Gácanu nadxibalú para gudxíʼlunu ca yuubaʼ stinu
Gácanu nadxibalú para gudxíʼlunu ca yuubaʼ stinu
«Dios zeeda gaca para laanu casi ti lugar ra zanda guilanu ne laabe nga stipa stinu, zanda gacanebe laanu nagueendaca ora cadídinu lu xiixa guendanagana.» (SAL. 46:1)
XI NICÁBILUʼ
Xi naquiiñeʼ gúninu ti cadi guniná xhaataʼ ca desgracia ca laanu.
Xi razón nápanu para gácanu nadxibalú.
Xi guiráʼ maʼ bidii Jiobá laanu para gudxíʼlunu ca guendanagana stinu.
1, 2. Xi guiráʼ desgracia cadídinu tiempu riʼ, ne xi caquiiñenu para gudxíʼlunu cani.
NABÁNINU ti tiempu ra cayaca stale desgracia: cayaca xu, tsunami, cacaguí stale lugar, nuu volcán, tornado ne huracán ni nabé cayuniná guidubi Guidxilayú. Laaca nuu binni o familia ridíʼdicaʼ lu xiixa guendanagana ne ruchibi nga laacaʼ o riguuni laacaʼ triste. Nga runi, napa Biblia razón ora riníʼ tutiica de laanu zándaca «málasi» guizaaca xiixa (Ecl. 9:11).
2 Guiráʼ ca xpinni Dios nayecheʼ nuucaʼ cudxiilucaʼ ca guendanagana sticaʼ né stale guendanadxibalú. Nga runi, naquiiñeʼ chuʼnu listu para intiica cosa ni gueeda luguianu laga zeeda guidxiña dxi guinitilú guiráʼ cosa malu. Ximodo zanda gudxíʼlunu ca guendanagana ca sin gusidxágani laanu yaʼ. Xii nga ni zacané laanu gudxíʼlunu sin guidxíbinu ca guendanagana gápanu yaʼ.
CHINÁNDANU EJEMPLU STIʼ CA BINNI NI GUCA NADXIBALÚ
3. Ximodo racané Romanos 15:4 laanu para ganda gudxíʼlunu ca guendanagana gápanu.
3 Cadi deruʼ yanna nga cayuniná ca guendanagana riʼ binni, maʼ stale iza de cayácani zacá, peru zeʼ dxi jma stale binni cayuniná ni. Guidúʼyanu ximodo bidxiilú caadxi xpinni Dios ni bibani dxiqué ca guendanagana gúpacaʼ (Rom. 15:4).
4. Xi guendanagana gupa David, ne tu bidii stipa laabe para bidxiilube cani.
4 Guiníʼ íquenu de ca guendanagana ni gupa David. Primé la? gucalaʼdxiʼ rey Saúl ñuuti laabe, bicaalú ca xhenemígube laabe, yenécabe ca xheelabe, bidxiideche binnilídxibe ne ca xhamígube laabe ne pur guiráʼ ngue nabé guyuube triste (1 Sam. 18:8, 9; 30:1-5; 2 Sam. 17:1-3; 24:15, 17; Sal. 38:4-8). Guiráʼ ni ridúʼndanu de laabe lu Biblia rusihuínnicani nabé gúpabe guendanagana. Peru qué nusaana de ñápabe fe Jiobá pur laacani. Laabe guniʼbe: «Jiobá zeeda gaca ti lugar ni nadipaʼ para naa lu xquendanabaneʼ. Tuu ndiʼ zanda guchibi naa yaʼ» (Sal. 27:1). Biblia na: «Purtiʼ zapa chaahuibe naa ora tiideʼ ra nagana; zaguube naa ti lugar ra jma nagaʼchiʼ ni nuu ndaaniʼ tienda stibe; zuzuhuaabe naa ique ti dani. Pa bixhózepiaʼ ne jñaapiaʼ gusaana naa la? Jiobá peʼ zacaa naa» (Salmo 27:5, 10).
