Biʼniʼ stipa pur gulaluʼ xquendaxheelaluʼ
Biʼniʼ stipa pur gulaluʼ xquendaxheelaluʼ
«Peru cani ma bichaganá la? chi tidxe laaca cadi ni na iqueʼ, sínuque ni na Señor.» (1 COR. 7:10)
ÑANDA NUSIÉNELUʼ NI LA?
Ximodo nga ruchaaga Dios cani maʼ bichaganáʼ.
Ximodo zanda gacané ca binnigola ca xpinni Cristu ni napa xiixa guendanagana lu xquendaxheelaʼ.
Ximodo naquiiñeʼ guidúʼyanu guendaxheelaʼ.
1. Ximodo ruuyaʼ ca xpinni Cristu guendaxheelaʼ, ne xiñee.
ORA richaganáʼ ti xpinni Cristu la? rudii stiidxaʼ nezalú Dios, nga runi, cadi naquiiñeʼ gúʼyabe ni casi guendariguite (Ecl. 5:4-6). Jiobá nga gudixhestí guendaxheelaʼ, nga runi, cani richaganáʼ «ma bichaaga Dios» laacaʼ (Mar. 10:9). Ne para Dios xheelacabe, neca nuu ley stiʼ gobiernu ni guiníʼ gadxé cosa. Ca xpinni Cristu naquiiñeʼ gúʼyacaʼ guendaxheelaʼ sticaʼ casi modo ruuyaʼ Jiobá ni, neca bichaganacaʼ ante gunibiaʼcaʼ Jiobá o despué.
2. Gunáʼ nga ca guendarinabadiidxaʼ zacábinu lu tema riʼ.
2 Zanda guibani chupa binni ni maʼ bichaganáʼ nayecheʼ. Peru xi zanda gúnicabe ora gápacabe guendanagana yaʼ. Ñee zanda gúnicabe xiixa para chuʼ xquendaxheelacabe naguidxi la? Xi zanda gacané cani ruluíʼ zabiá xquendaxheelaʼ yaʼ.
ÑEE ZABÁNICABE NAYECHEʼ LA? O ZÁCANI TI YUUBAʼ PARA LAACABE
3, 4. Xi zándaca gueeda guizaaca pa qué guiníʼ ique chaahuiʼ ti xpinni Cristu tu guichaganáʼ.
3 Ora rindaa guendaxheelaʼ stiʼ ti xpinni Cristu, rusiécheni laacaʼ ne rusisácani Jiobá. Peru ora ribiá ti guendaxheelaʼ, nabé runinani laacaʼ. Nga runi, ti xpinni Cristu ni maʼ caníʼ ique guichaganáʼ zanda guzulú xquendaxheelaʼ galán pa chinanda ca conseju stiʼ Dios. Peru pa qué guiníʼ ique chaahuibe tu binni guichaganabe la? zándaca qué ziuube nayecheʼ ne zápabe stale yuubaʼ. Nuu hombrehuiiniʼ ne dxaapahuiiniʼ, ruzulú rireenecaʼ tuuxa ante chuʼcaʼ listu para gúnicaʼ guiráʼ ni naquiiñeʼ gaca lu ti guendaxheelaʼ. Nuu tu laa ridxela tuuxa lu Internet ne nagueendaca richaganáʼ laabe, peru nabé triste modo riluxe cani runi zacá. Ne nuu tu runi xiixa cosa malu ora maʼ canazá de novio ne richaganáʼ despué, peru zándaca guzulúcabe xquendaxheelacabe sin guni respetársaacabe laacabe.
4 Nuu xpinni Cristu qué ruzuubaʼ diidxaʼ ne richaganáʼ tuuxa ni cadi naca «ti xpinni Señor», peru despué rapa guendanagana purtiʼ qué runi adorar xheelaʼ Dios (1 Cor. 7:39). Pa zacá nuuluʼ la? gunabaʼ Dios gutiidilaʼdxiʼ donda stiuʼ ne gudxi laabe gacanebe lii. Laabe qué zabeebe guiráʼ guendanagana ni napa binni pur bichee, peru zanda gudiibe stipa cani maʼ guca arrepentir para ganda guibánicaʼ galán, neca nuu ni cayuniná laacaʼ (Sal. 130:1-4). Biʼniʼ stipa de guidubi ladxidoʼloʼ para guʼnuʼ ni riuulaʼdxiʼ Jiobá yanna ne cadi gusaana de guʼnuʼ ni nabe, zacá zeeda gaca guendanayecheʼ stiʼ Jiobá «casi ti lugar ni naguidxi para [lii]» (Neh. 8:10).
