Rietenalaʼdxuʼ la?

Ñee biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

• Pora ne paraa guni orarnu.

Biblia qué ruzeeteʼ diʼ pora ne paraapeʼ naquiiñeʼ guni orar binni. Luni rieeteʼ biʼniʼ orar ca xpinni Dios ora tiica ne ratiica. Nga runi, riuʼnu nayecheʼ ora gánnanu zanda guinínenu laabe ne zucaadiágabe laanu ratiica nuunu ne ora tiica guinínenu laabe (1/1, yaza 9).

• Ñee rusianda ca testigu stiʼ Jiobá binni pur fe ni napa la?

Ca testigu stiʼ Jiobá qué huayuu dxi gusiándacaʼ binni pur fe ni napa. Laacabe nánnacabe dxiiñaʼ ni jma risaca gúnicabe nga gucheechecabe ca diidxaʼ nacubi ne galán stiʼ reinu stiʼ Dios, cásica biʼniʼ Jesús. Nanna dxíchicabe ti cosa: cani dxandíʼ xpinni Cristu qué rusiándacaʼ binni pur fe ni napa para guihuinni dxandíʼ xpinni Cristu laacaʼ, sínuque rusihuínnicabe ti cosa jma risaca (1/1, yaza 21).

• Xii nga ni cadi naquiiñeʼ guidúʼyanu casi ti amuletu.

Nuu tu laa runi cré napa caadxi cosa casi talismán o amuletu poder para gapa laacaʼ. Peru ca xpinni Cristu qué ridúʼyanu lá Dios zacá, sínuque nápanu fe laabe ne rúninu stipa pur gúninu ni nabe. Zacá nga ridúʼyanu labe casi ti lugar ra zanda guilanu (Sof. 3:12, 13) (15/1 yaza 5 ne 6).

• Xi zacané cani maʼ bichaganáʼ para cadi gucheenecaʼ xheelacaʼ yaʼ.

Biyubi ximodo gusihuinnuʼ laabe nga binni ni jma risaca para lii lu guidubi Guidxilayú pur cani gábiluʼ laabe ne pur cani gúniluʼ. Biʼniʼ stipa para cadi chuʼ xiixa o tuuxa ni guxheleʼ laatu (Pro. 5:15-20) (15/1, yaza 14).

• Xi gucané Job para biʼniʼ huantar ca guendanagana beeda luguiáʼ.

Guníʼ íquebe xi guiráʼ modo biquiiñeʼ Jiobá espíritu ne poder stiʼ (Job 38:1-41; 42:1, 2). Ngaca nga ni zacané laanu. Zándaca rietenaláʼdxinu ca biaje maʼ bisihuinni Jiobá rizaalaʼdxiʼ laanu. Ne dede yanna rizaaláʼdxibe laanu zacá (15/1, yaza 29).

• Xi naquiiñeʼ gúninu ora maʼ cadídinu ra nagana ne caquiiñeʼ quixhe íquenu gúninu xiixa.

Para ti binni ni qué gapa fe la? ni jma nagueenda guni nga guixeleʼ de ca conseju stiʼ Dios. Zacá nga biʼniʼ Saúl, laa guníʼ ique jneza ngue ni biʼniʼ purtiʼ qué guinni Samuel. Peru para ti binni ni racalaʼdxiʼ chuulaʼdxiʼ Dios ni cayuni la? rudii cuenta jneza nga chinanda ca conseju ni zeeda lu Biblia (15/2, yaza 22).

• Xiñee maʼ qué niná Jiobá ñaca Saúl rey.

Guca mandar Saúl cueza dede ora gueeda ni riguixhená stiʼ Dios para guuti ti maniʼ, peru qué nuzuubabe diidxaʼ ne laapebe bidiibe ofrenda que. Laaca qué ninabe nunitilube ti guidxi ni nabé malu (15/2, yaza 22 ne 23).

• Ximodo rusihuínninu nanaláʼdxinu cosa malu.

Ra cadi gueʼ xhaatanu nisa dxuʼniʼ, cadi gúninu ca cosa ni nuu lu espiritismo ne chinándanu ni guníʼ Jesús ra bizeeteʼ cadi chuʼné binni ni cadi xheelaʼ. Cadi galán diʼ nga gúʼyanu película de idxa guidxa o cosa dxabaʼ, purtiʼ zucaa cani ladxidoʼno chuulaʼdxiʼ guni cosa dxabaʼ (Mat. 5:27, 28). Ne laaca cadi naquiiñeʼ guidxaaganu cani maʼ biree ndaaniʼ xquidxi Dios (15/2, yaza 29 dede 32).

• Xi naquiiñeʼ guinabadiidxanu laca laanu ante cuinu xi gúninu para chuʼnu nayecheʼ ti ratu.

«Lu ca últimu beeu ni maʼ gudídinu ca, ñee huayuuyaʼ película, xiixa ni ridiʼdiʼ lu televisión, o huaguiteʼ xiixa videojuego, o huayuundaʼ libru o historia ni caníʼ de magia la? Ñee rieneʼ pabiáʼ risaca nga gucaanaʼyaʼ guiráʼ ni zeeda de espiritismo la? o qué rizaaladxeʼ pa dxandíʼ runinani binni. Ñee huaníʼ iqueʼ ximodo ruuyaʼ Jiobá cani runeʼ para chuaaʼ nayecheʼ ti ratu la? Ñee maʼ biaa guuyaʼ chupa chonna de laacani la? Pa zacá ni, ñee maʼ gudixhe iqueʼ gusaanaʼ de guuyaʼ cani tobi si tiru ti cadi guniná cani xquendabiaaneʼ ne zacá gusihuinneʼ nadxieeʼ Jiobá ne ca ley sicarú stiʼ la?» (15/2, yaza 30.)

• Ñee maca nanna Dios zuchee Adán ne Eva la?

Coʼ. Bizáʼ Jiobá laacabe casi binni nuu xpiaaniʼ ne zanda cuícabe xi gúnicabe, zacá zanda de laasicabe gúʼyacabe pa zúnicabe ni na Dios o pa coʼ. Neca zanda guʼyaʼ Jiobá xi chiguizaaca despué la? riguíxhebe pora nga zanda gúnibe ni ne pora nga qué zanda diʼ gúnibe ni (1/4, yaza 13 dede 15).