Rutagulisaa Jiobá familia stiʼ
Rutagulisaa Jiobá familia stiʼ
«Ma biʼni Espíritu Santu laatu tobi si. Nga runi cadi chuʼ dinde tu.» (EFE. 4:3)
ZANDA GUSIÉNELUʼ NI LA?
Xi para cayuni Dios ti dxiiñaʼ nabé risaca.
Xi riníʼ ca diidxaʼ riʼ: «Ma biʼni Espíritu Santu laatu tobi si. Nga runi cadi chuʼ dinde tu».
Xi zacané laanu para gácanu jma nachaʼhuiʼ né sti binni.
1, 2. Xi maʼ gudixhe ique Jiobá para Guidxilayú ne para binni.
XI RINÍʼ íqueluʼ ora runadiágaluʼ diidxaʼ, familia. Ñee riníʼ íqueluʼ de caadxi binni nadxiisaa ne nuucaʼ nayecheʼ la? O de caadxi binni ni cayuni dxiiñaʼ para ugaanda xiixa. Ñee riníʼ íqueluʼ de ti lugar ra zanda guiniisi binni, guiziidiʼ ne guiníʼ xi guiráʼ riuulaʼdxiʼ guni la? Pa nuuluʼ lade ti familia ni nadxiisaa la? zándaca riníʼ íqueluʼ zacá. Jiobá nga Dios ni gudixhe chuʼ familia (Efe. 3:14, 15). Laabe gudixhe íquebe guibani cani nuu guibáʼ ne cani nuu lu Guidxilayú casi ti familia ne cadi guchibi guirutiʼ laacaʼ, guni crecaʼ nuu tu zacané laacaʼ ne chuʼcaʼ tobi si.
2 Despué de bichee Adán ne Eva, maʼ qué ñácacabe ti familia si né guiráʼ ca ángel stiʼ Dios, peru qué nuchaa diʼ Jiobá ni naguixhe ique guni. Zuyúbibe modo para guibani guiráʼ cani za de Adán ne Eva ndaaniʼ ti paraísu lu Guidxilayú riʼ (Gén. 1:28; Isa. 45:18). Dede maʼ gudíxhebe guiráʼ ni caquiiñeʼ gaca para laani, ne carta ni bicaa Pablu ra nuu ca efesios cusiene stale de laani. Carta ca cusiene pabiáʼ risaca chuʼ binni tobi si. Guidúʼndanu chupa chonna versículo stiʼ libru riʼ ne guidúʼyanu ximodo zanda gacanenu para gaca ni naguixhe ique Jiobá: guibani cani nuu guibáʼ ne cani nuu lu Guidxilayú casi ti familia si.
NI CAYUNI JIOBÁ PARA GACA NI MAʼ GUDIXHE IQUE
3. Xiná Efesios 1:10 cayuni Dios, ne padxí bizulú primé dxiiñaʼ riʼ.
3 Guiráʼ ni runi Jiobá riquiiñeʼ ni para gaca ni naguixhe íquebe. Nga runi, gudíxhebe guiráʼ ni naquiiñeʼ gaca ti guibani cani nuu guibáʼ ne cani nuu ndaaniʼ Guidxilayú casi ti familia si, ne zaca nga ora «ganda [...] xhi ni» (biindaʼ Efesios 1:8-10). Ne chupa modo nga chigaca dxiiñaʼ riʼ. Primé la? zuyúbibe guiráʼ cani cheʼ guibáʼ para chuʼné Cristu ne gápacabe laa casi Xaíque stícabe. Ne lu Pentecostés iza 33, bizulú Jiobá cutagulisaa ca binni ni chiguni mandarné Cristu guibáʼ (Hech. 2:1-4). Riquiiñeʼ Dios guendaguti stiʼ Cristu para guʼyaʼ laacabe casi binni runi ni jneza ni maʼ zanda guibani sin gati. Nga runi riéchecabe ora rudiicabe cuenta maʼ «xiiñi Dios» laacabe (Rom. 3:23, 24; 5:1; 8:15-17).
4, 5. Gunáʼ nga guiropa dxiiñaʼ ni ruzeeteʼ Efesios 1:10.