ORA RULUÍʼ ZABIÁ TI GUENDAXHEELAʼ
5. Ximodo cadi naquiiñeʼ guiníʼ ique ti xpinni Cristu pa cadi nabani nayecheʼ né xheelaʼ.
5 Ti binni ni cadi nuu nayecheʼ lu xquendaxheelaʼ zándaca guinabadiidxaʼ: «Ñee dxandipeʼ nga racalaʼdxeʼ guilá guendaxheelaʼ stinneʼ la? ¡Pa ñanda si nudxiguetaʼ tiempu ni maʼ gudiʼdiʼ ne nichaganaʼyaʼ sti binni!». Zándaca tiidiʼ ndaaniʼ íquebe guchiabe xquendaxheelabe ne guiniʼbe: «¡Zacá maʼ ziuaaʼ stubeʼ sti biaje! Xiñee qué gacaʼ divorciar yaʼ. Neca cadi cudii Biblia ti razón para laani, xiñee qué gusaanaʼ xheelaʼ ne guibaneʼ nayecheʼ sti biaje yaʼ». Lugar de guiníʼ ique ti xpinni Cristu zacá ne guyubi ximodo nibani jma galán, naquiiñeʼ guʼyaʼ xiná Dios ne guni stipa pur chinanda ca conseju stibe biaʼ gándatiʼ.
6. Bisiene ca diidxaʼ guníʼ Jesús ni zeeda lu Mateo 19:9.
6 Cadi purtiʼ si maʼ guca divorciar ti xpinni Cristu zanda guininu rudii Biblia razón laabe para guichaganabe sti biaje. Jesús guníʼ: «Tutiica gaca divorciar né xheela ne ichaganá stobi, neca qué nuchee xheela la? ma enda rapa jnadxii ngue» (Mat. 19:9). Diidxaʼ gucheené binni xheelaʼ laaca riniʼni gapa binni jnadxii ne xcaadxi pecadu malu casi laacani. Nga runi, pa caníʼ ique ti xpinni Cristu gaca divorciar peru nin tobi de laacabe qué ñuuné sti binni la? naquiiñeʼ guinábabe Dios gacané laabe ne guluíʼ laabe xi naquiiñeʼ gúnibe.
7. Xi zanda guiníʼ ique cani guʼyaʼ ora guibiá xquendaxheelaʼ ti xpinni Cristu.
7 Ora ribiá xquendaxheelaʼ ti xpinni Cristu, rusihuínnini cadi naguidxi nuucabe nezalú Dios. Apóstol Pablu guníʼ xiixa ni rucaa binni guiníʼ ique: «Pa qué ganna be guni mandar be ndaani lidxi be la? ximodo zanda gapa be ca xpinni Dios yaʼ» (1 Tim. 3:5). Pa guirópacabe riníʼcabe xpinni Cristu laacabe ne guibiá xquendaxheelacabe la? cani guʼyaʼ modo nuucabe zaníʼ íquecaʼ qué rúnicabe ni rusiidicabe binni (Rom. 2:21-24).
8. Xi rusihuinni ti guendaxheelaʼ pa caníʼ íquecaʼ guixélecaʼ o gaca divorciarcaʼ.
8 Pa caníʼ ique chupa xpinni Cristu ni maʼ guyuunisa gusaanacaʼ xheelacaʼ o gaca divorciarcaʼ neca qué rudii Biblia razón para gúnicabe ni, rusihuinni nga maʼ caxélecabe de Dios. Zándaca tobi de laacabe o guirópacabe maʼ cadi zinándacabe ca conseju ni zeeda lu Biblia. Pa ñaca dxandíʼ runi crécabe Jiobá de guidubi ladxidóʼcabe la? ñanda nidxélacabe ximodo ñaca chaahuiʼ ni cadíʼdicabe ti nilá xquendaxheelacabe. Biblia na: «Gulaʼquiʼ guidubi ladxidoʼloʼ lu naʼ Jiobá, ne cadi gúniluʼ ni na si xpiaaniluʼ. Lu guiráʼ ni gúniluʼ guníʼ ique laabe, ne laabe zúnibe ca neza stiluʼ derechu» (Proverbios 3:5, 6).