5. Ximodo bidxiilú Abrahán ne Sara guiráʼ guendanagana ni gúpacaʼ.
5 Yanna, guiníʼ íquenu de Abrahán ne Sara. Laacabe bibánicabe stale iza xquidxi binni, ndaaniʼ yoo de lari. Neca nuu biaje gúcani nagana para laacabe purtiʼ biaadxaʼ ni gócabe ne bicaalú binni laacabe, gunda bidxiilúcabe cani né guendanadxibalú (Gén. 12:10; 14:14-16). Ximodo bíʼnicabe ni yaʼ. Guidúʼyanu xi biʼniʼ Abrahán, Stiidxaʼ Dios na gucuá «lú be icaa be guidxi ni bicuí Dios para laabe [...], guidxi ni qué ziuu dxi initilú» (Heb. 11:8-10). Lugar de nibánicabe modo nabani ca binni que, gudixhe íquecabe guicaacabe ni bizabiruaa Dios gudii laacabe.
6. Xi ejemplu bisaanané Job laanu.
6 Job laaca biʼniʼ huantar stale guendanagana. Nabé nadipaʼ guca para laabe ora biiyabe guiráʼ cosa feu bizaacabe ne casi ora maʼ chiguiluxe xquendanabánibe (Job 3:3, 11). Ne ni jma feu nga qué gánnabe xi pur cayácabe guiráʼ ngue. Peru qué ñuu dxi nusaana de ñápabe fe Dios. Biblia na: «¡Óraque gudxi Jiobá Binidxabaʼ: «Ñee maʼ biiyuʼ Job xpinneʼ la? gástiruʼ stobi casi laabe lu guidxilayú, tobi hombre ni qué gapa donda ne runi ni jneza, ridxibi Dios ne rixeleʼ de guendaquéiquiiñeʼ. Dede yanna cayúnirube stipa para cadi gucheenebe naa neca lii cucaaluʼ naa gunduuxeʼ laabe sin gúnibe gastiʼ!» (Job 2:3). ¡Nabé sicarú ejemplu bisaanané Job laanu!
7. Xi guiráʼ guendanagana gudiʼdiʼ Pablu ora biʼniʼ xhiiñaʼ Dios, ne tu bidii stipa laabe para qué nusaana de ñúnibe ni.
7 Guidúʼyanu ejemplu stiʼ Pablu. Laa guníʼ: «Huayuaa [ra] naxoo [...] lade binni xquidxeʼ», «ndaani guiʼxhiʼ, ne lu nisadóʼ», ne «huayaana sin gahuaʼ, huayate nisa», «huayaca naʼnda ne huayaana sin lari gacuaʼ», ne «bixuba laahua lu nisadóʼ ti dxi ne ti gueelaʼ» (2 Cor. 11:23-27). Neca zaqué, qué nireebe gana de ñúnibe ni na Jiobá ne bisihuínnibe ni pur ca diidxaʼ ni guniʼbe lu tobi de ca biaje gucaláʼdxicabe ñuuticabe laabe: «Guca ni zacá ti cadi icá lú du zanda ulá du laca laadu sínuque icá lú du Dios si zanda ulá laadu, purti laa dede gueʼtu rusibani. Ne dxandí bilá be laadu de lu ná enda guti que, ne nanna dxichi du zulá ru be laadu» (2 Cor. 1:8-10). Huaxiéʼ si binni huadiʼdiʼ lu guendanagana casi gudiʼdiʼ Pablu. Peru zanda guiénenu ni biʼniʼ sentirbe ne zacané ejemplu stibe laanu para gápanu stipa ora gúninu ni na Dios.
CADI GUDIʼNU LUGAR GUNINÁ XHAATAʼ CA DESGRACIA CA LAANU
8. Xi guendanagana zándaca guidxaagalunu. Bizeeteʼ ti ejemplu.
8 Lu guidxilayú riʼ cayaca stale desgracia ne xcaadxi cosa ni cayuniná binni, ne runi sentircaʼ maʼ qué zanda guni huantarcaʼ. Dede nuu xpinni Cristu runi sentir zacá. Lani, a laa ne xheelaʼ nácacaʼ precursor guidxi Australia, dede biacha ladi ora gunna napa cáncer de mama. Laabe guniʼbe: «Ca tratamientu bidiicabe naa nabé biʼniʼ huará cani naa ne maʼ qué ñapaʼ gana nibaneʼ». Ne ni jma naná nga ca dxi queca biʼniʼ operárcabe deche xheelabe, ne naquiiñeʼ gúʼyabe laa. Xi zanda gúninu pa gueeda guizaacanu xiixa zacá yaʼ.
9, 10. 1) Xi cadi naquiiñeʼ gudiʼnu lugar guni Binidxabaʼ. 2) Xi zanda gacané laanu gudxíʼlunu ca guendanagana gápanu casi na Hechos 14:22.
