Olivier Randriamora guníʼ ni bizaaca

«Nanna xii nga enda pobre ne laca huayapa stale. Ma biziide ibane ratiisi ne sica tiisi, zuhuaa stale endaró lua la? o gastiʼ [...]. Intiisi zanda gune purti nuu né [Jiobá] naa ne racané naa.» (Fili. 4:12, 13)

CA DIIDXAʼ guníʼ apóstol Pablu riʼ, maʼ xadxí de caguucani gana naa ne Oly xheelaʼ, ra cayúnidu xhiiñaʼ Dios lu isla stiʼ Madagascar. Cásica apóstol que, maʼ bizíʼdidu ti cosa nabé risaca: para ganda chuʼ binni nayecheʼ modo tiica nabani la? naquiiñeʼ guni cré zudii Jiobá laa guiráʼ ni caquiiñeʼ.

Bizulú bisiidiʼ ca testigu stiʼ Jiobá jñaa Oly ni cá lu Biblia lu iza 1982. Naa laaca bizuluáʼ, ne Oly bizulú despué, para ca dxi que maʼ novio laadu. Bichaganadu lu iza 1983, guyuʼnísadu lu iza 1985 ne qué nindaa gúcadu precursor auxiliar. Lu beeu julio iza 1986 gúcadu precursor regular.

Lu beeu septiembre iza 1987 beeda gácadu precursor especial ne biseendacabe laadu ti guidxi huiiniʼ nuu ladu guiaʼ neza ra rindani Gubidxa stiʼ isla que, gastiʼ nin ti neza binni ridagulisaa raqué. Lu isla Madagascar nuu biaʼ dieciocho grupu de binni ni jma risaca ne nuu stale grupu ni jma nahuiiniʼ, cada tobi de laacaʼ napa costumbre stiʼ ne modo runi dxiiñaʼ. Diidxaʼ ni jma riníʼ binni guidxi riʼ nga malgache, peru laaca nuuruʼ jma diidxaʼ ni biree de laani. Dxi yendadu ra biseendacabe laadu, gupa xidé bizíʼdinu diidxaʼ riníʼcabe raqué nagueendaca, zaqué jma gunda bidxéladu binni ni gucaadiaga laadu.

Dxi nacubi yendadu raqué, laasidu riuudu guendaridagulisaa. Guiráʼ domingu rudieeʼ ti libana, peru cumu xheelasiáʼ nga nuu raqué la? laasibe nga rigapanabe naa. Laaca rutíʼdidu guiráʼ ni riuundaʼ lu Scuela stiʼ cani Rucheeche Diidxaʼ, ne ora maʼ cutiidiʼ Oly ca libana stiʼ rúnini casi ora cadidiné tuuxa. Galán si nga gudxi binnigola ni riganna ca binni ridagulisaa laadu gúnidu ca guendaridagulisaa que sti modo. ¡Nabé bisiecheʼ ngue laadu!

Cumu qué redandá correu raqué guiráʼ beeu la? qué randa ricaadu bueltu ni ruseendacabe para laadu cada beeu. Peru bizíʼdidu guibánidu neca huaxiéʼ ni nápadu. Ti biaje guca ti guendaridagulisaa de chupa gubidxa biaʼ 130 kilómetru de ra nabézadu, napa xidé chuudu ni, peru qué zugaanda bueltu stidu para chuudu lu autobús. Óraque bietenaláʼdxidu conseju bidii ti Testigu laadu: «Cada biaje gápatu ti guendanagana la? lagüíʼneni Jiobá. Cadi guiaandaʼ laatu xhiiñabe nga cayúnitu». Ngue runi, biʼniʼ orardu ne gudixhe íquedu chuudu a pie. Peru órapeʼ maʼ chuudu, biuu ti xpinni Cristu ni cadi cabézadu ne bisigaʼdeʼ laadu ti ndaa bueltu. ¡Biáʼsipeʼ ni caquiiñedu para boletu stidu!

