«Nuu ti premiu para laatu pur dxiiñaʼ cayúnitu»

ZINÉ rey Asá ca soldadu stiʼ lade dani. Bireecabe lade ca dani nuu Judea para chindácabe guriá nisadóʼ. Ora yendácabe lugar ra jma xilaga lade ca dani que, bizuhuaadxí Asá ne bidxibi pur ni biiyaʼ. ¡Zuhuaa stale soldadu stiʼ ca etíope xagueteʼ que! Nuu biaʼ ti millón soldadu cabeza laacabe raqué, peru Asá napa biaʼ gaayuʼ gayuaa mil si.

Nanna Asá zadindené ca binni que, yanna, xii nga ni naquiiñeʼ gúnibe primé yaʼ. Ñee zábibe ca general stibe xi gúnicaʼ la? Ñee zaguube gana ca soldadu stibe la? Ñee zuseendabe carta ra nuu ca binnilídxibe la? Qué ñúnibe nin tobi de laacani. Xi bíʼnibe ora gudíʼdibe guendanagana que yaʼ. Biʼniʼ orarbe Dios.

Ante guidúʼndanu oración stibe ne cani bíʼnibe despué, guidúʼyanu tu clase binni nga gúcabe. Xiñee biyúbibe Dios. Ñee biʼniʼ crebe zacané Dios laabe la? Xi rusiidiʼ relatu riʼ laanu de ca ndaayaʼ rudii Jiobá ca xpinni.

TU CLASE BINNI GUCA ASÁ

Ma bisaa gande iza de guca guidxi Israel ne Judá chupa reinu, ne Judá nga guidxi ni jma runi adorar dios ni cadi dxandíʼ. Lu iza 977 ante de ca dxi stiʼ Jesús, dxi guca Asá rey, ca judíu que maʼ qué runi adorarcaʼ Jiobá, sínuque runi adorarcaʼ dios ni cadi dxandíʼ ni na ca binni que racané laacaʼ gápacaʼ xiiñicaʼ. Peru relatu ni zeeda lu Biblia riníʼ xi biʼniʼ Asá: «Bizulú biʼniʼ Asá cosa nachaʼhuiʼ ne ni jneza nezalú Jiobá Dios stiʼ. Ngue runi guleebe ca altar stiʼ xcaadxi guidxi ne ca lugar ra nasoo ne gulúzabe ca columna ne bichuugube ca poste ni riquiiñeʼ binni para guni adorar» (2 Crón. 14:2, 3). Laaca guládxibe de Judá ca hombre ni gutané xcaadxi hombre casi laacaʼ ra yuʼduʼ que, cani riníʼ runi adorarcaʼ dios sticaʼ zaqué. Peru qué nibee si Asá ca binni ni runi adorar dios ni cadi dxandíʼ, sínuque laaca biʼniʼ mandarbe guidxi que «guyubi Jiobá, Dios stiʼ ca bixhozególacaʼ ne gúnicaʼ ni na ca ley ne mandamientu» stiʼ Dios (1 Rey. 15:12, 13; 2 Crón. 14:4).

Nabé guyuulaʼdxiʼ Jiobá modo biʼniʼ adorar Asá laa né stale gana, ne pur ngue guluu Jiobá ndaayaʼ laabe stale iza purtiʼ qué ñuu tu nucaalú laabe. Ngue runi, guníʼ rey riʼ ca diidxaʼ riʼ: «Maʼ biyúbidu Jiobá, Dios stidu. Maʼ biyúbidu laabe, ne pur laabe maʼ guirutiʼ cadi cucaalú laadu». Ca dxi que biʼniʼ chaahuiʼ ca binni de Judá ca lindaa stiʼ xquídxicaʼ. Biblia na: «Bizulú bíʼnicabe dxiiñaʼ ne gunda bilúxecabe ni» (2 Crón. 14:1, 6, 7).