4 Guiropa la? zuyubi Jiobá ca binni ni chiguibani ndaaniʼ ti paraísu lu Guidxilayú riʼ, ne zuni mandar Reinu stiʼ Cristu laacabe. Guiráʼ ca binni ni ruzeeteʼ Apocalipsis nga primé ni chichuu ndaaniʼ Paraísu ca (Apo. 7:9, 13-17; 21:1-5). Ne lu ti mil iza chiguni mandar Cristu ziasa mil de millón de binni lade gueʼtuʼ para chuʼné laacabe (Apo. 20:12, 13). ¡Bixuiʼlú si xi guiráʼ zanda gúninu ora maʼ guiasa ca gueʼtuʼ ca para gusihuínninu pabiáʼ racaláʼdxinu chuʼnu tobi si! Ora maʼ biluxe ti mil iza riʼ, «irá ni nuu ndaani guidxilayú» zadíʼdicaʼ lu últimu guendanagana, ne cani qué gudxiideche Dios zacaabe laacaʼ casi xiiñibe ne zabánicaʼ ndaaniʼ Guidxilayú (Rom. 8:21; Apo. 20:7, 8).
5 Yanna nga cuyubi Jiobá ca binni cheʼ guibáʼ ne cani chiguibani ndaaniʼ Guidxilayú. Peru ximodo zanda gacanenu para gaca dxiiñaʼ cayuni Dios yaʼ.
«CADI CHUʼ DINDE TU»
6. Ximodo zusihuínninu nuunu tobi si casi na Stiidxaʼ Dios.
6 Stiidxaʼ Dios rusihuinni naquiiñeʼ guidagulisaa ca xpinni Cristu (1 Cor. 14:23; Heb. 10:24, 25). Peru qué ridagulisaanu ti lugar para si chuʼnu juntu ti ratu, casi runi cani rié luguiaa o cani riguuya ora maʼ caguite ti equipu. Laanu riuʼnu tobi si ora ruzúʼbanu stiidxaʼ Jiobá ne ora rinándanu ni na espíritu santu.
7. Xi riníʼ ca diidxaʼ riʼ: «Ma biʼni Espíritu Santu laatu tobi si. Nga runi cadi chuʼ dinde tu».
7 Cumu napa ca xpinni Cristu ni bibí fe lu guendaguti stiʼ Jesús la? ruuyaʼ Jiobá laacabe casi xiiñiʼ, ne laaca ruuyaʼ Jiobá casi xhamigu cani zeeda gaca casi xcaadxi dendxuʼ, purtiʼ rúnicaʼ ni jneza. Peru laga nabáninu ndaaniʼ Guidxilayú riʼ ante guinitilú ca cosa malu nuu luni, ziuu ora zápanu guendanagana né sti binni (Rom. 5:9; Sant. 2:23). Nga runi, jneza nga conseju cudii Biblia ra na: «Cadi casi ze tu idxiichi né tu stobi». Peru xi naquiiñeʼ gúninu para chuʼnu tobi si né guiráʼ ca xpinni Cristu yaʼ. Conseju riʼ na: «Cadi udxiiba tu laca laatu, sínuque lagaca nadóʼ». Pablu laaca guníʼ: «Ma biʼni Espíritu Santu laatu tobi si. Nga runi cadi chuʼ dinde tu» (biindaʼ Efesios 4:1-3). Para chinándanu conseju ni maʼ bizéʼtenu ca naquiiñeʼ gúninu ni na espíritu stiʼ Dios ne gudiʼnu lugar gacaneni laanu gápanu ca guenda ni rudii espíritu santu. Ca binni ni runi ni na ique, qué randa riuucaʼ tobi si, peru laanu randa runi chaahuinu ca guendanagana ni gapanenu sti binni purtiʼ zinándanu ni na espíritu.
8. Xiñee qué riuu binni tobi si ora runi ni na ique.
8 «Cani zinanda ni na ique» qué randa riuucaʼ tobi si né sti binni (biindaʼ Gálatas 5:19-21). Casi ni riuuné ni cadi xheelaʼ rixeleʼ de Jiobá ne de ca binni ridagulisaa, cani rapa jnadxii runinacaʼ binnilídxicaʼ ne ruxhélecaʼ xiiñicaʼ de laacaʼ ne nuu tiru dede ribiá xquendaxheelacaʼ. Cani runi cosa dxabaʼ qué riuucaʼ tobi si né Dios ne binnilídxicaʼ. Zeeda gácani cásica ora gacaláʼdxinu uquíʼdinu chupa cosa: naquiiñeʼ chuʼ guirópani nayá ti ganda iguiidiʼ chaahuiʼ cani. Ni runi cosa dxabaʼ sin guituilú rusihuinni qué rusisaca ca ley chaʼhuiʼ stiʼ Jiobá. Ne guiráʼ cosa ni cadi jneza runi binni ruxhéleni laa de stobi ne de Dios. Nanalaʼdxiʼ Jiobá guiráʼ ca cosa malu riʼ.
