Sanu jneza casi binni ni nuu ndaaniʼ xquidxi Reinu
Sanu jneza casi binni ni nuu ndaaniʼ xquidxi Reinu
«Lasá jneza casi na stiidxa Cristu.» (FILIP. 1:27)
XI NICÁBILUʼ.
Tuu nga ca binni ni zanda chuʼ ndaaniʼ xquidxi Reinu.
Ximodo nga rizíʼdinu ti «diidxaʼ nayá», rizíʼdinu historia ne ca ley stiʼ Reinu.
Ximodo rusihuinni ca binni ni nuu ndaaniʼ xquidxi Reinu nadxiicaʼ ley stiʼ Dios.
1, 2. Xiñee risaca ca diidxaʼ guníʼ Pablu para ca binni ridagulisaa guyuu Filipos.
GUIDÚʼYANU xi bicaa apóstol Pablu ra nuu ca xpinni Cristu de Filipos: «Lasá jneza casi na stiidxa Cristu» (biindaʼ Filipenses 1:27). Diidxaʼ griegu biquiiñeʼ Pablu ora guníʼ «lasá jneza», laaca zanda guiníʼcabe ni sicaríʼ: «Lasá jneza casi binni ni nuu ndaaniʼ xquidxi Reinu». Nabé risaca ca diidxaʼ riʼ para ca binni ridagulisaa guyuu Filipos, purtiʼ biiyaʼ Roma laacabe casi binni xquidxi ne gupa laacabe. Ca binni de Filipos ne cani guleza guidubi ra biʼniʼ mandar Roma nabé biéchecaʼ purtiʼ maʼ de guidxi que laacaʼ, ngue runi laasícabe gúpacabe caadxi derechu ni qué ñapa sti binni.
2 Peru ca xpinni Cristu de Filipos nápacaʼ xcaadxi razón jma risaca para chuʼcaʼ nayecheʼ. Bisietenalaʼdxiʼ Pablu laacabe «ibáʼ» nga chécabe, purtiʼ maʼ bibícabe pur espíritu santu (Filip. 3:20). Nácacabe binni ni nuu ndaaniʼ xquidxi Reinu stiʼ Dios, ne cadi xpinni ti gobiernu de guidxilayú laacabe. Pur nga rapa Reinu ca laacabe ne rudii laacabe caadxi ndaayaʼ ni qué ricaa sti binni (Efes. 2:19-22).
3. 1) Tuu nga cani zanda chuʼ ndaaniʼ xquidxi Reinu. 2) Xi zadúʼyanu lu tema riʼ.
3 Conseju bidii Pablu que gucuani para ca xpinni Cristu ni bibí ni nuu ndaaniʼ xquidxi Reinu, purtiʼ chiguni mandarné Cristu laacaʼ guibáʼ (Filip. 3:20). Peru laaca gucuani para cani chiguibani lu Guidxilayú riʼ, ne laacabe nga chiguni mandar Reinu stiʼ Dios. Xiñee ya. Purtiʼ guiráʼ ca xpinni Cristu ni maʼ guyuunisa cayúnicaʼ ni na ti Rey si, Jiobá, ne tobi si nga ley ni nápabe para guiracaʼ (Efes. 4:4-6). Tiempu riʼ, stale binni rié sti guidxi ra nuu stale bidxichi ne rúnicaʼ stipa pur gácacaʼ de guidxi ca ti guʼyaʼ gobiernu laacaʼ casi binni xquidxi. Yanna laanu, cadi dxandíʼ jma naquiiñeʼ gúninu stipa para gácanu binni ni nuu ndaaniʼ xquidxi Reinu la? Para ganda guiénenu pabiáʼ risaca ni bizéʼtenu riʼ, guidúʼyanu xi rinabaʼ ti gobiernu tuuxa ni racalaʼdxiʼ gaca binni xquídxibe ne xi rinabaʼ Reinu stiʼ Dios cani racalaʼdxiʼ chuʼ ndaaniʼ xquidxi. De racá maʼ zadúʼyanu chonna cosa ni naquiiñeʼ gúninu para cadi gusaana de gácanu binni ni nuu ndaaniʼ xquidxi Reinu.
