Guni crenu Jiobá, Dios stinu ni riguixhedxí ladxidoʼno
Guni crenu Jiobá, Dios stinu ni riguixhedxí ladxidoʼno
«Udíʼ nu diuxquixe Dios, Bixhoze Jesucristu Señor stinu, purti laca Bixhoze nu laa ne riá laanu. Laabe nga Dios stinu ne riguixhe dxí be ladxidóʼ no.» (2 COR. 1:3)
1. Xi caquiiñenu dede ora gálenu.
DEDE gálenu maʼ caquiiñeʼ chuʼ tu guʼyaʼ laanu ne quixhedxí ladxidoʼno. Casi ti baʼduhuiiniʼ, ruunaʼ purtiʼ racalaʼdxiʼ guicaacabe laa o gudiicabe ni gó. Ne neca maʼ huaniisinu, laaca riquiiñeʼ chuʼ tu quixhedxí ladxidoʼno, jmaruʼ si ora maʼ cadídinu lu guendanagana.
2. Xi cayabi Jiobá guiráʼ cani runi cré laabe.
2 Stale biaje, ca binnilídxinu ne ca xhamígunu riguixhedxicaʼ ladxidoʼno ora cayácanu xiixa. Peru nuu tiru, nin laacabe qué randa racanécabe laanu, purtiʼ nabé naná ni cadídinu. Dios si nga zanda gacané laanu ora tiica, dede né ora maʼ cadídinu ra jma naná. Stiidxabe cayabi laanu sicaríʼ: «Jiobá nuu gaxha de guiráʼ cani rinabaʼ ruaa laabe [...] ne zucaadiágabe ora guinábacaʼ gacanebe laacaʼ» (Sal. 145:18, 19). Ne laaca caniʼni: «Guielú Jiobá cayuuyaʼ ca binni runi ni jneza, ne rucaadiágabe ora rinábacaʼ gacanebe laacaʼ» (Sal. 34:15). Peru pa racaláʼdxinu gacané Jiobá laanu ne quixhedxí ladxidoʼno la? naquiiñeʼ guni crenu laabe. Zacá guníʼ David ni lu ti salmo: «Jiobá zeeda gaca casi ti lugar ra zanda guilá ti binni ni cuquiichinácabe laa, ti lugar ra zanda guilá ora cadiʼdiʼ ra nagana. Cani nanna tu laluʼ zuni crecaʼ lii, purtiʼ qué zusaanaluʼ cani cuyubi lii, Jiobá» (Sal. 9:9, 10).
3. Xi ejemplu biquiiñeʼ Jesús para bisihuinni nabé nadxii Jiobá ca xpinni.
3 Nabé rusisaca Jiobá ca xpinni. Zacá bisihuinni Jesús ni ora guníʼ: «Nanna tu ridoo chupa mani huiini pur chupa domiʼ, peru neca qué risaca came, qué ziaba si tobi de laacame layú pa qué na Dios. Ne laatu la? jma risaca tu que stale mani huiiniʼ. Nga runi cadi idxibi tu, purti dede guicha ique tu ma bigaba Dios» (Luc. 12:6, 7). Jiobá laaca biquiiñeʼ Jeremías, ti ni riguixhená, para gabi guidxi Israel ca diidxaʼ riʼ: «Qué huayuu dxi gusaanaʼ de gannaxhieeʼ lii. Nga runi, dede yanna rusihuinneʼ nadxieeʼ lii» (Jer. 31:3, La Palabra de Dios para Todos).
4. Xiñee zanda guni crenu cani maʼ guníʼ Jiobá guni.
4 Ora cadídinu ra nagana la? zatadxí ladxidoʼno pa guni crenu Jiobá ne guni crenu zaca guiráʼ ni maʼ guniʼbe. Naquiiñeʼ guiníʼ íquenu casi Josué, laa guníʼ: «Huayaca guiráʼ diidxaʼ sicarú ni huayabi Jiobá laatu, Dios stitu. Maʼ guca guirácani para laatu. Nin tobi de laacani qué liica huachee» (Jos. 23:14). Ne neca tiidinu ra jma nagana, zanda guni crenu «jneza runi Dios» ne qué ziuu dxi gusaanabe laanu pa qué guixélenu de laabe (biindaʼ 1 Corintios 10:13).
