Ti mil iza de guendariuudxi... ¡ne ziuuruʼ jma iza zacá!
Ti mil iza de guendariuudxi... ¡ne ziuuruʼ jma iza zacá!
«[Zaca Dios] xaíque sti irá ni.» (1 COR. 15:28)
XIMODO NUSIÉNELUʼ NDIʼ.
Xi ndaayaʼ zacaa binni ora gaca ni na ca textu riʼ.
Miqueas 4:4
Isaías 11:6-9
1. Xi ndaayaʼ cabeza ca binni ni qué zati ora gueeda ca dxi «jma nagana».
PA ÑUU ti gobiernu ni ñapa stale poder, ra ñuu ti rey nachaʼhuiʼ ni riá binni, xi guiráʼ cosa galán ñanda ñuni gobiernu riʼ pur ca xpinni lu ti mil iza yaʼ. Ngapeʼ nga ca ndaayaʼ cabeza stale binni, ca binni riʼ qué záticaʼ ora gueeda ca dxi «jma nagana» ra guinitilú guiráʼ cosa malu nuu yanna (Apoc. 7:9, 14).
2. Xi guiráʼ huayaca lu xhoopaʼ mil iza de cayuni mandar binni lu Guidxilayú.
2 Maʼ gudiʼdiʼ xhoopaʼ mil iza de cayuni mandar binni ndaaniʼ Guidxilayú, peru puru si yuubaʼ ne guendananá huayápacaʼ. Sicaríʼ guníʼ Biblia maʼ raca stale iza: «Biaʼ tiempu huayuni mandar hombre sti binni puru si yuubaʼ rápacaʼ» (Ecl. 8:9). Ne ngapeʼ nga ni cadúʼyanu ca dxi riʼ: nuu guendaridinde, cucaalúcabe gobiernu, nuu guendapobre, guendahuará, canitilú guiráʼ ni riquiiñeʼ binni para guibani ne nabé cuchaa tiempu. Stale gobiernu maʼ guníʼ naná zácani para laanu despué pa qué guchaʼnu modo nabáninu yanna.
3. Xi zaca ora maʼ guni mandar Reinu stiʼ Dios ti mil iza.
3 Dxi maʼ guni mandar gobiernu stiʼ Jesucristu ne 144,000 xpinni, zuni chaahuiʼ Reinu stiʼ Dios Guidxilayú riʼ ne zabeeni guiráʼ yuubaʼ napa binni. Lu ti mil iza guni mandar Reinu riʼ zaca ni na ca diidxaʼ guníʼ Jiobá: «Chiguzayaʼ ti guibáʼ cubi ne ti guidxilayú cubi; ne guiráʼ ni guyuu dxiqué maʼ guirutiʼ tu zietenalaʼdxiʼ cani, ne maʼ qué zanabaʼ ladxidóʼ binni cani» (Is. 65:17). Xi guiráʼ cosa sicarú zaca tiempu ca yaʼ. Ca diidxaʼ riguixhená zeeda lu Stiidxaʼ Dios racané laanu guiénenu guiráʼ «ni chi ihuinni ruʼ» (2 Cor. 4:18).
«ZUCUÍCABE YOO, NE [...] ZUDXIIBACABE UVA»
4. Xi guendanagana cadiʼdiʼ stale binni yanna.
4 Cadi dxandíʼ ñuulaʼdxiʼ guiráʼ binni ñapa ti lidxi ra ñanda nibaniné familia stiʼ sin nuchíbicabe laa la? Peru yanna riʼ nabé raca nagana para binni guidxela ti yoo ra guibani. Maʼ gastiʼ ra guibani binni ndaaniʼ ca guidxi roʼ ca, nga runi, rindézacabe ca lugar jma pobre ne biaʼ zidiʼdiʼ sícabe dxi. Para ca binni riʼ, gápacaʼ ti lugar galán para cuézacaʼ zeeda gácani casi ti bacaandaʼ.
5, 6. 1) Ximodo zaca ni na Isaías 65:21 ne Miqueas 4:4. 2) Xi naquiiñeʼ gúninu ti guidúʼyanu ora gaca ni na ca textu riʼ.
