Naquiiñeʼ cuézanu casi cabeza Jiobá ne Jesús
Naquiiñeʼ cuézanu casi cabeza Jiobá ne Jesús
«Laguietenalaʼdxi cabeza Señor stinu sin ixhacalaʼdxi.» (2 PED. 3:15)
XI NICÁBILUʼ.
Ximodo maʼ bisihuinni Jiobá nanna cueza.
Xiñee guleza Jesús stale iza.
Xi naquiiñeʼ gúninu para cuézanu sin guireʼnu gana.
1. Xi rinabadiidxaʼ stale xpinni Dios.
SICARÍʼ guníʼ ti gunaa ni maʼ ziné stale iza de cayuni ni na Jiobá neca huadiʼdiʼ lu stale guendanagana: «Ñee nabáneruaʼ ora guinitilú guidxilayú riʼ la?». Stale xpinni Cristu ni maʼ xadxí de cayuni ni na Jiobá laaca rinabadiidxaʼ zacá. Gastiʼ naca guiníʼ íquenu zacá, purtiʼ guiranu cabézanu guidxiña dxi guni Jiobá «irá xixé cosa nacubi» ne cuee guiráʼ guendanagana cadídinu (Apoc. 21:5). Neca nánnanu maʼ cadi candaa para guinitilú guidxilayú stiʼ Binidxabaʼ, ziuu biaje zareʼnu gana cuézanu ni.
2. Xi zacábinu lu tema riʼ.
2 Biblia rusiidiʼ naquiiñeʼ cuézanu sin guireʼnu gana. Para guidúʼyanu gaca guiráʼ ni maʼ guníʼ Dios, naquiiñeʼ gaca fe stinu naguidxi, cásica fe gupa stale xpinni Dios bibani dxiqué (biindaʼ Hebreos 6:11, 12). Guiníʼ íquenu de ejemplu stiʼ Jiobá. Pa ñaca ridxiichibe nagueenda la? biaa padxí maʼ nunitilube ca cosa malu nuu lu guidxilayú riʼ, peru cabézabe dxi stini (Rom. 9:20-24). Yanna, xiñee cabézabe yaʼ. Ximodo yenanda Jesús ejemplu stiʼ Dios ne xi zabeendunu pa gúninu zaqueca yaʼ. Ora guicábinu ca guendarinabadiidxaʼ riʼ, zacané cani gaca fe stinu naguidxi ne cadi guireʼnu gana neca ruluíʼ candaa Jiobá para guni guiráʼ ni maʼ guníʼ.
XIÑEE QUÉ HUAREE JIOBÁ GANA
3, 4. 1) Xiñee dede yanna cabeza Jiobá para guni ni maʼ gudixhe ique. 2) Xi biʼniʼ Jiobá despué de bidxiidéchecabe laa ndaaniʼ jardín que.
3 Jiobá nga Dios ni runi mandar guibáʼ ne Guidxilayú, neca zacá nápabe razón para cadi guidxiichibe nagueenda. Despué de bidxiidéchecabe Dios ndaaniʼ jardín que, bihuinni caadxi guendanagana ni caquiiñeʼ guni chaahuiʼ Dios, ne napa xidé gúnibe ni para gacaneni ca ángel ne ca binni ni guibani despué. Ne para nga caquiiñeʼ tiidiʼ tiempu. Cumu runibiáʼ chaahuiʼ Jiobá ni runi ca ángel ne modo riníʼ íquecaʼ ne runibiaʼbe binni la? nánnabe xi caquiiñeʼ gúnibe para cueenducaʼ ni jma galán (Heb. 4:13).
4 Dxi bizaʼbe Adán ne Eva gudíxhebe gápacaʼ xiiñicaʼ ne guidxá Guidxilayú riʼ de binni. Peru qué nuchaa Jiobá ni gudixhe ique neca bicaa Binidxabaʼ Adán ne Eva gucheenecaʼ laabe. Lugar de nidxiichibe nagueenda ne nusaanabe laacaʼ, guníʼ íquebe ximodo gaca ni maca gudixhe íquebe para binni ne Guidxilayú (Is. 55:11). Xiñee cabeza Jiobá neca maʼ gudiʼdiʼ stale iza. Para ganda gúnibe ni cá íquebe, gusihuínnibe nápabe derechu de guni mandarbe ne gaca dxiiñaʼ stibe jma jneza.