5. Xi racané laanu quixhedxinu ladxidóʼ binni.
5 Pablu guníʼ: Jiobá nga «Dios stinu ne riguixhe dxí be ladxidóʼ no». Ca diidxaʼ ca rusihuínnicani riguixhedxí Jiobá ladxidóʼ ca binni ni cadiʼdiʼ lu xiixa guendananá. Ne ngapeʼ nga ni runi Bixhózenu ni nuu guibáʼ (biindaʼ 2 Corintios 1:3, 4). Guirutiʼ ne gastiʼ ni zucueeza laabe de gacanebe ca binni ni nadxii laabe guidubi xhiálmacaʼ. Ne nápabe guiráʼ ni caquiiñebe para gúnibe ni. Cásica modo racanebe laanu, zacaca zanda quixhedxinu ladxidóʼ ca bíʼchinu ne ca bizáʼnanu «ora tiica acaná ladxidóʼ [caʼ]». Para nga «riziʼdi nu usieche nu stobi ni cayacaná ladxidóʼ, cásica bisieche [Dios] laanu». ¡Né ca diidxaʼ ca bisihuinni Pablu guirútiruʼ zanda quixhedxí ladxidoʼno cásica runi Jiobá ni!
Ni racané laanu gudxíʼlunu xiixa yuubaʼ ni cadídinu
6. Xii nga ca cosa ni nabé runiná laanu.
6 Stale biaje riquiiñenu quixhedxícabe ladxidoʼno. Tobi de ca yuubaʼ jma naná para laanu nga ora gati ti binnilídxinu, jmaruʼ si pa gati xheelanu o ti xiiñinu. Peru laaca nabé racaná binni ora chuʼ tu guni menu laa, ora gaca huará, ora maʼ zigola, ora pobre laa, ora chuʼ guendanagana lu xquendaxheelaʼ o pur guiráʼ ni cayaca ndaaniʼ guidxilayú riʼ.
7. 1) Xi riquiiñenu ora maʼ cadídinu lu xiixa guendanagana. 2) Xi zanda guni Jiobá ora cayuubaʼ ladxidoʼno pur xiixa guendanagana.
7 Ora cadídinu ra nagana nga jma caquiiñeʼ chuʼ tu quixhedxí ladxidoʼno, xquendabiaaninu, tu gacané laanu chuʼnu nazaaca ne chuʼnu galán nezalú Dios. Guininu de ni rizaaca ladxidoʼno. Biblia na nuu tiru zanda guiuubaʼ ni ne gacaná ni (Sal. 51:17). Peru laaca rusihuínnini Jiobá cusianda cani cayuubaʼ ladxidóʼ ne cuchéndabe venda ra naná laacaʼ (Sal. 147:3). Neca guidxaagalunu xiixa ni jma nagana, zacané Jiobá laanu pa gusihuínninu nápanu fe ora guni orarnu laa ne gúninu ni na ca mandamientu stibe (biindaʼ 1 Juan 3:19-22 ne 5:14, 15).
8. Ximodo racané Jiobá laanu para gatadxí xquendabiaaninu.
8 Laaca caquiiñeʼ chuʼ tu quixhedxí xquendabiaaninu purtiʼ nuu stale guendanagana ni runiná ni. Né stipa si stinu, qué zanda diʼ gudxíʼlunu cani guidxaagalunu. Laaca ni gucané salmista que nga ni zanda gacané laanu, laa biindaʼ sicaríʼ: «Ora bidale cani ruchiiñaʼ xquendabiaaneʼ, lii gudixhedxiluʼ xhialmaʼ pur guiráʼ ni gúdxiluʼ naa» (Sal. 94:19). Ne Pablu laaca bicaa: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa. Ne óraque zaguixhe dxí ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu, purti nuu né tu Cristu Jesús tobi si» (Fili. 4:6, 7). Pa guidúʼndanu Biblia ne guiníʼ íquenu de laani la? zacanécani para gatadxí xquendabiaaninu ti cadi chúʼpenu xizaa (2 Tim. 3:15-17).
