«Gulí pe Dios laatu [...] ne naca tu casi sacerdote [...]. Ma naca tu ti guidxi ni ulee chu be para laabe.» (1 PED. 2:9)

1. Xiñee rietenalaʼdxiʼ ca testigu stiʼ Jiobá guendaguti stiʼ Jesús guiráʼ iza.

 GUIDÚʼYANU xi bizaaca gueelaʼ 14 stiʼ Nisán iza 33, Jesucristu ne doce apóstol stiʼ bíʼnicaʼ Pascua stiʼ ca judíu últimu biaje. Guleesibe Judas Iscariote ni chigutoo laabe que, gudíxhebe gúnicaʼ sti cosa nacubi. Laani nga «Endaró xhi [...] gudixhe Señor» (1 Cor. 11:20). Gueelaʼ que guníʼ Jesús chupa biaje: «Racaladxe guni tu [ni] para guietenalaʼdxi tu naa» (1 Cor. 11:24, 25). Ca testigu stiʼ Jiobá rúnicaʼ ni biʼniʼ mandar Jesús gaca, nga runi rietenaláʼdxicabe ni guiráʼ iza. Lu iza 2012 riʼ, 14 stiʼ beeu Nisán lu calendariu stiʼ ca judíu ruzulú ni jueves 5 stiʼ abril despué de guiaaziʼ Gubidxa.

2. Xi guníʼ Jesús de pan ne de vinu.

² Chupa si versículo biquiiñeʼ discípulo Lucas para guníʼ xi biʼniʼ Jesús gueelaʼ que: «Ucuaa be pan, bidii be diuxquixe Dios ne gudiizi be ni lú caʼ, rabi be laacaʼ: “Ndi nga cuerpu stinne ni chi udiee pur laatu. Laguni casi cayuni nu riʼ para guietenaladxi tu naa”. Ne zaqueca biʼni né be copa que. Biluxe si gudó xhi cabe, ucuaa be ni, ne na be: “Copa ri nga rini stinne ni chi ixii pur laatu. Ne ra ixii ni zaguixhe Bixhoze ti modo cubi chuʼ né binni laa tobi si”» (Luc. 22:19, 20). Xi biene ca apóstol né ca diidxaʼ riʼ yaʼ.

3. Xi biene ca apóstol ora guníʼ Jesús zudii xcuerpu ne rini stiʼ.

³ Cumu judíu ca apóstol que la? nánnacabe ruuti cani ruzaaquiʼ guʼxhuʼ maniʼ para gusigáʼdecaʼ Dios ndaaniʼ yuʼduʼ stiʼ Jerusalén. Rudiicabe ca ofrenda que para chuulaʼdxiʼ Jiobá ni cayúnicabe, ne stale biaje para guinábacabe gutiidilaʼdxiʼ Dios stóndacabe (Lev. 1:4; 22:17-29). Ngue runi, ora guníʼ Jesús zudii xcuerpu ne zaxii rini stiʼ, biene ca apóstol que chigudiibe guendanabani sin donda stibe casi ti ofrenda. Jma risaca ofrenda riʼ que guiráʼ ca maniʼ biiticabe para gusigáʼdecabe Dios.

4. Xi cusiene Jesús né ca diidxaʼ riʼ: «Copa ri nga rini stinne ni chi ixii pur laatu. Ne ra ixii ni zaguixhe Bixhoze ti modo cubi chuʼ né binni laa tobi si».

 ⁴ Jesús laaca guníʼ: «Copa ri nga rini stinne ni chi ixii pur laatu. Ne ra ixii ni zaguixhe Bixhoze ti modo cubi chuʼ né binni laa tobi si». Xi zanda guiénenu né ca diidxaʼ riʼ yaʼ. Ca apóstol que nánnacaʼ de ca diidxaʼ riguixhená ni cuzeeteʼ de pactu cubi que. Biblia na: «¡Biiyaʼ! Zeeda dxi, na Jiobá, ne dxandipeʼ zuneʼ ti pactu cubi ne ca binnilidxi Israel ne ca binnilidxi Judá [...]. Purtiʼ ndiʼ nga pactu ni zuneniáʼ ca binnilidxi Israel tiidiʼ si ca dxi que, na Jiobá. Zudiéʼ laacabe ley stinneʼ ne zaguaani ndaaniʼ ladxidóʼcabe. Ne zeeda gacaʼ Dios stícabe, ne laacabe zeeda gácacabe xquidxeʼ» (Jeremías 31:31, 33). Ni guníʼ Jesús óraque bisihuínnini maʼ cuzulú pactu cubi que, ne maʼ laani chiguiaanani lugar pactu stiʼ Ley ni bininé Jiobá guidxi Israel ora biquiiñebe Moisés. Xi zanda guiénenu de guiropaʼ pactu riʼ ya.