5. Xi ndaayaʼ ricaa binni pur cabézaruʼ Jiobá.
5 Sti razón napa Jiobá nga purtiʼ zacá zanda guicaa stale binni guendanabani ni qué zaluxe. Dede nagasi maʼ cayúnibe dxiiñaʼ para ganda guilá stale binni ni runi adorar laabe (Apoc. 7:9, 14; 14:6). Ora maʼ canagucheechenu diidxaʼ nga runi invitar Jiobá binni para guiziidicaʼ ni na ca ley stibe ne xi chiguni Reinu stibe. Ca diidxaʼ stiʼ Reinu nga diidxaʼ nacubi ne galán ni rusiecheʼ binni guidxilayú (Mat. 24:14). Guiráʼ binni ni riuu gaxha de Jiobá reeda gaca bíʼchicaʼ ne bizáʼnacaʼ ne riuuláʼdxicaʼ gúnicaʼ ni jneza (Juan 6:44-47). Racané Dios laacabe para gúnicabe ni riuulaʼdxiʼ, purtiʼ nadxii laacabe. Laaca cabibe lade binni tuu nga cani chichuu lu gobiernu ni nuu guibáʼ. Ora maʼ nuucabe lu puestu stícabe guibáʼ, zacanécabe ca binni ni ruzuubaʼ diidxaʼ para guiree donda luguiacaʼ ne gápacaʼ guendanabani ni qué zaluxe. Nga runi, neca cabeza Jiobá guidxiña dxi riʼ, cayúnibe dxiiñaʼ para cuʼbe ndaayaʼ laanu casi maca guniʼbe.
6. 1) Ximodo bisihuinni Jiobá qué ridxiichi nagueenda ca dxi bibani Noé. 2) Ximodo cusihuinni Jiobá qué ridxiichi nagueenda ca dxi stinu.
6 Jiobá qué ridxiichi nagueenda neca runi binni cosa malu biaʼ gapa gana, ne zacá rihuínnini pur ni bizaaca ante guiaba Nisaguié naroʼbaʼ que. Tiempu que nabé guyuu binni ni gupa jnadxii ne bíʼnicaʼ guendaquéiquiiñeʼ, dede «gucaná ladxidóʼ» Jiobá pur guiráʼ cosa malu cayúnicabe (Gén. 6:2-8). Qué nudiibe lugar nibani ca binni que xadxí, ngue runi binitilube guiráʼ binni malu ora bisábabe ti nisaguié naroʼbaʼ. Peru «laga cuzáʼ Noé arca que, qué nixhacalaʼdxi Dios», sínuque gudíxhebe xi naquiiñeʼ gaca ti guilá Noé ne familia stiʼ (1 Ped. 3:20). Órapeʼ caquiiñeʼ ganna Noé ni nga gudxi Jiobá laa xi chiguni ne biʼniʼ mandar laabe guzaʼbe ti arca (Gén. 6:14-22). Ne gudxi Noé «laaca nusaana ca irá enda ruchee sticaʼ», purtiʼ chigunitilú Dios guiráʼ binni malu (2 Ped. 2:5). Yanna Jesús guníʼ zaca ca dxi stinu cásica guca dxi stiʼ Noé. Maʼ gudixhe Jiobá padxí guinitilú guidxilayú malu riʼ, peru nin ti binni qué ganna «padxí ne pora» (Mat. 24:36). Dxiiñaʼ nápanu yanna nga quíxhenanu binni ne gábinu laacaʼ xi naquiiñeʼ gúnicaʼ para guilacaʼ.
7. Ñee candaa Jiobá para guni guiráʼ ni maʼ guníʼ la? Bisiene ni guicábiluʼ.
7 Ñee cudii Jiobá lugar tiidiʼ tiempu purtiʼ si cabeza la? Coʼ. Cadi guiaandaʼ ndiʼ laanu: gadxé nga cueza binni gaca xiixa, ne gadxé nga gusiaandaʼ binni ni cayuni. Peru raca nagana para guiénenu ni, jmaruʼ si pa maʼ zigólanu o pa nabé cayuniná tiempu malu riʼ laanu. Zándaca guireʼnu gana o guiníʼ íquenu nabé candaa Dios para guni guiráʼ ni maʼ guníʼ (Heb. 10:36). Qué chuʼ dxi guiaandaʼ laanu nápabe stale razón para cadi guidxiichibe nagueenda ne tiempu ni cayaadxaʼ riʼ caquiiñebe ni para gacanebe ca xpínnibe ni ruzuubaʼ diidxaʼ (2 Ped. 2:3; 3:9). Yanna guidúʼyanu ximodo bisihuinni Jesús nanna cueza casi runi Bixhoze.