9. Xi ndaayaʼ ricaa ti xpinni Cristu ora qué rixeleʼ de xheelaʼ.
9 Stale guendaxheelaʼ ni ruluíʼ maʼ chiguibiá huayuni chaahuicaʼ guendanagana sticaʼ. Stale de ca xpinni Cristu ni qué rusaana xheelaʼ nagueenda, ribeenducaʼ ni galán pur stipa ni rúnicaʼ. Guiníʼ íquenu xi zándaca guizaaca né tuuxa ni qué runi adorar xheelaʼ Dios. Apóstol Pedru bicaa: «Hermana caʼ, lauzuuba stiidxa xheela tu, purti pa nuu de laaca qué runi cre stiidxa Cristu la? zándaca iguudxi ra guʼya runi xheela jneza ne runi respetar laa. Ne zacá cadi naquiiñe iníʼ pe tu para ucuudxi tu laacaʼ» (1 Ped. 3:1, 2). Pa jneza modo nabani ti xpinni Cristu, zándaca ra tiidiʼ tiempu zaca xheelabe xpinni Dios. Ti guendaxheelaʼ ni guni chaahuiʼ ca guendanagana stiʼ sin guibiá guendaxheelaʼ sticaʼ la? rusisácacaʼ Dios, zabánicaʼ nayecheʼ ne laaca ziuu xiiñicaʼ nayecheʼ.
10, 11. Xi zándaca guizaaca lu ti guendaxheelaʼ, peru xi cadi naquiiñeʼ guiaandaʼ laanu.
10 Cumu racalaʼdxiʼ ca xpinni Cristu chuulaʼdxiʼ Jiobá ni gúnicaʼ la? ruyúbicaʼ guichaganacaʼ tobi ni maʼ guyuunisa. Neca zacá, nuu biaje rizaaca xiixa ni cadi cabézacabe. Nuu tiru reeda gapa xheelaʼ tobi de laacabe xiixa guendanagana ni zándaca guniná xpiaaniʼ. O zándaca gusaana tobi de laacabe de gucheeche diidxaʼ. Ngapeʼ nga ni bizaaca Linda, a ti gunaa xpinni Cristu ni maʼ bichaganáʼ ne napa xiiñiʼ. Qué ñanda ñúnibe gastiʼ ora bíʼyabe zixeleʼ xheelabe de Dios chaahuiʼ chaahuiʼ ne despué gupa xidé guleecabe laa de ndaaniʼ xquidxi Dios. Xi naquiiñeʼ guni ti xpinni Cristu pa ruluíʼ zabiá xquendaxheelaʼ pur xiixa casi nga yaʼ.
11 Zanda guinabadiidxaluʼ laca lii: «Ñee naquiiñeruʼ guneʼ stipa pur guilá guendaxheelaʼ stinneʼ neca guizaaca intiica cosa la?». Guirutiʼ qué zanda gabi lii xi naquiiñeʼ guʼnuʼ. Peru neca ruluíʼ jma nagana modo nuu xquendaxheelatu, nuu stale razón para cadi guireetu gana. Nabé rusisaca Jiobá cani rucaa xquendabiaaniʼ laa guni huantar ca guendanagana rapa lu xquendaxheelaʼ (biindaʼ 1 Pedro 2:19, 20). Riquiiñebe Stiidxabe ne espíritu stibe para gacanebe ca xpinni Cristu ni cayuni stipa para chuʼ xquendaxheelaʼ naguidxi.
NUUBE LISTU PARA GACANÉCABE
12. Xi zaníʼ ique ca binnigola de laanu pa guinábanu laacaʼ gacanecaʼ laanu.
12 Pa nápaluʼ guendanagana lu xquendaxheelaluʼ, nagueendaca biyubi gacané ca xpinni Cristu ni maʼ huaniisi lu stiidxaʼ Dios lii. Ca binnigola zeeda gácacaʼ casi pastor stiʼ ca dendxuʼ huiiniʼ ne ziéchecaʼ guluiʼcaʼ lii ca conseju ni cá lu Stiidxaʼ Dios (Hech. 20:28; Sant. 5:14, 15). Cadi guiníʼ íqueluʼ maʼ qué zuni respetárcabe lii ne xheelaluʼ purtiʼ si gunábatu laacabe gacanécabe laatu ne gábitu laacabe xi guendanagana cadíʼditu. Jma zannaxhiicabe laatu ne zazaaláʼdxicabe laatu ora gúʼyacabe racaláʼdxitu gusiéchetu Dios.