5. Xi zanda cueendú Israel pur pactu stiʼ Ley.

⁵ Guiropaʼ pactu riʼ chigúnicaʼ ti dxiiñaʼ si. Ora gudixhe Jiobá pactu stiʼ Ley que, gúdxibe ca israelita: «Pa gúnitu guiráʼ ni gabeʼ laatu ne dxandipeʼ gúnitu ni na pactu stinneʼ la? dxandipeʼ zeeda gácatu guidxi stinneʼ ni nabé risaca de lade guiráʼ ca guidxi ni nuu, purtiʼ guidubi naca guidxilayú riʼ stinneʼ laa. Ne laatu zeeda gácatu para naa ti reinu ra ziuu ni ruzaaquiʼ guʼxhuʼ ne ti guidxi nayá» (Éxo. 19:5, 6). Ximodo biene ca israelita que ca diidxaʼ riʼ yaʼ.

GUNÍʼ DIOS ZIUU BINNI NI RUZAAQUIʼ GUʼXHUʼ

6. Xi para biquiiñeʼ pactu stiʼ Ley gucuaa ca israelita.

⁶ Ca israelita que riénecaʼ xi riníʼ diidxaʼ pactu, purtiʼ maca biʼniʼ Jiobá pactu né bixhozególacabe Noé ne Abrahán (Gén. 6:18; 9:8-17; 15:18; 17:1-9). Lu pactu biʼniʼ Jiobá né Abrahán gúdxibe laa: «Pur ni za de lii zaguaaʼ ndaayaʼ guiráʼ guidxi ni nuu lu guidxilayú riʼ» (Gén. 22:18). Pactu stiʼ Ley que gucaneni para guca ni maca guníʼ Dios. Pactu ca nga biquiiñeʼ para gunda guca Israel ti guidxi «ni nabé risaca [stiʼ Jiobá] lade guiráʼ ca guidxi». Xi para biʼniʼ Dios ni yaʼ. Para gácacabe «ti reinu ra ziuu ni ruzaaquiʼ guʼxhuʼ» para Jiobá.

7. Xi zanda guiénenu né ca diidxaʼ «ti reinu ra ziuu ni ruzaaquiʼ guʼxhuʼ».

⁷ Ca israelita que maca runadiágacaʼ nuu rey ne laaca nuu ni ruzaaquiʼ guʼxhuʼ, peru ti hombre si bibani dxiqué ni biree lá Melquisedec nga biʼniʼ guiropaʼ dxiiñaʼ ca ne guyuulaʼdxiʼ Jiobá bíʼnibe cani (Gén. 14:18). Yanna, né pactu riʼ cayabi Jiobá ca israelita zanda gácacaʼ «ti reinu ra ziuu ni ruzaaquiʼ guʼxhuʼ». Xi zanda guiénenu né ca diidxaʼ ca yaʼ. Despué bisiene Stiidxaʼ Dios zácacabe rey ne ni ruzaaquiʼ guʼxhuʼ (1 Ped. 2:9).

8. Xi dxiiñaʼ biʼniʼ cani ruzaaquiʼ guʼxhuʼ ni gulí Dios dxiqué.

⁸ Dxiiñaʼ stiʼ ti rey nga guni mandar. Peru xi dxiiñaʼ runi tobi ni ruzaaquiʼ guʼxhuʼ yaʼ. Hebreos 5:1 cusiene: «Gulí Dios ca sacerdote gola para iníʼ né laa pur binni, ne para quixhe ca ni guedané binni usigaʼde Dios lu altar, ne para idxiña né ca rini sti mani ni ma guti ra nuu Dios, para guiá ni huachee ca binni que». Dxiiñaʼ stiʼ ti ni ruzaaquiʼ guʼxhuʼ ni gulí Jiobá nga guiníʼ pur ca binni ruchee nezalú Dios ne gudiibe ofrenda para guinábabe Dios gutiidilaʼdxiʼ stóndacaʼ. Peru laaca riniʼbe pur Jiobá ora gusiidibe guidxi que ca Ley stiʼ Dios (Lev. 10:8-11; Mal. 2:7). Ca dxiiñaʼ rúnibe riquiiñecani para gacanécani binni chuʼcaʼ galán né Dios sti biaje.