BISAANA JESÚS TI EJEMPLU PURTIʼ NANNA CUEZA
8. Xi guendanagana gudiʼdiʼ Jesús ra bisihuinni pabiáʼ ruzuubaʼ diidxaʼ.
8 Maʼ ziné Jesús mil de iza de cayuni ni na Dios né stale gana. Dxi maʼ qué niná Binidxabaʼ nuzuubaʼ diidxaʼ, gudixhe Jiobá gueeda tobi lucha Xiiñiʼ ndaaniʼ Guidxilayú para gaca Mesías. Para guca ndiʼ gupa xidé guleza Jesús stale mil iza dede ora bidxiña dxi, peru qué nireebe gana (biindaʼ Gálatas 4:4). Peru qué ñuube casi tuuxa ni zuba si ne guidxináʼ ne cabeza ora gaca xiixa, sínuque bíʼnibe dxiiñaʼ bisaanané Bixhózebe laabe. Dxi maʼ beedabe ndaaniʼ Guidxilayú, maca nánnabe zuyubi Binidxabaʼ modo guuti laabe, purtiʼ zaqué na Stiidxaʼ Dios (Gén. 3:15; Mat. 16:21). Bíʼnibe ni na Dios ne qué nireebe gana, neca nabé bininácabe laabe, zaqué bisihuínnibe zanda guzuubaʼ binni diidxaʼ. Qué nicá íquebe pabiáʼ risácabe ne xi puestu gúpabe. ¡Zacá bisaanabe ti ejemplu galán para laanu! (Heb. 5:8, 9.)
9, 10. 1) Xi cayuni Jesús laga cabeza guni ni racalaʼdxiʼ Jiobá. 2) Xiñee naquiiñeʼ guidúʼyanu tiempu cásica ruuyaʼ Jiobá ni.
9 Biasa si Jesús de lade gueʼtuʼ, gucuaa poder para guni mandar guibáʼ ne lu Guidxilayú (Mat. 28:18). Ne yanna caquiiñebe poder stibe para gúnibe ni gudixhe ique Jiobá tiempu naquiiñeʼ gácani. Guyuube ladu derechu stiʼ Bixhózebe, racá gulézabe sin nireebe gana hasta lu iza 1914, dxi maʼ biʼniʼ Dios ca xhenemígube casi ti banguʼ huiiniʼ para quixhe ñeebe (Sal. 110:1, 2; Heb. 10:12, 13). Maʼ cadi candaa para gunitilube guidxilayú stiʼ Binidxabaʼ, peru laga cabézabe sin guireebe gana, cayacanebe binni para checaʼ «ra candani nisa rudii enda nabani» (Apoc. 7:17).
10 Ejemplu stiʼ Jesús rusiidini laanu naquiiñeʼ guidúʼyanu tiempu cásica ruuyaʼ Jiobá ni. Dxandíʼ rápabe gana gúnibe guiráʼ ni racalaʼdxiʼ Bixhózebe, neca zacá gulézabe dede ora bidxiña dxi gaca ni na Dios. Laaca cadi naquiiñeʼ guireʼnu gana laga cabézanu guinitilú guidxilayú stiʼ Binidxabaʼ, ti cadi gúninu xiixa ni qué rinabaʼ Dios laanu ne cadi guidxáganu. Yanna, xi zanda gúninu para cadi guireʼnu gana yaʼ.
XI NAQUIIÑEʼ GÚNINU PARA CADI GUIREʼNU GANA
11. 1) Xiñee caquiiñeʼ gápanu fe. 2) Xiñee nápanu stale razón para gaca fe stinu naguidxi.
11 Ñee zanda guni huantar binni sin guiree gana neca binni ruchee laa la? Zanda, purtiʼ ante gueeda Jesús maca guyuu xpinni Dios ne ni riguixhená ni bisihuinni zanda gácani. Fe ni gúpacabe gucaneni laacabe cuézacabe sin guireecabe gana (biindaʼ Santiago 5:10, 11). Ñanda nibézacabe ñuni Dios ni maʼ guníʼ pa qué ñápacabe fe laabe la? Guyuu biaje gudíʼdicabe ra naxoo ne bidxaagalúcabe guendanagana, peru biʼniʼ huantárcabe ni purtiʼ nánnacabe zuni Dios ni maʼ guníʼ (Heb. 11:13, 35-40). Yanna riʼ, nápanu stale razón para gaca fe stinu jma naguidxi, purtiʼ maʼ bisiidiʼ Jesús laanu ximodo sanu «lu neza udixhe Dios sa cani runi cre laa» (Heb. 12:2). Ora bíʼnibe ni na ca diidxaʼ riguixhená ne ora bisihuínnibe xi racalaʼdxiʼ Dios, bidiibe laanu stale razón para guni crenu Jiobá.