9. Xi naquiiñeʼ guinabadiidxaʼ ti xpinni Cristu para guʼyaʼ pa cayuni stipa pur chuʼ tobi si né xcaadxi.
9 Nga runi, cada tobi de laanu naquiiñeʼ guinabadiidxaʼ laca laa: «Pabiáʼ stipa cayuneʼ para chuaaniáʼ ca xpinni Cristu tobi si ne cadi chuʼdíndedu yaʼ. Xi runeʼ ora rapaʼ guendanagana. Ñee rabeʼ guiráʼ xhamiguaʼ xi cayacaʼ ti chúʼcabe pur naa la? Ñee ribezaʼ guni chaahuiʼ ca binnigola ca xiixa guendanagana napaniáʼ sti binni lugar de guneʼ ni naa la? Ñee qué rinaʼyaʼ guuyaʼ tuuxa binni para cadi guietenalaʼdxiʼ xiixa ni bineʼ laa la?». Pa gúninu cani maʼ bizéʼtenu ca zusihuínninu cadi cayacanenu para gaca ni maʼ gudixhe Dios guni: chuʼ ti familia si ni gapa Cristu casi xaíque stiʼ.
10, 11. 1) Pabiáʼ risaca chuʼnu tobi si né ca bíʼchinu ne bizáʼnanu. 2) Xi zanda gúninu para chuʼnu tobi si né Jiobá ti uguube ndaayaʼ laanu.
10 Jesús guníʼ: «Pa zeda saanu ti ofrenda lu altar para Dios ne guiétenalaʼdxu bichee neu tuuxa la? bisaana gá ofrenda stiuʼ raqué, uyé biene né ni bichee neu que, ne óraque bigueta yetixhe ofrenda stiuʼ lu altar. [...] Biyubi gaca neu laabe tobi si» (Mat. 5:23-25). Santiagu laaca bicaa: «Zaree ndu xhiiña cani runi pur chuʼ binni tobi si, purti cayuni ca jneza ne laca cayacané ca ca xcaadxi guni jneza» (Sant. 3:17, 18). Nga runi, qué zanda gúninu ni jneza pa qué ridxaaganu tuuxa.
11 Guzéʼtenu ti ejemplu. Jma de 30% de layú stiʼ ca guidxi ra guca guerra, ñanda ñaca dxiiñaʼ lúcani pa qué ñápacani mina ni ricaguí. Ora guicaguí ti mina, maʼ qué runi campesinu dxiiñaʼ lu layú stiʼ, raca nagana para laacaʼ guidxélacaʼ dxiiñaʼ ne maʼ qué riuu guendaró ndaaniʼ guidxi ca. Zacaca nga laanu, zaca nagana para gápanu ca guenda ni naquiiñeʼ gapa ti xpinni Cristu pa cadi nuunu tobi si né ca bíʼchinu ne bizáʼnanu. Pa nagueendaca gutiidiláʼdxinu stóndacabe ne gúninu cosa galán para laacabe la? ziuʼnu tobi si né laacabe ne zaguu Jiobá ndaayaʼ laanu.
12. Ximodo racané ca binnigola para chuʼnu tobi si.
12 Ca hombre «bidii be gracia» «para guni xhiiña be» zanda gacanecaʼ laanu para chuʼnu tobi si. Dxiiñaʼ stícabe nga gacanécabe laanu «gaca nu tobi si lu ni runi cre nu» (Efe. 4:8, 13). Ora maʼ cayuni adorarnu Dios né ca binnigola, riquiiñecaʼ Stiidxabe para gudiicaʼ conseju ni gacané laanu gápanu ca guenda ni naquiiñeʼ gapa ca xpinni Cristu (Efe. 4:22-24). Ñee ridúʼyanu ca conseju stícabe casi ti modo ni riquiiñeʼ Jiobá para gusiidiʼ laanu modo guibáninu lu guidxilayú cubi ra chiguni mandar Xiiñibe la? Laatu, ca binnigola, ñee rusihuínnitu nuutu gacanetu ca xpinni Cristu ora rulídxetu laacaʼ la? (Gál. 6:1.)