9 Cadi guiaandaʼ laanu riquiiñeʼ Binidxabaʼ ca guendanagana ca para gusirá fe stinu. Cadi gudiʼnu lugar chuʼnu triste pur laacani. Proverbios 24:10 caguixhená laanu: «Pa qué gapuʼ gana ora nuuluʼ ra nagana la? gastiʼ qué zanda guʼnuʼ». Pa guiníʼ íquenu de ca ejemplu ni maʼ bidúʼyanu ca, zanda gudxíʼlunu ca guendanagana guidxaagalunu.
10 Cadi galán diʼ guiníʼ íquenu qué zazaacanu gastiʼ, sínuque naquiiñeʼ gánnanu ziuu ora zadídinu xiixa guendanagana (2 Tim. 3:12). Hechos 14:22 na: «Naquiiñe tidi nu stale ra nagana ante chuʼ nu ra runi mandar Dios». Peru lugar de guireʼnu gana, naquiiñeʼ gudiicani stipa laanu ne gacaneni guni crenu zacané Dios laanu.
11. Xi naquiiñeʼ gúninu pa qué gápanu gana guniná xhaataʼ ca desgracia ca laanu.
11 Naquiiñeʼ guiníʼ íquenu lu ca cosa galán ni nápanu. Stiidxaʼ Dios na: «Rihuinni ca lú binni ora nayecheʼ nuu ladxidóʼ peru nabé racaná binni ora nuu yuubaʼ ladxidóʼ» (Prov. 15:13). Stale doctor nanna pa guni cré ti binni zanda gacané ti medicina laa la? zacané ni laa. Peru pa ti binni huará guiníʼ ique cayuniná ti medicina laa, jmápeca zaca huará. Pa guicá íquenu guni chaahuinu xiixa ni qué zanda, zareʼnu gana. Peru riéchenu ora gánnanu dxandipeʼ racané Jiobá laanu. Ora ridídinu xiixa desgracia, dxandipeʼ racanebe laanu ne Stiidxabe, ca xpínnibe ne espíritu santu stibe. Zabiguetaʼ ca stipa stinu pa iquiiñenu guionnaʼ cosa ni bizéʼtenu ca. Lugar de guiníʼ íquenu qué zanda gudxíʼlunu ca guendanagana gápanu, guyúbinu xi gúninu para guni chaahuinu cani ne guiníʼ íquenu de ca cosa galán ni nápanu (Prov. 17:22).
12, 13. 1) Xi huayacané caadxi xpinni Dios gusiaandacaʼ ca yuubaʼ bisaanané ca desgracia ca laacaʼ. Bizeeteʼ ti ejemplu. 2) Ora guizaaca ti desgracia, ximodo rusihuínninu gunáʼ nga ni jma risaca para laanu.
12 Ca iza gudiʼdiʼ ca, stale guidxi roʼ gucaná pur caadxi desgracia guca, ca xpinni Cristu ni nabeza raqué maʼ bisihuínnicaʼ pabiáʼ zanda guni huantarcaʼ neca gúcani nagana para laacaʼ. Lu beeu febrero iza 2010 guca ti xu roʼ Chile ne ti tsunami ni binduuxeʼ lidxi stale de ca xpinni Cristu. Stale de laacabe biniti guiráʼ ni napa, ne nuu tu biniti dxiiñaʼ stiʼ. Neca zacá, qué nusaana de ñúnicabe xhiiñaʼ Jiobá. Samuel, tobi de cani biniti lidxi guníʼ: «Neca gudídidu guendanagana que, naa ne xheelaʼ qué ñuu dxi nusaanadu de nucheechedu diidxaʼ ne chuudu ca guendaridagulisaa que. Ngue gucané laadu cadi guicá íquedu cani bizaacadu». Laacabe ne xcaadxi xpinni Cristu qué nusaanacabe de ñúnicabe ni na Jiobá.
13 Lu beeu septiembre iza 2009, biaba dxacha ti nisaguié ne bilaahua casi guidubi guidxi Manila, capital stiʼ Filipinas. Ti hombre ricu ni biniti guiráʼ ni napa guníʼ: «Nisaguié que bininá guiráʼ binni, cásica ricu zaqueca ca pobre; yanna ngueca guendanagana cadídidu». Ni bizaaca riʼ rusietenalaʼdxiʼ ni laanu conseju ni bidii Jesús: «Laguyubi gapa tu ni risaca ibáʼ purti ngue qué zo bandaa laa ne qué zacá tini ne qué ziuu gubaana cuana laa» (Mat. 6:20). Cani ricá ique gapa puru si bidxichi lu xquendanabani la? qué ribeendú ni galán, purtiʼ nagueenda rirá cani. Jma jneza nga guyúbinu modo chuʼnu jma gaxha de Jiobá, purtiʼ guirutiʼ zanda cuee laanu de gaca xhamígunu laabe (biindaʼ Hebreos 13:5, 6).
