Ruxhegueʼ Jiobá laanu ra canu yaga

«Ni ruuyaʼ chaahuiʼ lu ley ni qué ruchee [la?] zacaneni laa guixegueʼ ra cá yaga.» (SANT. 1:25, NM)

XI NICÁBILUʼ.

Xi ley cayacané laanu para gácanu casi binni ni cadi cá yaga, ne tuu nga cani ribeendú cosa galán pur laani.

Xipeʼ nga naquiiñeʼ gúninu para cadi guicanu yaga.

Xi ndaayaʼ zacaa cani qué guixeleʼ de neza ra zacaa binni guendanabani.

1, 2. 1) Ximodo nabani stale binni yanna, ne xiñee. 2) Xi cabeza ca xpinni Jiobá.

 NABÁNINU ti tiempu ra nabé cadale binni ni rachelú gapa jma, ni rucheené ley ne laaca cadale binni ni nabé ridinde (2 Tim. 3:1-5). Para ganda gucueeza gobiernu laacabe la? riguíxheruʼ jma ley, riguu jma puliciá ne rucaa cámara stale lugar ti guʼyaʼ xi cayaca. Ndaaniʼ stale guidxi roʼ, laaca cayuni binni xcaadxi cosa para cadi chúʼcabe ralidxi: riguu alarma, rucaa cerrojo o pasador ra puertaʼ lidxi ne nuu tiru dede riguu cable biaaniʼ ique lidxi. Stale tu maʼ qué riree huaxhinni ne qué rudii lugar chichite xiiñiʼ stubi lu calle, nin ridxíʼ qué rudii lugar guireecabe. Racá ridúʼyanu runi sentir stale binni maʼ laa nga deguyoo, ne qué rihuinni pa zadxiña dxi gaca chaahuiʼ ni.

² Yanna, xi caquiiñeʼ binni para cadi guni sentir casi ora nuseguyoocabe laa yaʼ. Ndaaniʼ jardín ni guyuu Edén que, guníʼ Binidxabaʼ zabani binni jma galán pa guixeleʼ de Jiobá. Peru pur guiráʼ ni cayaca tiempu riʼ, rihuinni bisiguii Binidxabaʼ. Ora guni binni guiráʼ ni gacalaʼdxiʼ ne guixeleʼ de ca ley stiʼ Dios la? jma runiná xcaadxi binni. Dede né laanu, ca xpinni Jiobá, laaca runinani. Peru laanu nuunu nayecheʼ, purtiʼ cabézanu guidxiña dxi cuee Jiobá laanu de lu náʼ pecadu ne de «lu ná enda nayuudxuʼ», ti guidúʼyanu gaca ni riníʼ Biblia: «Ibigueta aca ni galán, ne ma iquiiñe pe ni para laabe» (Rom. 8:21). Dede yanna mápeca cusiidiʼ Jiobá laanu guibáninu modo racalaʼdxiʼ. Ximodo cayúnibe ni yaʼ.

3. Xi ley maʼ bidii Jiobá ca xpinni Cristu, ne gunáʼ ca guendarinabadiidxaʼ zacábinu lu tema riʼ.

³ Xi cayuni Jiobá para gacané laanu chuʼnu listu laga cabézanu guidxiña dxi gulabe laanu yaʼ. Bidiibe laanu ti «ley ni qué ruchee». Guidúʼndanu xi guníʼ Santiagu (Jacobo) lu carta stiʼ ora caníʼ de laani: «Ni ruuyaʼ chaahuiʼ lu ley  ni qué ruchee, ne qué guixeleʼ de laani la? zacaneni laa guixegueʼ ra cá yaga. Binni riʼ qué riaandaʼ laa ni runadiaga, sínuque runi ni na ley, ne ziuu nayecheʼ ora guni ni» (Santiago 1:25, NM). Peru ora runadiaga binni de ley la? riníʼ ique chigucueeza tuuxa laa de guni guiráʼ ni riuulaʼdxiʼ. Yanna, xii nga «ley ni qué ruchee» ni ruxhegueʼ binni «ra cá yaga» yaʼ. Ximodo nga ruxhégueni laanu.

