Ximodo rudiiluʼ conseju binni

Ñee huayuu biaje guinabaʼ tuuxa conseju lii la? Ñee huanabadiidxacabe lii: «Xi zanda guneʼ», «Ñee zanda chaaʼ saa ca la?», «Ñee zaa chaaʼ scuela roʼ la?», «Ñee zaa guireeniáʼ binni riʼ la?».

Zándaca chuʼ tuuxa ni guinabaʼ lii gacaneluʼ laa cuí xi zanda quixhe ique guni ne pur ni gábiluʼ laa zándaca chuʼ jma gaxha de ca xhamigu, binnilidxi ne de Jiobá o guixeleʼ de laacabe. Ñee zudiiluʼ conseju binni ca casi na Biblia la? o zábiluʼ laabe cani gueeda si ndaaniʼ íqueluʼ. Ximodo racaneluʼ binni para ganna xi quixhe ique guni. Pa risaca ni guinabadiidxacabe laanu o coʼ la? naquiiñeʼ chinándanu conseju ni zeeda lu Proverbios 15:28: «Ladxidóʼ binni ni runi ni jneza la? riníʼ ique ante guicabi». Guidúʼyanu gaayuʼ conseju ni cudii Biblia ni zanda gacané laanu ora gudiʼnu conseju.

1 Biiyaʼ xipeʼ nga cazaacabe.

«Ora guicabi tuuxa xiixa cosa ante gucaadiaga la? zusihuinni nahuati ne zatuilú.» (PRO. 18:13)

Para ganda gudiʼnu conseju ni gacané binni, caquiiñeʼ gánnanu xi cazaacabe ne xi riníʼ íquebe de laani. Guzéʼtenu ti ejemplu: zándaca guiniʼné tuuxa lii pur teléfono para guinabadiidxaʼ lii ximodo chindá raliʼdxuʼ. Xi naquiiñeʼ gannuʼ primeru ante guicábiluʼ laabe yaʼ. Ñee zábiluʼ laabe ximodo chindabe ralídxiluʼ pa qué gánnaluʼ paraa nuube la? Coʼ, njaʼ. Zacaca nga naquiiñeʼ gúninu ora gudiʼnu conseju tuuxa: primeru caquiiñeʼ gánnanu xi cazaacabe ne xi riníʼ íquebe. Pa qué ganna chaahuinu ximodo nuu binni ni chigudiʼnu conseju ca la? zándaca gábinu laabe xiixa ni huaxiéʼ zacané laabe ne pur nga jmaruʼ si qué zadxélabe xi gúnibe (Luc. 6:39).

Biiyaʼ xi guiráʼ maʼ biyúbibe para gánnabe de ni racaláʼdxibe. Laaca jneza guinabadiidxanu binni ni canabaʼ conseju ca: «Xi conseju zeeda lu Biblia rábiluʼ zanda gacané lii para gánnaluʼ xi naquiiñeʼ gúniluʼ», «De cani maʼ naguixhe íqueluʼ gúniluʼ, ñee zabeenduluʼ ni galán la? o zápaluʼ guendananá», «Xi guiráʼ maʼ biindaluʼ de laani», «Ximodo maʼ gucané xcaadxi binni lii, casi ca binnigola, bixhózeluʼ ne jñaaluʼ o binni ni ruundané lii Biblia».

Pur modo guicábibe ca guendarinabadiidxaʼ ca zacané cani laanu gánnanu xi huayúnibe para gánnabe xi gúnibe o xi huayabi xcaadxi binni laabe. Ne laaca zacané cani laanu gudiʼnu cuenta pa ni cuyúbibe nga ti binni ni gabi laabe ni racaláʼdxisibe gunadiágabe (2 Tim. 4:3).

  2 Guníʼ ique ante guicábiluʼ.

«Lachuu para ucaa diaga tu, peru cadi nisi undaa ruaa si tu xiixa.» (SANT. 1:19)

Zándaca guiníʼ íquenu zacanenu binni ni canabaʼ conseju ca pa guicábinu laa nagueendaca. Peru tuuxa ni runi zacá zusihuinni cadi nuu xpiaaniʼ, jmaruʼ si pa caʼruʼ guʼndaʼ chaahuiʼ de ni gunabadiidxacabe laa. Proverbios 29:20 na: «Huayuuyaluʼ ti hombre ni nagueendaca rundaa ruaa xiixa la? Jma zanda cuézanu guchaa ti binni huati que laabe».