CANI GÚNINU PARA CHUʼNU NDAANIʼ XQUIDXI REINU
4. Xii nga «diidxaʼ nayá», ne ximodo «rininu» ni.
4 Guizíʼdinu diidxaʼ riníʼcabe. Ora rindeza binni sti guidxi la? gobiernu de guidxi ca rinabaʼ laacabe guiziidicabe stiidxacaʼ. Nuu tiru neca maʼ de guidxi ca laacabe, ridiʼdiʼ stale iza para guiziidiʼ chaahuicabe diidxaʼ stiʼ ca binni que. Zándaca nagueenda riziidicabe ximodo ricá diidxaʼ ca, peru raca nagana para laacabe guiníʼcabe ni. Reinu stiʼ Dios laaca rinabaʼ ca binni nuu ndaaniʼ xquidxi guiziidicaʼ «diidxaʼ nayá» ni ruzeeteʼ Biblia. Stiidxaʼ Dios na: «Zuchaaʼ diidxaʼ riníʼ stale guidxi ne zudieeʼ laacaʼ ti diidxaʼ nayá, para gucaacaʼ ridxi lá Jiobá, para gúnicabe ni nabe tobi si» (Sofonías 3:9). Xii nga «diidxaʼ nayá» ca yaʼ. Laani nga guiráʼ ni maʼ bisiidiʼ Biblia laanu de Dios ne cani naguixhe ique guni. «Rininu» diidxaʼ riʼ ora rúninu ni na ca ley ne ca conseju stiʼ Dios. Ca binni ni nacubi biuu ndaaniʼ xquidxi Reinu stiʼ Dios, zándaca nagueendaca zaziidicaʼ cani jma risaca rusiidiʼ Biblia. Peru despué, neca maʼ guyuunísacabe naquiiñeʼ gúnicabe stipa para guiziidicabe «guiníʼcabe» diidxaʼ riʼ jma jneza. Ximodo yaʼ. Ra gúnicabe stipa pur chinándacabe ni rusiidiʼ Biblia lu xquendanabánicabe.
5. Xiñee naquiiñeʼ guizíʼdinu biaʼ gándatiʼ de historia stiʼ xquidxi Jiobá.
5 Gánnanu historia stini. Ca binni ni racalaʼdxiʼ gaca de ti guidxi, zándaca laaca naquiiñeʼ gánnacaʼ caadxi historia stiʼ lugar ca. Reinu stiʼ Dios laaca rinabaʼ ca binni ni racalaʼdxiʼ chuʼ ndaaniʼ xquidxi guiziidicaʼ stale cosa de gobiernu riʼ. Guiníʼ íquenu de ejemplu bisaana ca xiiñiʼ Coré, cani biʼniʼ dxiiñaʼ ra guca adorar Dios ndaaniʼ guidxi Israel dxiqué. Nabé gunnaxhiicabe Jerusalén ne ra guca adorar Dios ne guyuuláʼdxicabe gusiidicabe binni historia stiʼ guidxi que. Peru bíʼnicabe ni purtiʼ laani nga «xquidxi Rey ni jma nandxóʼ», Jiobá, cadi pur sicarú ni. Raqué nga guyé binni para guni adorar Jiobá. Biziidiʼ binni Ley stiʼ Dios raqué ne laani nga guidxi ra biʼniʼ mandar Jiobá casi Rey stiʼ Jerusalén, ti guidxi ni nabé gunnaxhiibe. Biblia na: «Nabé nandxóʼ Jiobá ne napa xidé gusisaca binni Dios stinu ndaaniʼ xquidxi, lu dani ra runi adorárcabe laabe. Dani Sión ni nuu ladu guiaʼ, nabé sicarú ni purtiʼ nasoo ni, laani nga guendanayecheʼ stiʼ guidubi guidxilayú, laani nga xquidxi Rey ni jma nandxóʼ» (Salmo 48:1, 2). Ñee laaca riuuláʼdxiluʼ gúʼndaluʼ ne gusiidiluʼ binni historia stiʼ xquidxi Jiobá ni nuu ndaaniʼ Guidxilayú riʼ la? Ora guiziidiluʼ jma de laani ne gannuʼ ximodo racané Jiobá xquidxi, jma zuni creluʼ Reinu stiʼ Dios ne jma ziuuláʼdxiluʼ gucheecheluʼ ca diidxaʼ nacubi ne galán stiʼ Reinu (Jer. 9:24; Luc. 4:43).
