Conseju galán para cani caʼruʼ guichaganáʼ ne para cani maʼ bichaganáʼ

«Cayabe ndi laatu [para] acaniá laatu guni tu ni jneza ne ni nachaʼhuiʼ, ti cadi chuʼ xiixa ucueeza laatu de ganaxhii tu Señor.» (1 COR. 7:35)

1, 2. Xiñee caquiiñeʼ gánnanu xi conseju rudii Biblia para cani caʼruʼ guichaganáʼ ne para cani maʼ bichaganáʼ.

 ORA galán modo ridxaaga ti hombre ne ti gunaa la? riuucaʼ nayecheʼ. Peru ora coʼ la? riuucaʼ xizaa ne rápacaʼ guendanagana. Nga runi, ca xpinni Cristu caquiiñecaʼ guluíʼ Dios laacaʼ xi gúnicaʼ. Peru cadi óraca si nga guyúbicabe ra nuu Bixhózecabe ni nuu guibáʼ para gacané laacabe. Stale de cani caʼruʼ guichaganáʼ nuucaʼ nayecheʼ stúbicaʼ, peru runi sentircaʼ nabé rucaa xhamígucaʼ o binnilídxicaʼ laacaʼ guyúbicaʼ ti xheelacaʼ. Xcaadxi racalaʼdxiʼ guichaganáʼ, peru qué ganda guidxélacaʼ tuuxa biaʼsi para laacaʼ. Ne cani maʼ bizulú ti compromisu, caquiiñeʼ gacanécabe laacaʼ ti ganda gúnicaʼ guiráʼ dxiiñaʼ ni raca lu ti guendaxheelaʼ. Ne pa maʼ bichagananu, o pa coʼ, guiranu ridxaagalunu guendanagana ra naquiiñeʼ gusihuínninu qué zuchéʼnenu Dios.

² Cani bizéʼtenu ca zanda gacanécani laanu chuʼnu nayecheʼ, peru laaca naquiiñeʼ gánnanu ndiʼ: zanda gacaneni laanu chuʼnu gaxha de Dios, o guxhéleni laanu de laabe. Nga runi, galán guidúʼndanu ca conseju bidii Pablu lu capítulo 7 stiʼ primé carta bicaabe ra nuu ca binni de Corinto, luni bidiibe conseju para cani caʼruʼ guichaganáʼ ne para cani maʼ bichaganáʼ. Laaca laabe guniʼbe bicaabe cani para uguube gana laanu gúninu «ni jneza [...] ti cadi chuʼ xiixa ucueeza laa[nu] de ganaxhii[nu] Señor» (1 Cor. 7:35). Laga cadúʼndanu ca conseju sicarú riʼ, guiníʼ íquenu ximodo guni adorarnu Jiobá jma jneza, gastiʼ naca pa maʼ bichagananu o pa coʼ.

Ti cosa nabé risaca ni naquiiñeʼ quixhe ique cada binni guni

3, 4. 1) Xi zanda guizaaca pa chuʼ xhaataʼ tuuxa xizaa pur ti binnilidxi o ti xhamigu ni caʼruʼ guichaganáʼ. 2) Ximodo racané conseju bidii Pablu laanu ora guidúʼyanu pa zachagananu o pa coʼ.

³ Ca judíu ni bibani lu primé siglu, biiyacaʼ nabé risaca nga guichaganáʼ binni. Ne zacaca riníʼ ique binni de stale guidxi yanna. Pa nuu tuuxa ni maʼ huaniisi ne caʼruʼ guichaganáʼ la? ca binnilídxibe ne ca xhamígube riuucaʼ xizaa ne riníʼ íquecaʼ caquiiñeʼ gábicaʼ laabe guxheleʼ lube ti ganda guidxélabe xheelabe. Zándaca gábicabe laabe gúnibe stipa pur guyúbibe tuuxa o dede guiníʼcabe tuu nga rábicabe jma zanda guichaganabe. Zándaca dede zuquiidxicabe laabe tuuxa ne dede guyúbicabe ximodo gunibiaʼbe ti binni. Peru cadi jneza diʼ guni binni zacá, purtiʼ zanda gutíndecabe, guninácabe ne guchiichicabe chupa binni ni nabé xhamigu.