Biquiiñeʼ cani rusiidiʼ Stiidxaʼ Dios para gudiiluʼ conseju. Gunabadiidxaʼ laca lii: «Ora gudieeʼ conseju tuuxa, ñee rusihuinni cani riniéʼ riníʼ iqueʼ casi riníʼ ique binni guidxilayú la?» (1 Cor. 2:12, 13). Dxi gunna apóstol Pedru xi guiráʼ guendanagana chiguidxaagalú Jesús la? gúdxibe laa: «Dios guʼya qué izaaca lu ni nouʼ ca». Xi rizíʼdinu de ni guníʼ Pedru ca yaʼ. Nuu tiru ziuu binni ni gacalaʼdxiʼ gudii conseju tuuxa, peru pa qué chuʼ cuidadu zándaca gusihuinni «cadi de Dios zeeda ni cá ique [...] sínuque de binni guidxilayú» (Mat. 16:21-23). ¡Nabé risaca nga guiníʼ íquenu ante guininu xiixa! Galán cadi guiaandaʼ laanu, neca nánnanu stale cosa, qué zanda guchaaganu ni ne guiráʼ ni nanna Dios (Job 38:1-4; Pro. 11:2).

3 Biquiiñeʼ Stiidxaʼ Dios ne cadi gudxiibaluʼ laca lii.

«Qué rune gasti de naa siaʼ sínuque rinié ni bisiidi Bixhoze naa.» (JUAN 8:28)

Ñee ñábiluʼ tuuxa: «Pa ñacaʼ lii la?...». Neca nánnanu modo guni chaahuinu xiixa guendanagana, galán chinándanu ejemplu stiʼ Jesús, purtiʼ qué nudxiibaʼ laca laa ne qué ñuni cré nanna stale. Neca gúcabe ti binni nabé nuu xpiaaniʼ que tutiica binni guidxilayú, laapebe guniʼbe ca diidxaʼ riʼ: «Cadi de naa siaʼ uniéʼ sínuque maca udixhe Bixhoze [...] xi iniéʼ» (Juan 12:49, 50). Cani bisiidiʼ Jesús ne ca conseju bidiibe bisihuínnicani cadi de laabe bireecani, sínuque de Bixhózebe.

Casi Lucas 22:49 na dxi mayaca guinaazecabe laabe, ca discípulo stibe gunabadiidxacaʼ pa zanda tíndecaʼ para gulacaʼ laabe. Dede tobi de laacaʼ biquiiñeʼ ti espada para cadi guinaazecabe laabe. Lu relatu ni zeeda lu Mateo 26:52-54 laaca cuzeeteʼ gulee Jesús tiempu para gucané discípulo que guiene xi riníʼ ique Jiobá. Laaca gunna Jesús xiná ca diidxaʼ ni zeeda lu Génesis 9:6 ne ca diidxaʼ riguixhená ni zeeda lu Salmo 22 ne ni zeeda lu capítulo 53 stiʼ Isaías. Ngue runi, jneza ca conseju ni bidiibe purtiʼ gucanécani para guilá stale binni ne bisiecheʼ cani Jiobá.

  4 Biquiiñeʼ ca libru ne revista ni ribee xquidxi Dios.

«Uná nga mozo ni zanda gusaana xpixuaana laa guʼya irá xpinni ne gudii ni iquiiñe cabe yaʼ. Ti mozo ni nuu xpiaani ne ni runi jneza.» (MAT. 24:45)

Maʼ gulí Jesús mozo ni nuu xpiaaniʼ para gusiidiʼ laanu ni cá lu Biblia, casi ora nudii ni nidoʼno. Pa chigudiiluʼ conseju ne chigusiéneluʼ laa guni xiixa nabé risaca, ñee ribeeluʼ tiempu para guʼndaʼ chaahuiluʼ ca libru ne ca revista ni rusiene xi cusiidiʼ Biblia la?

Lu Índice de las publicaciones Watch Tower ne lu Watchtower Library a zeeda stale cosa ni zanda gacané laanu gánnanu xi gúninu. Galán iquiiñenu cani cudii xquidxi Dios riʼ laanu. Nabé stale tema zeeda lúcani ra zanda guidxela binni stale cosa ni gacané laa. Ñee zanda gusiidiluʼ xcaadxi xpinni Cristu iquiiñeʼ cani para guyúbicaʼ conseju ni zeeda lu Biblia ti gánnacaʼ xi gúnicaʼ la? Cásica riquiiñeʼ binni ni rábicabe GPS para ganna paraa nuu ne ximodo chindá ra racalaʼdxiʼ, zacaca zanda iquiiñenu cani rudii xquidxi Dios para gánnanu xii nga ni jma jneza gúninu cadi guireʼnu lu neza ra zanda ugaandanu guendanabani ni qué ziuu dxi guiluxe.