9. Xi zanda gacané laanu ora cadxíbinu.
9 Nuu tiru runi sentirnu ruluíʼ qué zanda gúninu ni na xiixa mandatu zeeda lu Biblia o xiixa dxiiñaʼ gudiicabe laanu lade ca binni ridagulisaa, peru zareʼnu gana pa guiníʼ íquenu zacá. Laaca zanda gacané Jiobá laanu ne quixhedxí ladxidoʼno ora guizaacanu zacá. Guzéʼtenu ti ejemplu. Dxi bibí Josué para sániruʼ nezalú ca israelita ti ganda gucaalucaʼ ca guidxi jma nadipaʼ que, gudxi Moisés guidxi que sicaríʼ: «Lagaca nadxibalú, ne lagaca nadipaʼ. Cadi guidxíbitu ne cadi gacadititu nezalúcabe, purtiʼ Jiobá Dios stiluʼ nga ni ziné lii. Qué zusaanadibe lii stúbiluʼ» (Deu. 31:6). Cumu gucané Jiobá Josué la? biʼniʼ ganarbe ca xhenemígucabe ne guluube ca israelita lu Layú ni Bizabiruaa Dios. Caadxi iza ante, laaca biiyaʼ Moisés ximodo gucané Jiobá laa ora gudiʼdiʼ ndaaniʼ nisadóʼ Xiñáʼ que (Éxo. 14:13, 14, 29-31).
10. Xi zacané laanu ora maʼ cayaca huaranu pur ca guendanagana ni cadxaagalunu.
10 Ca guendanagana ni ridxaagalunu laaca runi huará cani laanu. Ora ridoʼno guendaró ni gacané laanu, guiziiláʼdxinu, gúninu ejerciciu ne gácanu nayá la? riuu xcuérpunu nazaaca. Peru laaca galán guiníʼ íquenu ni ruzeeteʼ Biblia de ni chiguni Dios, purtiʼ zacanécani laanu gudxíʼlunu ca guendanagana gápanu. Ora tiidinu lu xiixa guendanagana ni uguu laanu triste, naquiiñeʼ guietenaláʼdxinu ejemplu stiʼ Pablu ne ca diidxaʼ ni guniʼbe riʼ: «Ladu tiisi chuu du cabeza ni nagana laadu, peru ruluíʼ be laadu modo iréʼ du de laani. Stale tiru qué riene du xiñee reeda ni luguiá du, peru qué riréʼ du gana. Nuu stale tu canaladxi laadu, peru qué rusaana Dios laadu. Neca huayuniná cabe laadu dede ruluíʼ ma qué zanda guiasa du, peru riasa du runi seguir du» (2 Cor. 4:8, 9).
11. Xi zanda gacané laanu ora chuʼ xiixa ni gacalaʼdxiʼ guxheleʼ laanu de Dios.
11 Caadxi de ca guendanagana ni rápanu laaca zanda guxhélecani laanu de Dios. Peru ora guizaacanu zacá, zanda gacané Bixhózenu ni nuu guibáʼ laanu. Stiidxabe cayabi laanu sicaríʼ: «Jiobá cayacané cani cayaba, ne candísabe guiráʼ cani» caguude (Sal. 145:14). Xi zanda gacané laanu para cadi guixélenu de Jiobá yaʼ. Guidxíñanu ra nuu ca binnigola ni nuu ra ridagulisaanu ti gacanecaʼ laanu (Sant. 5:14, 15). Sti cosa ni racané laanu cadi guixélenu de Jiobá nga cadi gusaana de guiníʼ íquenu de guendanabani ni qué ziuu dxi guiluxe ni maʼ guniʼbe gudiibe laanu (Juan 17:3).