DXI GUYÉ ASÁ LU GUERRA

Cumu nanna Asá riguu Jiobá ndaayaʼ cani gusihuinni napa fe la? ngue runi biʼniʼ orarbe Dios dxi chitíndenebe ejercitu de soldadu ni jma naroʼbaʼ ruzeeteʼ Biblia. Nánnabe rudii Jiobá premiu cani napa fe. Gunábabe laa gacané laabe, purtiʼ zanda guni ganarbe tutiisi, nin ñácacaʼ jma nadipaʼ, purtiʼ runi crebe Jiobá ne nuube gaxha de laa. Laaca nanna Asá zasaca lá Jiobá pa guni ganar guerra que, ngue runi biʼniʼ orarbe sicaríʼ: «Gucané laadu, Jiobá Dios stidu, purtiʼ dxandíʼ runi credu lii, ne pur laluʼ nga biúpadu para gucáʼludu guiráʼ ca binni riʼ. Jiobá, lii nga Dios stidu. Cadi gudiiluʼ lugar gucaalú binni lii» (2 Crón. 14:11). Casi ñaca niniʼbe: «Jiobá, lii nga cucaalú ca etíope riʼ. Cadi gudiiluʼ lugar guni ganar binni guidxilayú lii ne guni biidicaʼ  laluʼ». Bicabi Dios oración stibe, purtiʼ Biblia na «biʼniʼ ganar Jiobá ca etíope nezalú Asá ne nezalú Judá, ne bixooñeʼ ca etíope» (2 Crón. 14:12).

Ca dxi stinu riʼ, laanu, ca xpinni Jiobá ridxaagalunu stale clase guendanagana. Cadi cadíndenu lu ti guerra casi Asá, peru zanda guni crenu zacané Jiobá laanu guni ganarnu pa qué guixélenu de laa ne gusisácanu labe. Laanu laca nadipaʼ modo cudxíʼlunu ca xhenemígunu, laacani nga ca cosa malu runi binni, ca cosa malu riuuláʼdxinu gúninu o xiixa ni gacalaʼdxiʼ guxheleʼ familia stinu de Dios. Intiica guendanagana gudxíʼlunu pur fe stinu, zanda uguu oración stiʼ Asá gana laanu. Jiobá nga gucané Asá para biʼniʼ ganar, ndiʼ rusiidiʼ laanu xi zanda cuézanu pa guni crenu Dios. Guirutiʼ qué zanda gudxiilú Jiobá, purtiʼ laasibe nga ni jma napa poder.

CAADXI DIIDXAʼ NI RIGUU GANA NE RIGUIXHENÁ

Bibiguetaʼ si Asá de ra yetinde, bidxaagalú Azarías, ti ni riguixhená laabe ne gudxi laabe caadxi diidxaʼ ni guluu gana laabe ne gudixhená laabe: «¡Lagucaadiaga naa, Asá ne guidubi guidxi Judá ne Benjamín! Ziuuné Jiobá laatu pa nuunetu laa; ne pa guyúbitu laabe, zudiibe lugar guidxélatu laabe; peru pa gusaanatu laabe la? laaca zusaanabe laatu». De raqué guniʼbe: «Lagaca nadxibalú ne cadi gudiitu lugar guiaba natu, purtiʼ nuu ti premiu para laatu pur dxiiñaʼ cayúnitu» (2 Crón. 15:1, 2, 7).

Ca diidxaʼ riʼ ruquidxi cani fe stinu. Ne zacá nga laani, purtiʼ ziuu Jiobá né laanu pa gúninu ni na Jiobá sin gucheʼnu. Ora guinábanu laabe gacanebe laanu, zanda guni crenu zucaadiágabe laanu. Azarías guníʼ: «Lagaca nadxibalú». Naquiiñeʼ gácanu nadxibalú guiráʼ ora para gúninu ni jneza, peru nánnanu zanda gacané Jiobá laanu gúninu ni.

