Gúcacabe nadxibalú ora bicheechecabe Stiidxaʼ Dios

Cani dxandíʼ xpinni Cristu rusihuínnicaʼ nadxibalucaʼ ne qué ridxíbicaʼ neca chuʼ tu gucaalú laacaʼ, ne zanda guidúʼyanu dxandíʼ ni ora guidúʼndanu libru casi “Testimonio cabal” del Reino de Dios ne Los testigos de Jehová, proclamadores del Reino de Dios. Cásica cani bicheeche diidxaʼ lu primé siglu, laaca rinábanu Jiobá gudii espíritu stiʼ laanu ne gacané laanu guininu de Stiidxabe sin guidxíbinu (Hech. 4:23-31).

Sicaríʼ bicaa ti xpinni Cristu ora cuzeeteʼ modo bicheechecaʼ diidxaʼ dxi cayaca primé guendaridinde lu guidubi Guidxilayú: «Né stale gana cusaanané ca xpinni Dios binni libru The Finished Mystery (Maʼ bihuinni ni gaʼchiʼ), volumen gadxe stiʼ Estudios de las Escrituras ne bisaananécabe binni stale de laani. Primé númeru stiʼ tratadu Kingdom News (Ca diidxaʼ nacubi stiʼ Reinu), bireeni lu iza 1918. Despué biree guiropa númeru stiʼ Kingdom News, ni bisiene xiñee qué niná ca gobiernu niree The Finished Mystery. Ne gudiʼdiʼ ti tiempu biree guionna númeru stiʼ Kingdom News. Cani bibí pur espíritu santu bisaananecaʼ binni stale de laani, peru gúpacabe stale fe ne gúcacabe nadxibalú para gunda bidiicabe binni ca tratadu que».

Ca dxi riʼ, cani nacubi cucheeche stiidxaʼ Reinu stale biaje riziidicaʼ ximodo gucheechecaʼ diidxaʼ, peru cadi zacá gúcani dxiqué. Guzéʼtenu ti ejemplu. Ti xpinni Cristu de Polonia ni nabeza Estados Unidos, rietenalaʼdxiʼ primé biaje bicheeche diidxaʼ lu iza 1922. Laabe bicaabe: «Qué gannaʼ ximodo gusaananiáʼ binni revista ne libru ne cadi galán modo riniéʼ inglés, peru maʼ zuhuaaʼ ra puertaʼ stiʼ ti doctor ne cuxhidxeʼ nayaʼ. Bixheleʼ ti enfermera puertaʼ que. Qué ziuu dxi guiaandaʼ naa ni bizaacaʼ, purtiʼ cayecheʼ chigucheecheʼ diidxaʼ, peru laaca cadxibeʼ. Ora bixheleʼ maletín stinneʼ, biaba guiráʼ ni dxaʼ ndaaniʼ ni xañee enfermera que. Qué gannaʼ xi gudxeʼ laabe, peru biaananebe tobi de ca guiʼchiʼ ziniaaʼ. Ora bireeʼ de raqué maʼ cadi cadxibeʼ ne bineʼ sentir guluu Jiobá ndaayaʼ naa. Dxi que bisaanaʼ stale folletu ndaaniʼ ca tienda nuu calle que».

Ti gunaa xpinni Cristu bizeeteʼ: «Lu iza 1933 stale xpinni Cristu biquiiñecaʼ carru ni napa aparatu de sonidu para gucheechecaʼ stiidxaʼ Reinu». Guzéʼtenu xi guca ti dxi cucheechebe diidxaʼ né ti guendaxheelaʼ—laaca Testigu ca binni riʼ— ti lugar ra nuu caadxi dani California (Estados Unidos). Gunaa riʼ guníʼ: «Gudxiʼbané Testigu que xcarru lu ca dani que, peru naa ne xheelabe biaanadu ndaaniʼ guidxi que. Ora bizulú guxidxi discu ni guca grabar que, ruluíʼ de guibáʼ zeeda ridxi stini. Ca binni guidxi que biyúbicaʼ stale modo para nidxélacaʼ xpinni Cristu que, peru qué nidxélacaʼ laabe. Ora biluxe discu que, guyuudu ra lidxi ca binni que para gucheechedu diidxaʼ. Bicheecheʼ diidxaʼ né xhupa carru ni napa sonidu ne zanda gabeʼ laatu, stale binni qué niná nucaadiaga stiidxaʼ Reinu. Cumu rindá ridxi que dede ralídxicabe la? neca qué nácabe, bicaadiágacabe libana que. Gúcadu nadxibalú para gunda  bínidu ni, peru zaqué nga cucheechedu diidxaʼ ne bisisácadu lá Jiobá. Bidiʼdu cuenta cayacané Jiobá laadu iquiiñedu cani nuu tiempu stidu para gucheechedu diidxaʼ».