Ejemplu stiʼ ca binni ni gudixhedxí Dios ladxidóʼ
12. Ximodo gudixhedxí Jiobá ladxidóʼ Abrahán.
12 Ti salmista gudxi Jiobá ca diidxaʼ riʼ: «Bietenalaʼdxiʼ ni gúdxiluʼ xpínniluʼ, ni guʼdxuʼ naa cuezaʼ. Laani nga ni riguixhedxí ladxiduáʼ ora cadideʼ ra nagana, purtiʼ stiidxaluʼ nga ni rusibani naa» (Sal. 119:49, 50). Ca dxi stinu riʼ nápanu Stiidxaʼ Dios, luni zeeda stale ejemplu stiʼ binni ni gudixhedxibe ladxidóʼ. Guidúʼyanu ejemplu stiʼ Abrahán. Zándaca nabé guyuube xizaa ora gúnnabe chigunitilú Dios guidxi Sodoma ne Gomorra. Ngue runi gunabadiidxabe Jiobá: «Ñee zunduubaluʼ binni ni runi ni jneza ra guutiluʼ ca binni malu la?». Gudixhedxí Jiobá ladxidoʼbe ora guníʼ qué zunitilú ca guidxi que pa guidxela cincuenta si binni ni nachaʼhuiʼ ndaaniʼ cani. Peru Abrahán gunabadiidxaʼ laabe xcaayuʼ biaje xi zazaaca pa qué guidxélabe biaʼ que. Primeru guníʼ Abrahán de cuarenta y cinco binni, de raqué maʼ biétebe cuarenta, treinta, gande ne chii. Bicaadiaga Dios laabe sin nidxiichi, ne gudxi laabe qué zunitilú Sodoma pa guidxela neca chii si binni nachaʼhuiʼ raqué. Neca qué nidxélabe nin chii binni nachaʼhuiʼ, bilabe Lot ne ca xiiñidxaapaʼ (Gén. 18:22-32; 19:15, 16, 26).
13. Ximodo bisihuinni Ana runi cré Jiobá.
13 Guiníʼ íquenu xi bizaaca né Ana, xheelaʼ Elqaná. Nécapeʼ nabé rápabe gana gápabe xiiñibe, guyuube triste purtiʼ qué zanda gápabe nin ti baʼduʼ. Ngue runi, biʼniʼ orarbe Jiobá de modo nuube, ne gudxi Elí, xaíque stiʼ cani ruzaaquiʼ guʼxhuʼ, laabe: «Dios stiʼ Israel gudii lii ni gunabuʼ laa». Gutadxí ladxidóʼ Ana ne «maʼ qué liica nihuinni [...] pa nuube xizaa» (1 Sam. 1:8, 17, 18). Bisaanabe guiráʼ ni lu naʼ Jiobá, purtiʼ runi crebe zuni ni gunábabe laa. Qué gánnadibe ximodo chiguizaaca ca cosa que, peru gutadxí ladxidoʼbe. Gudiʼdiʼ si dxi, bicabi Dios oración stibe ra gucaxiiñibe ne gúpabe ti baʼduhuiiniʼ ni biree lá Samuel (1 Sam. 1:20).