TI LEY NI RUXHEGUEʼ LAANU

4. Xii nga «ley ni qué ruchee» ni ruxhegueʼ binni «ra cá yaga», ne tuu nga cani ribeendú cosa galán pur laani.

⁴ «Ley ni qué ruchee» ni ruxhegueʼ binni «ra cá yaga», cadi laa diʼ ni nga Ley stiʼ Moisés, purtiʼ gucuá ley que «para ihuinni ruchee binni», peru maʼ biʼniʼ Cristu guiráʼ ni beeda lu ley que (Gál. 3:19; Mat. 5:17). Lu textu riʼ caníʼ Santiagu de «ni gudixhe Cristu guni nu», o ley stiʼ Cristu (Gál. 6:2). Nga runi, «ley ni qué ruchee» riʼ nga guiráʼ ni ribeza Jiobá gúninu. Ca xpinni Cristu ni bibí ne cani zeeda gaca casi «xcaadxi dendxu», ribeenducaʼ stale cosa galán pur ley riʼ (Juan 10:16).

5. Xiñee cadi nagana para guni binni ni na ley ni ruxhegueʼ binni ra cá yaga.

⁵ Ca ley ni napa stale guidxi roʼ nabé nagana para guiene binni cani ne laaca nagana para guni binni ni na cani. Peru lu «ley ni qué ruchee», zeeda conseju ne mandatu ni caquiiñeʼ binni ne cadi nagana para chinándacabe cani (1 Juan 5:3). Jesús guníʼ: «Nasisi [ayubu stinneʼ,] cadi nanaa ni casi ni nua tu ca» (Mat. 11:29, 30). Lu «ley ni qué ruchee» riʼ, cadi zeeda diʼ xi guiráʼ castigu nuu para binni. Gudixhe Dios ni purtiʼ nadxii laanu ne guluube ley riʼ lu xquendabiaaninu ne ndaaniʼ ladxidoʼno, qué nucaabe ni lu guié (biindaʼ Hebreos 8:6, 10).

XIMODO NGA RUXHEGUEʼ «LEY NI QUÉ RUCHEE» LAANU

6, 7. 1) Xi zanda guzéʼtenu de cani rinabaʼ Jiobá gúninu. 2) Ximodo nga ruxhegueʼ «ley ni qué ruchee» laanu.

⁶ Jiobá maʼ gudixhe stale ley ne riquiiñeʼ cani para cueendunu ni galán ne cadi gacananu. Tobi de laacani nga ley de gravedad. Xi dxiiñaʼ runi ley riʼ yaʼ. Runiibini stale cosa ti ganda gúnicaʼ dxiiñaʼ jneza. Nin ti binni qué riníʼ ruchiiñaʼ ley riʼ laa purtiʼ qué rudiini lugar laa guni guiráʼ ni riuulaʼdxiʼ. Cadi dxandíʼ la? Guiranu rusisácanu ni ne riénenu caquiiñenu ni para chuʼnu nazaaca. Zacaca nga cani maʼ gudixhe Jiobá gúninu, zeedacani lu «ley ni qué ruchee» stiʼ Cristu, ne riquiiñeni para cueendunu puru si cosa galán.

⁷ Ley ni ruxhegueʼ binni ra cá yaga, qué rápasini laanu, sínuque laaca racaneni laanu gúninu cani riuuláʼdxinu sin gacananu, ne ganda guni respetarnu derechu stiʼ xcaadxi binni sin gucueezanu laacaʼ de gúnicaʼ ni riuuláʼdxicaʼ. Nga runi, para cadi guicanu yaga —o para gúninu ni riuuláʼdxinu la?— naquiiñeʼ gúninu guiráʼ ni rinabaʼ Jiobá ne gácanu casi laabe. Laca zanda guininu ni sicaríʼ: naquiiñeʼ gannaxhiinu guiráʼ ca cosa ni nadxii Dios ne gaca nanaláʼdxinu guiráʼ ni nanaláʼdxibe. Ngapeʼ nga ni rusiidiʼ ley ni qué ruchee riʼ laanu (Amós 5:15).

8, 9. Xi ribeendú binni ora runi ni na ley ni ruxhegueʼ binni. Bizeeteʼ ti ejemplu.