9. 1) Xi naquiiñeʼ guni ca israelita para ganda gápacaʼ «ti reinu ra ziuu ni ruzaaquiʼ guʼxhuʼ». 2) Xi para gudixhe Jiobá chuʼ ni ruzaaquiʼ guʼxhuʼ ndaaniʼ guidxi Israel. 3) Xiñee qué ñanda ñapa Israel «ti reinu ra ziuu ni ruzaaquiʼ guʼxhuʼ» dxi guyuu pactu stiʼ Ley.

⁹ Pactu stiʼ Ley que zanda gacaneni ca israelita para gápacaʼ rey ne ni ruzaaquiʼ guʼxhuʼ para chuʼ ndaayaʼ «guiráʼ ca guidxi ni nuu». Peru xi gudixhe Jiobá gúnicabe  para guicaacabe ndaayaʼ ca yaʼ. Laabe guniʼbe: «Pa gúnitu guiráʼ ni gabeʼ laatu ne dxandipeʼ gúnitu ni na pactu stinneʼ». Ñee zanda guni ca israelita que guirá cani na ca mandatu stiʼ Jiobá la? zanda, peru qué zanda diʼ gúnicabe guiráʼ ni sin gucheecabe (Rom. 3:19, 20). Ngue runi gudixhe Jiobá chuʼ cani ruzaaquiʼ guʼxhuʼ lade ca israelita. Laacabe qué zanda gácacabe rey. Dxiiñaʼ stícabe nga guuticabe maniʼ para gudiicabe Dios ti guiaxa donda stiʼ ca binni que ora gucheecaʼ (Lev. 4:1–6:7). Laaca riaxa donda stiʼ cani ruzaaquiʼ guʼxhuʼ ora rudiicabe ca ofrenda que (Heb. 5:1-3; 8:3). Ricaa Jiobá ca ofrenda que, peru qué randa ruxhiani guiráʼ xixé ca donda stiʼ ca israelita. Cani ruzaaquiʼ guʼxhuʼ biʼniʼ dxiiñaʼ lu pactu stiʼ Ley, qué ñanda ñacanécabe binni para ñuu gaxha de Dios cásipeʼ modo rinábabe ni, nin ca israelita ni cayuni adorar Dios de guidubi ladxidóʼ. Sicaríʼ bisiene apóstol Pablu ni: «Qué zanda ixá stonda binni ne rini sti yuze ne sti chiva» (Heb. 10:1-4). Cumu bicheené ca israelita Ley que la? bisabanáʼ ni laacaʼ (Gál. 3:10). Pur modo nuucabe riʼ, nagana para gueeda gácacabe rey ne ni ruzaaquiʼ guʼxhuʼ ni gacané guiráʼ binni.

10. Xi para biquiiñeʼ pactu stiʼ Ley que.

¹⁰ Yanna, ñee pur gana si guníʼ Jiobá zanda chuʼ «ti reinu ra ziuu ni ruzaaquiʼ guʼxhuʼ» lade ca israelita la? Coʼ. Pa gúnicabe stipa pur guzuubacabe stiidxabe la? zanda gápacabe ndaayaʼ, peru qué zanda diʼ gácani laga nuucabe lu pactu stiʼ Ley que. Xiñee yaʼ (biindaʼ Gálatas 3:19-25). Para ganda guiénenu ni, naquiiñeʼ gánnanu xi para guca pactu stiʼ Ley que. Gucaneni ca israelita ni ruzuubaʼ diidxaʼ para cadi guni adorarcaʼ dios ni cadi dxandíʼ. Laaca gucaneni laacabe guiénecabe nácacabe binni ruchee ne caquiiñecabe chuʼ sti binni jma risaca que xaíque stiʼ cani ruzaaquiʼ guʼxhuʼ nápacabe para gudii ti ofrenda jma galán pur laacabe. Beeda gaca Ley que casi ti binni ni cayapa laacabe ne gucané laacabe gánnacabe tuu nga Cristu, o Mesías ni gulí Dios. Peru ora guedandá Mesías que, zaguu laacabe lu pactu cubi ni bizeeteʼ Jeremías. Cani guni cré Cristu zaca invitarcaʼ para chuʼcaʼ lu pactu cubi ca ne zacá gueeda gácacaʼ «ti reinu ra ziuu ni ruzaaquiʼ guʼxhuʼ». Guidúʼyanu ximodo.