⁴ Qué ñuu dxi ñabi Pablu binni guichaganáʼ o guiaana sin guichaganáʼ (1 Cor. 7:7). Nécapeʼ nayecheʼ guyuube ora bíʼnibe ni na Jiobá purtiʼ qué gápabe xheelabe, biʼniʼ respetarbe cani richaganáʼ. Cada xpinni Cristu naquiiñeʼ guʼyaʼ pa zachaganáʼ o pa ziaana stubi ne cadi gudii lugar gabi sti binni laa xi naquiiñeʼ guni.

Xi guiráʼ ribeendú tuuxa ora caʼruʼ guichaganáʼ

5, 6. Xiñee guluu Pablu gana ca xpinni Cristu guiaanacaʼ sin guichaganacaʼ.

⁵ Lu ca diidxaʼ ni gudxi Pablu ca xpinni Cristu de Corinto, bisihuínnibe xi guiráʼ zanda guni ti binni ni caʼruʼ guichaganáʼ lu xhiiñaʼ Dios  (biindaʼ 1 Corintios 7:8). Neca qué nichaganabe, qué ñuu dxi ñúnibe casi runi ca xaíque yuʼduʼ, laacaʼ riníʼ íquecaʼ jma risácacaʼ purtiʼ qué richaganacaʼ. Ni bíʼnibe nga guniʼbe xi guiráʼ cosa zanda guni tuuxa lu xhiiñaʼ Dios ora caʼruʼ guichaganáʼ. Xi guiráʼ nga zanda gúnicabe yaʼ.

⁶ Jma zanda guicaacabe intiica dxiiñaʼ ni qué ñanda nicaacabe pa nichaganácabe. Casi Pablu, gunda gúcabe «apóstol sti cani cadi judíu» (Rom. 11:13). Ora ridúʼndanu capítulo 13 dede 20 stiʼ Hechos, ridúʼyanu xi guiráʼ biʼniʼ Pablu lu xhiiñaʼ Dios: guzanebe xcaadxi misioneru, guyebe stale lugar ra qué huareeche ne gucanebe para bizulú neza binni ridagulisaa ndaaniʼ stale guidxi. Dxi bíʼnibe xhiiñaʼ Dios bidxaagalube stale guendanagana ni zándaca qué huayuu dxi guidxaagalunu (2 Cor. 11:23-27, 32, 33). Laabe bidxiilube guiráʼ ca guendanagana gúpabe purtiʼ gudixhe íquebe gacanebe binni gaca xpinni Cristu ne guizáʼ bisiecheʼ ngue laabe (1 Tes. 1:2-7, 9; 2:19). Ñanda ñúnibe guiráʼ ni maʼ bizéʼtenu ca pa ñápabe xheelabe ne xiiñibe la? Zándaca coʼ.

7. Ximodo runi chupa precursora jma lu xhiiñaʼ Reinu purtiʼ caʼruʼ guichaganacaʼ.

⁷ Stale xpinni Cristu riguixhe íquecaʼ gúnicaʼ jma lu xhiiñaʼ Reinu purtiʼ caʼruʼ guichaganacaʼ. Ngapeʼ nga ni bizaaca Sara ne Limbania, chupa precursora de Bolivia ni yegacané ndaaniʼ ti guidxihuiiniʼ ra guirutiʼ qué huacheeche diidxaʼ maʼ stale iza. Nécapeʼ gastiʼ biaaniʼ lugar que la? laacabe qué riuucabe xizaa pur ngue, sicaríʼ guníʼcabe: «Cumu gastiʼ radiu nin televisión lugar que la? randa runi binni ti cosa ni nabé riuulaʼdxiʼ: laani nga gúʼndacabe xiixa libru». Caadxi de ca vecinu stícabe biluiʼcaʼ laacabe caadxi libru ne revista yooxhoʼ ni maʼ qué raca yanna, peru ruundaruʼ ca binni que cani. Ndaaniʼ stale de ca yoo que ridxela ca precursora riʼ binni ni riuulaʼdxiʼ gucaadiaga de Dios, nga runi rindaa para gucheechecabe diidxaʼ guidubi ra nexheʼ gúnicabe dxiiñaʼ. Laacabe guníʼcabe ni gudxi ti gunaa ni maʼ nagola laacabe: «Pa maʼ bedandá ca testigu stiʼ Jiobá dede raríʼ la? ¡riníʼ nga mayaca gunitilú Dios guiráʼ ca binni malu!». Pur dxiiñaʼ cayuni ca precursora riʼ, stale de ca binni de lugar que mápeca riecaʼ ca guendaridagulisaa raca raqué.

