«Guca ni maca gudixheʼ iqueʼ guneʼ»

Dxiqué guca Emilia precursora, peru gupa xidé bisaanabe ni raca quince iza. Peru raca ti tiempu huiiniʼ guníʼ íquebe pabiáʼ nayecheʼ guyuube dxi bíʼnibe dxiiñaʼ que, ngue runi gucuá íquebe guzulube sti biaje.

Neca racalaʼdxiʼ Emilia gaca precursora, nabé stale tiempu riguʼbaʼ dxiiñaʼ stibe laabe, ngue runi nabé riuube triste. Ti dxi gúdxibe ca binni ni runinebe dxiiñaʼ: «¡Pa ñanda si maʼ qué ñuneʼ dxiiñaʼ biaʼ tiempu runeʼ yanna!». Ora gunna jefa stibe xi guniʼbe, guyé ra nuube ne gunabadiidxaʼ laabe pa dxandíʼ ngue ni guniʼbe. Óraque gudxi Emilia laabe dxandíʼ ni. Peru naquiiñeʼ cheʼ Emilia ra nuu director que para guiníʼ xi racalaʼdxiʼ, purtiʼ ca binni runi dxiiñaʼ ndaaniʼ empresa que rinábacabe laacaʼ gúnicaʼ dxiiñaʼ guidubi dxi. Ngue runi, biʼniʼ orar Emilia ne gunábabe Jiobá gacané laabe ti cadi guidxíbibe ora guiníʼnebe director que.

Ora guyé Emilia ra nuu hombre que, gúdxibe laa ñuuláʼdxibe nudiicabe laabe jma tiempu para ganda gúnibe sti cosa ni riuuláʼdxibe, peru guniʼbe né diidxaʼ nadóʼ ne qué nidxíbibe. Bisiénebe director que riuuláʼdxibe gacanebe binni ora maʼ cadi cayúnibe dxiiñaʼ. Laabe guniʼbe: «Testigu stiʼ Jiobá naa, ne racaniáʼ binni para guiziidiʼ ni cá lu Biblia. Stale binni maʼ qué ganna xii nga jneza ne ni cadi jneza ca dxi riʼ, nga runi guizáʼ caquiiñeʼ guiénecabe xi rusiidiʼ Biblia. Ráparuaʼ gana guneʼ dxiiñaʼ raríʼ, peru laaca ñuuladxeʼ ñapaʼ jma tiempu para ganda gacaniáʼ binni. Nga runi rabeʼ pa ñanda nudiitu lugar nireeʼ xcaadxi tempranu».

Bicaadiaga director que laabe ne gudxi laabe: «Ti biaje laaca gucuá iqueʼ ñuneʼ xiixa para ñacaniáʼ binni». Óraque gudxi hombre que laabe: «Jneza nga cani cá íqueluʼ gúniluʼ, nga runi rabeʼ zanda guneʼ ni canabuʼ naa. Peru nannuʼ jma huaxiéʼ zuni ganarluʼ, njaʼ». Gudxi Emilia laabe zaa quíxecabe laa huaxiéʼ ne zaziidiʼ guibaniné biaʼ guni ganar. Óraque guníʼ: «Ni jma racalaʼdxeʼ nga guneʼ xiixa ni dxandíʼ gacané binni». Para na director que: «Ridxagayaaʼ guiráʼ tu riquiiñeʼ tiempu stiʼ para gacané binni neca qué riguíxecabe laa».

Yanna riʼ, runi Emilia dxiiñaʼ tapa si gubidxa lu ti semana ne deruʼ laabe ngue primé binni bidiicabe tiempu gunabaʼ ndaaniʼ empresa que. Ne nabé bidxagayaabe, purtiʼ qué nindaa bidxiibacabe lu sueldu stibe, yanna maʼ riáxabe biaʼca gudíxecabe laabe dxiqué. Laabe guniʼbe: «Guca ni maca gudixheʼ iqueʼ guneʼ. Maʼ precursora naa sti biaje».

Lii yaʼ. Ñee maʼ huaníʼ íqueluʼ guchaaluʼ caadxi cosa lu xquendanabániluʼ para gácaluʼ precursor la?

[Ni caníʼ yaza 32]

Gudxi director que laabe: «Ridxagayaaʼ guiráʼ tu riquiiñeʼ tiempu stiʼ para gacané binni neca qué riguíxecabe laa»