 YEGÁNNADU CA NEZA BINNI RIDAGULISAA

Beeda gacaʼ binnigola ni riganna ca neza binni ridagulisaa lu beeu febrero iza 1991. Iza que maʼ nuu gaʼ binni ni rucheeche diidxaʼ lu grupuhuiiniʼ stidu —chonna de laacaʼ maʼ guyuunísacaʼ— ne rié biaʼ cincuenta binni cada guendaridagulisaa. Biziidesiaʼ ximodo guneʼ dxiiñaʼ que, biseendacabe laadu chigánnadu ca neza binni ridagulisaa nuu Antananarivo, capital stiʼ isla que. Lu iza 1993 guyuudu ra nuu xcaadxi neza binni ridagulisaa ni nuu neza ra rindani Gubidxa stiʼ isla que. Pa guchaaganu modo nabani binni lugar riʼ la? guizáʼ maʼ gadxé si ni né modo nabani binni ndaaniʼ guidxi.

Para chigánnadu ca neza binni ridagulisaa ne ca grupu nuu zitu, naquiiñeʼ sadu a pie biaʼ 145 kilómetru lu dani ra nuu stale guiʼxhiʼ. Ndaaniʼ maleta stidu rié ca cosa si ni jma zaquiiñedu, peru rinedu xcaadxi cosa ora rinabaʼ libana que tiidiʼ diapositiva, zacá gúcani chupa chonna biaje dxiqué. Cada biaje gácani zaqué la? ruaʼ Oly proyector que, ne naa ruayaʼ ti batería stiʼ carru ni napa 12 voltio.

Para chindadu ra nuu sti neza binni ridagulisaa, napa xidé sadu biaʼ 40 kilómetru ti dxi lade dani, ridídidu guiiguʼ ne ra nuu beñe. Guyuu biaje gúsidu guriá neza, peru jma stale biaje biyúbidu ti lugar ra guiaanadu ndaaniʼ xiixa guidxi. Laaca guyuu dxi gunábadu binni ni qué liica rubiaʼdu gudiicaʼ lugar guiaanadu ralídxicaʼ ti gueelaʼ. Ora maʼ bidxéladu ra guiaanadu la? maca chigúnidu ni guidóʼxhidu. Riguiiñeʼ Oly ti guisu ca binni que para chicaa nisa ra guiiguʼ nuu jma gaxha; laga zebe, ruyubeʼ ti jacha para guichezaʼ yaga ni iquiiñeʼ para gaca guendaroxhi. Riné tiempu para gaca guiráʼ ngue. Ne laaca guyuu biaje guzidu ti bere, biitidu laame ne bisiadu laame para gácame guendaró.

Ora maʼ gudóʼxhidu, ricaadu nisa ne rázedu, de raqué maʼ rigásidu, stale biaje ndaaniʼ guzina. Ne pa guidxuuni ique guzina que ora guiaba nisaguié la? ridópadu cueʼni para cadi ugadxe nisa que laadu.

Cada yoo ra guiaanadu, nabé biyúbidu modo gusíʼdidu ca binni nabeza raqué de stiidxaʼ Dios. Ora maʼ yendadu ra ziuudu, nabé raca ca xpinni Cristu nachaʼhuiʼ né laadu ne sicarú modo ridxaagalucaʼ laadu. Ora gúʼyadu pabiáʼ cayéchecabe pur zigánnadu laacabe, riaandaʼ laadu guiráʼ ni gudídidu neza.

Pa guiaanadu ralidxi ti familia Testigu la? riuuláʼdxidu gacanedu laacaʼ né ca dxiiñaʼ ni raca ndaaniʼ yoo. Zaqué rápacabe jma tiempu para chigucheechecabe diidxaʼ né laadu. Qué ñuu dxi nibézadu nudiicabe laadu cosa risaca o guendaró jma caru ni qué zanda gudiicabe.

YEGÁNNADU CA GRUPU NUU STI LADU

Nabé riéchedu chigánnadu ca grupu huiiniʼ nuu sti ladu. Nabé stale ni riguixhe ca xpinni Cristu que gúnidu raqué, purtiʼ nuu tiru qué liica riaana tiempu para guiziiláʼdxidu (Mar. 6:31). Lu tobi de ca grupu que nuu ti guendaxheelaʼ Testigu, laacaʼ biʼniʼ invitarcaʼ 40 de ca binni ruundanecaʼ Biblia para chuʼdu ora guʼndanécabe ca binni que. Oly ne xheelaʼ Testigu que biindanecaʼ gande binni, naa ne hombre que bíʼndanedu xcaadxi. Cásipeʼ guilúxedu né tobi, maca ruzuludu né stobi.  Gulézadu ti ratu para gúpadu guendaridagulisaa ne despué bíʼndanedu cani cayaadxaʼ. Bíʼndanedu ca binni que dede lu gueelaʼ.