Lu ca iza stiʼ 1930 ne ra bizulú iza ca iza stiʼ 1940 biquiiñeʼ fonógrafo ne libana ni guca grabar lu discu para bireeche diidxaʼ. Ti gunaa xpinni Cristu guníʼ xi bizaaca ti dxi: «Cucheeche ti dxaapahuiiniʼ diidxaʼ de yoo pur yoo né ti fonógrafo. Ora gudíxhebe ti discu para xhidxi ra puertaʼ ti yoo, nabé bidxiichi hombre lidxi raqué ne bidii ti patada fonógrafo stibe, peru qué nilaa nin ti discu. Gaxha de raqué zuhuaa ti camión ra nuu chonna hombre ni cuxhirini, laacaʼ biiyacaʼ ni guca, biʼniʼ invitarcaʼ dxaapahuiiniʼ riʼ quixhe discu que para gucaadiágacaʼ ne gunábacaʼ laabe libru ne revista. Ngue guluu gana laabe para cadi chuʼbe triste pur ni bizaacabe». Riquiiñeʼ gaca binni nadxibalú para ganda guni huantar ca guendanagana ca.

Laaca gunaa xpinni Cristu que guníʼ: «Rietenalaʼdxeʼ bizulú bicheechedu diidxaʼ ndaaniʼ calle ne ca revista stinu lu iza 1940. Ante gaca nga guca ni rábicabe marchas de información. Ca xpinni Cristu maʼ zecaʼ pur fila lu ca banqueta nuu lu calle maʼ zinecaʼ ti guiʼchiʼ naroʼbaʼ ra na “Ti trampa ca religión ca ne rusiguiicaʼ binni” ne “Laguni ni na Dios ne ni na Cristu ni naca Rey”. Ne laaca rusigáʼdecabe tratadu binni. Laaca riquiiñeʼ gaca binni nadxibalú para guni dxiiñaʼ que, peru biquiiñeʼ ni para biziidiʼ binni tu lá Dios ne gánnacaʼ de xquídxibe».

Sti gunaa xpinni Cristu guníʼ: «Nagana para gusaananedu binni revista ndaaniʼ ca calle stiʼ ca guidxi que. Ca dxi que nabé nuu tu cucaalú ca Testigu [...]. Dxandipeʼ caquiiñeʼ gácadu nadxibalú para guzuhuaʼdu ca squina calle ne guinaazedu revista ne guinidu nadipaʼ cani maca gúdxicabe laadu. Peru nin ti sábadu qué nusaana de ñúnidu zaqué. Nuu biaje guca binni nachaʼhuiʼ né laadu; peru laaca guyuu biaje beeda grupu de binni ni cadxiichi, riguucaʼ leʼ laadu, ne chupa chonna de ca biaje que gupa xidé guyuudu sti lugar para cadi guninácabe laadu».

Neca guzananda binni ca testigu stiʼ Jiobá dxi cayaca guiropa guendaridinde lu guidubi Guidxilayú, gúcacaʼ nadxibalú para bicheechecaʼ diidxaʼ. Bíʼnicabe ti campaña para guireeche diidxaʼ ni bindaa 43 dxi, (biree lá ni dxiqué Períodos de Testimonio), despué maʼ biree lá ni «Nadxibalú». Bizuluni 1 stiʼ diciembre iza 1940 ne bilúxeni 12 stiʼ enero iza 1941, biaʼ 50,000 ni rucheeche diidxaʼ ni nuu Estados Unidos bisaanacaʼ biaʼ xhono millón folletu.

Stale de ca xpinni Cristu ni maʼ nagola qué huayaandaʼ laacaʼ guiráʼ ni bizaacacaʼ dxiqué ne modo gúcacaʼ nadxibalú. Nuu tu riníʼ xadxí bisihuínnicaʼ pabiáʼ nadxibalucaʼ ora riniʼcaʼ ca diidxaʼ riʼ gatigá: «Chinenu guendaridinde riʼ dede ra puertaʼ yoo». Yanna, ante guiluxe guidxilayú stiʼ Binidxabaʼ, zadúʼyanu ximódoruʼ zanda gucheechenu stiidxaʼ Dios. Peru né ndaayaʼ stiʼ Dios, qué ziuu dxi gusaana de gucheechenu Stiidxabe, zápanu fe ne zácanu nadxibalú.

[Ni caníʼ yaza 9]

Riquiiñeʼ gaca binni nadxibalú para cadi gusaana de gucheeche diidxaʼ