Ni rinabadiidxaʼ cani ruundaʼ

Xiñee riníʼ Biblia: «Nabé risaca para Jiobá guendaguti stiʼ cani qué rusaana laa».

▪ Nabé rusisaca Jiobá guendanabani stiʼ guiráʼ xpinni ne cada tobi de cani qué rusaana laa. Peru ca diidxaʼ ni zeeda lu Salmo 116:15, cadi caníʼcani de guendaguti stiʼ ti binni.

Ora gudii tuuxa ti libana ra guti ti binni la? cadi jneza guiniʼbe cayaca ni na textu ca luguiáʼ gueʼtuʼ ca, neca bizuubaʼ xpinni Cristu ca stiidxaʼ Jiobá dede ora guti. Xiñee yaʼ. Purtiʼ stale cosa nga ni cusiene versículo riʼ. Ni gucalaʼdxiʼ salmista que nusiene lu textu riʼ nga qué zudii Jiobá lugar gati guiráʼ ca xpinni ni qué rusaana laa tobi si tiru, purtiʼ para laa nabé risaca xquendanabánicaʼ (biiyaʼ xiná Salmo 72:14 ne 116:8).

Relatu riʼ caníʼ qué zudii Jiobá lugar gunduuxecabe guiráʼ xixé ca xpinni ni qué rucheené laa. Historia stinu rusihuinni zacá ni. Stale de ca bíʼchinu ne bizáʼnanu huayuni huantarcaʼ ora rucaalú binni laacaʼ ne ora rizanándacabe laacaʼ, racá ridúʼyanu cayapa Jiobá ca xpinni para cadi gunduuxeʼ binni laacaʼ.

Cumu Jiobá nga ti Dios ni napa stale poder la? zaca guiráʼ ni maʼ gudixhe íquebe gúnibe. Nga runi, qué ziuu dxi gudiibe lugar guinitilú xquídxibe tobi si tiru. Pa chuʼ dxi gaca nga, zahuinni jma nadipaʼ ca xhenemígube que laabe. Ne pa nizaaca nga la? maʼ qué ñaca ni gudixhe ique Jiobá ora guníʼ zadxá Guidxilayú riʼ de binni ni ruzuubaʼ diidxaʼ (Isa. 45:18; 55:10, 11). Laaca maʼ qué ñuu binni ndaaniʼ Guidxilayú, o lu patiu stiʼ yuʼduʼ stiʼ Dios para ñuni adorarcaʼ Jiobá ne ñúnicaʼ ni nabe. Laaca qué ñuu binni ni ñeeda gaca «guidxilayú cubi», o guiráʼ ca xpinni Dios ni runi jneza ni guibani lu Guidxilayú riʼ ora maʼ guni mandar gobiernu stiʼ Dios, ni zeeda gaca casi «ibáʼ cubi» (Apo. 21:1). Pa qué chuʼ binni lu Guidxilayú riʼ, qué zanda diʼ guni mandar Cristu lu Reinu stiʼ Dios ti mil iza (Apo. 20:4, 5). ¡Nagana huiiniʼ guizaaca ni guninu ca!

Ne pa gudii Jiobá lugar gunduuxeʼ ca xhenemigu xquídxibe lu Guidxilayú riʼ, zaca nagana para binni guni cré pa laabe nga Dios ni runi mandar ne zuuyacabe laabe casi ti binni ni huaxiéʼ risaca. Ne maʼ qué zuuyacabe laabe casi Dios ni napa derechu de guni mandar guibáʼ ne Guidxilayú. Peru cumu runi respetarbe laabe ne runi respetarbe labe la? qué ziuu dxi gudiibe lugar guinitilú guiráʼ ca xpínnibe. Ne naquiiñeʼ guiníʼ íquenu ndiʼ: Dios «qué runi ni malu», nga runi, runi crenu zulabe guiráʼ ca xpínnibe ni qué rusaana laabe (Deu. 32:4; Gén. 18:25). Ne biaʼsi ni bizéʼtenu riʼ né ni caníʼ Biblia: «Jiobá qué zusaana xquidxi purtiʼ nabé risaca labe» (1 Sam. 12:22). Dxandíʼ, «Jiobá qué liica zusaana xquidxi stubi, ne qué zusaanabe herencia stibe» (Sal. 94:14).

¡Nabé ratadxí ladxidoʼno gánnanu qué liica zanitilú xquidxi Dios lu Guidxilayú riʼ! Nga runi, cadi liica gusaana de gúninu ni na Jiobá ne guni crenu ca diidxaʼ riʼ: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ ne intiica guiníʼcabe para gucaalúcabe lii ora gaca juzgarluʼ la? zudxiibaluʼ donda íquecabe. Ndiʼ nga ni cudieeʼ ca xpinneʼ casi ti herencia, ne pur naa nga cayúnicabe ni jneza» (Isa. 54:17).

[Ni caníʼ yaza 22]

Qué ziuu dxi gudii Dios lugar guinitilú xquidxi