Laanu, ca xpinni Jiobá, nápanu caadxi cosa ni zeeda gaca casi ti herencia bisaananécabe laanu. Zeedani lu ca libru ne revista stinu, peru laaca nápanu foto, carta ne relatu ni bizaaca tuuxa. Laaca nápanu stale cosa ni biquiiñenu para biʼniʼ adorarnu Dios dxiqué, para bicheechenu diidxaʼ ne para gánnanu ximodo bizulú ni. Peru xi para gápanu guiráʼ cani ne gánnanu guiráʼ ni guca dxiqué yaʼ. Dxi bibani ca binni ruzeeteʼ Biblia, xaíque stiʼ cada familia israelita bisiidiʼ ca xiiñiʼ ley stiʼ Dios ne guiráʼ cosa sicarú biʼniʼ Jiobá pur laacabe ti guni crécabe Dios (Sal. 78:1-7).

Maʼ xadxí nga de riquiiñeʼ guiráʼ ni gucuá lu guiʼchiʼ dxiqué para guihuinni ximodo ziyaca ni maʼ gudixhe ique Jiobá. Casi dxi gucalaʼdxiʼ caadxi xhenemigu ca xpinni Dios nucueezacaʼ laacabe de gucuícabe yuʼduʼ stiʼ Jerusalén la? yeguuyacabe ca guiʼchiʼ stiʼ gobiernu ni nuu Ecbátana, capital stiʼ Media, ne bidxélacabe caadxi documentu stiʼ rey Ciro ra caníʼ zaa cuí yuʼduʼ que (Esd. 6:1-4, 12). Ngue runi, guca ca dxiiñaʼ que casi modo gudixhe Dios gaca cani. Evangelista Lucas laaca biiyaʼ ca guiʼchiʼ ni nuu dxi nabani ne gunabadiidxaʼ para ganna ximodo bizulú guiráʼ ni (Luc. 1:1-4).

Ca dxi stinu riʼ, Grupu ni Zaniruʼ nabé rizaalaʼdxiʼ historia stiʼ xquidxi Dios. Dxi caníʼ tobi de laacabe pabiáʼ  risaca guiaapaʼ herencia bisaananécabe laanu, guicá ni lu guiʼchiʼ ne ganna xcaadxi binni de laani, guniʼbe sicaríʼ: «Para gánnanu pa neza ziuunu, naquiiñeʼ gánnanu padé ziúpanu». Pur nga, ca oficina ni nuu Brooklyn (Nueva York), maʼ bíʼnicabe sti departamentu ni láʼ: Ca cosa nuu chaahuiʼ ni riquiiñeʼ cani Ruuyaʼ xi Guicá lu ca Guiʼchiʼ Ricaanu (Archivos de Redacción).

«ÁLBUM» STINU NE XCAADXI HERENCIA BIAANANENU

Ora maʼ zidiʼdiʼ iza la? stale de ca cosa ni bizaaca familia stinu maʼ ziyaandaʼ cani. Ñee cadi dxandíʼ ñuuláʼdxinu ñánnanu guiráʼ ni bizaacacabe dxiqué la? Ngapeʼ nga dxiiñaʼ cayuni departamentu ni láʼ: Ca cosa nuu chaahuiʼ ni riquiiñeʼ cani Ruuyaʼ xi Guicá lu ca Guiʼchiʼ Ricaanu, purtiʼ racaláʼdxicabe gápacabe ne uguu chaahuicabe guiráʼ cosa sicarú bizaaca xquidxi Dios dxiqué. Guiráʼ ca foto ni nápacabe zanda guininu zeeda gácacani casi ti «álbum stiʼ ca binnilídxinu». Lade cani nápacabe nuu ca primé libru ne revista biree dxiqué, relatu ni bicaa ca xpinni Cristu de ni bizaacacaʼ dede ne caadxi cosa ni rusixidxi. Laacani nga herencia ni racané laanu gánnanu ximodo bizulú xquidxi Dios ne guidúʼyanu xi guiraruʼ zuni xquidxi Dios.

Runi invitardu lii «chigánnaluʼ» departamentu ni láʼ: Ca cosa nuu chaahuiʼ ni riquiiñeʼ cani Ruuyaʼ xi Guicá lu ca Guiʼchiʼ Ricaanu ne gúʼyaluʼ guiráʼ ni nápacabe. Zeedani gatigá lu revista Torre stiʼ ni rapa ra reeda ca tema ni riuundaʼ, ne zaree lá ni «Cani naguu chaahuiʼ xquidxi Dios». Lu sti revista zeeda ti tema ne caadxi foto ra zacábidu ca guendarinabadiidxaʼ riʼ: Xii nga ti «auroramóvil». Tu biquiiñeʼ ni. Padxí biquiiñecabe ni, ne xi para biquiiñeʼ ni.