12. Xi zanda gúninu para gaca fe stinu naguidxi.
12 Xi zanda gúninu para gaca fe stinu naguidxi ne gánnanu cuézanu. Naquiiñeʼ chinándanu ca conseju stiʼ Dios. Guiníʼ íquenu ca razón nápanu para gúninu xhiiñaʼ Reinu primeru lu xquendanabáninu. Mateo 6:33 cayabi laanu gúninu jma lu xhiiñaʼ Dios, ñee zanda gúninu stipa ca la? Zándaca caquiiñeʼ cueenu jma tiempu para chigucheechenu diidxaʼ o guchaʼnu modo nabáninu ti ganda gúninu ni. Cadi guiaandaʼ laanu guiráʼ ndaayaʼ ni maʼ bidii Jiobá laanu pur stipa rúninu para gúninu ni nabe. Zándaca huayacanebe laanu guidúʼndanenu tuuxa binni Biblia o maʼ gudixhedxibe ladxidoʼno (biindaʼ Filipenses 4:7). Pa guiníʼ íquenu ca ndaayaʼ ni maʼ gucuaanu pur ruzúʼbanu stiidxaʼ Jiobá, zudiʼnu cuenta pabiáʼ risaca gánnanu guni huantarnu (Sal. 34:8).
13. Xi naquiiñeʼ gúninu para gápanu fe ne gánnanu cuézanu. Bidii ti ejemplu.
13 Quíxhenu ejemplu stiʼ ti hombre ni runi dxiiñaʼ lu layú stiʼ. Primeru zusábabe biidxiʼ stibe, zuni tenderbe ni para guiroobaʼ ni ne despué maʼ guindísabe cosecha stibe. Cada biaje gudii layú stibe stale, jma rudii gana laabe gúnibe dxiiñaʼ sti biaje. Peru nánnabe naquiiñeʼ cuézabe sin guireebe gana. Dede zándaca guicaabe jma layú para gúnibe dxiiñaʼ purtiʼ nánnabe zudii cani. Zacaca nga zeeda gaca né ca conseju ni rudii Dios. Cada biaje guizíʼdinu de laacani, gúninu ni na cani ne guicaanu ndaayaʼ pur rinándanu ca conseju ca la? jma naguidxi zaca fe stinu ne zacaneni laanu cuézanu ca ndaayaʼ ni gueeda despué (biindaʼ Santiago 5:7, 8).
14, 15. Ximodo naquiiñeʼ guidúʼyanu ca yuubaʼ cadiʼdiʼ binni guidxilayú.
14 Xi sti cosa zacané laanu para cadi guireʼnu gana yaʼ. Naquiiñeʼ guidúʼyanu guidxilayú riʼ ne modo nabáninu casi modo ruuyaʼ Jiobá ni. Neca riuubaʼ ladxidóʼ Dios pur modo cayacaná binni tiempu riʼ, qué rucueezani laabe de gúnibe ni jneza. Lugar de ñuyadxísibe xi cayaca biseendabe tobi lucha Xiiñibe para «uchiá xhiiña binidxabaʼ» ne guni chaahuiʼ guiráʼ guendanagana napa binni pur Binidxabaʼ (1 Juan 3:8). Ora maʼ biluxe Jesús dxiiñaʼ stiʼ, zadúʼyanu tobi gudiʼdiʼ si ca yuubaʼ ca, peru qué ziuu dxi guiráʼ ca ndaayaʼ stiʼ Dios. Nga runi, lugar de chuʼnu xizaa pur guiráʼ guendaquéiquiiñeʼ ni nuu lu guidxilayú stiʼ Binidxabaʼ o guininu xiñee caʼruʼ guinitilú cani la? naquiiñeʼ gápanu fe ne cuézanu zaca guiráʼ ni maʼ guníʼ Jiobá. Laabe maʼ gudíxhebe padxí gunduuxebe guidxilayú malu riʼ ne zúnibe ni dxi maʼ gudíxhebe gácani (Is. 46:13; Nah. 1:9).