6. Xiñee jneza nga guinabaʼ Jiobá laanu guizíʼdinu ca ley ne ca conseju stiʼ.
6 Gunibiaʼnu ca ley stini. Ca gobiernu ca laaca rinábacaʼ guiziidiʼ binni ley stiʼ guidxi ca ne guzuubacaʼ diidxaʼ. Nga runi, laaca jneza nga guinabaʼ Jiobá ca binni ni nuu ndaaniʼ xquidxi Reinu guiziidicaʼ ley stibe ne gúnicaʼ ni na ca conseju rudiibe (Is. 2:3; Juan 15:10; 1 Juan 5:3). Nuu tiru cadi jneza modo riguixhe gobiernu ley ne qué racanécani para cueendú binni ni galán. Peru «ley stiʼ Dios qué ruchee» (Sal. 19:7). Ñee riuuláʼdxiluʼ gúʼndaluʼ Biblia guiráʼ dxi ne guiziidiluʼ ca ley stiʼ Dios la? (Sal. 1:1, 2.) Cada tobi de laanu nga naquiiñeʼ guʼndaʼ ne guiene ca ley stiʼ Dios. Guirutiʼ qué zanda gúnini pur laanu.
CANI NUU NDAANIʼ XQUIDXI REINU NADXIICAʼ LEY STIʼ DIOS
7. Xiñee runi ca binni ni nuu ndaaniʼ xquidxi Reinu ni na ca ley stiʼ Dios.
7 Para cadi guireʼnu ndaaniʼ xquidxi Reinu, naquiiñeʼ gunibiaʼnu ca ley stiʼ Dios, peru laaca naquiiñeʼ gannaxhiinu cani. Ndaaniʼ guidxilayú riʼ, stale binni riníʼ jneza ca ley nuu ndaaniʼ guidxi ra nabézacaʼ. Peru ora qué riuuláʼdxicabe ti ley ne nánnacabe cadi cayuuyaʼ guirutiʼ laacabe la? qué rúnicabe ni na ni. Stale biaje rúnicabe ni para si gusiéchecabe binni (Col. 3:22). Peru ca binni ni nuu ndaaniʼ xquidxi Reinu rúnicaʼ ni na ley stiʼ Dios purtiʼ nadxiicaʼ laabe, nga nga razón ni jma risaca nápacabe. Nga runi riéchecabe guzuubacabe diidxaʼ neca cadi cayuuyaʼ binni laacabe (Is. 33:22; biindaʼ Lucas 10:27).
8, 9. Ximodo zanda gannuʼ pa dxandíʼ nadxiiluʼ ca ley stiʼ Dios.
8 Ximodo zanda gannuʼ pa dxandíʼ nadxiiluʼ ca ley stiʼ Dios yaʼ. Guníʼ ique ximodo ricaaluʼ conseju rudiicabe lii. Casi ora gábicabe lii ximodo gáculuʼ lari o modo guzuchaahuiluʼ. Ante chuʼluʼ ndaaniʼ xquidxi Reinu, zándaca qué liica nizaalaʼdxuʼ ximodo ruuyaʼ binni lii o pa riníʼ ique binni cosa dxabaʼ de lii pur modo gúculuʼ lari. Peru despué maʼ biziidiluʼ gáculuʼ lari jneza para gusisácaluʼ Dios purtiʼ maʼ nadxiiluʼ laa (1 Tim. 2:9, 10; 1 Ped. 3:3, 4). Zándaca yanna ruuyaluʼ maʼ jneza modo ruzuchaahuiluʼ. Peru pa ñabi ti binnigola lii cadi jneza modo ruuyaʼ ca binni ridagulisaa ni, xi ñuʼnuʼ óraque yaʼ. Ñee nucaaluluʼ laabe la? Ñee nidxiichiluʼ la? o niníʼ íqueluʼ qué zuchaaluʼ. Cani nuu ndaaniʼ xquidxi Reinu zinándacaʼ ejemplu stiʼ Cristu ne laani nga ley ni jma risaca nápacabe (1 Ped. 2:21). Ne ora caníʼ apóstol Pablu de laani bicaa ca diidxaʼ riʼ: «Guni nu ni chuʼlaʼdxi stobi, ti acané nu laa uzuhuaa chaahuiʼ. Nin Cristu qué ñuni di ni gucalaʼdxi laa si» (Rom. 15:2, 3). Nga runi, ti xpinni Cristu ni maʼ huaniisi lu stiidxaʼ Dios qué zuni xiixa ni guchiiñaʼ xquendabiaaniʼ sti binni, purtiʼ racalaʼdxiʼ chuʼ ca binni ridagulisaa tobi si (Rom. 14:19-21).