NÁPANU RAZÓN PARA GÁCANU BINNI NADXIBALÚ
14. Xi razón nápanu para gácanu nadxibalú.
14 Jesús gudxi ca discípulo stiʼ zápacaʼ guendanagana ora laa maʼ cayuni mandar guibáʼ, peru laaca gúdxibe laacaʼ: «Cadi idxibi tu» (Luc. 21:9). Stale razón nápanu para gácanu nadxibalú purtiʼ Rey Jesús ne Jiobá nuuné laanu. Pablu guluu gana Timoteo né ca diidxaʼ riʼ: «Purti bidii Dios laanu Espíritu stiʼ, cadi para guni laanu namuxeʼ, sínuque para udii stipa laanu udxíʼ lú nu, ne acané laanu ganaxhii nu binni, ne cuʼ xpiaani nu» (2 Tim. 1:7).
15. Tuu nga cani biʼniʼ cré zacané Dios laacaʼ, ne ximodo zanda gúninu casi bíʼnicabe.
15 Stale de ca xpinni Dios bisihuínnicaʼ runi crecaʼ zacanebe laacaʼ. Casi David, laa guníʼ: «Jiobá nga stipa stinneʼ ne escudu stinneʼ. Runeʼ cré laabe de guidubi ladxiduáʼ, ne huayacanebe naa, pur nga riuu ladxiduáʼ nayecheʼ» (Sal. 28:7). Pablu guníʼ: «Neca gueeda irá nga luguiá nu, qué zanda di usaba ni laanu, purti nadxii Cristu laanu» (Rom. 8:37). Dxi guyuu Jesús ra naxoo bisihuinni runi cré zacané Dios laa ne ca diidxaʼ riʼ: «Cadi stube nuaaʼ, purti nuu né Bixhoze naa» (Juan 16:32). Pur ca diidxaʼ guníʼcabe riʼ bisihuínnicabe pabiáʼ nápacabe fe Jiobá. Pa gúninu casi bíʼnicabe ca, zácanu nadxibalú ora gudxíʼlunu intiica guendanagana gápanu. Biblia na: «Dios zeeda gaca para laanu casi ti lugar ra zanda guilanu ne laabe nga stipa stinu, zanda gacanebe laanu nagueendaca ora cadídinu lu xiixa guendanagana» (Salmo 46:1).
RACANÉ JIOBÁ LAANU GÁCANU NADXIBALÚ
16. Xiñee nabé risaca guidúʼndanu Stiidxaʼ Dios.
16 Qué racanu nadxibalú pur stipa si stinu, sínuque purtiʼ runibiaʼnu Dios ne nánnanu zacanebe laanu. Para nga naquiiñeʼ guidúʼndanu Biblia guiráʼ dxi. Ti gunaa xpinni Cristu ni napa depresión guníʼ xi racané laa: «Chupa chonna biaje ruundaʼ ca relatu ni jma riguixhedxí ladxiduáʼ». Xi zanda guininu de gueelaʼ ni ribeenu para guni adorarnu Dios né binnilídxinu yaʼ. Ñee cayúninu ni la? Pa zacá ni, zanda guininu casi guníʼ salmista que: «¡Guizáʼ nadxieeʼ ley stiluʼ! Guidubi dxi laani maʼ caníʼ iqueʼ» (Sal. 119:97).
17. 1) Xi zacané laanu qué guicá íquepenu ca guendanagana nápanu. 2) Bizeeteʼ ximodo huayacané tobi de ca historia ni zeeda ndaaniʼ ca revista ca lii.
17 Laaca nápanu stale libru ne revista ni ruquidxi fe ni nápanu Jiobá. Casi ndaaniʼ ca revista ca reeda ti tema ni láʼ, modo bibaneʼ, laani nabé huayacaneni stale de ca xpinni Cristu. Guzéʼtenu ejemplu stiʼ ti gunaa xpinni Cristu de Asia, laa huará de trastorno bipolar, biindabe historia stiʼ sti xpinni Cristu ni gucaʼ misioneru ni napa guendahuará queca, peru biʼniʼ misioneru riʼ stale stipa para cadi gusaana de guni xhiiñaʼ Jiobá, ngue guluu gana laabe.