8, 9. 1) Xi cá ique Pablu ora bizeeteʼ guiráʼ ni ribeendú cani caʼruʼ guichaganáʼ. 2) Xi guiráʼ zanda guni ca xpinni Cristu ni caʼruʼ guichaganáʼ.

⁸ Cani maʼ bichaganáʼ laaca ribeenducaʼ ni galán ora rucheechecaʼ diidxaʼ ca lugar ra huaxiéʼ raca dxiiñaʼ ca. Peru ca precursor ni caʼruʼ guichaganáʼ jma rúnicaʼ dxiiñaʼ ni qué zanda guni cani  maʼ bichaganáʼ ne cani napa xiiñiʼ. Ora guníʼ Pablu xi guiráʼ ribeendú binni lu xhiiñaʼ Jiobá ora caʼruʼ guichaganáʼ la? caniʼbe de pabiáʼ naroʼbaʼ dxiiñaʼ chigaca despué. Laabe rápabe gana chuʼ ca xpinni Cristu nayecheʼ cásica laabe ora gúnicaʼ xhiiñaʼ Dios.

⁹ Ti precursora ni caʼruʼ guichaganáʼ de Estados Unidos bicaa ca diidxaʼ riʼ: «Nuu tu riníʼ naquiiñeʼ guichaganáʼ binni para chuʼ nayecheʼ. Peru bidiéʼ cuenta cadi nga diʼ nga ni racané binni chuʼ nayecheʼ, sínuque gaca xhamigu Jiobá. Dxandíʼ ridiʼdiʼ binni ra nagana ora nuu stubi, peru pa guicá ique guni ni na Jiobá la? zabeendú stale cosa sicarú». Ne laaca guniʼbe: «Ruluíʼ si jma zanda guibani binni nayecheʼ ora caʼruʼ guichaganáʼ. Pa maʼ bichagananu, o pa coʼ la? nadxii Jiobá guiranu». Nabe nayecheʼ nuu baʼdudxaapaʼ riʼ purtiʼ rucheeche diidxaʼ ti lugar ra nabé caquiiñeʼ tu guni dxiiñaʼ riʼ. Guiráʼ ni caʼruʼ guichaganáʼ naquiiñeʼ guinabadiidxaʼ laca laa: «Ñee zanda guneʼ jma lu xhiiñaʼ Dios laga caʼruʼ guichaganaʼyaʼ la?». Zándaca gudiiluʼ cuenta nabé risaca nga ora caʼruʼ guichaganáʼ binni, purtiʼ zeeda gácani casi xiixa ni rusigaʼdeʼ Dios.

Cani racalaʼdxiʼ guichaganáʼ

10, 11. Ximodo racané Jiobá cani racalaʼdxiʼ guichaganáʼ peru qué ganda guidxela ti xheelaʼ.

¹⁰ Despué de tiidiʼ ti tiempu, stale xpinni Cristu riníʼ íquecaʼ guichaganacaʼ. Cumu rápacabe gana guidxélacabe tuuxa ni zanda gudiináʼ laacabe la? rinábacabe Jiobá gacané laacabe (1 Cor. 7:36).

¹¹ Nuu xpinni Cristu ñuulaʼdxiʼ nidxela ti xheelaʼ ni runi ni na Jiobá de guidubi ladxidóʼ. Pa zacá nuuluʼ la? biʼniʼ orar Jiobá gatigá (Fili. 4:6, 7). Neca maʼ xadxí de cabezuʼ, cadi guireeluʼ gana. Gunna riene Dios modo nuuluʼ ne zaguixhedxibe ladxidoʼloʼ ti cadi chuʼluʼ triste, purtiʼ nadxiibe lii (Heb. 13:6).