CA BINNI NUU LU PACTU CUBI ZÁCACAʼ NI RUZAAQUIʼ GUʼXHUʼ

11. Ximodo beeda gaca Jesús binni ni zaquiiñeʼ para chuʼ ti reinu ra ziuu ni ruzaaquiʼ guʼxhuʼ.

¹¹ Lu iza 29 despué de ca dxi stiʼ Jesús, bihuinni Jesús de Nazaret nga Mesías ni nexheʼ gueeda que. Guyuunísabe dxi nápabe 30 iza, ne óraque nga bihuinni maʼ nuube listu para gúnibe guiráʼ ni maʼ gudixhe Jiobá para laabe. Sicaríʼ guníʼ Jiobá de laabe: «Ndi nga Xiiñe ni nadxiee ne ni rusieche naa». Ne laaca gulí Jiobá laabe, peru cadi né aceite, sínuque né espíritu santu (Mat. 3:13-17; Hech. 10:38). Cumu maʼ gulí Dios Jesús la? maʼ nácabe Xaíque stiʼ cani ruzaaquiʼ guʼxhuʼ ne despué maʼ zácabe Rey stiʼ guiráʼ ca binni ni guni cré laabe (Heb. 1:8, 9; 5:5, 6). Laabe nga chiguiquiiñeʼ para ganda chuʼ ti reinu ra ziuu ni ruzaaquiʼ guʼxhuʼ.

12. Xi para caquiiñeʼ guendaguti stiʼ Jesús.

¹² Yanna ra cayuni Jesús dxiiñaʼ casi Xaíque stiʼ cani ruzaaquiʼ guʼxhuʼ, xi ofrenda zanda gudiibe para guixá guiráʼ xixé donda gulené cani guni cré yaʼ. Guendanabani sin donda stibe, ngapeʼ nga ni guniʼbe gueelaʼ biʼniʼ mandarbe guietenaláʼdxicabe guendaguti stibe (biindaʼ Hebreos 9:11, 12). Dede dxi guyuunisa Jesús lu iza 29, dxi bibí para gaca Xaíque stiʼ cani ruzaaquiʼ guʼxhuʼ, bidxiilú stale guendanagana ne biziidiʼ guni xhiiñaʼ dede ora biiticabe laa (Heb. 4:15; 5:7-10). Biásasibe de lade gueʼtuʼ guyebe guibáʼ ne biluiʼbe Jiobá pabiáʼ risaca ofrenda ni bidiibe (Heb. 9:24). Dede óraque maʼ  zanda guinábabe Jiobá pur cani gapa fe lu guendaguti stibe ne gacanebe laacaʼ gúnicaʼ ni na Dios ti ganda guicaacaʼ guendanabani ni qué zaluxe (Heb. 7:25). Ne laaca biquiiñeʼ guendaguti stibe para bizulú pactu cubi que cayuni dxiiñaʼ (Heb. 8:6; 9:15).