«LAGACA NACHAʼHUI NE STOBI»
13. Xi zazaaca pa qué chinándanu conseju ni zeeda lu Efesios 4:25-32.
13 Lu Efesios 4:25-29 cuzeeteʼ caadxi cosa ni cadi naquiiñeʼ gúninu. Cadi gácanu binni rusiguii, ni ridxiichi xhaataʼ, binni nachaabaʼ ne cadi guininu diidxaʼ ni guniná stobi. Ora qué rinanda tuuxa ca conseju riʼ, nabé triste riuu espíritu santu stiʼ Dios, purtiʼ laani nga ti stipa ni racané chuʼ binni tobi si (Efe. 4:30). Para cadi chuʼdíndenu ne chuʼnu tobi si, naquiiñeʼ chinándanu conseju bicaa Pablu riʼ: «Lausaana de aca nanalaʼdxi tu binni, ne de idxiichi né tu laacaʼ, ne de chuʼ tu xiana, ne de guni char tu tuuxa o cuʼ dí tu laa. Lausaana de uyubi tu izaaca stobi xiixa. Ni guni tu la? lagaca nachaʼhui ne stobi, ne lailaselaʼdxi saa. Laguni perdonar saa casi bini perdonar Dios laatu ra guca né tu Cristu tobi si» (Efe. 4:31, 32).
14. 1) Xi riníʼ ca diidxaʼ «lagaca nachaʼhui». 2) Xi zacané laanu para gácanu nachaʼhuiʼ.
14 Ca diidxaʼ «lagaca nachaʼhui», rusihuínnicani caquiiñeruʼ guizíʼdinu gácanu nachaʼhuiʼ, purtiʼ zándaca cayaadxaruʼ laanu. ¡Nabé sicarú nga guiénenu jma risaca xi runi sentir sti binni que ni runi sentirnu! (Fili. 2:4.) Zándaca rápanu gana guininu xiixa ni gusixidxi stobi o ni gusihuinni nabé nuu xpiaaninu, peru pa zuninani tuuxa la? jma galán cadi guininu ni. Pa guiníʼ íquenu ante guininu, zacaneni laanu gácanu nachaʼhuiʼ né binni.
LAGANNAXHII NE LAGUNI RESPETAR BINNILÍDXITU
15. Ximodo racané Efesios 5:28 ca hombre ni maʼ bichaganáʼ para chinándacaʼ ejemplu stiʼ Cristu.
15 Modo nuu ca binni ridagulisaa né Cristu, ruchaaga Biblia ni casi modo nabani cani maʼ bichaganáʼ. Ejemplu riʼ rusihuinni naquiiñeʼ gusiidiʼ hombre xheelaʼ, gannaxhii ne gapa laabe, ne naquiiñeʼ guzuubaʼ gunaa stiidxaʼ xheelaʼ (Efe. 5:22-33). Ora bicaa Pablu «naquiiñe ganaxhii hombre xheela casi nadxii cuerpu stiʼ» la? caniʼbe naquiiñeʼ chinándacaʼ ejemplu stiʼ Cristu (Efe. 5:28). Xiñee yaʼ. Purtiʼ «gunaxhii Cristu ca xpinni, dede bidii xpida pur laacaʼ, [...] ne bisiá ladxidóʼ cabe ra uyuu nisa cabe, purti bini cre cabe stiidxaʼ». Nga runi, ti hombre ni maʼ bichaganáʼ naquiiñeʼ gacané familia stiʼ chuʼcaʼ gaxha de Dios. Pa gúnibe ni la? zusihuínnibe dxandíʼ racaláʼdxibe gacanebe Jiobá para gutagulisaa guiráʼ binni casi ti familia ni gapa Cristu casi xaíque stiʼ.