⁸ Cumu binni ruchee laanu la? raca nagana para laanu gudxíʼlunu ca cosa malu ni riuuláʼdxinu. Peru pa qué guixélenu de Jiobá ne gúninu ni na ca ley stibe, dede yanna maʼ zanda guibáninu casi binni ni cadi cá yaga. Ejemplu stiʼ ti hombre láʼ Jay, rusihuinni zacá ni, laa nabé riguʼbaʼ gueza dxi bizulú cayuundaʼ Biblia. Ora biénebe qué riuulaʼdxiʼ Dios viciu que, gadxé si gúcani para laabe. Guníʼ íquebe sicaríʼ: «Zácaruaʼ esclavu stiʼ viciu riʼ la? o zuzuubaʼ stiidxaʼ Jiobá». Neca guca nagana para laabe gusaanabe gueza que, gudixhe íquebe gúnibe ni na Dios, zaqué bisihuínnibe pabiáʼ nuu xpiaanibe. Ximodo biʼniʼ sentir Jay dxi maʼ bisaana viciu stiʼ yaʼ. Laa guníʼ: «Nabé guyuaaʼ nayecheʼ, purtiʼ maʼ cadi esclavu stiʼ viciu que naa».

⁹ Jay biziidiʼ ti cosa nabé risaca: binni gacalaʼdxiʼ guibani modo gapa gana ne qué gudii lugar chuʼ tu guni mandar laa la? reeda gaca esclavu  stiʼ ca cosa malu ni riuulaʼdxiʼ guni; peru cani ruzuubaʼ stiidxaʼ Dios ne rudiicaʼ lugar guni mandar espíritu santu laacaʼ la? ruxhégueni laacaʼ, ricaacaʼ «enda nabani ne raʼta dxí ladxidóʼ [caʼ]» (Rom. 8:5, 6). Tu bidii stipa Jay para bisaana viciu que yaʼ. Jiobá nga bidii stipa laabe, cadi stúbisibe bíʼnibe ni. Jay cusiene: «Biindaʼ Biblia gatigá, gunabaʼ Dios gudii espíritu santu stiʼ naa. Laaca bidieeʼ lugar gacané ca binni ridagulisaa naa, purtiʼ bisihuínnicaʼ pabiáʼ nadxiicaʼ naa». Yanna guidúʼyanu ximodo zanda gacané cani bizéʼtenu riʼ laanu ti guni sentirnu maʼ nabáninu casi binni ni maʼ bixegueʼ ra cá yaga.

GUIDÚʼNDANU NE GUIÉNENU STIIDXAʼ DIOS

10. Ximodo nga ruuyaʼ chaahuiʼ tuuxa lu ley stiʼ Dios.

¹⁰ Santiago 1:25 cayabi laanu: «Ni ruuyaʼ chaahuiʼ lu ley ni qué ruchee, ne qué guixeleʼ de laani la? zacaneni laa guixegueʼ ra cá yaga [...]. Ziuu nayecheʼ ora guni ni». Diidxaʼ griegu biquiiñeʼ para guníʼcabe «ruuyaʼ chaahuiʼ» riniʼni «ugaanda ique tuuxa ti guʼyaʼ chaahuiʼ xiixa» ne naquiiñeʼ guni binni stipa ne cadi guiníʼ ique lu sti cosa. Zacá nga laani, para ganda chuʼ ley ni qué ruchee riʼ ndaaniʼ ladxidoʼno ne lu xquendabiaaninu, naquiiñeʼ gúninu stipa pur guidúʼndanu ne guiénenu Biblia ne guiníʼ íquenu lu ni cazíʼdinu (1 Tim. 4:15).

11, 12. 1) Xi guníʼ Jesús para bisihuinni pabiáʼ risaca iquiiñenu guendanabani stinu para gúninu ni na Dios. 2) Ximodo caguixhená dibuju zeeda lu yaza riʼ ca hombrehuiiniʼ ne ca dxaapahuiiniʼ.