Maacá nga jñaabiidaʼ Asá. Xi biʼniʼ gunaa riʼ yaʼ. Laa «biʼniʼ ti bidóʼ feu lu poste ni biquiiñeʼ binni para guni adorar», ngue runi, gupa xidé gulee Asá laabe de «dama» ca dxi biʼniʼ mandar casi rey. Peru guca Asá nadxibalú para gunda biʼniʼ ngue. Laaca bizaaquibe bidóʼ que (1 Rey. 15:13). Guluu Jiobá ndaayaʼ laabe pur gúcabe nadxibalú ne pur ni bíʼnibe. Laanu laaca naquiiñeʼ guzúʼbanu stiidxaʼ Jiobá ne gúninu ni na ca ley stibe neca qué náʼ ca binnilídxinu guni ni na Dios. Pa gúninu zacá la? zacaanu premiu ni gudii Jiobá.

Xi premiu nga gucuaa Asá yaʼ. Biiyabe ora bibiguetaʼ stale israelita ndaaniʼ guidxi Judá, cani biʼniʼ adorar sti dios dxi guyuucaʼ lu reinu ni nuu ladu guiaʼ. Xiñee bibiguétacabe yaʼ. Purtiʼ biiyacabe nuuné Jiobá rey Asá. Nabé guyuuláʼdxicabe guni adorárcabe Jiobá jneza, ne pur ngue bisaanacabe lídxicabe para chindézacabe ra nuu xcaadxi xpinni Jiobá. Guca si ngue, Asá ne guidubi guidxi Judá «bíʼnicabe ti pactu ra guníʼcabe zuyúbicabe Jiobá Dios stiʼ bixhozególacabe ne zúnicabe ni de guidubi ladxidóʼcabe ne de guidubi xhiálmacabe», ne nabé guyuucabe nayecheʼ. Ngue runi «bidii [Dios] lugar guidxélacabe laa; ne gupa Jiobá laacabe, ne maʼ guirutiʼ qué nucaalú laacabe» (2 Crón. 15:9-15). ¡Guizáʼ nayecheʼ riuʼnu ora gúʼyanu binni guni ni jneza ne guni adorarcaʼ Jiobá casi modo riuulaʼdxiʼ!

Peru ca diidxaʼ guníʼ Azarías ni riguixhená que, laaca caguixhená cani laanu yanna riʼ: «Pa gusaanatu [Jiobá] la? laaca zusaanabe laatu». Qué chuʼ dxi  guiníʼ íquenu gúninu zacá, purtiʼ nabé naná ca yuubaʼ zápanu pa guixélenu de Dios (2 Ped. 2:20-22). Stiidxaʼ Dios qué riníʼ diʼ xiñee gudixhená Jiobá Asá né ca diidxaʼ riʼ, peru qué nucaadiaga rey riʼ laabe.

«TI GUENDAHUATI NGA NI BÍʼNILUʼ»

Dxi maʼ ziné Asá biaʼ treinta y seis iza de cayuni mandar casi rey, bicaalú Baasá, rey stiʼ Israel, guidxi Judá. Bicuí Baasá lindaa guidxi Ramá, nuuni biaʼ xhono kilómetru ladu guiaʼ de Jerusalén, zándaca para gucueezabe ca xpínnibe de checaʼ chiguni adorarcaʼ Dios Judá ra cayuni mandar rey Asá. Lugar de ninabaʼ Asá ñacané Jiobá laa —casi biʼniʼ dxi gudindené ca etíope—, laga biyubi gacané binni laa. Biseendabe xiixa para gusigáʼdebe rey stiʼ Siria ne gunábabe laa chigucaalú reinu stiʼ Israel. Despué de bicaalú Siria ca israelita chupa chonna biaje la? biree Baasá de guidxi Ramá (2 Crón. 16:1-5).