5 Ora maʼ guni mandar Reinu, guiráʼ binni zapa ti lidxi, purtiʼ zaca ni guníʼ Isaías riʼ: «Zucuícabe yoo, ne zaquiiñecabe ni, ne dxandipeʼ zudxiibacabe uva lu layú ne zócabe ni gudiini» (Is. 65:21). Yanna riʼ nuu binni napa lidxi, nuu tu laa naroʼbaʼ lidxi ne nuu tu ruluíʼ nabeza ndaaniʼ ti palaciu. Peru stale de laacabe ridxíbicabe guníticabe ni pa guirá xpuéltucabe o pa chuʼ gubaanaʼ ralídxicabe o pa guizaacacabe sti cosa jma malu. Laaca zabee Reinu stiʼ Dios guiráʼ ni riguu xizaa binni, casi maca bicaa Miqueas: «Zabí cada tobi xaʼnaʼ yaga uva ne xaʼnaʼ yaga duʼgaʼ stiʼ, ne qué ziuu tuuxa guchibi laacaʼ» (Miq. 4:4).
6 Xi naquiiñeʼ gúninu pa racaláʼdxinu guibáninu ora guni mandar Reinu ca yaʼ. Dxandíʼ caquiiñenu ti yoo galán ra guibáninu. Peru cadi jneza gúninu dxiiñaʼ para si gápanu ti yoo ni jma sicarú, dede guzáʼbinu pur laani. Jma galán guicá íquenu ni chigudii Jiobá laanu. Jesús guníʼ ca diidxaʼ riʼ: «Ca mistu guiʼxhi la? napa ca cueva ra riaana caʼ, ne zaqueca ca mani huiini napa ca lidxi caʼ. Peru naa nga Hombre Biseenda Dios, ne qué gapa nin ra quixhe iqueʼ» (Luc. 9:58). Ñanda nucuí Jesús o nizíʼ ti yoo ni jma galán para laa. Peru xiñee qué ñúnibe ni yaʼ. Purtiʼ qué nicá íquebe ñápabe xiixa ni nucueeza laabe de ñúnibe xhiiñaʼ Reinu primé lu xquendanabánibe. Ñee zanda chinándanu ejemplu stibe ne cadi guicálunu gápanu stale cosa risaca, ti cadi gápanu guendanagana la? (Mat. 6:33, 34.)
«GUEUʼ NE DENDXUʼ [...] ZOCAʼ JUNTU»
7. Xi dxiiñaʼ bisaana Dios lu náʼ Adán ne Eva.
7 Dxi bizáʼ Jiobá Guidxilayú, bizaʼbe binni ne laacaʼ nga ni jma sicarú bíʼnibe últimu. Guidúʼyanu xi gudxi Jiobá tobi lucha Xiiñiʼ, ni gucané laa para guyáʼ guiráʼ cosa: «Gúninu binni casi laanu, ne gápacabe ca benda nuu ndaaniʼ nisadóʼ ne ca maniʼ ripapa guibáʼ ne ca maniʼ nadóʼ ne gápacabe guidxilayú ne guiráʼ maniʼ ni riniibi lu guidubi guidxilayú» (Gén. 1:26). Bisaana Dios lu náʼ Adán ne Eva guni mandarcaʼ guiráʼ maniʼ ne ngueca guni guiráʼ ca xiiñiʼ.
8. Xi rusihuinni ca maniʼ ca pur ni rúnicaʼ.
8 Ñee zanda guni mandar binni ca maniʼ ca ne chuʼ tobi si né laacame la? Stale binni napa biʼcuʼ, mistuʼ ne xcaadxi maniʼ ralidxi. Peru xi zanda guzéʼtenu de ca maniʼ duxhuʼ ca yaʼ. Guidúʼyanu xi bizeeteʼ ti libru: «Ca científicu ni ruundaʼ de ca maniʼ ca maʼ biiyacaʼ laaca runi sentírcame». Guiranu nánnanu xi runi ti maniʼ ora ridxibi ne ora nuu tu cucaalú laame, peru ñee randa rusihuínnicame xi runi sentírcame la? laaca libru que guníʼ: «Ora cusiniisicame xiiñicame rusihuínnicame pabiáʼ nadxiicame laacaʼ».
