¡Ca cosa nacubi chiguiree lu revista ni riuundaʼ!

XHÍDXINI LU

¡Ca cosa nacubi chiguiree lu revista ni riuundaʼ!

Maʼ bidxaa caadxi cosa lu revista Torre stiʼ ni rapa ni riuundaʼ, jma galán modo chiguiree ni yanna ne zacaneni laanu para guiénenu ca cosa risaca ni zeeda lu Stiidxaʼ Dios jma nagueenda (Sal. 1:2; 119:97).

Maʼ raca tapa iza de caree chupa clase revista riʼ, tobi para gucheechenenu diidxaʼ ne stobi para ca testigu stiʼ Jiobá ne para ca binni ni cayuundaʼ Biblia ni rapa gana guiniisi lu stiidxaʼ Dios.

Ti xpinni Cristu ni maʼ xadxí de nuu ndaaniʼ xquidxi Dios guníʼ: «Dxi biree primé revista Torre stiʼ ni rapa ni riuundaʼ, guníʼ iqueʼ: “¡Nabé sicarú revista riʼ ne zindani ndaaniʼ ladxiduáʼ!”. Ne zaqué gúcani, modo rusiéneni ca cosa ni jma risaca zeeda lu Biblia yendani dede ndaaniʼ ladxiduáʼ. Xquíxepeʼ laatu pur ni cusigáʼdetu laadu riʼ». Sti xpinni Cristu bicaa: «Racalaʼdxeʼ cueeʼ stale hora para guundaʼ revista riʼ stubeʼ ne iquiiñeʼ Biblia con referencias stinneʼ». Ribézadu laaca guiníʼ íqueluʼ casi ca binni riʼ.

Ñee rietenalaʼdxuʼ padxí bizulú biree revista Torre stiʼ ni rapa la? ¡Dede iza 1879! Ne cayándaruʼ cayácani pur ndaayaʼ ne pur espíritu stiʼ Jiobá (Zac. 4:6). Lu ti gayuaa treinta y tres iza ni maʼ gudiʼdiʼ de caree ni, maʼ huadxaa modo riree primé yaza stini caadxi biaje. Yanna, lu guidubi iza 2012, cada revista guiree zedaneni ti dibuju ra careeche diidxaʼ lu primé yaza stini. Zacá qué zusiáʼndanu dxiiñaʼ ni bidii Dios laanu gúninu, gusiidiʼ chaahuinu binni de Reinu stiʼ Jiobá (Hech. 28:23). Lu guiropa yaza stini zadxélanu laaca foto ni cá lu primé yaza ca, peru yanna maʼ zusiéneni xcaadxi cosa ne paraa guleecabe foto ca. Guiráʼ beeu zusietenalaʼdxiʼ ni laanu rucheeche ca xpinni Jiobá diidxaʼ «idubi naca guidxilayú» (Mat. 24:14).

Peru zeedaruʼ xcaadxi cosa nacubi lu revista riʼ. Casi ca guendarinabadiidxaʼ ni reeda ora riluxe cada tema, zuuyaluʼ zeedacani lu primé yaza ra ruzulú tema ni chiguiuundaʼ ca. Zacá zánnaluʼ dede ante xii nga cani jma chiguieeteʼ luni ne zanda guidxélaluʼ xi guicábiluʼ ora maʼ cayuundaluʼ revista Torre stiʼ ni rapa. Naquiiñeʼ gánnanu ora guiluxe guiuundaʼ tema ca nga guinabadiidxacabe cani, cásica maca rácani. Laaca zuuyaluʼ jma xilaga cueʼ ca yaza stini, jma rihuinni númeru stiʼ ca yaza ca ne númeru stiʼ ca párrafo ca.

Laaca zedaneni ti tema ni láʼ «Cani naguu chaahuiʼ xquidxi Dios». Tema riʼ zusietenaláʼdxini laanu ca cosa ni jma risaca cayuni ca testigu stiʼ Jiobá tiempu riʼ. Laaca zeeda sti tema huiiniʼ ra na «Bíʼnicabe xhiiñacabe né stale gana». Lu tema riʼ zeeda relatu stiʼ ca xpinni Cristu ni nabani yanna, ne zahuinni pabiáʼ nayecheʼ nuucabe ne ridxátipa ladxidóʼcabe purtiʼ cayacanécabe ra jma caquiiñeʼ tu gucheeche stiidxaʼ Reinu.

Racaláʼdxidu gacané revista riʼ lii cada biaje cueeluʼ tiempu para gúʼndaluʼ Stiidxaʼ Dios né laani.

Cani bicaani