Yanna, xi biʼniʼ guiráʼ ca xpinni Cristu ni nuu lu sti grupu huiiniʼ ni yegánnadu yaʼ. Yenecaʼ laadu para chigucheechedu diidxaʼ sti guidxi huiiniʼ nuu gaxha de raqué. Bireʼdu biaʼ las ocho siadóʼ. Óraque nácudu lari yooxhoʼ, purtiʼ xiroobaʼ zazadu ndaaniʼ guiʼxhiʼ. Yendadu raqué biaʼ galaa dxi, raqué maʼ gúcudu lari nayá ne bizulú bicheechedu diidxaʼ de yoo pur yoo. Cumu nahuiiniʼ guidxi que ne stáledu la? media hora si bindúʼxedu ni. De raqué guyuudu sti guidxi huiiniʼ, ne bilúxesidu raqué, maʼ bibiguétadu yoo. Dxi bizulú bicheechedu diidxaʼ ca lugar que, nabé bireʼdu gana, purtiʼ riquiiñeʼ stale tiempu ne stipa para gúnidu biaʼ ti hora si. Peru ca xpinni Cristu nabé nayecheʼ riuucaʼ ne qué riguiche ruaacaʼ.

Ndaaniʼ guidxi Taviranambo nuu ti grupu huiiniʼ gaxha de ique ti dani. Ora yendadu raqué, bidxéladu ti yoo ni napa ti cuartu si ra nabeza ti familia Testigu. Cueʼni cabí ti yoo ni riquiiñecabe para gaca guendaridagulisaa. Málasi bicaa hombre nabeza ndaaniʼ yoo que ti ridxi: «¡Bíchecaʼ!». Dede ique sti dani nuu gaxha de raqué biree sti ridxi: «¡Xi guca!». Hombre nabeza ra yoo que bicaa sti ridxi: «¡Maʼ bedandá binnigola ni reeda ganna ca binni ridagulisaa!». Óraque bicabi stobi: «¡Galanpeʼ nga maʼ beedabe!». Ruluíʼ bidiicabe diidxaʼ xcaadxi ni nabeza jma zitu, ne chaahuiʼ chaahuiʼ bizulú bidxíñacabe. Ora bizulú guendaridagulisaa que, maʼ nuu biaʼ ti gayuaa binni.

GÚPADU GUENDANAGANA LU CA VIAJE BÍNIDU

Lu iza 1996 bichaacabe laadu ra nuu sti grupu de binni ridagulisaa nuu jma gaxha de Antananarivo, nuuni lu ti pampa huiiniʼ stiʼ isla que, peru laaca gúpadu caadxi guendanagana raqué. Ti biaje chigánnadu ti grupu huiiniʼ ni nuu Beankàna (Besakay), biaʼ 240 kilómetru de Antananarivo, peru gástipeʼ carru para cheʼ binni raqué. Gúnnadu cheʼ ti camión huiiniʼ neza raqué, ne despué de gúdxidu chofer pagala chiné laadu, gudxíbadu ndaaniʼ ni. Biaʼsi treinta binni gudxiʼbaʼ luni, caadxi nexheʼ íqueni ne xcaadxi naazeʼ atrá de laani.

Cásica raca stale biaje, bixiiñeʼ camión que galaa neza. Ngue runi, gupa xidé guzadu a pie xadxí, dede ora gudiʼdiʼ sti camión ngola. Laaca dxátipa carru riʼ de binni ne stale cosa ni zeʼ ndaaniʼ ni, neca zaqué bizuhuaadxí carru que. Gudxíbadu ndaaniʼ ni, neca nánnadu gastiʼ lugar para  cuidu. De raqué yendadu ra nuu ti guiiguʼ, peru cayaca chaahuiʼ puente stini, ngue runi gupa xidé guzadu a pie sti biaje. Guzásidu xiroobaʼ yendadu ti guidxi huiiniʼ ra nabeza chupa precursor especial. Neca cadi laacabe zigánnadu, biaanadu raqué para gucheechedu diidxaʼ né laacabe dede ora gudiʼdiʼ sti carru guca chaahuiʼ si puente que.