9 Yanna guzéʼtenu de xhupa cosa ni risaca: xi riníʼ íquenu de ora ratané ti binni stobi ni cadi xheelaʼ ne ximodo ridúʼyanu guendaxheelaʼ. Xi riníʼ ique ca binni ni cadi nuu ndaaniʼ xquidxi Reinu stiʼ Dios. Riniʼcaʼ gastiʼ naca gaca binni muxeʼ o nguiuʼ [gunaa nguiuʼ], o gúʼyacaʼ película ra ridiʼdiʼ cosa dxabaʼ. Laaca riníʼcabe gastiʼ naca gapa binni jnadxii ne gaca divorciar de xheelaʼ. Peru laanu maʼ nuunu ndaaniʼ xquidxi Reinu stiʼ Dios, nga runi nánnanu zacananu ne zuninanu stobi pa gúninu ni cadi jneza. Stale de ca xpinni Cristu zacá bibánicaʼ dxiqué, peru yanna maʼ biénecaʼ ti cosa sicarú bisigaʼdeʼ Dios binni nga guendaxheelaʼ ne laasicaʼ nga zanda gátacaʼ juntu. Nabé rusisácacabe ca ley stiʼ Dios ne nanna dxíchicabe qué zanda chuʼ cani runi cosa dxabaʼ ndaaniʼ xquidxi Reinu (1 Cor. 6:9-11). Peru laaca nánnacabe riguite ladxidóʼ binni laa (Jer. 17:9). Nga runi riéchecabe guicaacabe conseju ni gacané laacabe gúnicabe ni na ca ley stiʼ Dios.
RIECHEʼ CANI NUU NDAANIʼ XQUIDXI REINU ORA QUIXHENÁCABE LAACAʼ
10, 11. Ximodo caguixhená Reinu stiʼ Dios laanu, ne xi riníʼ íqueluʼ de laacani.
10 Ca gobiernu ca riguixhenacaʼ binni ora gánnacaʼ nuu xiixa guendaró o medicina ni zándaca guni huará binni. Dxandíʼ, cadi malu guiráʼ cani. Peru pa ganna gobiernu zándaca guniná tobi de laacani binni la? zaniʼbe xi naquiiñeʼ gaca ti cadi gaca huará binni xquídxibe. Pa qué gúnibe ni, zápabe donda pa gati binni. Zacaca nga riguixhená Reinu stiʼ Dios laanu para gúninu ni na ca ley stibe ti cadi gúninu xiixa ni guxheleʼ laanu de laabe. Maʼ raca stale iza de caguixhená mozo ni nuu xpiaaniʼ laanu para cadi gúʼyanu cosa dxabaʼ lu Internet, purtiʼ zuxhéleni laanu de Dios ne maʼ qué zanda chuʼnu ndaaniʼ xquidxi Reinu. Cadi dxandíʼ riéchenu pur modo riguixhenácabe laanu la?
