«Ñee zanda cueeluʼ laadu ti foto la?»

Biluxe si guiropa gubidxa stiʼ ti guendaridagulisaa de chonna gubidxa ra guyé Josué, ti betelita de Méjicu, yezanebe xcaadxi Testigu galahuiʼ guidxi Querétaro. Javier ne Maru, ti guendaxheelaʼ de Colombia ni canayunibiáʼ guidxi que gunábacaʼ laabe cueebe laacaʼ ti foto. Cumu galán modo zuchaahuiʼ Josué né ca xhamigu ne cá ti tarjeta ladxidoʼcaʼ ni culuíʼ paraa guyecaʼ la? gunabadiidxaʼ guendaxheelaʼ que laacabe pa guyécabe ra biree tuuxa de scuela o xiixa saa. Josué bisiene laacabe guyecaʼ ti guendaridagulisaa roʼ stiʼ ca testigu stiʼ Jiobá ne biʼniʼ invitar laacabe chécabe domingu, últimu dxi que.

Gudxi guendaxheelaʼ que laabe qué zuni sentircaʼ galán pa checaʼ raqué, purtiʼ zinecaʼ lari ni racu binni ora maʼ zizá paxaraa. Neca zaqué, gudxi Josué laacabe tu láʼ ne bidii laacabe númeru de teléfono stiʼ Betel.

Tapa beeu despué, Javier ne Maru gulídxicaʼ Josué pur teléfono para gábicaʼ laabe guyecaʼ guendaridagulisaa ni biʼniʼ invitarbe laacaʼ ne rápacaʼ gana chiguundané ca Testigu laacaʼ ndaaniʼ guidxi Méjicu, purtiʼ raqué nabézacaʼ. Qué nindaa bizulú biindacabe Biblia ne guyécabe guendaridagulisaa. Chii beeu despué maʼ bizulú bicheechecabe diidxaʼ. Gudiʼdiʼ si tiempu yendézacabe Toronto (Canadá), ne raqué biziidirúcabe jma de Jiobá dede guyuunísacabe.

Despué biseendaʼ Javier ti carta ra nuu Josué ne luni cusiénebe xi bicaa laacabe guiziidicabe de Dios. Lu carta que bicaabe: «Ante chuudu guendaridagulisaa ni biʼniʼ invitarluʼ laadu que, naa ne xheelaʼ bidiʼdu cuenta caquiiñeʼ guizíʼdidu de Dios. Cumu galán modo zuchaahuitu la? guníʼ íquedu nabé risaca guendaridagulisaa ra guyetu. Dxi guyuudu guendaridagulisaa que, bidxagayaadu modo naca xpiaʼ guiráʼ binni nuu raqué ne pabiáʼ nachaʼhuiʼ gúcacaʼ né laadu para guidxéladu paraa cuidu ne guidxéladu ca textu ni zeeda lu Biblia. Nin tobi de cani nuu raqué qué ñabi laadu xiñee zinedu lari ni racu binni ora maʼ zizá paxaraa».

Josué biiyaʼ dxandíʼ ni na ca diidxaʼ guníʼ Salomón riʼ: «Bidxiibaʼ biidxiʼ stiluʼ siadóʼ, ne cadi guiaanadxí naluʼ dede ora gaca huadxí; purtiʼ qué [gannuʼ] paraa zandánini, pa raríʼ o pa raricaʼ, o guiropaʼ lugar ca» (Ecl. 11:6). Ñee zanda gúniluʼ zacaca ra guni invitarluʼ xcaadxi binni checaʼ ti guendaridagulisaa roʼ o chigucaadiágacaʼ xiixa libana ndaaniʼ Yoo stiʼ Reinu la? Gunna laaca zanda iquiiñeʼ Jiobá lii para guchiña binni ni racalaʼdxiʼ guiziidiʼ de laa ndaaniʼ xquidxi, cásica bizaaca Javier ne Maru (Isa. 55:1).

[Imagen ni zeeda lu yaza 32]

Ruzulú lácabe ladu bigaʼ ne rilúxecani ladu derechu: Alejandro Voeguelin, Maru Pineda, Alejandro Pineda, Javier Pineda ne Josué Ramírez ndaaniʼ Betel ni nuu Méjicu