Peru para gudiʼdiʼ sti carru que gupa xidé gulézadu ti semana. Stale biaje, ora guiétedu para gucáʼnadu carru que, dede lu xíbidu nisa, purtiʼ nabé nuu stale barranca neza que. ¡Stale biaje birenda ñeʼdu ne biábadu! Nacándaruʼ yendadu sti guidxi huiiniʼ ne raqué biétedu. Para chindadu ra ziuudu la? gupa xidé biuʼdu lu ca layú ra rudxiibacabe arroz, dede xandaanidu ca nisa beñe que.

Cumu deruʼ primé biaje ngue ziuudu raqué la? gunínedu caadxi de cani cayuni dxiiñaʼ raqué ne gunabadiidxadu laacaʼ ximodo chindadu ralidxi ca Testigu. ¡Guizáʼ biéchedu ora gúnnadu laaca Testigu laacabe!

GUCANEDU XCAADXI BINNI PARA GÚNICAʼ JMA LU XHIIÑAʼ DIOS

Nabé riéchedu pur dxiiñaʼ huayúnidu ca iza ni maʼ gudiʼdiʼ, purtiʼ maʼ bidúʼyadu cayuni stale de ca binni ni gucanedu jma lu xhiiñaʼ Dios. Ti biaje gúdxidu gaʼ precursor regular stiʼ ti neza binni ridagulisaa gúʼyacaʼ pa ganda gacanecaʼ tuuxa para gaca precursor. Ora bibiguétadu raqué, gudiʼdiʼ si xhoopaʼ beeu, maʼ nuu veintidós precursor. Chupa precursora gucanecaʼ bixhózecaʼ —ni naca binnigola lade ca binni ridagulisaa— para gácacaʼ precursor. Laacaʼ gucanecaʼ sti binnigola. Qué nindaa guca binnigola riʼ precursor especial, ne despué, laa ne xheelaʼ yegánnacaʼ ca neza binni ridagulisaa. Xi guca né xhupa binnigola que yaʼ. Tobi de laacabe riganna ca neza binni ridagulisaa, ne stobi que nuu lu grupu ni rucuí Yoo stiʼ Reinu.

Guiráʼ dxi rudiʼdu xquíxepeʼ Jiobá, purtiʼ qué ñanda ñúnidu gastiʼ pa qué ñacanebe laadu. Nuu biaje ridxágadu ne raca huaradu, peru ridxátipa ladxidoʼdo de guendanayecheʼ ora riníʼ íquedu guiráʼ ni guleendudu pur guiráʼ dxiiñaʼ bínidu. Rihuínnica racané Jiobá para guiroobaʼ xhiiñaʼ, ne riéchedu purtiʼ dede yanna cayacanedu neca caadxi huiiniʼ casi precursor especial. Maʼ bizíʼdidu ti cosa nabé risaca: para ganda chuʼ binni nayecheʼ modo tiica nabani la? naquiiñeʼ guni cré zudii Jiobá laa guiráʼ ni caquiiñeʼ. Xiñee yaʼ. Purtiʼ laabe nga Dios ni rudii stipa laanu.

[Ni caníʼ yaza 6]

Maʼ bizíʼdidu ti cosa nabé risaca: para ganda chuʼ binni nayecheʼ modo tiica nabani la? naquiiñeʼ guni cré zudii Jiobá laa guiráʼ ni caquiiñeʼ

[Mapa ne imagen ni zeeda lu yaza 4]

Madagascar, runibiáʼcabe ni casi Isla Ngola Naxiñáʼ purtiʼ zacá color yú nuu guidxi riʼ. Laani nga guidapa isla jma naroʼbaʼ nuu lu Guidxilayú ne racá si nuu caadxi maniʼ ni qué rihuinni sti ladu

[Imagen ni zeeda lu yaza 5]

Gúpadu guendanagana lu ca viaje bínidu

[Imagen ni zeeda lu yaza 5]

Riuuláʼdxidu guidúʼndanedu binni Biblia