laacaʼ záticaʼ pa qué guzuubacaʼ diidxaʼ.

Gisela: Dxandíʼ la? Xi gúcacabe yaʼ.

Carla: Ora guireʼnu arrecreu güeniaʼ ni lii.

VOTACIÓN

Miguel: Diego, tuu nga rábiluʼ jma naquiiñeʼ gaca presidente.

Diego: Naa la? cadi nuaaʼ nin pur tobi de laacabe.

Miguel: Xiñee yaʼ.

Diego: Purtiʼ naa maʼ guliéʼ ti xaíque ni jma jneza runi mandar. Cumu nacaʼ xpinni Cristu la? maʼ guniéʼ qué zusaanaʼ de chinandaʼ laabe. Nga runi, qué zanda chuaaʼ nin pur tobi de laacabe. ¡Ah! nannuʼ xiñee runeʼ cré Jesús nga ti xaíque ni jma jneza runi mandar la?

Miguel: Qué gánnadiaʼ, ne cadi nuaaʼ gannaʼ.

Diego: Pue pa chuʼ dxi gacaláʼdxiluʼ gánnaluʼ ni la? ziuuladxeʼ gusieneʼ ni lii.

[Dibuju/foto ni zeeda lu yaza 3]

«Xiñee qué runi saludarluʼ bandera ne qué ruundaluʼ himno pue»

[Dibuju/foto ni zeeda lu yaza 4]

«Julio, chigudieeʼ lii ti invitación para cheluʼ saa stinneʼ»