11 Lu ca últimu iza riʼ cahuinni xcaadxi cosa lu Internet ni zanda iquiiñenu, peru naquiiñeʼ gatananu ora maʼ nuunu lúcani. Laani nga ca yaza ni riquiiñeʼ para gunibiáʼ binni stobi (redes sociales). Pa qué chuʼ binni cuidadu la? zanda guninani laa, purtiʼ zadxaagacabe binni malu racá (1 Cor. 15:33). Nga runi, qué ridxagayaanu ora riguixhená xquidxi Jiobá laanu para cadi guiábanu lu ca trampa riʼ. Ñee maʼ biindaluʼ ca últimu tema ni gulee mozo ni nuu xpiaaniʼ ra cusiene de laacani la? Pa chuʼnu lu Internet ante gúʼndanu ca tema riʼ zeeda gácani casi ora nideʼnu o nicanu ti medicina sin gúʼndanu xi para ni. a
12. Xiñee ti guendahuati nga qué gucaʼdiáganu conseju stiʼ Dios.
12 Cani qué rucaadiaga ca conseju rudii mozo ni nuu xpiaaniʼ racanacaʼ ne runinacaʼ binnilídxicaʼ. Nuu tu laa reeda gapa viciu de guʼyaʼ película ra ridiʼdiʼ cosa dxabaʼ, o riuuné ni cadi xheelaʼ ne riguítecaʼ laca laacaʼ ora riníʼ íquecaʼ cadi cayuuyaʼ Jiobá laacaʼ. ¡Ti guendahuati nga guiníʼ íquenu qué ruuyaʼ Dios xi cayúninu! (Prov. 15:3; biindaʼ Hebreos 4:13.) Tuuxa ni maʼ naca de ti guidxi, peru guni cosa malu lugar ca la? zanda cuee gobiernu laa de ndaaniʼ guidxi ca; zacaca nga runi Jiobá, tuuxa ni gucheené ca ley stibe ne qué gaca arrepentir la? zanda cueebe laa de ndaaniʼ xquidxi Reinu (1 Cor. 5:11-13). b Peru nabé rilaseláʼdxibe ca binni riʼ ne nápabe gana gacanebe laacaʼ, ne para nga riquiiñebe ca binnigola nuu ndaaniʼ xquídxibe (Gál. 6:1). Cani gaca arrepentir ne guchaa modo nabani, zanda chuʼcaʼ galán né Dios sti biaje ne ziaanacaʼ ndaaniʼ xquidxi Reinu (2 Cor. 2:5-8). ¡Ti ndaayaʼ naroʼbaʼ nga guni adorarnu ti Rey ni nadxii laanu!
RUSISACA CANI NUU NDAANIʼ XQUIDXI REINU GUIRÁʼ NI RIZIIDICAʼ
13. Ximodo rusihuinni cani nuu ndaaniʼ xquidxi Reinu rusisácacaʼ ni rusiidiʼ Dios.
13 Stale gobiernu runi stipa para ganda gusiidiʼ ca binni xquidxi. Rucuícabe scuela para gusiidicabe binni guʼndaʼ ne gucaa ne laaca rusiidicabe laacaʼ ximodo guidxélacaʼ ti dxiiñaʼ para gápacaʼ ni iquiiñecaʼ. Riecheʼ ca xpinni Cristu pur guiráʼ ni runi ca gobiernu riʼ ne rúnicabe stipa pur iquiiñecabe ni riziidicabe, peru jma rusisácacabe guiráʼ ni rusiidiʼ Jiobá laacabe ndaaniʼ xquidxi. Ne nabé riguu xquidxi Jiobá gana laanu gúʼndanu. Laaca riguuni gana cani napa xiiñiʼ para gúʼndanecaʼ laacabe dede nahuiinicabe. Guiráʼ beeu ribee mozo ni nuu xpiaaniʼ revista ni rusiene xi zeeda lu Biblia. Pa gúʼndaluʼ chupa yaza guiráʼ dxi la? zaziidiluʼ stale cosa ni racalaʼdxiʼ Reinu gánnaluʼ.
14. 1) Ximodo rusiidiʼ Dios laanu. 2) Gunáʼ nga ca tema ni huaquiiñeluʼ para guni adorarluʼ Dios né binnilídxiluʼ.
