Zanda guni binni ni na Dios neca maʼ huaniisi

Lu 19 stiʼ diciembre iza 2009 guyuunisa ti gunaa ni láʼ Ana ne ti xiiñiʼ ni laaca láʼ Ana, ndaaniʼ guidxi Málaga (riaanani ladu gueteʼ stiʼ España). Neca laasicabe nga nuucabe lade 2,352 binni ni guyuunisa España iza que la? nabé ridxagayaanu ni bíʼnicabe. Xiñee yaʼ. Purtiʼ primé gunaa ca napa 107 iza ne xiiñibe napa 83 iza.

Xi bicaa guiropaʼ gunaa riʼ gudiicaʼ laacaʼ Jiobá ne chuʼnísacaʼ yaʼ. Ra bizulú ca iza stiʼ 1970, ti vecina stícabe ni naca Testigu biʼniʼ invitar xiiñiʼ gunaa riʼ cheʼ ra nuu Grupu ni Ruundaʼ Libru stiʼ ca Binni Ridagulisaa ni raca ralidxi. Neca guyé Ana chupa chonna biaje, peru qué ñanda niniisibe lu stiidxaʼ Dios pur dxiiñaʼ stibe.

Gudiʼdiʼ si chii iza, bizulú cayuundaʼ chupa chonna de ca xiiñibe Biblia ne guyuunísacaʼ. Peru xiiñibe Mari Carmen nga gucané laabe para guibiguetaʼ chuuláʼdxibe guiziidibe de Dios ne bizulú biindané laabe Biblia. Qué nindaa laaca guyuulaʼdxiʼ jñaabidaʼ Mari Carmen ni rusiidiʼ Stiidxaʼ Dios. Biaʼsi chii de ca binnilídxibe biziidiʼ de Stiidxaʼ Dios.

Guiropaʼ gunaa ni láʼ Ana riʼ guizáʼ cayéchecaʼ dxi chichuunísacaʼ. Binnigola ni napa 107 iza ca guníʼ: «Guizáʼ maʼ guca Jiobá nachaʼhuiʼ né naa, purtiʼ bidiibe lugar gunebiaʼyaʼ laabe». Ne xiiñibe guníʼ: «Racalaʼdxeʼ guneʼ adorar Jiobá dede ora gueeda Paraísu ca, guneʼ ni nabe ne gucheecheʼ diidxaʼ biaʼ gándatiʼ».

Tobi de ca cosa ni jma riuulaʼdxiʼ guiropaʼ gunaa viuda riʼ nga ca guendaridagulisaa ca. Tobi de ca binnigola ni nuu ra ridagulisaacabe guníʼ: «Qué riaadxacabe nin ti guendaridagulisaa, ne nuucabe listu para guicábicabe ora cayuundaʼ Torre stiʼ ni rapa.

Ejemplu galán stícabe rusietenaláʼdxini laanu de Ana, ti viuda ni bibani dxiqué. Biblia na «qué riree be ndaani yuʼdu roʼ. Rusisaca be Dios ridxí ne huaxhinni, ne stale tiru riaana be sin go be para iníʼ né be Dios». Ne pur qué ñaadxabe raqué nga gúpabe ndaayaʼ de gúʼyabe Jesús dxi naca baʼduhuiiniʼ (Luc. 2:36-38). Neca maʼ nápabe 84 iza qué niníʼ íquebe maʼ huaniisibe para guni adorarbe Jiobá, ne ngaca nga ni zanda guininu de ca tocaya stibe ni nabani yanna.

Ñee nápaluʼ binnilídxiluʼ ni zaná gucaadiaga ni rusiidiʼ Biblia la? Ñee maʼ huadxaagaluʼ tuuxa binni ni maʼ huaniisi ni riuulaʼdxiʼ guiziidiʼ ora maʼ zigucheecheluʼ diidxaʼ la? Zanda gueeda gaca neca tobi de laacabe casi ca gunaa ni láʼ Ana ni bizéʼtenu lu relatu riʼ, purtiʼ zanda guni binni ni na Jiobá, Dios ni dxandíʼ, neca maʼ huaniisi.

[Ni caníʼ yaza 25]

«Guizáʼ maʼ guca Jiobá nachaʼhuiʼ né naa»

[Ni caníʼ yaza 25]

«Racalaʼdxeʼ guneʼ adorar Jiobá dede ora gueeda Paraísu ca»