16. Xi ribeendú cani napa xiiñiʼ ora rúnicaʼ dxiiñaʼ bisaanané Dios laacaʼ.
16 Cadi guiaandaʼ laatu xhiiñaʼ Jiobá nga cayúnitu ora rannaxhiitu ca xiiñitu. Triste guininu ni, peru ndaaniʼ guidxilayú riʼ, nuu stale binni ni maʼ qué riá guirutiʼ (2 Tim. 3:1, 3). Stale hombre qué rizaalaʼdxiʼ guʼyaʼ ca xiiñiʼ, ne pur laani nabé racaná xiiñicaʼ. Peru Pablu bidii conseju riʼ: «Cadi guni tu xiixa para uchiichi si tu xiiñi tu, sínuque lausiidi laacabe ne laulidxe laacabe. Lausiniisi laacabe modo na [Jiobá]» (Efe. 6:4). Cadi dxandíʼ ralidxi binni nga riziidiʼ xiiñiʼ gannaxhii ne guni respetar sti binni la? Nga runi, tuuxa ni cusiidiʼ ca xiiñiʼ guni zacá, cayacané para gaca ni maʼ gudixhe ique Jiobá de chuʼ ca familia ca tobi si. Ora qué ridxiichi binni ne qué riníʼ xhaataʼ ne ca xiiñiʼ la? cusiidiʼ laacabe gannaxhiicabe binni ne guni respetárcabe cani runi mandar. Ne nga zacané laacabe para guiziidicabe modo guibánicabe lu guidxilayú cubi stiʼ Dios.
17. Xi naquiiñeʼ gúninu para gudxíʼlunu Binidxabaʼ ora gucaalú laanu.
17 Naquiiñeʼ guiénenu Binidxabaʼ nga primé espíritu malu ni bicueeza binni de guni adorar Dios, ne laaca zuyúbibe modo gucueezabe laanu para cadi guni adorarnu Dios. Ni riuulaʼdxiʼ Binidxabaʼ nga runi binni ora raca divorciar, ora ribezané si tuuxa ne ora richaganáʼ chupa hombre o chupa gunaa. Peru qué rudiʼnu lugar gabi ca binni ca laanu ximodo naquiiñeʼ guibáninu ne xi guiníʼ íquenu. Laanu zinándanu ejemplu stiʼ Cristu (Efe. 4:17-21). Nga runi cayabi Biblia laanu iquiiñenu «irá ni ma bidii Dios laa[n]u» para ganda gudxíʼlunu Binidxabaʼ ne ca demonio stiʼ (biindaʼ Efesios 6:10-13).
«LAUSIHUINNI NADXII SAA TU»
18. Xi naquiiñeʼ gúninu para chuʼnu tobi si.
18 Naquiiñeʼ gannaxhiisaanu para chuʼnu tobi si. De guidubi ladxidoʼno nadxiinu tobi lucha Señor stinu, tobi lucha Dios stinu ne guiráʼ ca xpinni Cristu. Nga runi, cumu «ma biʼni Espíritu Santu laa[nu] tobi si» la? maʼ gudixhe íquenu «cadi chuʼ dinde [nu]» (Efe. 4:3-6). Modo nadxii ca xpinni Cristu ca nga guníʼ Jesús ora biʼniʼ orar sicaríʼ: «Cadi pur laasi cabe canaba lii, sínuque ne pur cani guni cre naa ra guna diaga ni iníʼ cabe. Ne rinaba lii aca cabe tobi si casi naca nu tobi si [...]. Ma bisiene laacabe tu [laluʼ] ne zusiene ruaʼ laacabe ti gapa cabe naa ndaani ladxidóʼ cabe para ganaxhii saa cabe casi nadxii lu naa» (Juan 17:20, 21, 26).
19. Xi naquiiñeʼ quixhe íquenu gúninu.
19 Pa pur donda gulenenu cayaca nagana guchaʼnu modo laanu, guendarannaxhii ca zucaani laanu guni orarnu casi biʼniʼ salmista riʼ: «Gucané naa guidxibeʼ laluʼ de guidubi ladxiduáʼ» (Sal. 86:11). Nga runi, gudxíʼlunu guiráʼ ni riquiiñeʼ Binidxabaʼ para guxheleʼ laanu de Bixhózenu ni nadxii laanu ne de ca xpinni Cristu. Cásica ralídxinu, ora maʼ zigucheechenu diidxaʼ ne ora maʼ nuunu lade ca binni ridagulisaa, naquiiñeʼ gúninu stipa pur chinándanu conseju bidii Pablu: «Ma xiiñi Dios laatu ne nadxii laatu. Yanna laucaalaʼdxi gaca tu casi laa. Intiica guni tu lausihuinni nadxii saa tu» (Efe. 5:1, 2).
[Guendarinabadiidxaʼ stiʼ párrafo]
[Imagen ni zeeda lu yaza 29]
Bisaanagá ofrenda stiluʼ lu altar ne biyubi gacaneluʼ bíʼchiluʼ tobi si
[Imagen ni zeeda lu yaza 31]
Lagusiidiʼ ca xiiñitu guni respetarcaʼ binni