Cásica ti álbum ra zeeda guiráʼ ni bizaaca binnilídxinu, guiráʼ ni napa departamentu ni láʼ: Ca cosa nuu chaahuiʼ ni riquiiñeʼ cani Ruuyaʼ xi Guicá lu ca Guiʼchiʼ Ricaanu rusiidicani laanu stale cosa de xquidxi Dios ra nuunu ne de ni biʼniʼ ca xpinni Cristu de dxiqué. Zazíʼdinu de fe stícabe, pabiáʼ nadxibalú gúcacabe, cani bisiecheʼ laacabe ne ca guendanagana ni bidxaagalúcabe ora bíʼnicabe ni na Bixhózenu ni nuu guibáʼ ne ximodo rusiidiʼ Dios xquidxi ne modo racané laacabe (Deu. 33:27). Nánnanu zaguu Jiobá ndaayaʼ dxiiñaʼ ni cayaca para cadi guiaandaʼ historia stiʼ xquidxi Dios, purtiʼ zacanécani laanu chuʼnu tobi si ne zudii cani stipa laanu para gúninu ni na Dios.

[Imagen ne cuadru ni zeeda lu yaza 31]

Gunibiaʼnu xcaadxi cosa

Xi raca ante gaca ti libru, ti revista, ti DVD ne xcaadxi guiʼchiʼ ni rusiene de Biblia yaʼ. Ca binni ni rucaa ca tema ca, ca artista ne xcaadxi binni runi dxiiñaʼ racá, riecaʼ ca lugar ra nuu ca guiʼchiʼ ni caníʼ de xiixa ni racaláʼdxicaʼ gusiidicaʼ. Nga runi, departamentu ni láʼ: Ca cosa nuu chaahuiʼ ni riquiiñeʼ cani Ruuyaʼ xi Guicá lu ca Guiʼchiʼ Ricaanu, rutópacaʼ ne rindisaʼ chaahuicaʼ stale cosa ni caníʼ de historia stiʼ xquidxi Dios ni biseendaʼ ca Yoo Betel, ca oficina ni runi dxiiñaʼ ndaaniʼ ni, ca neza binni ridagulisaa, ni biseendaʼ binni ne ni biseendaʼ tuuxa grupu. Guidúʼyanu caadxi de ca dxiiñaʼ rúnicabe:

Ruuyaʼ chaahuicabe ni ricaacabe. Gatigá riguucabe xcaadxi cosa lu cani maca nápacabe. Stale de laacani rusigaʼdeʼ binni ni laacabe. Peru laaca nuu binni rutiiñeʼ laacabe caadxi de laacani, ca binni riʼ nápacaʼ binnilídxicaʼ ni maʼ xadxí de cayúnicaʼ ni na Jiobá. Ruuyacabe ne ruchaagacabe ni rudii binni laacabe, zacá ránnacabe jma de historia stinu ne tuu nga ca binni ni bibani tiempu biquiiñeʼ cani.

Raʼtaʼ chaahuiʼ cani. Stale cosa nga ni nápacabe, nuu de laacani maʼ nápacani jma de ti gayuaa iza. Cumu gadxé gadxé nga ni nápacabe ne nuuni naroʼbaʼ ne nahuiiniʼ la? naquiiñeʼ gataʼ chaahuiʼ cani para ganda iquiiñeʼ cani despué.

Raca chaahuiʼ cani ne riaapaʼ cani. Raca chaahuiʼ ca libru ne ca cosa ni maʼ gulaa para guiaapaʼ cani ne nabé galán modo rúnicabe cani. Ca guiʼchiʼ, ca foto, cani biree lu periódicu, película ne cani guca grabar para gucaadiaga binni riuu cani lu computadora. Zacá zanda gúʼyacabe cani lu computadora ne maʼ qué zagáʼnacabe cani maʼ guca chaahuiʼ.

Riuu chaahuiʼ cani ne ruyúbicabe xcaadxi. Rindisaʼ chaahuicabe guiráʼ ni nápacabe ne riguixhe chaahuicabe ni para cadi guinítini ne para cadi gaca feu ni pur xtuxhu biaaniʼ o pur gudxa. Cayúnicabe ti programa ni gacané laacabe gánnacabe paraa nuu cani ne ganda guidxélacabe ca cosa risaca biquiiñenu dxiqué.

[Imagen ni zeeda lu yaza 32]

1) Póster stiʼ “Foto-Drama de la Creación”. 2) Ra gucuá lá cani gucuaa revista. 3) Carru ni napa ti aparatu de sonidu. 4) Primé yaza stiʼ revista The Watch Tower 15 stiʼ abril 1912. 5) Guiʼchiʼ ra na guseguyoocabe J. F. Rutherford. 6) Micrófono stiʼ WBBR. 7) Fonógrafo. 8) Maletín para libru. 9) Ni bicaa binni. 10) Telegrama para J. F. Rutherford