¹¹ Laaca naquiiñeʼ gúninu stipa para cadi gusaana de gúninu ni na Stiidxaʼ Dios, zacá zahuinni caquiiñenu guendanabani stinu para gúninu ni na Dios. Laaca zacagá nga ni cusiidiʼ Jesús ca xpinni ora guníʼ ca diidxaʼ riʼ: «Pa qué iree chu tu de lu stiidxa la? zaca xpinne piaʼ laatu. Ne  zanna tu ni dxandíʼ, ne zaladi tu ra cá tu yaga purti ma nanna tu ni» (Juan 8:31, 32). Sicaríʼ cusiene ti libru diidxaʼ «zanna tu», riniʼni «gusisácanu xiixa», purtiʼ «ora si maʼ runibiaʼnu xiixa nga zánnanu pabiáʼ risácani». Ne para guihuinni maʼ nánnanu xii nga ni dxandíʼ, naquiiñeʼ gusisácanu ni ne guibáninu modo na ni. Óraca si nga zanda guininu «cayuni» «stiidxaʼ Dios» «dxiiña ndaani ladxidoʼ[no]», purtiʼ cayacaneni guchaʼnu modo laanu ti gácanu casi Bixhózenu ni nuu guibáʼ (1 Tes. 2:13).

¹² Galán gúninu guinabadiidxanu laca laanu: «Ñee nannaʼ xipeʼ nga ni dxandíʼ la? Ñee maʼ nabaneʼ modo na ni la? Ñee riuuladxeruáʼ guibaneʼ casi binni ni qué riná guni mandárcabe laa la?». Ti gunaa xpinni Cristu ni biniisi ndaaniʼ ti familia Testigu, cusiene xi bizaaca dxi jma maʼ ziniisi: «Cumu biniiseʼ ndaaniʼ xquidxi Dios la? biziideʼ guneʼ cré nuu Jiobá. Peru qué ñuu dxi ñunebiaʼyaʼ laabe modo racaláʼdxibe. Qué ñaca nanaladxeʼ cani nanaláʼdxibe, guníʼ iqueʼ qué rizaaláʼdxibe ni runeʼ ne laaca qué ninieniáʼ laabe ora gupaʼ guendanagana. Para naa la? maʼ stale ngue nannaʼ, peru ti guendahuati ngue, purtiʼ qué gannaʼ gastiʼ». Peru galán nga bidiibe cuenta cadi jneza modo nuube ra gudiʼdiʼ tiempu ne bichaabe modo laabe. Dede gúcabe precursora regular ra gudiʼdiʼ dxi.

RACANÉ ESPÍRITU SANTU LAANU PARA CADI GUICANU YAGA

13. Ximodo racané espíritu santu stiʼ Dios laanu para cadi guicanu yaga.

¹³ Lu 2 Corintios 3:17 ridúʼndanu: «Ra ma nuu Espíritu [stiʼ Jiobá] la? ma cadi cá cabe yaga». Ximodo racané espíritu santu laanu para cadi guicanu yaga. Tobi de ca dxiiñaʼ rúnini nga racaneni laanu gápanu ca guenda sicarú rinabaʼ Dios, casi cani ruzeeteʼ Stiidxabe ra na: «Cani zinanda ni na Espíritu Santu la? nadxii binni ne nayeche nuu, ne nuu dxí ladxidóʼ. Qué rixhacalaʼdxi stobi, ne qué runiná binni, ne nachaʼhuiʼ. Qué zaree chu de neza sti Dios, ne nadóʼ, ne rapa xpiaʼ» (Gál. 5:22, 23). Qué zanda guiníʼ binni cadi cá yaga pa qué gapa ca guenda riʼ, jmaruʼ si pa cadi nadxii sti binni. Cumu cadi nadxiicabe stobi la? nabé cadale guendaquéiquiiñeʼ ndaaniʼ Guidxilayú riʼ. Bizeeteʼ si Pablu ca guenda napa espíritu stiʼ Dios, guníʼ: «Pa chi nanda nu irá nga la? qué zuchéʼ né nu nin ti ley». Nga runi qué zanda diʼ chuʼ tuuxa ni quixhe ti ley ni gucueeza binni de gapa ca guenda ni rudii espíritu stiʼ Dios (Gál. 5:18). Ti guendahuati nga ñuni binni pa niguixhe ti ley zacá. Jiobá racalaʼdxiʼ gápanu ca guenda ni naquiiñeʼ gapa ti xpinni Cristu ne qué chuʼ dxi gusaana de gusihuínninu cani.