13. Xi ndaayaʼ zanda gapa ca binni ni guca invitar para chuʼ lu pactu cubi.

¹³ Cani guca invitar para chuʼ lu pactu cubi que laaca bibicaʼ pur espíritu santu (2 Cor. 1:21). Primeru biuu ca judíu ni bizuubaʼ diidxaʼ, de raqué maʼ biuu binni de sti guidxi (Efe. 3:5, 6). Xi zaca né ca binni riʼ yaʼ. Zaxiá guiráʼ donda stícabe. Jiobá maca guníʼ: «Zutidelaʼdxeʼ stóndatu, ne maʼ qué zietenalaʼdxeʼ ca donda stitu» (Jer. 31:34). Cumu maʼ bixiá donda stícabe la? maʼ zanda gácacabe «ti reinu ra ziuu ni ruzaaquiʼ guʼxhuʼ». Dxi caniʼné Pedru ca xpinni Cristu ni bibí, gúdxibe laacaʼ: «Laatu la? gulí pe Dios laatu para gaca tu xpinni, ne naca tu casi sacerdote para guni tu xhiiña rey stinu ni nuu ibáʼ. Ma naca tu ti guidxi ni ulee chu be para laabe. Ma sti pe be laatu. Ne gudixhe be gaca ni zacá para gabi tu binni rihuinni pabiáʼ nandxóʼ be pur ni runi be, purti ulee be laatu de lu guelacahui ne uluu be laatu lu biaani sicarú stibe» (1 Ped. 2:9). Dxi que bizeeteʼ Pedru ca diidxaʼ gudxi Jiobá Israel ora bidii laacabe Ley, ne guníʼ Pedru cayaca cani luguiáʼ ca xpinni Cristu ni nuu lu pactu cubi que (Éxo. 19:5, 6).

CA REY NE CANI RUZAAQUIʼ GUʼXHUʼ ZACANECAʼ GUIRÁʼ BINNI

14. Paraa chiguni ca rey ne cani ruzaaquiʼ guʼxhuʼ dxiiñaʼ.

¹⁴ Paraa chiguni cani nuu lu pactu cubi riʼ dxiiñaʼ yaʼ. Ndaaniʼ Guidxilayú riʼ. Grupu de binni riʼ zácacaʼ casi ni ruzaaquiʼ guʼxhuʼ ne zaníʼcabe pur Jiobá nezalú binni ora gusiidicabe laacaʼ guiráʼ ni naquiiñeʼ gánnacaʼ de Dios (Mat. 24:45; 1 Ped. 2:4, 5). Gatisícabe ne despué de guiásacabe de lade gueʼtuʼ ziécabe guibáʼ para gúnicabe dxiiñaʼ né Cristu casi rey ne ni ruzaaquiʼ guʼxhuʼ, racá zúnicabe guiropaʼ dxiiñaʼ gucuaacabe (Luc. 22:29; 1 Ped. 1:3-5; Apo. 1:6). Biáʼsipeʼ nga ni bizéʼtenu ca pur ni biiyaʼ apóstol Juan lu ti visión, raqué biiyabe caadxi binni de espíritu nuucaʼ gaxha de trono stiʼ Jiobá guibáʼ. Ca binni que «cayuunda ca ti cantu cubi» nezalú dendxuʼ huiiniʼ sicaríʼ: «Uzíʼ neu laadu rini stiuʼ para Dios,  irá du ni za du de irá ladu, de irá guidxi ne de irá idioma ni riníʼ binni. Ne biʼni lu laadu sacerdote para guni du xhiiña Dios, ne rey para guni mandar du binni guidxilayú» (Apo. 5:8-10). Lu sti visión biiyaʼ Juan, guníʼ de laacabe sicaríʼ: «Zaca cabe sacerdote para guni cabe xhiiña Dios ne xhiiña Cristu, ne zuni mandar né cabe laa ti mil iza» (Apo. 20:6). Cristu ne ca binni riʼ nga chigácacaʼ rey ne ni ruzaaquiʼ guʼxhuʼ para gacanecaʼ guiráʼ binni.

15, 16. Xi ndaayaʼ zedané ca rey ne cani ruzaaquiʼ guʼxhuʼ para guiráʼ binni.

¹⁵ Xi ndaayaʼ zedané 144,000 binni ndaaniʼ Guidxilayú yaʼ. Lu capítulo 21 stiʼ Apocalipsis ruzeeteʼ laacabe casi ti guidxi ni nuu guibáʼ, Jerusalén Cubi, laaca rábicabe laacaʼ «xheela Dendxú huiiniʼ» (Apo. 21:9). Ca versículo 2 dede 4 na: «Biiya dxiʼche Jerusalén cubi, guidxi roʼ sti Dios, zeda yete de ibáʼ de ra nuu Dios. Zuchaahui casi ti gunaa ora chi chaganáʼ. Bina diaʼga ucuá ti ridxi reciu de ibáʼ, na: “Biiyaʼ, ma nabeza Dios lade binni. Laape be zabeza né be laacaʼ. Zaca ca xpinni be, ne laabe zaca be Dios sticaʼ. Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué”». ¡Nabé sicarú ca ndaayaʼ ca! Ora guiree guendaguti, maʼ qué zuunaʼ binni, maʼ qué zacaná ladxidóʼ ne maʼ qué ziuu yuubaʼ. Guiráʼ binni ni guzuubaʼ diidxaʼ maʼ qué zápacaʼ donda, óraca maʼ ziuunécabe Dios tobi si modo racalaʼdxi.