Stale binnigola huasiidicaʼ cani rucheeche diidxaʼ ximodo iquiiñecaʼ Índice o Watchtower Library. Ora rúnicabe zacá, racanécabe cani rucheeche diidxaʼ gánnacaʼ xi tema zanda gúʼndacaʼ ne xi conseju zeeda lu Biblia zacané laacaʼ ora quixhe íquecaʼ gúnicaʼ xiixa. Zacá racanécabe ca xpinni Cristu cadi gánnasicaʼ ni gunabadiidxacaʼ, sínuque laaca zaziidicaʼ guʼndaʼ chaahuicaʼ ne guni crecaʼ de guidubi ladxidoʼcaʼ guiráʼ ni cudii Jiobá para iguidxi fe sticaʼ. Pa gúnicabe nga, zacaneni laacabe gánnacabe «uná nga jneza ne uná nga ni cadi jneza» (Heb. 5:14).

5 Cadi guiniʼluʼ xi naquiiñeʼ guni stobi.

«Cada tobi nga naquiiñeʼ guni ni biaana lu naʼ.» (GÁL. 6:5, NM)

Rudii Jiobá lugar binni cuí pa zinanda ca conseju ni gudiibe laa o pa coʼ (Deu. 30:19, 20). Nuu tiru ziuu stale conseju ni zanda iquiiñeʼ binni ora cuí xi guni, peru laa nga naquiiñeʼ guʼyaʼ xi guni. Pa guinabaʼ tuuxa xiixa conseju laanu, galán guinabadiidxanu laca laanu: «Ñee naa nga napaʼ derechu para gusieneʼ tema riʼ la?». zándaca nuu tiru jma galán gacané ca binnigola stiʼ ca binni ridagulisaa tuuxa, ne pa nahuiinibe la? jma galán gacané bixhózebe o jñaabe laabe.

[Nota]

[Imagen ne cuadru ni zeeda lu yaza 8]

Ni zanda iquiiñeluʼ ora guni adorarluʼ Dios né binnilídxiluʼ

Tobi de ca cosa ni zanda iquiiñeluʼ para gúʼndaneluʼ binnilídxiluʼ nga de cani nacubi huanabadiidxaʼ binni lii. Ñee zanda guyúbiluʼ xiixa tema ne textu ni zeeda lu Biblia ni zacané lii guicábiluʼ ni huanabadiidxaʼ binni lii la? Xi zanda gúniluʼ pa málasi guinabadiidxaʼ ti xpinni Cristu lii pa zanda guireené tuuxa ni racalaʼdxiʼ guichaganáʼ. Primeru zanda guyúbiluʼ lu Índice o lu Watchtower Library diidxaʼ «Concertar citas» o «Matrimonio» ne despué biiyaʼ xi tema zanda iquiiñeluʼ. Ora guyúbiluʼ xiixa tema, biiyaʼ pa zeeda diidxaʼ «Véase también», purtiʼ cuseendaʼ ni lii sti lugar ra zándaca guidxélaluʼ xiixa ni gacané lii.

[Cuadru ni zeeda lu yaza 9]

Riquiiñeʼ Jiobá xquidxi para gudii laanu ca conseju jma galán ti ganda gacanenu binni ora gusíʼdinu laa. Eclesiastés 12:11 cayabi laanu: «Stiidxaʼ binni nuu xpiaaniʼ zeeda gaca casi punta puya, ne binni ni ricaa conseju risaca zeeda gaca casi clavu daabi dxiichiʼ; ne ti pastor si nga bidii cani». Cásica riquiiñeʼ binni «puya» para gucaa ti yuze guzuubaʼ diidxaʼ, zacaca rizaaca ora rudii binni ti conseju né guendabiaaniʼ, purtiʼ racanécani binni saʼ jneza. Ca «clavu daabi dxiichiʼ» ca riquiiñeʼ cani para guinaazeʼ cani xiixa. Zacaca nga rizaaca né ca conseju galán rudii binni: racanécani guzuhuaa dxiichiʼ cani gucaadiaga cani. Ca binni nuu xpiaaniʼ riéchecaʼ ora ruundacaʼ ne riénecaʼ ca «conseju risaca» ni rusihuinni pabiáʼ nuu xpiaaniʼ «pastor» sticaʼ, Jiobá.

Nga runi, galán iquiiñenu stiidxaʼ Pastor riʼ ora gudiʼnu conseju. Nabé risaca nga gucaadiáganu binni ora guinabaʼ xiixa conseju laanu ne guyúbinu modo gacanenu laa. Ne pa iquiiñenu Biblia para gudiʼnu conseju la? zacaneni binni guiníʼ ique jneza ne cueendú ni galán biaʼ dxi guibani.