9. Xi chiguni Dios né ca maniʼ ca.
9 Qué ridxagayaanu ora ridúʼndanu riníʼ Biblia zanda chuʼ binni tobi si né laacame. Biblia na: «Guirutiʼ tu zuniná ne zunitilú lu dani nayá stinneʼ; purtiʼ guidxilayú riʼ zadxá típani de guiráʼ ni rusiidiʼ Jiobá cásica dxátipa nisadóʼ» (Isaías 11:9). Xiñee yaʼ. Guietenaláʼdxinu xi gudxi Jiobá Noé ne familia stiʼ bireesicaʼ ndaaniʼ arca que: «Nabé zadxibi guiráʼ ca maniʼ ni nuu lu guidxilayú laatu». Ndiʼ racané para cadi guniná binni laacame (Gén. 9:2, 3). Peru Jiobá zanda cuee dxiibi nápacame ti ganda gaca ni maca gudixhe ique (Os. 2:18). ¡Nabé sicarú zácani para guiráʼ tu guibani lu Guidxilayú riʼ!
«ZUCHAA BE NISA RIETE LÚ CAʼ»
10. Xiñee ruunaʼ binni.
10 Ora biʼyaʼ Salomón «guiráʼ ni cayúnicabe lu guidxilayú para cuquiichinácabe binni» guníʼ: «¡Biiyaʼ!, guiráʼ nisa cayete lu ca binni ni cuquiichinácabe que, peru qué gápacabe tu quixhedxí ladxidóʼcabe» (Ecl. 4:1). Yanna jma triste modo nabáninu. Ñee nuu tu qué huayuunaʼ nin ti biaje ca dxi riʼ la? Nuu tiru rúʼnanu purtiʼ nuunu nayecheʼ, peru jma stale biaje rúʼnanu purtiʼ cayuubaʼ ladxidoʼno.
11. Gunáʼ nga relatu ni jma runiibi ladxidoʼloʼ.
11 Guzéʼtenu caadxi relatu zeeda lu Biblia ra rihuinni xi biʼniʼ sentir caadxi binni ni biʼnaʼ. Casi Abrahán, laa biinaʼ dede gucuaalaʼdxiʼ ora guti Sara dxi napa 127 iza (Gén. 23:1, 2). Dxi gudxi Noemí ca xuaalidxi guibiguétacaʼ xquídxicaʼ, «bizulú bicaacaʼ ridxi cayuunacaʼ» (Rut 1:9, 14). Dxi guca huará rey Ezequías ne gúnnabe zátibe, biʼniʼ orarbe Dios «ne nabé naná modo bíʼnabe», zándaca pur ngue bisianda Jiobá laabe (2 Rey. 20:1-5). Yanna, guiníʼ íquenu de Pedru, despué de guniʼbe chonna biaje qué runibiáʼ Jesús, binadiágabe biindaʼ ti gallu, cadi dxandíʼ riniibi ladxidoʼno ora gánnanu «yeguuna be dede guyuu yuuba ladxidóʼ be» la? (Mat. 26:75.)
12. Xi ndaayaʼ zudii Reinu stiʼ Dios binni.
12 Guiranu ridídinu xiixa desgracia, nuu tiru naroʼbaʼ o nahuiiniʼ ne guiranu caquiiñenu tu gacané laanu ne quixhedxí ladxidoʼno. Ngapeʼ nga ni chiguni Reinu stiʼ Dios lu ti mil iza para ca xpinni, purtiʼ Biblia na «zuchaa [Dios] nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ» (Apoc. 21:4). Riéchenu ora gánnanu maʼ qué ziuu binni triste, maʼ qué zuunaʼ ne maʼ qué ziuubaʼ ladxidóʼ. Peru Dios laaca maʼ guníʼ zabee sti cosa ni jma runiná binni, laani nga guendaguti. Ximodo chigúnibe ni yaʼ.
ZAREE «IRÁ CANI NUU NDAANI BAʼ»
13. Ximodo huayuniná guendaguti laanu dede dxi bichee Adán.
13 Dede dxi bichee Adán, biaana guendaguti lu Guidxilayú casi ti rey ni cayuni mandar, ne guirutiʼ qué rilá de laani, nabé runinani binni ne rusiuubani ladxidóʼ (Rom. 5:12, 14). Nga runi, «nuu binni de tantu ridxibi gati ruluíʼ ma naaze enda guti laa idubi nabani» (Heb. 2:15).