14. Ximodo nga raca binni esclavu stiʼ ca cosa malu nuu lu guidxilayú riʼ.

¹⁴ Cani rudii lugar quite guidxilayú riʼ ique ne runi guiráʼ cosa malu riuulaʼdxiʼ la? runi cré guirutiʼ qué runi mandar laa (biindaʼ 2 Pedro 2:18, 19). Peru qué gánnacabe pa esclavu stiʼ ca cosa malu ca laacabe. Xiñee yaʼ. Purtiʼ maʼ gudixhe gobiernu stale ley para gucueeza laacabe de gúnicabe guiráʼ ni racaláʼdxicabe. Pablu guníʼ: «Qué raʼta ley para cani cayuni jneza sínuque para cani cuchee, cani qué na uzuuba diidxaʼ» (1 Tim. 1:9, 10). Ne cumu rúnicabe guiráʼ ni gápacabe gana la? maʼ esclavu stiʼ pecadu laacabe, ni zeeda gaca casi xpixuaanacabe ni nabé malu (Efe. 2:1-3). Cásica rati bialazi ora guiaba ndaaniʼ ti bladuʼ ra daʼ dxiña yaga pur cuyubi ni gó, zacaca rati binni malu, purtiʼ reeda gaca ca cosa ni riuuláʼdxicabe casi ti trampa ni ruuti laacabe (Sant. 1:14, 15).

QUÉ RIUʼNU XIZAA ORA MAʼ NUUNU LADE CA BINNI RIDAGULISAA

15, 16. Xiñee nabé risaca chuʼnu lade ca xpinni Cristu, ne ximodo nabáninu ndaaniʼ xquídxibe yanna.

¹⁵ Pa nuunu lade ca xpinni Cristu la? nuunu purtiʼ guluu Jiobá laanu, cadi purtiʼ si racaláʼdxinu, qué ñuʼnu ládecabe casi riuu tuuxa ni ricá lá para chuʼ lade ti grupu (Juan 6:44). Yanna, xiñee  bíʼnibe ni yaʼ. Ñee bíʼnibe ni purtiʼ maca rúninu ni jneza ne purtiʼ maca ridxíbinu laabe la? Coʼ, cadi pur nga diʼ. Yanna, xi bíʼyabe yaʼ. Biiyabe nayá ladxidoʼno, zuzúʼbanu stiidxabe né stale gana, ne zúninu ni na ley ni qué ruchee ni ruxhegueʼ laanu ra canu yaga. Ne dxi maʼ biuʼnu lade ca binni ridagulisaa, bizulú bisiidibe laanu ni cá lu Stiidxabe, casi ora nuyaanabe laanu. Laaca maʼ bixheleʼ Jiobá laanu de ca cosa ni cadi jneza rusiidiʼ religión ni cadi dxandíʼ ne maʼ bisiidibe laanu guibáninu casi bibani Cristu (biindaʼ Efesios 4:22-24). Pur cani biʼniʼ Jiobá nga nuunu nayecheʼ, ne zeeda gácanu casi ti guidxi ni maʼ biree de esclavu, ne laasinu nga nabáninu zacá ndaaniʼ Guidxilayú riʼ (Sant. 2:12).

¹⁶ Ora maʼ nuunu lade ca binni ni nadxii Jiobá de guidubi ladxidóʼ, cadi dxandíʼ qué ridxíbinu la? Cadi dxandíʼ qué riníʼ íquenu pa nuu tuuxa ni racalaʼdxiʼ guniná laanu la? Ne ora maʼ nuunu ndaaniʼ Yoo stiʼ Reinu, qué riuʼnu xizaa, purtiʼ nánnanu guirutiʼ qué zabaʼnaʼ ca cosa stinu. Runi sentirnu nuu tu cayapa laanu. ¡Peru qué runi sentirnu zacá ora maʼ nuunu sti lugar! Neca galán modo nabáninu ndaaniʼ xquidxi Dios yanna, ora maʼ gueeda guidxilayú cubi stibe jma galán zabáninu.

