Ni rinabadiidxaʼ cani ruundaʼ

Xi guneʼ ora qué ganda guieneʼ xiixa ni guundaʼ lu Biblia o caquiiñeʼ gacané tuuxa naa né ti guendanagana stinneʼ yaʼ.

Proverbios 2:1-5 caguu gana laanu para gúninu stipa pur gunibiaʼnu Dios ne gácanu binni ni riene, peru naquiiñeʼ gúninu stipa casi runi tuuxa ni ruyubi xiixa tesoro ni gaʼchiʼ. Nga runi, naquiiñeʼ gúninu stipa pur guiénenu modo ricabi Biblia xiixa ni racaláʼdxinu gánnanu. Ngaca nga ni naquiiñeʼ gúninu ti gánnanu ximodo guni chaahuinu xiixa guendanagana gápanu. Ximodo zanda guʼnuʼ nga yaʼ.

Lu ca yaza 33 dede 38 stiʼ libru Benefíciese de la Escuela del Ministerio Teocrático zeeda ti capítulo ni láʼ «La investigación eficaz» (galán guʼndaʼ chaahuinu), laani cusiéneni ximodo zanda iquiiñenu guiráʼ ni maʼ bidii «mozo ni nuu xpiaaniʼ ne ni runi jneza» laanu (Mat. 24:45). Lu yaza 36 zeeda ximodo jma zanda iquiiñenu guiráʼ ca Índice de las publicaciones Watch Tower, ra zeeda ti lista de stale tema ne textu stiʼ Biblia. Zacaneni lii guyúbiluʼ xiixa diidxaʼ ne xiixa versículo ne zacá zadxélaluʼ lu ca libru ne revista de tema ni rapuʼ gana gannuʼ ca. Cadi guireeluʼ gana ora maʼ cuyubuʼ xiixa ni racalaʼdxuʼ gannuʼ ne ora rapuʼ gana guidxeʼluʼ xi conseju cudii xquidxi Dios de xiixa ni racalaʼdxuʼ guʼnuʼ. Bietenalaʼdxiʼ, casi ñaca cuyúbiluʼ tesoro ni gaʼchiʼ, ne para nga riquiiñeʼ tiempu ne stipa.

Cadi guiaandaʼ laanu qué rusiene diʼ ca libru ne ca revista stinu guiráʼ ca versículo ni zeeda lu Biblia ne laacaʼ qué rusiene cani guiráʼ ni zándaca guinabadiidxanu. Ne nuu tiru, ora rusiéneni ti textu, zándaca cadi cusiéneni ni racaláʼdxinu gánnanu. Ne nuu biaje, rireeruʼ xcaadxi ni ñuuláʼdxinu ñánnanu purtiʼ qué ruzeeteʼ diʼ Stiidxaʼ Dios xi guiráʼ guca lu ti relatu. Nga runi, cadi guiráʼ diʼ biaje zanda guidxélanu xiixa ni racaláʼdxinu gánnanu nagueendaca. Ora guizaacanu zacá, cadi galán diʼ guininu modo rábinu naquiiñeʼ guiénenu xiixa ni qué zanda guicábinu yanna. Qué zabeendunu gastiʼ pa tindediidxanu né xiixa ni qué zacané laanu guizíʼdinu jma de Dios o xiixa ni qué zuquidxi fe stinu (1 Tim. 1:4; 2 Tim. 2:23; Tito 3:9). Nin Betel ni nuu Brooklyn nin xcaadxi yoo Betel qué zanda guicábicaʼ xiixa ni caʼruʼ gusiene ca guiʼchiʼ ni rudii xquidxi Dios laanu. Naquiiñeʼ chuʼnu nayecheʼ purtiʼ rusiidiʼ Stiidxaʼ Dios laanu ni naquiiñeʼ gánnanu para guibáninu jneza. Caadxi de ca cosa ni qué nicá lu Biblia, zanda gacanécani laanu para gusihuínninu pabiáʼ naroʼbaʼ fe nápanu Dios ni guníʼ xi guicá lu Biblia (biiyaʼ libru Acerquémonos a Jehová yaza 185 ne 186).

Yanna, pa maʼ bíʼniluʼ guiráʼ ni caquiiñeʼ para guidxeʼluʼ xiixa ni racalaʼdxuʼ gannuʼ, peru gastiʼ ni cusiene de laani, xiruʼ naquiiñeʼ guʼnuʼ yaʼ. Zanda guiníʼneluʼ ti binnigola ni nuu lade ca binni ridagulisaa o sti xpinni Cristu ni maʼ huaniisi lu stiidxaʼ Dios. Ca xpinni Cristu ca nabé nánnacaʼ stale de lu Biblia ne maʼ xadxí de cayúnicaʼ ni na Dios lu xquendanabánicaʼ. Zanda iquiiñeluʼ ca conseju gudiicabe lii, purtiʼ laacabe runibiáʼcabe lii ne zuyúbicabe modo gacanécabe lii, jmaruʼ si ora guidxaagaluluʼ xiixa guendanagana ne ora naquiiñeʼ quixheʼ íqueluʼ guʼnuʼ xiixa lu xquendanabániluʼ. Ne lu ca oración gúniluʼ laaca naquiiñeʼ guzeeteluʼ ni naguu xizaa lii. Gunabaʼ Dios gudii lii espíritu santu, «purtiʼ Jiobá nga rudii guendabiaaniʼ [...] ne guendariene» (Pro. 2:6; Luc. 11:13).