14. Xi zazaaca ora guiree guendaguti.
14 Biblia ruzeeteʼ: «Ni unitilú [Dios] últimu nga enda guti» (1 Cor. 15:26). Chupa grupu nga zacaa ndaayaʼ pur laani. Primé grupu ca nga ca xpinni Dios ni nabani yanna ni chiguiuu lu guidxilayú cubi, racá zanda guibánicaʼ sin gáticaʼ. Sti grupu ca nga guiráʼ millón binni ni chiguiasa lade gueʼtuʼ. Ñee ruxuíʼluluʼ pabiáʼ nayecheʼ zuni sentir ca binni ni cayuni ni na Jiobá yanna ora guiasa binnilídxicaʼ de lade gueʼtuʼ la? Para gánnanu ximodo zuni sentirnu, guidúʼndanu caadxi relatu ni ruzeeteʼ de caadxi binni ni biasa lade gueʼtuʼ (biindaʼ Marcos 5:38-42 ne Lucas 7:11-17).
15. Ximodo zuni sentirluʼ ora guiasa binnilídxiluʼ lade gueʼtuʼ.
15 Ca textu ca cuzeetecaʼ nabé bidxagayaa ca binni que dede bidxíbicaʼ ne «cudii ca diuxquixe Dios». Pa ñuʼnu dxi guca ca milagru riʼ, laaca nabé ñéchenu. Qué zadxélanu ximodo guininu pabiáʼ nayecheʼ ziuʼnu ora guiasa ca binnilídxinu lade gueʼtuʼ. Zándaca pur nga guníʼ Jesús ca diidxaʼ riʼ: «Zadxiña dxi guna diaga irá cani nuu ndaani baʼ stidxi Xiiñi be, ne zaree caʼ» (Juan 5:28, 29). Tobi de ca cosa «ni chi ihuinni ruʼ» nga ora guiasa ca gueʼtuʼ ca, ne ndiʼ nga tobi de cani qué ziuu dxi guiaandaʼ binni.
ZACA DIOS «XAÍQUE STI IRÁ NI»
16. 1) Xiñee naquiiñeʼ chuʼnu nayecheʼ ora maʼ caninu de ca cosa «ni chi ihuinni ruʼ». 2) Ximodo guluu Pablu gana ca xpinni Cristu de Corinto.
16 Cani guzuubaʼ stiidxaʼ Jiobá ca dxi nagana riʼ, nabé sicarú ca ndaayaʼ ni zacaacaʼ. Neca qué ridúʼyanu cani, naquiiñeʼ guiníʼ íquenu de laacani, purtiʼ zacanécani laanu para gúninu caadxi dxiiñaʼ risaca ne cadi gudiʼnu lugar cueechú guidxilayú laanu (Luc. 21:34; 1 Tim. 6:17-19). Naquiiñeʼ chuʼnu nayecheʼ ora maʼ cusíʼdinu binni xi cabézanu gudii Dios laanu, ora guni adorarnu Jiobá né binnilídxinu, ora maʼ caníʼnenu ca xpinni Cristu ne ora cucheechenu diidxaʼ. Zacá qué ziaandaʼ ni laanu ne zahuinni dxandíʼ runi crenu ni. Zacá nga guluu apóstol Pablu gana ca xpinni cristu, purtiʼ bicaabe laacaʼ guiníʼ íquecaʼ ximodo zabani binni ora guiluxe ti mil iza de cayuni mandar Cristu. Guiníʼ íquenu ca diidxaʼ bicaabe lu 1 Corintios 15:24, 25, 28 (biindaʼ ni).
17, 18. 1) Ximodo nga guca Dios «xaíque sti irá ni» dxi nacubi guyuu binni ndaaniʼ Guidxilayú. 2) Xi zuni Jesús para chuʼ binni tobi si ne guibani nayecheʼ.