«DXI [GUIXEGUEʼ] CA XIIÑI [DIOS]»

17. Xi zabeendú ca binni chiguibani lu Guidxilayú riʼ ora gusihuinni Dios gunáʼ nga ca xiiñiʼ.

¹⁷ Guidúʼyanu xi guníʼ Pablu ora cusiene ximodo chiguxhegueʼ Jiobá ca xpinni ni nabani ndaaniʼ Guidxilayú. Laabe guniʼbe: «Irá ni bizáʼ Dios, laca cabeza si idxiña dxi uluíʼ be uná nga ca xiiñi be». De raqué guniʼbe: «Cabeza ni [bizáʼ Dios] dxi [guixegueʼ] né ni ca xiiñi be [de] lu ná enda nayuudxuʼ, ti ibigueta aca ni galán, ne ma iquiiñe pe ni para laabe» (Rom. 8:19-21). Ora caníʼ textu riʼ de «ni [bizáʼ Dios]» la? cuzeeteni de ca binni ni cabeza guibani ndaaniʼ Guidxilayú riʼ sin gati. Yanna, padxí nga guluíʼ Dios gunáʼ nga ca xiiñiʼ, o ca xpinni Cristu ni bibí ne xi zabeendú binni óraca yaʼ. Zácani ora guiasa ca últimu xpinni Cristu ni bibí ne checaʼ guibáʼ para gacanecaʼ Cristu guiree guiráʼ guendaquéiquiiñeʼ nuu ndaaniʼ Guidxilayú ne uguucabe guiráʼ binni guzuubaʼ stiidxaʼ Dios lu guidxilayú cubi (Apo. 7:9, 14).

18. Ximodo nga zaxegueʼ binni guzuubaʼ diidxaʼ de ra cá yaga, ne xi ndaayaʼ zacaacabe.

¹⁸ Ora maʼ guidxiña dxi gundiibi Jesús Binidxabaʼ ne ca demonio stiʼ, zuni sentir binni zaxegueʼ de laacabe, purtiʼ maʼ qué zaguítecabe binni (Apo. 20:1-3). ¡Guizáʼ sicarú ora maʼ gaca nga! De racá, 144,000 rey ne ni ruzaaquiʼ guʼxhuʼ stiʼ Cristu, zaquiiñecaʼ guendaguti stibe para cueecaʼ pecadu ne donda gulené binni (Apo. 5:9, 10). Despué zusihuínnicabe pa dxandíʼ nápacabe fe ora tiidicabe lu últimu guendanagana. Ca xpinni Dios ni guzuubaʼ diidxaʼ zabánicaʼ modo maca gucalaʼdxiʼ Jiobá ñácani dede dxiqué. Ñee zanda guxuíʼluluʼ nga la? Óraque maʼ qué zaca nagana para laanu gúninu ni na Dios, purtiʼ zácanu binni ni qué gapa donda ne zanda gusihuínninu ca guenda stiʼ Dios módopeʼ racalaʼdxiʼ.

19. Xi naquiiñeʼ gúninu pa dxandíʼ racaláʼdxinu guibáninu casi binni ni cadi cá yaga.

¹⁹ Ñee racalaʼdxuʼ guxhegueʼ Dios lii casi chigúnibe né «ca xiiñi be» la? Pa zacá ni, bidii lugar chuʼ «ley ni qué ruchee» lu xquendabiaaniluʼ ne ndaaniʼ ladxidoʼloʼ, purtiʼ ruxhégueni binni «ra cá yaga». Biindaʼ Stiidxaʼ Dios ne bicaa ique guieʼnuʼ ni. Bisihuinni dxandíʼ nabanuʼ casi na Biblia. Gunabaʼ Jiobá gudii espíritu santu lii. Cadi guixeluʼ de ca binni ridagulisaa ne biquiiñeʼ guiráʼ ni rudii Jiobá lii para guizíʼdiluʼ de laa, ni zeeda gaca casi ti guendaró. Cadi guʼnuʼ casi biʼniʼ Eva, laa bichee ora bidii lugar gudxite Binidxabaʼ ique, purtiʼ bicaa Binidxabaʼ laa guni cré nagana guni binni guiráʼ ni rinabaʼ Dios. Dxandíʼ nexhená Binidxabaʼ. Peru lu sti tema ca zadúʼyanu ximodo guni ganarnu laabe, «purti ma nanna nu ximodo runi be dxiiñaʼ» (2 Cor. 2:11).

[Guendarinabadiidxaʼ stiʼ párrafo]

[Imagen ni zeeda lu yaza 9]

Ñee riuuladxeruáʼ guibaneʼ casi binni ni qué riná guni mandárcabe laa la?

[Imagen ni zeeda lu yaza 9]

Ñee nabaneʼ modo na Biblia la?