14. Xiñee biquiiñeʼ David chuʼ tu quixhedxí ladxidóʼ, ne tu gunábabe ni.
14 David nga sti hombre ni bizuubaʼ diidxaʼ ne gudixhedxí Jiobá ladxidóʼ. Jiobá nga Dios ni «ruuyaʼ ni nuu ndaaniʼ ladxidóʼ binni». Ngue runi, ora gulibe hombrehuiiniʼ riʼ para gueeda gaca rey stiʼ Israel, nánnabe runi ni jneza ne riuulaʼdxiʼ guni adorar Dios (1 Sam. 16:7; 2 Sam. 5:10). Peru dxi maʼ nácabe rey, guyuunebe Bat-seba ne biyúbibe modo gucaachibe ni ora biʼniʼ mandarbe gati xheelaʼ gunaa ca. Ora bidiibe cuenta nabé feu ni bíʼnibe, biʼniʼ orarbe Jiobá: «Cumu nabé rilaseláʼdxiluʼ binni la? bixhá donda stinneʼ. Gudiibiʼ guendaruchee stinneʼ ne bisiá donda stinneʼ. Purtiʼ nannaʼ maʼ bicheeniáʼ lii, ne donda stinneʼ zuhuaa nezaluáʼ guiráʼ ora» (Sal. 51:1-3). Cumu guca arrepentirbe de guidubi ladxidoʼbe la? bitiidilaʼdxiʼ Dios stóndabe. Peru naná modo gudíxebe cani bíʼnibe (2 Sam. 12:9-12). Neca zaqué, bilaselaʼdxiʼ Bixhózebe ni nuu guibáʼ laabe ne gudixhedxí ladxidoʼbe.
15. Ximodo gucané Dios Jesús ante gati.
15 Jesús laaca bidxaagalú stale guendanagana dxi bibani lu Guidxilayú riʼ. Bidii Dios lugar tiidibe ca guendanagana que, peru qué liica nucheenebe laa. Jesús guca ti binni sin donda ne bizuubaʼ stiidxaʼ Dios guiráʼ ora, zacá bisihuínnibe runi crebe zacané Bixhózebe laabe ne bisihuínnibe Dios nga napa derechu de guni mandar. Dxi mayaca guinaazecabe laabe ne guuticabe laabe, biʼniʼ orarbe Dios sicaríʼ: «Cadi gaca ni rabeʼ, sínuque ni na luʼ». De raqué beeda ti ángel ra nuube para gudii stipa laabe (Luc. 22:42, 43). Zaqué gudixhedxí Jiobá ladxidoʼbe, gucané laabe ne bidii stipa ni caquiiñebe hora que.
16. Ximodo zacané Jiobá laanu pa ruluíʼ zuuticabe laanu pur fe stinu.
16 Laaca zanda gacané Jiobá laanu para cadi guchéʼnenu laa, dede né ora guidxaagalunu guendanagana ra zándaca gueeda gátinu pur fe stinu. Ne laaca riguixhedxibe ladxidoʼno purtiʼ maʼ guniʼbe zusibánibe ca binni ni maʼ guti. Casi na Stiidxaʼ Dios: «Ni unitilú be últimu nga enda guti» (1 Cor. 15:26). ¡Nabé maʼ racaláʼdxinu guidúʼyanu dxi gaca nga! Zusibani Dios guiráʼ gueʼtuʼ ni nuu lu xquendabiaaniʼ, ládecabe nuu ca xpínnibe ni qué nusaana laabe ne stáleruʼ binni (Juan 5:28, 29; Hech. 24:15). Ratadxí ladxidoʼno ne riuʼnu gana ora runi crenu zuni Jiobá ni maʼ guníʼ, jmaruʼ si ora nuu tu canazananda laanu.
17. Ximodo riguixhedxí Jiobá ladxidoʼno ora gati ti binnilídxinu.
17 Jiobá riguixhedxí ladxidoʼno ora rabi laanu zandisaʼ ca binnilídxinu ni nuu ndaaniʼ Seol para guibánicaʼ ndaaniʼ Guidxilayú, dxi ca maʼ qué ziuu guiráʼ yuubaʼ cadídinu yanna. Ne laaca rusiidibe laanu zalá «jma binni» ora gunduuxebe guidxilayú malu stiʼ Binidxabaʼ, ca binni ni guilá zanda guidxaagalucaʼ cani guiasa de lade gueʼtuʼ para guibánicaʼ lu guidxilayú cubi ne gusiidicabe laacaʼ de Dios (Apo. 7:9, 10). ¡Ti ndaayaʼ naroʼbaʼ nga guiráʼ ni chigaca riʼ!