13. Xi conseju ridxélanu lu 1 Corintios 7:10-16.
13 Pa nuu ti xpinni Cristu ni cadiʼdiʼ lu guendanagana purtiʼ qué runi adorar xheelaʼ Dios la? zanda guinábabe ca binnigola gacanecaʼ laabe. Laacaʼ zaquiiñecaʼ conseju casi ni bidii apóstol Pablu riʼ: «Peru cani ma bichaganá la? chi tidxe laaca cadi ni na iqueʼ, sínuque ni na Señor, cadi usaana gunaa xheelaʼ. Ne pa chuʼ ti gunaa usaana xheela la? napa xidé guiaana stubi, o pacaa la? ibigueta né xheelaʼ. Ne zaqueca hombre, cadi ilaa né xheelaʼ [...]. Purti zándaca ulá lu xheela lu, hermana. Zacaca lii, hermanu, zándaca ulá lu xheela luʼ» (1 Cor. 7:10-16). ¡Ti ndaayaʼ naroʼbaʼ nga chuulaʼdxiʼ xheelaʼ tuuxa guni adorar Dios!
14, 15. Pora nga zándaca guiníʼ ique ti xpinni Cristu gusaana xheelaʼ, peru xiñee naquiiñeʼ guni orarbe Dios de guidubi ladxidoʼbe para gacané laabe.
14 Zándaca pur xiixa cosa ni cayaca guiníʼ ique ti gunaa xpinni Cristu «usaana [...] xheelaʼ». Nuu tu laa rusaana xheelaʼ purtiʼ nabé runiná xheelaʼ laa, purtiʼ maʼ qué ganda gúnibe ni naʼ Dios o purtiʼ qué naʼ hombre ca gudii ni caquiiñeʼ binnilídxibe.
15 Binni nga naquiiñeʼ guʼyaʼ pa zusaana xheelaʼ o pa coʼ. Peru ti xpinni Cristu ni maʼ guyuunisa naquiiñeʼ guʼyaʼ chaahuiʼ ximodo nuu ne guni orar Dios para gacané laa. Casi pa qué naʼ xheelabe guni adorarbe Dios, ñee hombre casi nga napa donda la? o laaca maʼ bisaana gunaa ca de guʼndaʼ Biblia, maʼ qué rié ca guendaridagulisaa ne maʼ qué rucheeche diidxaʼ.
16. Xi naquiiñeʼ gucueeza laanu para cadi gaca divorciarnu nagueendaca.
16 Laanu, ca xpinni Cristu, qué riníʼ íquenu gaca divorciarnu nagueendaca. Xiñee yaʼ. Purtiʼ nabé risaca para laanu chuʼnu gaxha de Dios ne laaca rusisácanu guendaxheelaʼ casi ti cosa sicarú bisigáʼdebe laanu. Ni jma risaca para ca xpinni Jiobá nga gusisaca binni labe. Nga runi, qué liica ruyúbinu guibiá xquendaxheelanu purtiʼ racaláʼdxinu guichagananu sti binni (Jer. 17:9; Mal. 2:13-16).
17. Pora nga zanda guininu «cadi guridxi Señor laanu para tinde nu».
17 Ti xpinni Cristu ni qué runi adorar xheelaʼ Dios naquiiñeʼ guni stipa pur chuʼ xquendaxheelaʼ galán. Peru pa gusaana xheelabe laabe neca maʼ bíʼnibe stipa pur cadi guibiá xquendaxheelabe la? cadi galán diʼ guiníʼ íquebe nápabe donda. Pablu bicaa: «Peru pa ma qué na ni qué runi cre cueza né xheela ni runi cre la? cadi uyubi modo ucueeza laabe, purti cadi guridxi Señor laanu para tinde nu» (1 Cor. 7:15). b
BIʼNIʼ CRÉ ZACANÉ JIOBÁ LII
18. Neca qué ganda gulá ti xpinni Cristu xquendaxheelaʼ, xi zanda cueendube pur ca stipa gúnibe.
18 Ora gápaluʼ xiixa guendanagana lu xquendaxheelaluʼ gunabaʼ Jiobá gacané lii gácaluʼ nadxibalú ne cadi gusaana de guni creluʼ laabe. Biblia na: «Guleza gacané Jiobá lii; guca nadxibalú, ne biʼniʼ ladxidoʼloʼ naguidxi. Guleza gacané Jiobá lii» (Salmo 27:14). Linda, gunaa ni maca bizéʼtenu que, guca divorciar xheelabe de laabe neca bíʼnibe stipa pur stale iza para nilá xquendaxheelabe. Ñee guníʼ íquebe qué nisaca tiempu gulézabe que la? Laabe guniʼbe: «Coʼ. Cani biʼyaʼ ni bizaacaʼ biziidicaʼ stale de laani. Nuudxí xquendabiaaneʼ yanna. Ne ndiʼ nga ni jma galán: ca iza que gucanécani para guiziidiʼ xiiñedxaapaʼ de Dios, chúʼnisa ne gaca testigu stiʼ Jiobá».