17 Jneza nga ni guníʼ Pablu ora bizeeteʼ zaca Dios «xaíque sti irá ni» ora guiluxe ti mil iza. Xi zanda guiénenu né ca diidxaʼ riʼ yaʼ. Ante guchee Adán ne Eva, gúcacabe tobi si né ca xiiñiʼ Dios ni nuu guibáʼ ne bibánicabe nayecheʼ. Jiobá, Dios ni jma nandxóʼ nga biʼniʼ mandar ca ángel nuu guibáʼ ne ca binni guyuu ndaaniʼ jardín que. Gunda biʼniʼ adorárcabe laabe ne guniʼnécabe laabe ne guluu Jiobá ndaayaʼ laacabe. Guca Dios «xaíque sti irá ni» dxiqué.
18 Peru biluxe guiráʼ nga ora bidii binni lugar quite Binidxabaʼ laacaʼ ne bidxiidéchecaʼ derechu napa Jiobá de guni mandar. Peru dede iza 1914, Reinu stiʼ Cristu maʼ cayuni dxiiñaʼ para chuʼ binni tobi si ne guibánicaʼ nayecheʼ (Efes. 1:9, 10). Lu ti mil iza ca nga zaca guiráʼ «ni chi ihuinni ruʼ». Oracaruʼ nga guiluxe guni mandar Cristu. Xi zazaaca despué yaʼ. Neca nexheʼ «irá xixé ni nuu ibáʼ ne ni nuu guidxilayú» ndaaniʼ náʼ Jesús, cadi cá lube guicaabe puestu stiʼ Jiobá, purtiʼ qué rachelube ni cadi stibe. «Zudii be ca xpinni be Dios Bixhoze be», ne zaquiiñebe puestu ne poder stibe para gusisácabe Dios (Mat. 28:18; Filip. 2:9-11).
19, 20. 1) Ximodo zusihuinni ca xpinni Reinu zudiicaʼ lugar guni mandar Jiobá laacaʼ. 2) Xi ndaayaʼ naroʼbaʼ cabézanu.
19 Tiempu gaca ni maʼ bizéʼtenu riʼ maʼ guirutiʼ qué zapa donda bisaanané Adán binni. Zinándacabe ejemplu stiʼ Jesús ne zudiicabe lugar guni mandar Jiobá laacabe. Peru zadíʼdicabe lu últimu guendanagana para gusihuínnicabe dxandíʼ ruzuubacabe diidxaʼ (Apoc. 20:7-10). De racá maʼ zanitilú guiráʼ cani qué nuzuubaʼ diidxaʼ —cásica binni ne ca demonio— ne maʼ qué ziuuruʼ dxi guibiguétacabe. ¡Nabé ziuʼnu nayecheʼ dxi ca! Guidubi familia stiʼ Jiobá, cásica ni nuu guibáʼ ne cani nuu lu Guidxilayú, ziéchecaʼ ora gusisácacaʼ laabe purtiʼ zácabe «xaíque sti irá ni» nuu. Biblia na: «Maʼ beeda gaca Jiobá rey. Zadxibi ca guidxi ca. Ma zúbabe lade ca querubín. Zacaditi guidxilayú» (Salmo 99:1).
20 Yanna, xi naquiiñeʼ guʼnuʼ ra maʼ nannuʼ xi guiráʼ chiguni Reinu stiʼ Dios yaʼ. Ñee zucaa íqueluʼ gúniluʼ ni na Dios né guiráʼ stipa stiuʼ la? Ñee zuzuhuaaluʼ dxiichiʼ ti cadi gudiiluʼ lugar cueechú guiráʼ ni guiníʼ binni lii ne cadi guicáluluʼ gápaluʼ guiráʼ ni culuíʼ Binidxabaʼ binni la? Ñee zaguixhe íqueluʼ chuʼluʼ pur Jiobá ne gusihuínniluʼ nápabe derechu de guni mandarbe lii la? Pa zacá ni, bisihuinni dxandíʼ zúniluʼ ni nabe biaʼ dxi guibániluʼ. Óraca zanda guibániluʼ ti mil iza ra zacaaluʼ stale ndaayaʼ ne ra ziuu guendariuudxi... ¡ne ziuuruʼ jma iza zacá!
[Guendarinabadiidxaʼ stiʼ párrafo]
[Imagen ni zeeda lu yaza 11]
Ora maʼ biluxe Jesús dxiiñaʼ stiʼ casi Rey, zudiibe Reinu ca Bixhózebe