¹⁶ Apocalipsis 22:1, 2 caníʼ xi guiráʼ ndaayaʼ zedané cani ruzaaquiʼ guʼxhuʼ ne ca rey riʼ: «Oraque biluíʼ ángel que naa ti guiigu nayá guieʼ. Ne ndaani ni riree nisa ni rudii enda nabani, ne nayaʼni dxindxi ni casi vidriu. Candani ni ra nuu trono sti Dios ne sti Dendxu huiini que. Didi ni galahui calle roʼ sti [Jerusalén Cubi], ne iropa uriá ni zuhuaa yaga rudii enda nabani. Ricá cuananaxhi lu ni irá beeu, ne riquiiñe bandaga stini para usianda binni». Visión riʼ cusihuinni zaree donda bisaanané Adán guiráʼ binni. Dxandipeʼ nga zadiʼdiʼ guiráʼ xixé cosa guca dxiqué.

RA GUNDUUXEʼ CANI RUZAAQUIʼ GUʼXHUʼ XHIIÑACAʼ

17. Xi zuni ca rey ne cani ruzaaquiʼ guʼxhuʼ ra tiidiʼ tiempu.

¹⁷ Despué de ti mil iza de cayúnicabe dxiiñaʼ, ca rey ne cani ruzaaquiʼ guʼxhuʼ zacanécabe guiráʼ binni Guidxilayú para gácacaʼ binni sin donda. Cristu, casi Xaíque stiʼ cani ruzaaquiʼ guʼxhuʼ ne Rey, zudiibe guiráʼ binni ni maʼ qué gapa donda Jiobá (biindaʼ 1 Corintios 15:22-26). Óraca nga guiluxe dxiiñaʼ stiʼ ca rey ne cani ruzaaquiʼ guʼxhuʼ.

18. Guiluxe si ca rey ne cani ruzaaquiʼ guʼxhuʼ dxiiñaʼ sticaʼ, ximódoruʼ zaquiiñeʼ Jiobá laacabe.

¹⁸ Ximodo iquiiñeʼ Jiobá ca xpinni Cristu riʼ guilúxesicaʼ dxiiñaʼ sticaʼ yaʼ. Apocalipsis 22:5 na: «Qué ziuu dxi guiaana dxí de guni mandar cabe». Tu chiguni mandárcabe yaʼ. Qué ruzeeteʼ diʼ Biblia ni. Peru guendanabani guicaacabe ne guiráʼ ni maʼ biziidicabe ra gucanécabe binni ni napa donda zacaneni laacabe para gúnicabe dxiiñaʼ risaca lu cani maʼ gudixhe Jiobá guni.

19. Xi cadi naquiiñeʼ guiaandaʼ laanu ora guietenaláʼdxinu guendaguti stiʼ Jesús.

¹⁹ Ora guidagulisaanu para guietenaláʼdxinu guendaguti stiʼ Cristu 5 stiʼ abril 2012, guietenaláʼdxinu cani bizíʼdinu riʼ. Grupu huiiniʼ de xpinni Cristu ni bibí ni nabani ndaaniʼ Guidxilayú riʼ, zocaʼ pan ne zeʼcaʼ vinu tintu, nga rusihuinni maʼ nuucabe lu pactu cubi. Ora gúnicabe zacá rusietenaláʼdxini laacabe pabiáʼ sicarú ca dxiiñaʼ cayúnicabe para gaca guiráʼ ni maʼ gudixhe Dios. ¡Ora chuunu ra guietenaláʼdxinu guendaguti stiʼ Jesús, gudiʼnu xquíxepeʼ Jiobá Dios pur bizáʼ ti reinu ra nuu ni ruzaaquiʼ guʼxhuʼ ni zacané guiráʼ binni!

[Guendarinabadiidxaʼ stiʼ párrafo]

[Imagen ni zeeda lu yaza 29]

Ca ndaayaʼ guedané ca rey ne cani ruzaaquiʼ guʼxhuʼ para guiráʼ binni qué ziuu dxi guirá cani