19. Xi zanda cueendú tuuxa pa guni stipa pur gulá xquendaxheelaʼ.
19 Sti gunaa xpinni Cristu láʼ Marilyn riecheʼ purtiʼ biʼniʼ cré Dios ne biʼniʼ stale stipa para bilá xquendaxheelaʼ. Laabe guniʼbe: «Gucalaʼdxeʼ nusaanaʼ xheelaʼ purtiʼ qué rudiibe bueltu para guibaneniáʼ binnilidxeʼ ne qué rinabe guneʼ adorar Jiobá. Gúcabe binnigola ndaaniʼ neza binni ridagulisaa ante gúnibe caadxi negocio ni cadi jneza. Peru despué maʼ qué ñebe ca guendaridagulisaa ne bisaana de güidu diidxaʼ. Dxi bicaalú caadxi terrorista xquídxidu nabé bidxibeʼ ne bixeleʼ de binni. Óraque nga bieneʼ laaca napaʼ donda pur ca guendanagana nuu lu xquendaxheelaʼ. Bizulú gunieniáʼ xheelaʼ sti biaje, bibiguetaʼ bidúʼndadu Biblia ne bizulú guyuudu ca guendaridagulisaa sti biaje. Guca ca binnigola nachaʼhuiʼ né laadu ne gucanecaʼ laadu stale. Qué nindaa guyuu xquendaxheeladu galán ne ra gudiʼdiʼ tiempu gucuaa xheelaʼ guiráʼ ca dxiiñaʼ gupa lade ca binni ridagulisaa. Naná guiráʼ ni gudídidu para bizíʼdidu, peru yanna maʼ nuudu nayecheʼ».
20, 21. Xi naquiiñeʼ quixhe íquenu gúninu lu xquendaxheelanu.
20 Pa maʼ bichagananu o pa coʼ la? guiráʼ ora naquiiñeʼ gusihuínninu nácanu binni nadxibalú ne runi crenu Jiobá. Pa nuu guendanagana lu xquendaxheelanu gúninu stipa pur guni chaahuinu cani, ne guietenaláʼdxinu ndiʼ: cani maʼ bichaganáʼ, «ma cadi chupa cabe sínuque tobi si laacabe» (Mat. 19:6). Ne pa guzúʼbanu stiidxaʼ Jiobá neca xheelanu qué runi adorar laabe, zándaca despué ziéchenu ora guidúʼyanu guzulú guni adorarbe Dios.
21 Modo tiica nabáninu, quixhe íquenu gácanu binni nuu xpiaaniʼ ti ora guʼyaʼ cani cadi naca Testigu laanu guiniʼcaʼ jneza modo nabáninu. Ne pa nuu guendanagana lu xquendaxheelanu ne ruluíʼ zabiani la? guni orarnu de guidubi ladxidoʼno, guiduʼyaʼ chaahuinu xi cucaa laanu guiníʼ íquenu zacá, guiníʼ íquenu ca conseju zeeda lu Biblia ne guinábanu gacané ca binnigola laanu. Peru ni jma risaca gúninu nga gusiéchenu Jiobá ne gusihuínninu dxandíʼ rusisácanu guendaxheelaʼ casi ti cosa ni bisigáʼdebe laanu.
[Nota]
a Bidxaa lácabe.
b Biiyaʼ libru Cadi guixélenu de Dios ni nadxii laanu, yaza 219 dede 221, ne La Atalaya 1 stiʼ noviembre 1988, yaza 26 ne 27, ne 1 stiʼ febrero 1976, yaza 95.
[Guendarinabadiidxaʼ stiʼ párrafo]
[Ni caníʼ yaza 10]
Stale de ca xpinni Cristu ni qué rixeleʼ de xheelaʼ nagueenda, ribeenducaʼ ni galán pur stipa ni rúnicaʼ
[Ni caníʼ yaza 12]
Cadi gusaana de guni crenu Jiobá ne guinábanu laa gudii stipa laanu para gácanu nadxibalú
[Imagen ni zeeda lu yaza 9]
Riguu Jiobá ndaayaʼ ca xpinni Cristu ni cayuni stipa para chuʼ xquendaxheelaʼ naguidxi
[Imagen ni zeeda lu yaza 11]
Zanda quixhedxí ca binni ridagulisaa ladxidoʼno ne gacanecaʼ laanu gúninu ni na Dios