14 Guiráʼ semana rápanu guendaridagulisaa ne racá nga rusiidiʼ Reinu stiʼ Dios laanu. Guzéʼtenu de Scuela stiʼ cani Rucheeche Diidxaʼ, maʼ raca jma de sesenta iza de cayacaneni ca binni ruundaʼ Biblia para gánnacaʼ gusiidicaʼ ni cá lu Stiidxaʼ Dios. Ñee cá laluʼ lu scuela riʼ la? Lu ca últimu iza ni maʼ gudiʼdiʼ riʼ, mozo ni nuu xpiaaniʼ ne ni runi jneza nabé huazeeteʼ pabiáʼ risaca guni adorar binni Dios né binnilidxi. Ora runi binni ni, racaneni para chuʼ ca familia tobi si. Ñee huaquiiñeluʼ ca tema ni huabee xquidxi Dios para laani la? c
15. Gunáʼ tobi de ca ndaayaʼ jma naroʼbaʼ nápanu.
15 Stale de ca binni ni nuu pur ti partidu políticu riecaʼ de yoo pur yoo para guyúbicaʼ jma binni ni chuʼ lu partidu sticaʼ ne guni votar pur laacaʼ. Ca binni nuu ndaaniʼ xquidxi Reinu, rusihuínnicaʼ nuucaʼ pur gobiernu stiʼ Dios ora rucheechecaʼ diidxaʼ né stale gana, rúnicabe ni ndaaniʼ calle ne de yoo pur yoo. Ne casi bidúʼyanu lu tema gudídinu que, revista Torre stiʼ ni rapa nga ni jma ruundaʼ binni ndaaniʼ Guidxilayú, ne rireeni para gusiidini binni de Reinu stiʼ Jiobá. Tobi de ca ndaayaʼ jma naroʼbaʼ nápanu nga gusíʼdinu binni de Reinu ca. Ñee rucheecheluʼ stiidxaʼ Reinu de guidubi ladxidoʼloʼ la? (Mat. 28:19, 20.)
16. Ximodo zanda gusihuínninu nácanu binni nachaʼhuiʼ ni nuu ndaaniʼ xquidxi Reinu.
16 Ma cadi candaa, gobiernu si stiʼ Dios nga ziuu lu Guidxilayú. Zusiidini laanu xi naquiiñeʼ gúninu para guibani galán ne para guni adorar Dios. Ñee zácanu tobi de ca binni nachaʼhuiʼ ni chuʼ ndaaniʼ xquidxi Reinu óraca la? Yanna nga tiempu gusihuínninu ni. Lu guiráʼ ni quixhe íquenu gúninu cada dxi tiidiʼ, gúninu cani para gusisácanu Jiobá ne gusihuínninu canazanu casi ca binni nachaʼhuiʼ ni nuu ndaaniʼ xquidxi Reinu stiʼ Dios (1 Cor. 10:31).
[Nota]
a Zanda gúʼndaluʼ ¡Despertad! stiʼ julio 2011, yaza 24 dede 27; agosto 2011, yaza 10 dede 13, ne febrero 2012, yaza 3 dede 9.
c Biiyaʼ Torre stiʼ ni rapa 15 stiʼ agosto 2011, yaza 6 ne 7, ne Xhiiñaʼ Reinu ni Rúninu stiʼ enero 2011, yaza 3 dede 6.
[Guendarinabadiidxaʼ stiʼ párrafo]
[Ni caníʼ yaza 14]
Ñee rucaadiaʼguʼ ca conseju rudii Biblia ora riniʼni ximodo iquiiñeluʼ Internet la?
[Imagen ni zeeda lu yaza 12]
Ñee riuuláʼdxiluʼ guni adorarluʼ Dios ne gannuʼ historia stiʼ xquidxi, cásica guyuulaʼdxiʼ ca xiiñiʼ Coré ni la?
[Imagen ni zeeda lu yaza 15]
Pa guni adorarluʼ Dios né binnilídxiluʼ la? zacaneni laatu para gácatu binni nachaʼhuiʼ ni nuu ndaaniʼ xquidxi Reinu