12. Xiñee galán guiníʼ ique chaahuiʼ binni ante gudii stiidxaʼ guichaganáʼ tuuxa.

¹² Pa maʼ cá íqueluʼ guichaganaluʼ, ne guiree tuuxa ni naʼ guichaganáʼ lii, xi naquiiñeʼ guʼnuʼ yaʼ. Primeru biiyaʼ pa naguidxi zuhuaa binni ca lu Stiidxaʼ Dios, purtiʼ nuu tiru dede binni ni cadi Testigu ñuulaʼdxiʼ nichaganáʼ ti xpinni Cristu. Nécapeʼ naná nga chuʼ binni stubi ora maʼ rapa gana guichaganáʼ, naquiiñeʼ guietenalaʼdxiʼ jma triste zabani ne zapa jma yuubaʼ pa guichaganáʼ tuuxa ni qué gacané laa. Ne cadi guiaandaʼ ndiʼ lii, ora maʼ guniʼluʼ «zachaganaʼyaʼ» la? napa xidé guʼnuʼ ni, ne naquiiñeʼ gudxiiluluʼ guiráʼ ni gueeda (1 Cor. 7:27). Nga runi, qué chuʼ dxi guichaganaluʼ tuuxa purtiʼ si caníʼ íqueluʼ maʼ qué ziuuruʼ tu guiniʼné lii despué. Zándaca guʼnuʼ xiixa ni gucaa lii guiníʼ íqueluʼ cadi jneza ni biʼnuʼ, ne zacá chuʼluʼ biaʼ dxi guibániluʼ (biindaʼ 1 Corintios 7:39).

Xi naquiiñeʼ guni tuuxa ante guichaganáʼ

13-15. Gunáʼ nga ca guendanagana ni riuu lu ti guendaxheelaʼ, ne xiñee naquiiñeʼ guiníʼ cani canazá de novio de laacani.

¹³ Casi maʼ bidúʼyanu, Pablu bisihuinni xi guiráʼ ribeendú cani caʼruʼ guichaganáʼ, peru qué ñuu dxi niniʼbe cadi jneza ni biʼniʼ ca xpinni Jiobá ora bichaganacaʼ. Gucanepeʼ espíritu santu laabe para gucaabe caadxi conseju para cani maʼ bichaganáʼ, ti gánnacaʼ xipeʼ nga ca guendanagana rapa binni ora richaganáʼ ne ximodo chuʼ xquendaxheelaʼ naguidxi.

¹⁴ Zándaca nuu guendaxheelaʼ caquiiñeʼ guchaacaʼ modo riníʼ íquecaʼ. Dxi nácacabe novio, zándaca guníʼ íquecabe guirútiruʼ nadxii casi nadxiicabe, ne zacaxácabe nga nga ni zacané laacabe guibánicabe nayecheʼ. Dxi bichaganácabe guníʼ íquecabe casi ora laacabe nga tobi de ca guendaxheelaʼ galán ni nabé riete lu stale cuentu, purtiʼ ruzulúcabe qué ziuu gastiʼ ni guchiiñaʼ laacabe. Pa nuzuhuaa ñeecabe yu la? ñénecabe zadxaagalúcabe guendanagana lu xquendaxheelacabe. Ne nécapeʼ nabé nadxiisaacabe, qué zucueeza nga laacabe de gápacabe guendanagana (biindaʼ 1 Corintios 7:28). a

¹⁵ Stale de cani nacubi bichaganáʼ gadxé si rácani para laacaʼ ora gúʼyacaʼ gadxé gadxé modo  riníʼ íquecaʼ de ca cosa ni jma risaca, ne nuu tiru dede riníʼ íquecaʼ xiñee bichaganacaʼ binni ca. Zándaca dede tindediidxacabe ora guiníʼcabe ximodo iquiiñecabe xpuéltucabe, xi gúnicabe ora gápacabe ti tiempu para guiziiláʼdxicabe, paraa chindézacabe ne pora chigánnacabe binnilídxicabe. Cada tobi de laacabe nápacabe modo stícabe, ne ante guichaganácabe huaxiéʼ bizaaláʼdxicabe modo laacabe, peru yanna ra maʼ bichaganácabe, maʼ ruchiichini laacabe ne ruluíʼ maʼ qué zanda guibánicabe galán pur laani. Nga runi, cani napa novio o novia, naquiiñeʼ guiniʼcaʼ de cani maʼ bizéʼtenu riʼ ante guichaganacaʼ.