15 Lu ca últimu dxi stiʼ guidxilayú malu riʼ, zándaca zadxaagalunu guendanagana ra zahuinni pabiáʼ naguidxi fe stinu. Pa guninácabe laanu o guninácabe ti binnilídxinu, cadi guidxiichinu. Cumu binni ruchee laanu la? zácani nagana para laanu, peru naquiiñeʼ gúninu stipa para guni crenu zacané Jiobá laanu ne chinándanu ejemplu stiʼ Jesús casi na Mateo 26:39 (biindaʼ ni).
16. Laga cabézanu guinitilú guidxilayú malu riʼ, xi cadi naquiiñeʼ gúninu.
16 Pa qué racaláʼdxinu guireʼnu gana, naquiiñeʼ guni crenu zuni Jiobá ni maʼ guníʼ. Xiñee yaʼ. Purtiʼ pa qué runi cré tuuxa mayaca guinitilú guidxilayú riʼ, zándaca guiníʼ ique sicaríʼ: «Chindezaʼ para guuyaʼ pa zuni Jiobá ni maʼ guníʼ». Zándaca guiníʼ íquebe gácabe ti binni risaca tiempu riʼ ne gápabe bidxichi lugar de gúnibe xhiiñaʼ Reinu primé, o zándaca guiníʼ íquebe chebe scuela roʼ para ganda guibánibe jma galán despué. Tuuxa ni guni zacá rusihuinni huaxiéʼ napa fe. Guietenaláʼdxinu xi guníʼ Pablu: chinándanu ejemplu stiʼ ca binni ni gupa fe ne ni biʼniʼ huantar purtiʼ laacaʼ gucuaacaʼ cani guníʼ Dios gudii laacaʼ (Heb. 6:12). Maʼ gudixhe Jiobá padxí gunitilú guidxilayú malu riʼ, ne zúnibe ni dxi maʼ gudíxhebe gácani (Hab. 2:3). Laga cabézanu ni, cadi gudiʼnu lugar chuʼ tu cuee gana laanu, sínuque naquiiñeʼ gatananu ne gucheechenu stiidxaʼ Jiobá né stale gana. Dxiiñaʼ riʼ zuchá típani ladxidoʼno tiempu riʼ (Luc. 21:36).
XI ZABEENDUNU PA NÁNNANU CUÉZANU
17, 18. 1) Xi zanda gúninu laga cudii Jiobá tiempu laanu. 2) Xi zabeendunu pa dede yanna guizíʼdinu cuézanu.
17 Pa maʼ xadxí de runibiaʼnu Jiobá o pa deruʼ bizulunu, qué racaláʼdxinu gusaana de gúninu ni nabe. Pa qué guireʼnu gana zacaneni laanu guni huantarnu dede ora gulá Dios laanu, neca qué gánnanu pabiáʼ tiempu cayaadxaʼ guidxilayú malu riʼ. Yanna riʼ, cudii Jiobá tiempu laanu para gusihuínninu dxandíʼ runi crenu guiráʼ ni maʼ gudixhe íquebe gúnibe ne pa qué zaxélenu de laabe ora gápanu guendanagana (1 Ped. 4:13, 14). Laaca cusiidibe laanu xi naquiiñeʼ gúninu para cadi guireʼnu gana ne zacá guni huantarnu dede ora gueeda dxi stiʼ Jiobá (1 Ped. 5:10).
18 Jesús nga runi mandar guibáʼ ne Guidxilayú, nga runi zanda gápabe laanu pa guzúʼbanu stiidxaʼ Dios (Juan 10:28, 29). Qué gápanu razón para guidxíbinu guendaguti nin sti cosa ni gueeda despué. Zalá cani cueza sin guiree gana. Nga runi, cadi gudiʼnu lugar quite guidxilayú riʼ laanu ne gusirani fe nápanu Jiobá. Naquiiñeʼ gaca fe stinu naguidxi ne iquiiñenu tiempu stinu né guendabiaaniʼ (Mat. 24:13; biindaʼ 2 Pedro 3:17,18).
[Guendarinabadiidxaʼ stiʼ párrafo]
[Imagen ni zeeda lu yaza 21]
Pa qué guireʼnu gana, zacaneni laanu gúninu jma lu xhiiñaʼ Reinu ne zacaanu stale ndaayaʼ