Qué ñuulaʼdxiʼ Jiobá ni biʼniʼ Asá, ngue runi biseendabe Hananí, ti ni riguixhená para gabi laabe xi bíʼnibe. Naquiiñeʼ ñetelaʼdxiʼ rey riʼ xi biʼniʼ Jiobá pur laa dxi bicaalú ca etíope laa, ne laaca naquiiñeʼ ñánnabe ndiʼ: «Cayuuyaʼ [Jiobá] guiráʼ ni cayaca lu guidxilayú para gacané guiráʼ cani runi cré laa de guidubi ladxidóʼ». Zándaca guyuu tu gudxi laabe guyúbibe tu gacané laabe. O zándaca guníʼ íquebe laasibe zanda guyúbibe ximodo guni ganarbe Baasá ne ca soldadu stiʼ. Modo tiica gúcani, qué nuyúbibe Jiobá, sínuque biyúbibe gacané binni laabe. Ngue runi gudxi Hananí laabe ca diidxaʼ riʼ: «Ti guendahuati nga ni maʼ bíʼniluʼ, nga runi dede yanna qué ziaadxaʼ tu gucaalú lii» (2 Crón. 16:7-9).

Ora binadiágabe ca diidxaʼ que: bidxiichibe stale dede guluube ni riguixhená que lu cepo (2 Crón. 16:10). Ñee guníʼ ique Asá maʼ cadi caquiiñeʼ chuʼ tu tindené laa purtiʼ si maʼ xadxí de cayuni ni na Dios la? Ñee purtiʼ maʼ bióʼxhobe maʼ qué riníʼ ique chaahuibe la? Qué rusiene diʼ Biblia ni.

Gudiʼdiʼ si treinta y nueve iza de cayuni mandar Asá, gupa ti guendahuará malu ñee. Biblia na: «Neca huarabe qué nuyúbibe Jiobá, sínuque biyúbibe binni para gusianda laabe». Ni bíʼnibe ca rusihuinni maʼ cadi nuube gaxha de Jiobá. Ne zándaca zaqué nuube dxi gútibe, despué de bisaabe cuarenta y un iza de nácabe rey (2 Crón. 16:12-14).

Ni biʼyaʼ Jiobá de laabe nga ca cosa galán ni bíʼnibe ne modo biʼniʼ adorarbe laa né stale gana, ne qué ñuuyaʼ ra bicheebe. Qué ñuu dxi nusaanabe de ñúnibe ni na Jiobá (1 Rey. 15:14). Yanna, xi zanda guizíʼdinu de cani biʼniʼ Asá lu xquendanabani yaʼ. Naquiiñeʼ guietenaláʼdxinu ximodo huayacané Jiobá laanu, purtiʼ laacani zucaacani laanu guyúbinu laabe ora gápanu xiixa guendanagana. Laaca cadi naquiiñeʼ guiníʼ íquenu maʼ cadi caquiiñenu conseju stiʼ Dios, purtiʼ si maʼ nápanu stale iza de cayúninu ni na Jiobá. Biaʼ tiica iza zinenu ndaaniʼ xquídxibe, pa guchéʼnenu laabe la? zaguu jnézabe laanu. Naquiiñeʼ gúninu modo nabe ti cueendunu ni galán. Ne ni jma galán nga qué zusaana Bixhózenu ni nuu guibáʼ laanu pa guzúʼbanu stiidxaʼ. Cayuuyaʼ Jiobá guiráʼ ni nuu lu Guidxilayú ne cuyubi cani ruzuubaʼ stiidxaʼ. Riquiiñeʼ Jiobá poder stiʼ para gacané laacabe. Zacá bíʼnibe ni né Asá, ne zacaca zúnibe né laanu.

[Ni caníʼ yaza 9]

Zacané Jiobá laanu guni ganarnu pa qué guixélenu de laa

[Ni caníʼ yaza 10]

Caquiiñeʼ gácanu nadxibalú para gúninu ni jneza nezalú Jiobá