Qué ziuu dxi gusaana Jiobá de gapa laanu
18, 19. Ximodo huayacané Jiobá ca xpinni ora rizanándacabe laacaʼ.
18 Moisés bicaa ti canción ni gudixhedxí ladxidóʼ ca israelita: «Dios ni qué ziuu dxi gati nga ra zanda guilaluʼ, qué ziuu dxi guiráʼ poder stibe ne laabe nga gápabe lii» (Deu. 33:27, La Palabra de Dios para Todos). Ne Samuel, ni riguixhená gudxi laacabe ca diidxaʼ riʼ gudiʼdiʼ si caadxi iza despué: «Cadi guiree cueʼtu de chinándatu Jiobá, ne napa xidé gúnitu ni na Jiobá de guidubi ladxidoʼto. [...] Jiobá qué zusaana xquidxi purtiʼ nabé risaca labe» (1 Sam. 12:20-22). Casi maʼ bidúʼyanu ca, pa qué gusaana de gúninu ni nabe ne guni adorarnu laabe la? qué ziuu dxi gusaanabe laanu. Zacanebe laanu guiráʼ ora iquiiñenu laabe.
19 Lu ca últimu dxi jma nagana riʼ, qué huasaana Jiobá de uguu gana xquidxi ne quixhedxí ladxidóʼcabe. Maʼ raca jma de ti siglu, mil de ca xpinni Cristu huazanándacabe laacaʼ ne huaseguyoocabe laacaʼ pur cani runi crecaʼ. Guiráʼ cani huazaacacabe rusihuínnicani rapa Dios ca xpinni ora ridíʼdicaʼ ra nagana. Guininu ejemplu stiʼ ti xpinni Cristu de Unión Soviética, ti guidxi ni guyuu dxiqué. Guníʼcabe guieeguyoobe 23 iza pur fe stibe, neca zaqué, qué ñaadxaʼ laabe ca libru ne ca revista ni bisiidiʼ laabe de Dios, guluucani gana laabe ne gudixhedxícani ladxidoʼbe. Laabe guniʼbe: «Ca iza biseeguyoocabe naa que, biziideʼ guneʼ cré zacané Jiobá naa, ne bidiibe stipa naa» (biindaʼ 1 Pedro 5:6, 7).
20. Xiñee zanda guni crenu qué ziuu dxi gusaana Jiobá laanu.
20 Qué gánnanu xi guiráʼ zadxaagalunu, peru intiica gueeda, galán gúninu guietenaláʼdxinu ca diidxaʼ ni bicaa salmista riʼ: «Jiobá qué liica zusaana xquidxi stubi» (Sal. 94:14). Peru cadi laasinu nga caquiiñenu chuʼ tu quixhedxí ladxidoʼno, laaca caquiiñeʼ quixhedxinu ladxidóʼ sti binni. Lu sti tema ca zazíʼdinu ximodo zanda quixhedxinu ladxidóʼ cani cayacaná lu guidxilayú ra dxaʼ guendanagana riʼ.
Xi nicábinu
• Gunáʼ caadxi de ca cosa ni zanda guniná laanu.
• Ximodo riguixhedxí Jiobá ladxidóʼ ca xpinni.
• Xi rudii stipa laanu ora ruluíʼ zuuticabe laanu pur fe stinu.
[Guendarinabadiidxaʼ stiʼ párrafo]
[Cuadro ne dibuju/foto ni zeeda lu yaza 25]
XIMODO ZANDA GUDXÍʼLUNU CA GUENDANAGANA NI
▪ guniná ladxidoʼno Sal. 147:3; 1 Juan 3:19-22; 5:14, 15
▪ guniná xquendabiaaninu Sal. 94:19; Fili. 4:6, 7
▪ guni huará laanu 2 Cor. 4:8, 9
▪ zándaca guxheleʼ laanu de Dios Sal. 145:14; Sant. 5:14, 15