16. Xiñee nabé risaca chuʼ cani maʼ bichaganáʼ tobi si ora gápacaʼ guendanagana.

¹⁶ Para ganda chuʼ ti guendaxheelaʼ nayecheʼ ne cueenducaʼ ni galán la? guirópacaʼ naquiiñeʼ gudxiilucaʼ ca guendanagana gápacaʼ. Guirópacabe naquiiñeʼ gúʼyacabe ximodo gusiniisicabe ca xiiñicabe, ximodo gúʼyacabe bixhózecabe ne jñaacabe ni maʼ zigola, ne cadi gudiicabe lugar guxheleʼ guendanagana ni gapa binnilídxicabe laacabe. Pa chinándacabe ca conseju zeeda lu Biblia, zuni chaahuicabe ca guendanagana stícabe —o zánnacabe ximodo gudxiilúcabe cani—, ne zacá zanda chúʼcabe tobi si ne guibánicabe nayecheʼ (1 Cor. 7:10, 11).

17. Xii nga ca cosa ni «nuu ndaani guidxilayú» ni jma ricá ique cani maʼ bichaganáʼ.

¹⁷ Pablu bizeeteʼ de sti guendanagana ni ridxaagalú cani maʼ bichaganáʼ lu 1 Corintios 7:32-34 (biindaʼ ni). Ti hombre ni maʼ bichaganáʼ «jma cá ique ni nuu ndaani guidxilayú riʼ», casi gudii ni gó binnilidxi, ni gácucabe, ra cuézacabe ne xcaadxi ni riquiiñecabe. Xiñee nabé ricá íquecabe guiráʼ nga yaʼ. Purtiʼ napa xidé gápabe xheelabe ne gudiibe ni caquiiñeʼ para chuʼ nayecheʼ. Dxiqué jma gunda gucuá íquebe gúnibe xhiiñaʼ Dios purtiʼ caʼruʼ guichaganabe, peru yanna maʼ napa xidé iquiiñebe tiempu ne stipa stibe para xheelabe. Ne ngaca nga ni naquiiñeʼ guni ti gunaa. ¡Galán nga riene Jiobá xi caquiiñeʼ ti binni ni maʼ bichaganáʼ para chuʼ nayecheʼ! Nanna Jiobá naquiiñeʼ guni cani maʼ bichaganáʼ stipa para  chuʼ xquendaxheelacaʼ naguidxi ne para gúnicaʼ ni la? zaquiiñecabe tiempu ne stipa ni biquiiñecabe lu xhiiñaʼ Dios ante guichaganácabe.

18. Xi naquiiñeʼ guni tuuxa né tiempu stiʼ despué de guichaganáʼ.

¹⁸ Ca diidxaʼ guníʼ Pablu que laaca rusiidicani laanu sti cosa nabé risaca. Ante guichaganáʼ tuuxa gupa stale tiempu para guni xhiiñaʼ Dios. Peru dxi maʼ bichaganabe maʼ riquiiñebe caadxi de tiempu ca para gúʼyabe xi caquiiñeʼ xheelabe. Ne ngaca nga ni naquiiñeʼ gúnibe né tiempu ni ribeebe para gúnibe caadxi cosa ni riuuláʼdxibe. Guiníʼ íquenu: «Xi zaníʼ ique xheelaʼ ti hombre pa nabé chichite né ca xhamigu cásica biʼniʼ ante guichaganáʼ yaʼ. O ximodo zuni sentir ti hombre pa nabé stale tiempu riquiiñeʼ xheelabe para chiganna ca xhamiga yaʼ. Nin qué zandaa zaníʼ ique cada tobi de laacabe maʼ huaxiéʼ nadxiisaacabe, zuni sentírcabe stúbicabe ne qué ziuucabe nayecheʼ. Peru qué zazaaca nga pa guirópacabe gúnicabe stipa para chuʼ xquendaxheelacabe naguidxi (Efe. 5:31).

Rinabaʼ Jiobá chuʼnu nayá nezalú

19, 20. 1) Xiñee cadi jneza guiníʼ ique binni qué ziuuné ni cadi xheelaʼ purtiʼ siʼ maʼ bichaganáʼ. 2) Xi guendanagana zándaca gueeda gapa cani maʼ bichaganáʼ pa chuʼcaʼ stale tiempu stúbicaʼ.