18. Xiñee naquiiñeʼ guinínenu Jiobá ora tiisi gápanu guendanagana.
18 Sti cosa ni zanda gacané laanu lu intiica guendanagana nga oración. Pablu guníʼ pabiáʼ risaca guni orarnu ora guníʼ ca diidxaʼ riʼ: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa. Ne óraque zaguixhe dxí ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu, purti nuu né tu Cristu Jesús tobi si» (Filip. 4:6, 7). Ñee runi orarnu ora tiica gápanu xiixa guendanagana para gacané Jiobá laanu la? Ti hombrehuiiniʼ ni láʼ Alex de Gran Bretaña, maʼ xadxí de cayuni huantar ti guendahuará láʼ depresión, laa guníʼ: «Ni racané naa stale nga guinieniáʼ Jiobá ne guundaʼ Stiidxabe, casi ñaca ñunadigaʼ ni cayabibe naa».
19. Xiñee nabé risaca nga chuunu ca guendaridagulisaa ca.
19 Sti cosa ni zanda gacané laanu nga ca guendaridagulisaa ca. Sicaríʼ bicaa ti salmista: «De guidubi xhialmaʼ ne guidubi ladxiduáʼ, racaladxeʼ chuaaʼ ndaaniʼ ca patiu stiʼ Jiobá» (Sal. 84:2). Ñee runi sentirnu casi salmista riʼ la? Lani, gunaa ni maca bizéʼtenu que guníʼ ximodo biiyaʼ ca guendaridagulisaa que: «Qué riníʼ iqueʼ pa ziaaʼ cani o pa coʼ. Naa nannaʼ pa gacalaʼdxeʼ gacané Jiobá naa la? napaʼ xidé chaaʼ cani».
20. Xi zabeendunu pa gucheechenu diidxaʼ
20 Pa gucheechenu stiidxaʼ Reinu laaca zacané ni laanu gácanu nadxibalú (1 Tim. 4:16). Ti gunaa xpinni Cristu de Australia ni maʼ gudiʼdiʼ lu gadxé gadxé guendanagana guníʼ: «Ti binnigola biʼniʼ invitar naa chigucheecheniaʼ laa diidxaʼ, neca óraque guníʼ iqueʼ maʼ qué zucheecheʼ diidxaʼ, yeniáʼ laabe. Ne Jiobá gucané naa purtiʼ cada chigucheecheʼ diidxaʼ runeʼ sentir nuaaʼ nayecheʼ» (Prov. 16:20). Stale xpinni Cristu maʼ bidiicaʼ cuenta ora guquídxicaʼ fe stiʼ xcaadxi binni la? laaca riguidxi fe sticaʼ. Ne laaca qué riníʼ íquecabe de ca guendanagana stícabe, sínuque jma ricá íquecabe ca cosa ni jma risaca (Filip. 1:10, 11).
21. Xiñee zanda gudxíʼlunu ca guendanagana ni gápanu.
21 Stale cosa maʼ bidii Jiobá laanu para gudxíʼlunu ca guendanagana gápanu ne guendanadxibalú. Pa iquiiñenu cani, guiníʼ íquenu de ca relatu stiʼ ca xpinni Dios ni bisihuinni guendanadxibalú, ne gúninu modo bíʼnicabe, zanda gudxíʼlunu intiica guendanagana ni gápanu ne ziuʼnu nayecheʼ. Neca gápanu jma guendanagana ra maʼ zidxiña dxi guinitilú guidxilayú malu riʼ, zanda guininu casi guníʼ Pablu: «Neca huayuniná cabe laadu dede ruluíʼ ma qué zanda guiasa du, peru riasa du runi seguir du. [...] Nga runi qué riréʼ du gana» (2 Cor. 4: 9, 16). Ne cumu nuu Jiobá gaxha de laanu la? zanda gudxíʼlunu ca guendanagana gápanu né guendanadxibalú (biindaʼ 2 Corintios 4:17, 18).
[Nota]
a Bidxaa lácabe.
[Guendarinabadiidxaʼ stiʼ párrafo]
[Ca imagen ni zeeda lu yaza 10 ne 11]
Ora guizaacaluʼ xiixa desgracia, biquiiñeʼ cani cudii Jiobá para gacané lii