¹⁹ Guiráʼ ca xpinni Jiobá nánnacaʼ cadi naquiiñeʼ chúʼnecaʼ ni cadi xheelacaʼ. Nuu tu richaganáʼ purtiʼ riníʼ ique zacá maʼ qué zapa guendanagana ca. Peru, cadi purtiʼ si maʼ bichaganáʼ ti binni guiníʼ ique zucueeza nga laa. Tiempu gucuá Biblia, guyuu caadxi guidxi ni gupa ti lindaa, peru rápani ca binni si ni nuu ndaaniʼ guidxi que. Pa guireecabe de ndaaniʼ ni la? zándaca guiree gubaanaʼ lúcabe, o guuti binni malu laacabe. Zacaca nga né cani maʼ bichaganáʼ, pa chinándacabe ca ley ni maʼ gudixhe Jiobá para ti guendaxheelaʼ la? qué ziuu dxi gucheenécabe xheelacabe, purtiʼ Dios nga gudixhestí guendaxheelaʼ.

²⁰ Gunáʼ nga ca conseju ca yaʼ. Pablu bizeeteʼ de laacani lu 1 Corintios 7:2-5. Xheelaʼ si tuuxa nga napa derechu de gatané laa. Biblia na «naquiiñe ibani né [binni] xheela modo ma nexhe ibani binni ni ma bichaganáʼ». Triste guininu ni, peru nuu tu laa maʼ qué ratané xheelaʼ purtiʼ jma ricá ique guni dxiiñaʼ o pur rié de vacación stubi. ¡Feu nga gudii binni lugar guquiinde Binidxabaʼ laa ora nuu zacá ne chuʼné ni cadi xheelaʼ purtiʼ qué ganda «guni mandar [...] cuerpu» stiʼ! Jiobá zaguu ndaayaʼ xaíque stiʼ ti familia ora runi stipa pur gudii ni caquiiñeʼ binnilidxi sin guni xiixa ni uguu xquendaxheelaʼ ra naxoo (Sal. 37:25).

Ni ribeendunu ora ruzúʼbanu stiidxaʼ Jiobá

21. 1) Xiñee raca nagana para binni guʼyaʼ pa zachaganáʼ o pa coʼ. 2) Ximodo racané capítulo 7 stiʼ primé carta ni gucuá ra nuu ca binni de Corinto laanu.

²¹ Nabé nagana nga para guʼyaʼ binni pa zachaganáʼ o pa coʼ. Guiranu nácanu binni ruchee, ne pur laani nabé rápanu stale guendanagana. Nga runi, dede cani riguu Jiobá ndaayaʼ laacaʼ —pa maʼ bichaganáʼ o pa coʼ— laaca nuu biaje ridxaagalucaʼ guendanagana casi cani maʼ bizéʼtenu ca. Peru ca conseju ni bidii Pablu lu capítulo 7 stiʼ primé carta ni gucuá ra nuu ca Corinto, zacanécani laanu para guni chaahuinu ca guendanagana gápanu ne para gúninu ni jneza nezalú Dios, neca maʼ bichagananu o coʼ (biindaʼ 1 Corintios 7:38). Gastiʼ sti cosa jma risaca que chuulaʼdxiʼ Dios modo runi adorarnu laa. Pa chuulaʼdxiʼ Dios cani rúninu la? zanda guibáninu sin gátinu ndaaniʼ ti guidxilayú cubi, ra maʼ qué zapa hombre ne gunaa ca guendanagana ni rapa binni yanna.

[Cani cá ñee yaza]

Ñee nannuʼ xi guicábiluʼ la?

• Xiñee cadi naquiiñeʼ gucaacabe tuuxa guichaganáʼ.

• Ximodo jma jneza iquiiñeʼ ti xpinni Cristu ni caʼruʼ guichaganáʼ tiempu stiʼ.

• Xi zanda guni cani canazá de novio para gánnacaʼ xi naquiiñeʼ gúnicaʼ ora maʼ bichaganacaʼ.

• Xiñee cadi jneza guiníʼ ique binni qué ziuuné ni cadi xheelaʼ purtiʼ si maʼ bichaganáʼ.

[Guendarinabadiidxaʼ stiʼ párrafo]

[Ca dibuju/foto ni zeeda lu yaza 14]

Ca xpinni Cristu ni caʼruʼ guichaganáʼ jma nayecheʼ riuucaʼ ora riquiiñecaʼ tiempu sticaʼ para gúnicaʼ jma lu xhiiñaʼ Dios

[Dibuju/foto ni zeeda lu yaza 16]

Xi zándaca naquiiñeʼ guni tuuxa despué de guichaganáʼ